Apoclipsis 19 - Mixteco del suroeste de Tlaxiaco Oaxaca

¹ Jee sáá njia̱ꞌa vá, jee kuíre ne̱ antivɨ́ súkún nteso̱ꞌo ni̱ꞌ rá nusuyuꞌú ya̱ káꞌánꞌ kue̱ꞌe̱ꞌ víꞌí ñɨvɨ, jee káchíꞌ ráa: ¡Nákuetúꞌún‑ó Ndiosíꞌ!, chi nátavaꞌ re̱ꞌ ñɨvɨ nu̱u̱nꞌ kua̱chi ráa síkáku re̱ꞌ ráa, jín máá kúñáꞌnú víꞌí kúvi re̱ꞌ, jín ya̱ níso víꞌí re̱ꞌ fesáꞌ ííꞌ ni̱ꞌin.

² Chi na̱a̱ꞌ jiéꞌnéꞌ re̱ꞌ tiñu, jee na̱a̱ꞌ sáꞌá re̱ꞌ maa, chi ñeꞌneꞌ re̱ꞌ tiñu jie̱ꞌe̱ꞌ ñuunꞌ kúñáꞌnú vá, ya̱ kúvi‑i kuéntáꞌ ñaꞌan sɨ̱ɨ̱ꞌ iniꞌ. Chi nstívɨ́ ñuunꞌ vá rá ñɨvɨ ñɨ̱vɨ́ jín rá tiñu téní sáꞌá‑a. Jee saáva nna̱ku̱ꞌva re̱ꞌ tu̱nóꞌó xéénꞌ nu̱u̱nꞌ‑u, jie̱ꞌe̱ꞌ ya̱ ñaꞌniꞌ rá ñɨvɨ ñuunꞌ vá rá musúꞌ re̱ꞌ ya̱ yɨ́tíñú ráa nu̱u̱nꞌ re̱ꞌ, nkachiꞌ rá nusuyuꞌú vá.

³ Jee ya̱ uvíꞌ íchí nkachiꞌ ráa: ¡Na̱ ka̱ꞌ nakuetúꞌún‑ó Ndiosíꞌ! Chi nɨ́ɨ́nkání kaa ñu̱ꞌma̱ꞌ kene‑e ñuunꞌ vá, nkachiꞌ ráa.

⁴ Saájee ni ókóꞌ ku̱mi̱ꞌ (24) rá te̱e ñáꞌnú ya̱ nísotíñú vá, jín ni kúmíꞌ rá tékúꞌ vá, nna̱kui̱ñɨ̱ꞌ ítɨ́ ráa jiáxin ráa maáráa ne̱ nu̱u̱nꞌ ñu̱ꞌún nu̱u̱nꞌ Ndiosíꞌ jee nneñu̱ꞌun ráa Ndiosíꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ. Jee nkachiꞌ ráa: ―¡Amén! ¡Sukuán koo! ¡Na̱ ka̱ꞌ nakuetúꞌún‑ó noꞌó! ―nkachiꞌ ráa.

⁵ Saájee nkene ɨɨn nusuyuꞌú nkaꞌanꞌ‑a ne̱ nu̱u̱nꞌ teyuꞌ nu̱u̱nꞌ nééꞌ re̱ꞌ tátúníꞌ re̱ꞌ yukuán jee nkachiꞌ‑i: Ntáká ránoꞌó ya̱ kúvi rán musúꞌ re̱ꞌ yɨ́tíñú rán nu̱u̱nꞌ re̱ꞌ, jín ntáká ránoꞌó ya̱ ñúyúꞌví iniꞌ rán re̱ꞌ, va̱ni ntáká ránoꞌó ya̱ kúñáꞌnú áxí va̱ni ntu̱ví, ntáká ránoꞌó íyó nakuetúꞌún rán re̱ꞌ, nkachiꞌ‑i.

