Apoclipsis 14 - Mixteco del suroeste de Tlaxiaco Oaxaca

Yaaꞌ ííꞌ ya̱ jíta sientúꞌ u̱vi̱xiko ku̱mi̱ꞌ mil (144,000) ñɨvɨ

¹ Saájee nuꞌuꞌ, Juan, nna̱kune̱ꞌyá ni̱ꞌ jee niniꞌ ni̱ꞌ maáréꞌ ya̱ kúvi re̱ꞌ Lanchi Ndiosíꞌ íñɨ́ re̱ꞌ xi̱ni̱ꞌ yuku naní Sión. Jee yukuán íñɨ́ re̱ꞌ jín sientúꞌ u̱vi̱xiko ku̱mi̱ꞌ mil (144,000) ñɨvɨ, jee níso súví re̱ꞌ jín súví Tátáꞌ re̱ꞌ te̱e̱nꞌ ráa.

² Jee ne̱ súkún nteso̱ꞌo ni̱ꞌ ɨɨn nusuyuꞌú kuéntáꞌ kua̱ꞌ nɨ́ꞌɨn káyu kue̱ꞌe̱ꞌ víꞌí rá ntekáꞌnú, jín kuéntáꞌ kua̱ꞌ kúvi nu̱u̱nꞌ nɨ́ꞌɨn kani tajia. Jee nusuyuꞌú ya̱ nteso̱ꞌo ni̱ꞌ kúvi kuéntáꞌ kue̱ꞌe̱ꞌ víꞌí rá ñɨvɨ vá tée ráa arpa sáꞌá ráa yaaꞌ.

³ Jee jíta ráa ɨɨn yaaꞌ jiáá ichinúúnꞌ teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ, jín nu̱u̱nꞌ ni kúmíꞌ rá tékúꞌ, jín nu̱u̱nꞌ ni ókóꞌ ku̱mi̱ꞌ (24) rá te̱e ñáꞌnú nísotíñú. Jee ni ɨɨn ntu kúvi kutu̱ꞌva yaaꞌ vá, chisaꞌ kútúꞌva kua̱chi rá sientúꞌ u̱vi̱xiko ku̱mi̱ꞌ mil (144,000) ñɨvɨ maa, ya̱ nna̱chuya̱ꞌvi Lanchi Lúlí vá ráa ne̱ nu̱u̱nꞌ rá ñɨvɨ ñɨ̱vɨ́ sáva nuvi ráa ñɨvɨ re̱ꞌ.

⁴ Jee suviráa kúvi ñɨvɨ ya̱ ntu nkúkuáchi ráa jín ñaꞌan, chi íyó noo ninuꞌun ánímaꞌ ráa. Jee suviráa ví ya̱ níkɨ́nꞌ ráa maáréꞌ ya̱ kúvi re̱ꞌ Lanchi Lúlí Ndiosíꞌ né ni ví nkuvi nu̱u̱nꞌ kuáꞌánꞌ re̱ꞌ. Jee suviráa kúvi ñɨvɨ ya̱ nna̱chuya̱ꞌvi Lanchi Lúlí vá ráa ne̱ nu̱u̱nꞌ rá ñɨvɨ ñɨ̱vɨ́ sáva nuvi ráa ñɨvɨ re̱ꞌ. Jee nso̱ko̱ꞌ ráa maáráa nu̱u̱nꞌ Ndiosíꞌ, jín nu̱u̱nꞌ maáréꞌ ya̱ kúvi Lanchi Lúlí vá kuéntáꞌ kúvi ráa parte xíꞌnañúꞌún tataꞌ sáꞌá jee va̱ji kue̱ꞌe̱ꞌ ka̱ꞌ.

⁵ Jee ni ntu nkaꞌanꞌ kuitɨꞌ ráa tu̱ntúꞌún, chi kúvi ráa ñɨvɨ na̱a̱ꞌ ya̱ íyó noo ánímaꞌ ráa ya̱ ntu kúvi chikua̱chi ñɨvɨ ráa [sáá íñɨ́ ráa ichinúúnꞌ nu̱u̱nꞌ tátúníꞌ Ndiosíꞌ].

