3 Juan 1 - Mixteco del suroeste de Tlaxiaco Oaxaca

Tu̱ꞌun ya̱ káꞌánꞌ va̱ꞌa jie̱ꞌe̱ꞌ te̱e naní Gayo

¹ Nuꞌuꞌ, ya̱ kúvi ni̱ꞌ te̱e ñáꞌnú nu̱u̱nꞌ rá ñɨvɨ kúneí iniꞌ Jesús, tée ni̱ꞌ tutuꞌ yaꞌá nu̱u̱nꞌ noꞌó, Gayo, ya̱ ma̱ni̱ꞌ jín ni̱ꞌ, ya̱ ñúnúunꞌ nijia ni̱ꞌ.

² Noꞌó, ya̱ ñúnúunꞌ ni̱ꞌ, jíkánꞌ táꞌvíꞌ ni̱ꞌ nu̱u̱nꞌ Ndiosíꞌ ya̱ va̱ꞌa kɨ̱ꞌɨ̱nꞌ jín nú nta̱ká nu̱u̱nꞌ tiñu ya̱ sáꞌá nú, jín ya̱ koo va̱ꞌa nú nkúkuꞌviꞌ nú, kuéntáꞌ kua̱ꞌa̱nꞌ va̱ꞌa jín ánímaꞌ nú chi jiáꞌnu nú ichi na̱a̱ꞌ nu̱u̱nꞌ Ndiosíꞌ.

³ Chi nnusɨ̱ɨ̱ꞌ víꞌí iniꞌ ni̱ꞌ sáá nkiji sava rá ñanitáꞌán‑ó, jee ntaji ráa tu̱ꞌun na̱a̱ꞌ nu̱u̱nꞌ ni̱ꞌ ya̱ síkúnkuvi na̱a̱ꞌ nú tu̱ꞌun na̱a̱ꞌ, chi jíka nú jín tu̱ꞌun na̱a̱ꞌ Jesús.

⁴ Ntu̱ví ka̱ꞌ ná inka jie̱ꞌe̱ꞌ kusɨ̱ɨ̱ꞌ ka̱ꞌ iniꞌ ni̱ꞌ nsú káꞌ ya̱ tésóꞌo ni̱ꞌ ya̱ rá ñɨvɨ, ya̱ kúvi kuéntáꞌ se̱ꞌya ni̱ꞌ, jíka ráa jín tu̱ꞌun na̱a̱ꞌ.

⁵ Noꞌó ya̱ ñúnúunꞌ ni̱ꞌ, na̱a̱ꞌ sáꞌá nú nu̱u̱nꞌ Ndiosíꞌ sáá chíneí chítuvi nú rá ñanitáꞌán‑ó ya̱ yɨ́ꞌɨ́ ichi Jesús, sú ntu jíníꞌ nú ráa.

⁶ Suviráa vá njia̱ꞌa tu̱ꞌun na̱a̱ꞌ jie̱ꞌe̱ꞌ nú nu̱u̱nꞌ rá ñɨvɨ ya̱ ínúꞌ iniꞌ ráa Jesús, ya̱ kútútú yaꞌá, jee nkachiꞌ ráa ya̱ ñúnúunꞌ nú ráa. Jee va̱ꞌa saꞌá nú nu̱u̱nꞌ chineí nú ráa jie̱ꞌe̱ꞌ ya̱ jíniñúꞌún ráa, sáva kɨ̱ꞌɨ̱nꞌ ráa nu̱u̱nꞌ kɨ̱ꞌɨ̱nꞌ ráa, sánikua̱ꞌ kuíni Ndiosíꞌ.

⁷ Chi nkene ráa jíka ráa sáva saꞌá ráa tiñu Cristo, jee ni ntu̱náꞌ tɨ́ɨn ráa rénákúvi ya̱ chíneí rá ñɨvɨ ya̱ ntu kúneí iniꞌ Jesús.

⁸ Saáva suvió íyó chineí‑ó koto‑ó rá ñɨvɨ sáꞌá suꞌva, sáva kenta‑ó kuvi‑ó ñɨvɨ táꞌán sátíñú‑ó jín ráa ya̱ síkúténuun ráa tu̱ꞌun na̱a̱ꞌ Jesús.