⁶ Saájee nteso̱ꞌo ni̱ꞌ ya̱ káꞌánꞌ kue̱ꞌe̱ꞌ víꞌí ñɨvɨ, kuéntáꞌ kua̱ꞌ nɨ́ꞌɨn káyu kue̱ꞌe̱ꞌ víꞌí rá ntekáꞌnú, jín kuéntáꞌ kua̱ꞌ kúvi nu̱u̱nꞌ nɨ́ꞌɨn kana tajia, jee káchíꞌ ráa: ¡Na̱ ka̱ꞌ nakuetúꞌún‑ó I̱toꞌoꞌ‑ó!, chi tátúníꞌ I̱toꞌoꞌ‑ó tiñu níso re̱ꞌ, Ndiosíꞌ‑ó ya̱ maáréꞌ ya̱ níso re̱ꞌ fesáꞌ ííꞌ níꞌin ya̱ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó.

⁷ ¡Na̱ ka̱ꞌ kusɨ̱ɨ̱ꞌ iniꞌ‑ó, jee sɨ̱ɨ̱ꞌ kuvi iniꞌ ánímaꞌ‑ó, nakuetúꞌún‑ó re̱ꞌ chi máá kúñáꞌnú kúvi re̱ꞌ! Chi ya̱ nkenta viko tánáꞌá maáréꞌ ya̱ kuvi Lanchi Lúlí, jee nkenta tana̱ꞌá re̱ꞌ. Jee rá ñɨvɨ yɨ́ꞌɨ́ xi̱ntíín Ndiosíꞌ kúvi ráa kuéntáꞌ kúvi ñaꞌan ya̱ ya íyó tu̱ꞌva ña ya̱ tana̱ꞌá ña jín re̱ꞌ.

⁸ Jee njia̱ꞌa Ndiosíꞌ nu̱u̱nꞌ ña ya̱ nakuniji ña máá saꞌma máá ñunkúún íyó ya̱ íyó noo ya̱ jiánu̱te̱ꞌ, nkachiꞌ nusuyuꞌú vá. Jee saꞌma vá kúvi‑i na̱ja kua̱ꞌ jiáꞌnu noo na̱a̱ꞌ rá ñɨvɨ ya̱ nsa̱ꞌá sɨ́ɨ́n Ndiosíꞌ ya̱ kɨꞌɨ ráa nu̱u̱nꞌ re̱ꞌ.

⁹ Saájee nkachiꞌ najiáꞌáꞌ ííꞌ nu̱u̱nꞌ ni̱ꞌ: ―Tee rá tu̱ꞌun yaꞌá: “¡Na̱ ka̱ꞌ netuꞌ ka̱ꞌ ví rá ñɨvɨ ya̱ nkana Ndiosíꞌ ráa ya̱ kɨ̱ꞌɨ̱nꞌ ráa xíní viko tánáꞌá re̱ꞌ ya̱ kúvi re̱ꞌ Lanchi Lúlí Ndiosíꞌ!” ―jee suni nkachiꞌ‑i ka̱ꞌ nu̱u̱nꞌ ni̱ꞌ―. Tu̱ꞌun na̱a̱ꞌ Ndiosíꞌ kúvi tu̱ꞌun vá ―nkachiꞌ najiáꞌáꞌ ííꞌ vá.

¹⁰ Saájee nuꞌuꞌ nna̱kui̱ñɨ̱ꞌ ítɨ́ ni̱ꞌ jiáxin ni̱ꞌ maáníꞌ ne̱ nu̱u̱nꞌ ñu̱ꞌún nu̱u̱nꞌ najiáꞌáꞌ ííꞌ vá sáva kuneñu̱ꞌun ni̱ꞌ maa. Soo nkachiꞌ‑i nu̱u̱nꞌ ni̱ꞌ: ―Koto sáꞌá nú sukuán. Chi suni táꞌán musúꞌ kúvi ni̱ꞌ jín noꞌó jín rá ñanitáꞌán nú, ya̱ yɨ́tíñú‑órán nu̱u̱nꞌ Ndiosíꞌ ya̱ níkɨ́nꞌ kutú váꞌa‑ó tu̱ꞌun jie̱ꞌe̱ꞌ Jesús. Saáva kuneñu̱ꞌun nú máá maá Ndiosíꞌ. Chi rá tu̱ꞌun na̱a̱ꞌ ya̱ nkachitu̱ꞌún Jesús, yukuán kúvi tu̱ꞌun na̱a̱ꞌ ya̱ jiáꞌa Ta̱chi̱ꞌ Ííꞌ nu̱u̱nꞌ rá ñɨvɨ ya̱ káchítu̱ꞌún na̱a̱ꞌ tu̱ꞌun kéne yuꞌú Ndiosíꞌ ―nkachiꞌ najiáꞌáꞌ ííꞌ vá.

