Apoclipsis 18 - Mixteco del suroeste de Tlaxiaco Oaxaca

Sáá naanꞌ ñuunꞌ Babilonia

¹ Saájee sáá njia̱ꞌa ntáká yukuán, jee niniꞌ ni̱ꞌ inka ka̱ꞌ najiáꞌáꞌ ííꞌ ya̱ va̱ji kúun ne̱ antivɨ́ súkún. Jee nísotíñú nasɨ́kuitɨꞌ re̱ꞌ, jee túúnꞌ nuva re̱ꞌ ne̱ iniꞌ ñɨ̱vɨ́ sáꞌá ya̱ jiánu̱te̱ꞌ re̱ꞌ.

² Jee ni̱ꞌin nka̱najíín re̱ꞌ jee nkachiꞌ re̱ꞌ: ¡Ya nnaanꞌ! ¡Ya nnaanꞌ!, ñuunꞌ káꞌnú ya̱ kúvi Babilonia ñáꞌnú, jee nkenta kuvi‑i nu̱u̱nꞌ nééꞌ rá kui̱ꞌna̱ꞌ ntu íyó ninuꞌun, jín nu̱u̱nꞌ yɨ́ꞌɨ́ ntáká nu̱u̱nꞌ rá ta̱chi̱ꞌ kákini, jín nu̱u̱nꞌ yɨ́ꞌɨ́ ntáká nu̱u̱nꞌ rá kitɨ kákini íyó chi̱yo̱ꞌ ya̱ ntu íyó ninuꞌun, [jín nu̱u̱nꞌ yɨ́ꞌɨ́ ntáká nu̱u̱nꞌ rá kitɨ kákini] íyó néꞌí.

³ Nnaanꞌ ñuunꞌ vá chi nsi̱kúvi ráa iniꞌ rá ñɨvɨ ntáká nación nxi̱nóo rává Ndiosíꞌ sáva kuneñu̱ꞌun rává inka ka̱ꞌ, kuéntáꞌ njia̱ꞌa ráa nixiꞌ vinúꞌ xe̱e̱nꞌ niꞌi rává jísóꞌ ni̱ñɨ̱ꞌ rává nsa̱ꞌá téní rává jín ñɨvɨ ñuunꞌ vá. Jee rá ñɨvɨ nísotíñú ya̱ tátúníꞌ nu̱u̱nꞌ rá ñuunꞌ íyó ñɨ̱vɨ́, suni sukuán nsa̱ꞌá néꞌí ráa jín ñɨvɨ ñuunꞌ vá. Jee rá ñɨvɨ xíkó jee nku̱kúká ráa jín rá kue̱ꞌe̱ꞌ nantíñú yɨ́yáꞌvi nkeꞌen ñuunꞌ vá, nkachiꞌ najiáꞌáꞌ ííꞌ vá.

⁴ Saájee nteso̱ꞌo ni̱ꞌ inka ka̱ꞌ nusuyuꞌú ya̱ káꞌánꞌ‑a ne̱ súkún, jee nkachiꞌ‑i: Ránoꞌó ñɨvɨ ni̱ꞌ, kene rán nu̱u̱nꞌ ñuunꞌ i̱ña̱ꞌ, sáva ntu jíꞌín rán nkaa saꞌá rá kua̱chi sáꞌá ráa, jee sáva ntu jíꞌín rán nkaa kunoꞌo rán rá tu̱nóꞌó kunoꞌo ráa.

⁵ Chi nkaa víꞌí kua̱chi sáꞌá ráa nku̱súkún‑u nkenta‑a ne̱ nu̱u̱nꞌ antivɨ́ súkún, jee nna̱ku̱ꞌun iniꞌ Ndiosíꞌ rá tiñu níváꞌa sáꞌá ráa.

⁶ Nachunáán rán nu̱u̱nꞌ ñuunꞌ vá sánikua̱ꞌ nsa̱ꞌá‑a nu̱u̱nꞌ rá inka ñɨvɨ, jee u̱vi̱ꞌ íchí ka̱ꞌ naxinóꞌo rán maa nu̱u̱nꞌ ya̱ niva̱ꞌa nsa̱ꞌá‑a, jee kuéntáꞌ nsa̱ka̱nuun xá ñuunꞌ vá tu̱nóꞌó njia̱ꞌa‑a nu̱u̱nꞌ inka ñɨvɨ, jee u̱vi̱ꞌ íchí ka̱ꞌ naku̱ꞌva rán maa nu̱u̱nꞌ ñuunꞌ vá.