Tu̱ꞌun ya̱ káchíꞌ ni uníꞌ rá najiáꞌáꞌ ííꞌ

⁶ Saájee niniꞌ ni̱ꞌ inka ka̱ꞌ najiáꞌáꞌ ííꞌ Ndiosíꞌ náva‑a kua̱ꞌa̱nꞌ‑a jíkó‑o sava súkún. Jee va̱ji‑i jín tu̱ꞌun váꞌa Ndiosíꞌ stekútu̱ꞌún‑u vá nu̱u̱nꞌ rá ñɨvɨ nééꞌ ñɨ̱vɨ́, nu̱u̱nꞌ ntáká nu̱u̱nꞌ rá ñɨvɨ, jín nu̱u̱nꞌ ñɨvɨ ntáká tataꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín nu̱u̱nꞌ ntáká ñuunꞌ.

⁷ Jee ne̱ kánajíín ni̱ꞌin‑i tátúníꞌ‑i káchíꞌ‑i: ―Kuꞌun yúꞌví iniꞌ rán Ndiosíꞌ, jee nakuetúꞌún ya̱ kúñáꞌnú re̱ꞌ, chi ya̱ nkenta hora saꞌá náaꞌ re̱ꞌ jie̱ꞌe̱ꞌ kua̱chi nsa̱ꞌá rá ñɨvɨ. Jee kuneñu̱ꞌun rán re̱ꞌ ya̱ maáréꞌ ví ya̱ nsa̱ꞌá re̱ꞌ súkún, jín nu̱u̱nꞌ ñuꞌun, jín nteñúꞌún, jín ntáká nu̱u̱nꞌ kene nute ―káchíꞌ najiáꞌáꞌ ííꞌ vá.

⁸ Saájee inka ka̱ꞌ najiáꞌáꞌ ííꞌ ya̱ uvíꞌ, níkɨ́nꞌ maa, káchíꞌ‑i: ―¡Ya nnaanꞌ! ¡Ya nnaanꞌ!, ñuunꞌ káꞌnú ya̱ kúvi Babilonia ñáꞌnú, chi nxi̱tá ráa rá ñɨvɨ ntáká nación xinóo rává Ndiosíꞌ jee kuneñu̱ꞌun rává inka ka̱ꞌ, kuéntáꞌ jísóꞌ ni̱ñɨ̱ꞌ ráa nsa̱ꞌá téní ráa nsi̱jíta ráa xi̱ni̱ꞌ rá ñɨvɨ ntáká nación, kuéntáꞌ njia̱ꞌa ráa nixiꞌ vinúꞌ niꞌi rává ne̱ ni̱ni rává ―nkachiꞌ‑i.

⁹ Saájee tuku inka ka̱ꞌ najiáꞌáꞌ ííꞌ ya̱ uníꞌ, jee nusuyuꞌú‑u laxín káchíꞌ‑i: ―Retú néni ɨɨn ya̱ néñu̱ꞌun‑u kitɨ xéénꞌ kákini vá, jín santúꞌ ñunéꞌyúꞌ máá maátíꞌ, jín retú ni̱ꞌi̱nꞌ‑i kuniso‑o seña ti̱ꞌ te̱e̱nꞌ‑e, áxí naꞌá‑a,

¹⁰ saájee ne̱ jíꞌín‑i kunoꞌo‑o tu̱nóꞌó xéénꞌ ya̱ kiji saꞌá Ndiosíꞌ chi kítɨ́ꞌ víꞌí iniꞌ re̱ꞌ, chi nsa̱ꞌá túꞌva re̱ꞌ ninuꞌun tu̱nóꞌó xinóꞌo re̱ꞌ ráa, ya̱ kúvi kuéntáꞌ copa nixiꞌ xe̱e̱nꞌ ku̱ꞌva re̱ꞌ nu̱u̱nꞌ ráa koꞌo ráa. Chi ka̱yu̱ꞌ ráa nu̱u̱nꞌ ñúꞌúnꞌ jín sufríꞌ, ichinúúnꞌ rá najiáꞌáꞌ ííꞌ Ndiosíꞌ jín maáréꞌ ya̱ kúvi re̱ꞌ Lanchi Lúlí vá.