Ɨɨn ya̱ yósóꞌ kitɨ kuíjín

¹¹ Saájee niniꞌ ni̱ꞌ ya̱ níne antivɨ́ súkún nu̱u̱nꞌ nééꞌ Ndiosíꞌ. Jee nna̱kune̱ꞌyá ni̱ꞌ jee yukuán nkenta ɨɨn kitɨ kuíjín, jee ɨɨn ya̱ yósóꞌ ya̱ta̱ꞌ ti̱ꞌ vá naní maáréꞌ ya̱ Síkúnkuvi Na̱a̱ꞌ‑a jín Te̱e Na̱a̱ꞌ Ví‑i. Chi na̱a̱ꞌ jiéꞌnéꞌ re̱ꞌ ntáká tiñu, jee na̱a̱ꞌ kántáꞌán re̱ꞌ.

¹² Jee rá titɨ nchinúún re̱ꞌ kúvi‑i kuéntáꞌ yáá itaꞌ ñuꞌunꞌ, jee xi̱ni̱ꞌ re̱ꞌ ñúꞌún kue̱ꞌe̱ꞌ víꞌí rá corona, jee suni níso súví re̱ꞌ maáréꞌ, soo ni ɨɨn ntu̱náꞌ jíníꞌ maa, chi kua̱chi métúꞌún maáréꞌ ví ya̱ jíníꞌ maa.

¹³ Jee ñúꞌún re̱ꞌ ɨɨn saꞌma nñu̱náji ni̱ñɨ̱ꞌ, jee naní re̱ꞌ Tu̱ꞌun Ndiosíꞌ.

¹⁴ Jee níkɨ́nꞌ rá soldado ííꞌ re̱ꞌ íyó antivɨ́ súkún ya̱ta̱ꞌ re̱ꞌ, jee yósóꞌ ráa kitɨ kuíjín, jee ñúꞌún ráa saꞌma kuíjín váꞌa ñunkúún íyó noo.

¹⁵ Jee yuꞌú re̱ꞌ kéne yuchiꞌ espada xe̱e̱nꞌ. Jee jín espada vá xínáánꞌ re̱ꞌ rá ñɨvɨ ntáká nación. Jee xichiꞌ víꞌí tatúníꞌ ni̱ꞌin re̱ꞌ nu̱u̱nꞌ rá ñɨvɨ rá nación jín ɨɨn bastón ka̱a. Jee ku̱ꞌva re̱ꞌ ntántúníꞌ tu̱nóꞌó xéénꞌ kunoꞌo ráa jie̱ꞌe̱ꞌ kítɨ́ꞌ víꞌí iniꞌ Ndiosíꞌ jie̱ꞌe̱ꞌ kua̱chi ráa, kuéntáꞌ kua̱ꞌ sáꞌá te̱e ya̱ jiáñúꞌ‑u uva jee jíꞌni‑i vá. Jee Ndiosíꞌ ví ya̱ níso fesáꞌ ííꞌ ni̱ꞌin ya̱ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó.

¹⁶ Jee saꞌma ñúꞌún ɨɨn rá sɨ̱ꞌɨn tíkóó re̱ꞌ níso súví yaꞌá: “Nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ ráa nu̱u̱nꞌ rá ñuunꞌ jín I̱toꞌoꞌ nu̱u̱nꞌ ntáká i̱toꞌoꞌ.”