⁷ Jee sánikua̱ꞌ kútéyɨ́ɨ́ víꞌí‑i ya̱ kúká víꞌí jiáꞌnu‑u jín nɨꞌɨ ya̱ kúmí‑i, jee sánikua̱ꞌ kútéyɨ́ɨ́‑ɨ sukuán suni sukuán naxinóꞌo rán maa ne̱ koo tu̱nkuéká iniꞌ‑i. Chi jiáni iniꞌ ánímaꞌ‑a, jee káchíꞌ‑i: “Nééꞌ ni̱ꞌ tátúníꞌ ni̱ꞌ kúvi ni̱ꞌ ɨɨn reina, jee ntu nóꞌo ni̱ꞌ kuéntáꞌ ɨɨn ñaꞌan náꞌví, jee ni nsáꞌ kunoꞌo ni̱ꞌ tu̱nkuéká iniꞌ”, káchíꞌ‑i.

⁸ Jee saáva sa̱naanꞌ ni métúꞌún ki̱vɨ̱ꞌ kiji tu̱nóꞌó xéénꞌ kunoꞌo‑o, chi koo ni̱yɨ, jín tu̱nkuéká iniꞌ, jín ta̱ma̱ꞌ, jee ka̱yu̱ꞌ‑u jín ñuꞌunꞌ. Chi máá kúñáꞌnú víꞌí ka̱ꞌ máá I̱toꞌoꞌ‑ó Ndiosíꞌ jín fuersáꞌ ííꞌ níso re̱ꞌ, ya̱ maáréꞌ vá keꞌneꞌ re̱ꞌ kua̱chi ñuunꞌ vá.

⁹ Jee rá ñɨvɨ nísotíñú ya̱ tátúníꞌ rá ñuunꞌ ñɨ̱vɨ́ ya̱ kuéntáꞌ nkusi̱kɨ́ iniꞌ ráa nu̱ne̱ꞌén ráa jín‑i, jín ya̱ kúká víꞌí ñaꞌnu ráa jín‑i, jee kunaꞌyuꞌ víꞌí ráa nukuíꞌyáꞌ iniꞌ ráa jie̱ꞌe̱ꞌ‑e sáá kuniꞌ ráa ñu̱ꞌma̱ꞌ ya̱ ka̱yu̱ꞌ‑u.

¹⁰ Jee kuiñɨ íká ráa chi kuyu̱ꞌví ráa rá tu̱nóꞌó kunoꞌo víꞌí rá ñɨvɨ ñuunꞌ vá, jee kachiꞌ ráa: ¡Na̱ ka̱ꞌ náꞌví náꞌví ka̱ꞌ ñuunꞌ káꞌnú!, ya̱ kúvi Babilonia ya̱ nkuvi ñuunꞌ ya̱ níyo nasɨ́kuitɨꞌ fesáꞌ nékúvi, chi métúꞌún hora ni nkenta kuna̱a̱ꞌ kua̱chi nú.

¹¹ Jee rá ñɨvɨ ñɨ̱vɨ́ ya̱ jiáꞌánꞌ ráa xíkó ráa, jee kunaꞌyuꞌ ráa jee koo tu̱nkuéká iniꞌ ráa jie̱ꞌe̱ꞌ‑e, chi ntu íyó ka̱ꞌ ne̱ ɨɨn keꞌen rá nantíñú ráa.

¹² Jee kue̱ꞌe̱túníꞌ rá nantíñú yɨ́yáꞌvi víꞌí vá ví oro, plata, jín yu̱u̱ꞌ xiñúꞌ máá viiꞌ yɨ́yáꞌvi, jín perla, jín saꞌma yɨ́yáꞌvi ya̱ kúvi saꞌma váꞌa ñunkúún, jín saꞌma líꞌí, jín saꞌma seda jín saꞌma kuéꞌé, jín suni ntáká nu̱u̱nꞌ yutun ya̱ jiáꞌánꞌ vi̱xi̱ꞌ, jín ntáká nu̱u̱nꞌ rá nantíñú nsa̱ꞌá jín nu̱ꞌun karañúꞌ elefante, jín ntáká nu̱u̱nꞌ rá nantíñú nsa̱ꞌá jín yutun yɨ́yáꞌvi, jín ka̱a kuáán naní bronce, jín hierro jín yu̱u̱ꞌ kuijín máá viiꞌ,