¹¹ Jee ñu̱ꞌma̱ꞌ ya̱ káyúꞌ ráa yukuán kɨ̱nkaa‑a nɨ́ɨ́nkání kuitɨꞌ. Jee ni nsáꞌ koo tu̱najia̱ví ráa nuví niñuꞌ nu̱u̱nꞌ tu̱nóꞌó kunoꞌo ráa, jie̱ꞌe̱ꞌ ya̱ néñu̱ꞌun ráa kitɨ xéénꞌ kákini vá, jín santúꞌ ñunéꞌyúꞌ máá maátíꞌ, jín retú néni ɨɨn ni̱ꞌi̱nꞌ‑i kuniso‑o seña súví ti̱ꞌ.

¹² Jee saáva rá ñɨvɨ ya̱ nsa̱ꞌá sɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ, íyó káꞌnú koo iniꞌ ráa jee kuni̱ꞌin ráa nu̱u̱nꞌ re̱ꞌ, ya̱ maáráa ví ya̱ sikúnkuvi ráa tu̱ꞌun nta̱túníꞌ re̱ꞌ, jee íñɨ́ níꞌin ráa kúneí iniꞌ ráa Jesús ―káchíꞌ najiáꞌáꞌ ííꞌ uníꞌ vá.

¹³ Jee nteso̱ꞌo ni̱ꞌ ɨɨn ta̱chi̱yuꞌú ne̱ súkún, jee káchíꞌ‑i: ―Tee tu̱ꞌun ya̱ kachiꞌ ni̱ꞌ nu̱u̱nꞌ nú: “Na̱ ka̱ꞌ netuꞌ ka̱ꞌ kuvi rá ñɨvɨ níꞌiꞌ ya̱ yɨ́ꞌɨ́ ráa nu̱u̱nꞌ I̱toꞌoꞌ‑ó, ya̱ jíꞌíꞌ ráa ne̱ vitan jín ntáká tiempúꞌ ichinúúnꞌ.” ―Va̱tu̱ꞌ nijia ―káchíꞌ Ta̱chi̱ꞌ Ííꞌ Ndiosíꞌ― chi najia̱ví ráa ya̱ níkó néí ráa nsa̱tíñú ráa nu̱u̱nꞌ re̱ꞌ. Jee rá tiñu váꞌa ya̱ nsa̱ꞌá ráa, chi íyó ráa jín‑i jee sáꞌá‑a ya̱ kuvi ya̱ váꞌa ráa nɨ́ɨ́nkání ―káchíꞌ‑i.

Nástútú Ndiosíꞌ rá ñɨvɨ ñɨ̱vɨ́ ya̱ kúvi ráa kuéntáꞌ tataꞌ sáꞌá

¹⁴ Saájee nna̱kune̱ꞌyá ni̱ꞌ jee niniꞌ ni̱ꞌ ɨɨn vi̱ko̱ꞌ kuíjín, jee nu̱u̱nꞌ vi̱ko̱ꞌ vá nééꞌ ɨɨn ya̱ túvi kuéntáꞌ ɨɨn ya̱ nkenta re̱ꞌ kúvi re̱ꞌ te̱e ya̱ nta̱jí Ndiosíꞌ maáréꞌ nu̱u̱nꞌ ñɨ̱vɨ́ sáva kuvi re̱ꞌ Se̱ꞌya Ñɨvɨ. Jee ñúꞌún ɨɨn corona oro xi̱ni̱ꞌ re̱ꞌ, jee ínaꞌá re̱ꞌ ɨɨn yuchiꞌ xe̱e̱nꞌ kanchúꞌ naní hoz.