¹⁷ Jee niniꞌ ni̱ꞌ ɨɨn najiáꞌáꞌ ííꞌ ya̱ íñɨ́ nichiꞌ‑i ya̱ta̱ꞌ nka̱niiꞌ, jee kua̱yuꞌú‑u nka̱najíín laxín‑i xi̱ni̱ꞌ kua̱íyó rá kitɨ kákini íyó chi̱yo̱ꞌ ya̱ jíkó sava súkún, jee nkachiꞌ‑i: ―Neꞌenꞌ rán, jee nutútú rán nu̱u̱nꞌ sáꞌá Ndiosíꞌ xíní máá káꞌnú,

¹⁸ sáva kajiꞌ rán ku̱ñu rá ñɨvɨ nísotíñú ya̱ tátúníꞌ, jín ku̱ñu rá capitán, jín ku̱ñu rá te̱e tiɨ́kɨ́, jín ku̱ñu rá kitɨ jín rá te̱e ya̱ nyosoꞌ ya̱ta̱ꞌ ti̱ꞌ, jín suni ku̱ñu ntáká rá ñɨvɨ, va̱ni ku̱ñu rá ñɨvɨ íyó núne ya̱ sáꞌá‑a tiñu maáa, va̱ni ku̱ñu rá musúꞌ satíñú saɨn ya̱ nkuya̱ꞌvi ráa, va̱ni ñɨvɨ kúñáꞌnú va̱ni ñɨvɨ ntu kúñáꞌnú ―nkachiꞌ najiáꞌáꞌ ííꞌ vá.

¹⁹ Saájee niniꞌ ni̱ꞌ máá maá kitɨ xéénꞌ kákini vá jín ntáká rá ñɨvɨ nísotíñú tátúníꞌ iniꞌ ñɨ̱vɨ́ jín ntáká rá soldado ráa. Jee nnu̱tútú ráa sáva kantáꞌán ráa jín máá te̱e ya̱ yósóꞌ kitɨ kuíjín vá jín rá soldado ííꞌ re̱ꞌ.

²⁰ Soo maáréꞌ jín rá soldado ííꞌ re̱ꞌ ntɨɨn ráa kitɨ xéénꞌ kákini vá jín suni inka ka̱ꞌ kitɨ xéénꞌ kákini ya̱ kúvi te̱e ya̱ nkachitu̱ꞌún tu̱ꞌun túꞌún ya̱ nkene yuꞌú kitɨ xe̱e̱nꞌ xíꞌnañúꞌún, jín suni nsa̱ꞌá‑a rá seña a̱nasɨ́ ichinúúnꞌ kitɨ xéénꞌ kákini xíꞌnañúꞌún. Jee jín rá seña a̱nasɨ́ nsa̱ꞌá‑a nxi̱náꞌví‑i rá ñɨvɨ ya̱ nni̱ꞌi̱nꞌ ráa seña kitɨ xéénꞌ kákini xíꞌnañúꞌún kuniso ráa jee kúvi ráa ya̱ nneñu̱ꞌun ráa santúꞌ ñunéꞌyúꞌ maátíꞌ. Jee ni núvíꞌ ráa kitɨ xéénꞌ kákini vá, ni tékúꞌ rátíꞌ jee nsi̱kéne maáréꞌ ya̱ yósóꞌ kitɨ kuíjín vá rátíꞌ nu̱u̱nꞌ ñúꞌúnꞌ xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ sufríꞌ.

²¹ Jee rá inka soldado rá kitɨ xe̱e̱nꞌ vá, chi ñaꞌniꞌ te̱e ya̱ yósóꞌ kitɨ kuíjín vá ráa jín yuchiꞌ espada ya̱ kéne yuꞌú re̱ꞌ. Saájee ntáká nu̱u̱nꞌ rá chi̱í nyajiꞌ rátíꞌ nnaꞌaꞌ rátíꞌ ku̱ñu ráa.