¹³ jín canela, jín especia ya̱ sáꞌá nu̱ꞌú neyu, jín su̱jie ííꞌ, jín su̱jie u̱va̱ꞌ jiáꞌánꞌ vi̱xi̱ꞌ naní mirra, jín aceite jiáꞌánꞌ vi̱xi̱ꞌ, jín nixiꞌ vinúꞌ uva, jín aceite, jín yuchi trigúꞌ, jín nikɨn trigúꞌ, jín rá xi̱ni̱kɨ̱ꞌ, jín rá lanchi, jín rá kitɨ, jín rá karretáꞌ, jín rá musúꞌ ya̱ sátíñú saɨn ya̱ nkuya̱ꞌvi.

¹⁴ Ya̱ vixíꞌ kéne nu̱u̱nꞌ ñu̱ꞌún ya̱ ñúkúvi iniꞌ nú nkuiyo nu̱u̱nꞌ noꞌó, jee kua̱íyó rá nantíñú yɨ́yáꞌvi nú jín rá nantíñú máá viiꞌ xiñúꞌ nú, nsu̱kuíta nú rá nantíñú vá. Jee ni nsáꞌ naniꞌinꞌ nú ka̱ꞌ ráa.

¹⁵ Saájee rá ñɨvɨ ya̱ xíkó rá nantíñú nu̱u̱nꞌ ñuunꞌ vá, jee nku̱kúká ráa nsa̱ꞌá ñuunꞌ vá, jee kuiñɨ íká ráa ya̱ kuyu̱ꞌví ráa jie̱ꞌe̱ꞌ tu̱nóꞌó nóꞌo ñuunꞌ vá, jee kunaꞌyuꞌ ráa jee koo tu̱nkuéká iniꞌ ráa.

¹⁶ Jee kachiꞌ ráa: ¡Na̱ ka̱ꞌ náꞌví náꞌví ka̱ꞌ ñuunꞌ káꞌnú!, chi nkuvi nú kuéntáꞌ ɨɨn ñaꞌan ya̱ nñu̱ꞌun ña saꞌma máá váꞌa máá ñunkúún víꞌí, jín saꞌma líꞌí jín ya̱ kuéꞌé ya̱ yɨ́yáꞌvi, jín nsi̱kútú ña maáña jín oro, jín yu̱u̱ꞌ xiñúꞌ máá viiꞌ yɨ́yáꞌvi jín perla.

¹⁷ Soo vitan jee métúꞌún hora jee nnaanꞌ nɨꞌɨ kua̱íyó nantíñú váꞌa yɨ́yáꞌvi vá. Jee suni sukuán kachiꞌ ntáká rá te̱e ya̱ síkáka barkúꞌ, jín rá ñɨvɨ kua̱ꞌa̱nꞌ ñuꞌun iniꞌ barkúꞌ, jín rá te̱e sátíñú ya̱ nékuéntáꞌ ráa barkúꞌ, jín rá te̱e sátíñú nu̱u̱nꞌ nteñúꞌún, jee kikuiñɨ íká ráa.

¹⁸ Jee sáá néꞌyá ráa ya̱ kéne ñu̱ꞌma̱ꞌ ya̱ káyúꞌ ñuunꞌ vá, jee kanajíín ráa, jee kachiꞌ ráa: “¿Né ɨɨn ñuunꞌ vá kúñáꞌnú kuéntáꞌ ñuunꞌ yaꞌá rúja? ¡Ni ntu̱ví!”, kachiꞌ ráa.

¹⁹ Jee nyosoꞌ ráa ti̱ka̱cha̱a̱ꞌ ñuꞌun xi̱ni̱ꞌ ráa, jee kánajíín ráa náꞌyúꞌ ráa ya̱ íyó tu̱nkuéká iniꞌ ráa, jee káchíꞌ ráa: ¡Na̱ ka̱ꞌ náꞌví náꞌví ka̱ꞌ ñuunꞌ kúñáꞌnú yaꞌá!, ya̱ rá nantíñú yɨ́yáꞌvi íyó ñuunꞌ vá nsa̱ꞌá‑a nku̱kúká ntáká rá ñɨvɨ xí rá barkúꞌ ya̱ jíka nu̱u̱nꞌ nteñúꞌún, jee métúꞌún hora nnaanꞌ ñuunꞌ vá, nkachiꞌ ráa.