¹⁵ Saájee nkene inka ka̱ꞌ najiáꞌáꞌ ííꞌ Ndiosíꞌ iniꞌ veñu̱ꞌun káꞌnú Ndiosíꞌ íyó antivɨ́ súkún, jee kánajíín ni̱ꞌin‑i jín nusuyuꞌú‑u laxín káchíꞌ‑i nu̱u̱nꞌ maáréꞌ ya̱ nééꞌ nu̱u̱nꞌ vi̱ko̱ꞌ vá: ―Siáꞌa nú hoz nú, jee nakeꞌen nú tataꞌ sáꞌá, chi ya̱ nkenta hora ya̱ nastútú nú rá ñɨvɨ ñɨ̱vɨ́, chi íyó tiempúꞌ kuéntáꞌ kua̱ꞌ nijia tataꞌ.

¹⁶ Saájee maáréꞌ ya̱ nééꞌ re̱ꞌ nu̱u̱nꞌ vi̱ko̱ꞌ vá nsi̱áꞌa re̱ꞌ hoz re̱ꞌ nu̱u̱nꞌ ñu̱ꞌún iniꞌ ñɨ̱vɨ́ jee nastútú re̱ꞌ tataꞌ, ya̱ suvi kúvi rá ñɨvɨ ñɨ̱vɨ́.

¹⁷ Saájee iniꞌ veñu̱ꞌun káꞌnú íyó antivɨ́ súkún, yukuán nkene inka ka̱ꞌ najiáꞌáꞌ ííꞌ, jee suni ínaꞌá‑a ɨɨn hoz xe̱e̱nꞌ.

¹⁸ Jee nu̱u̱nꞌ altar vá nkene inka ka̱ꞌ najiáꞌáꞌ ííꞌ, jee nísotíñú‑u nu̱u̱nꞌ ñuꞌunꞌ ya̱ káyúꞌ nu̱u̱nꞌ altar. Jee nka̱najíín ni̱ꞌin‑i nu̱u̱nꞌ najiáꞌáꞌ ííꞌ ya̱ ínaꞌá hoz xe̱e̱nꞌ vá, jee nkachiꞌ‑i: ―Siáꞌa hoz xe̱e̱nꞌ nú nteñu rá ya̱ꞌlu̱ꞌ nokoꞌ uva sáva keꞌneꞌ nú rá nokoꞌ, ya̱ suvi kuvi rá ñɨvɨ ntu yɨ́ꞌɨ́ ráa nu̱u̱nꞌ Ndiosíꞌ jee nastútú nú ráa chi ya̱ ni̱chi‑i ―nkachiꞌ‑i.

¹⁹ Saájee nsi̱áꞌa najiáꞌáꞌ ííꞌ vá hoz ínaꞌá‑a ne̱ nu̱u̱nꞌ ñu̱ꞌún, jee ñeꞌneꞌ‑e nna̱stútú‑u rává ntaanꞌ‑a nu̱u̱nꞌ kunoꞌo rává tu̱nóꞌó xinóꞌo Ndiosíꞌ chi kítɨ́ꞌ iniꞌ re̱ꞌ néꞌyá re̱ꞌ ráa, yukuán kúvi kuéntáꞌ nu̱u̱nꞌ nútútú uva jee jíꞌni maa.

²⁰ Jee ne̱ yuñúúnꞌ xinóꞌo re̱ꞌ rá ñɨvɨ vá, jee katɨ ni̱ñɨ̱ꞌ ráa kaka‑a kɨ̱ꞌɨ̱nꞌ‑ɨ, kuéntáꞌ kua̱ꞌ jíka nu̱xi uva sáá jíꞌni maa jee kéne nu̱xi yukuán. Jee ni̱ñɨ̱ꞌ ráa vá kaa kenta‑a ne̱ nu̱u̱nꞌ nééꞌ yoꞌo ñúꞌún yuꞌú kitɨ, jee kaka ni̱ñɨ̱ꞌ vá ne̱ u̱ni̱ꞌ sientúꞌ (300) kilómetro.