²⁰ Jee nkachiꞌ nusuyuꞌú vá ya̱ káꞌánꞌ‑a ne̱ súkún: Soo kusɨ̱ɨ̱ꞌ iniꞌ ránoꞌó ya̱ nééꞌ antivɨ́ súkún jín ránoꞌó ya̱ níso rán tiñu apóstol nchu̱ichí Cristo, jín ránoꞌó ya̱ nákani rán tu̱ꞌun kéne yuꞌú Ndiosíꞌ, jín ránoꞌó ya̱ kúvi rán rá inka ñɨvɨ ya̱ suni nsa̱ꞌá sɨ́ɨ́n re̱ꞌ kɨꞌɨ rán nu̱u̱nꞌ re̱ꞌ. Kusɨ̱ɨ̱ꞌ iniꞌ rán chi nsa̱náaꞌ Ndiosíꞌ si̱kɨ̱ꞌ ñuunꞌ vá jie̱ꞌe̱ꞌ nsa̱ꞌá kini ráa si̱kɨ̱ꞌ rán, nkachiꞌ nusuyuꞌú vá.

²¹ Saájee ɨɨn najiáꞌáꞌ ííꞌ ya̱ níso nasɨ́kuitɨꞌ re̱ꞌ fesáꞌ ííꞌ nna̱neꞌen‑e ɨɨn yu̱u̱ꞌ mánasɨ́ ya̱ íyó kuéntáꞌ yu̱u̱ꞌ yo̱sóꞌ molínúꞌ, jee nsi̱kéne‑e vá nu̱u̱nꞌ nteñúꞌún, jee nkachiꞌ‑i: Suni suꞌva xe̱e̱nꞌ kinaanꞌ ñuunꞌ Babilonia, ya̱ kúvi ñuunꞌ kúñáꞌnú ka̱ꞌ. Jee ni nsáꞌ kuniꞌ‑ó ka̱ꞌ maa.

²² Ni nsáꞌ teso̱ꞌo‑ó ka̱ꞌ yaaꞌ arpa ya̱ tée rá ñɨvɨ iniꞌ nú Babilonia, ni ta̱chi̱yuꞌú rá ñɨvɨ jíta ráa yaaꞌ, ni yaaꞌ xi̱kiꞌli tée rá ñɨvɨ, ni yaaꞌ trompeta tívɨ́ꞌ ráa. Jee suni ni nkóo iniꞌ nú ni ɨɨn ka̱ꞌ ñɨvɨ jíníꞌ saꞌá na̱ni tiñu. Jee nsáꞌ tu̱vi nanɨꞌɨn ta̱chi̱ꞌ molínúꞌ iniꞌ nú.

²³ Jee ni nsáꞌ kujianu̱te̱ꞌ ka̱ꞌ ɨɨn nuva ñuꞌunꞌ kantil nu̱u̱nꞌ nú, jee nu̱u̱nꞌ nú ni nsáꞌ teso̱ꞌo ka̱ꞌ ta̱chi̱yuꞌú ya̱ káꞌánꞌ te̱e tánáꞌá ni ñaꞌan tánáꞌá, kɨ̱naanꞌ ñuunꞌ nú chi ñɨvɨ kúñáꞌnú iniꞌ ñɨ̱vɨ́ yaꞌá nkuvi rá ñɨvɨ nú ya̱ nxi̱kó ráa nantíñú ráa, chi jín tiñu tásɨ́ sáꞌá rá ñɨvɨ nú nxi̱náꞌví nú rá ñɨvɨ ntáká nación.

²⁴ Chi níso rá ñɨvɨ ñuunꞌ nú kua̱chi ni̱yɨ si̱kɨ̱ꞌ ráa, jie̱ꞌe̱ꞌ ñaꞌniꞌ ráa rá ñɨvɨ ya̱ nna̱kani ráa tu̱ꞌun nkene yuꞌú Ndiosíꞌ, jín rá ñɨvɨ ya̱ nsa̱ꞌá sɨ́ɨ́n re̱ꞌ kɨꞌɨ ráa nu̱u̱nꞌ re̱ꞌ, jín ntáká ka̱ꞌ rá ñɨvɨ ya̱ ñaꞌniꞌ ráa né ni ví nkuvi iniꞌ ñɨ̱vɨ́, nkachiꞌ najiáꞌáꞌ ííꞌ vá.