Tu̱ꞌun ya̱ niváꞌa jiáꞌnu Diótrefes

⁹ Ntee ni̱ꞌ tutuꞌ nu̱u̱nꞌ rá ñɨvɨ kúneí iniꞌ ráa Jesús ya̱ kútútú i̱ña̱ꞌ, soo Diótrefes chi ntu tɨ́ɨn kuéntáꞌ re̱ꞌ tiñu níso ráníꞌ, chi táꞌánꞌ iniꞌ re̱ꞌ kúñáꞌnú re̱ꞌ ka̱ꞌ nu̱u̱nꞌ ráa.

¹⁰ Saáva sáá kenta ni̱ꞌ yukuán, jee xináku ni̱ꞌ si̱kɨ̱ꞌ tiñu sáꞌá re̱ꞌ. Chi nékáíyó káꞌánꞌ re̱ꞌ tu̱ꞌun niva̱ꞌa si̱kɨ̱ꞌ ráníꞌ. Jee nsú kua̱chi jín rá tiñu yaꞌá kúváꞌa iniꞌ re̱ꞌ, chi ni ntu jiáꞌa re̱ꞌ veꞌi re̱ꞌ ki̱vɨ rá ñanitáꞌán vá. Jee jiásɨ́ꞌ re̱ꞌ nu̱u̱nꞌ rá ñɨvɨ ya̱ kuíni ráa ku̱ꞌva ráa veꞌi ráa ki̱vɨ rá ñanitáꞌán vá, jee táváꞌ re̱ꞌ ráa nteñu rá táꞌán ráa ya̱ kúneí iniꞌ ráa Jesús, ya̱ ntu jiáꞌa re̱ꞌ kútútú ráa jín rá táꞌán ráa.

¹¹ Noꞌó Gayo, ya̱ ñúnúunꞌ ni̱ꞌ, koto nuún sáꞌá nú kuéntáꞌ ya̱ niváꞌa sáꞌá ñɨvɨ. Chisaꞌ nuún saꞌá nú kuéntáꞌ ya̱ váꞌa sáꞌá ñɨvɨ. Chi ñɨvɨ ya̱ sáꞌá ya̱ váꞌa jee ñɨvɨ Ndiosíꞌ ví nijia‑a. Soo ñɨvɨ ya̱ sáꞌá tiñu niváꞌa, jee ntiáꞌan kuniꞌ‑i Ndiosíꞌ.

Ichi váꞌa jíka Demetrio

¹² Nta̱ká ñɨvɨ jiáꞌa tu̱ꞌun na̱a̱ꞌ jie̱ꞌe̱ꞌ va̱ꞌa sáꞌá Demetrio. Jee ne̱ tu̱ꞌun na̱a̱ꞌ Jesús stúvi ya̱ jiáꞌnu na̱a̱ꞌ re̱ꞌ sáni káchíꞌ tu̱ꞌun vá. Jee suni jiáꞌa ráníꞌ ya̱ naáꞌ ya̱ va̱ꞌa jiáꞌnu re̱ꞌ. Jee jíníꞌ nú ya̱ tu̱ꞌun na̱a̱ꞌ ví tu̱ꞌun jiáꞌa ránꞌ.

Tu̱ꞌun nu̱u̱nꞌ nɨ́ꞌɨ

¹³ Íyó kue̱ꞌe̱ꞌ na̱ tu̱ꞌun tee ni̱ꞌ nu̱u̱nꞌ nú, soo ntu kuíni ni̱ꞌ tee ni̱ꞌ maa jín tinta nu̱u̱nꞌ tutuꞌ,

¹⁴ chi íyó tu̱ꞌun neí iniꞌ ni̱ꞌ ya̱ ñamani kua̱jiane̱ꞌyá ni̱ꞌ noꞌó, jee kaꞌanꞌ máá maáó.

¹⁵ Na̱ ka̱ꞌ kuneeꞌ va̱ꞌa nú ka̱ꞌ. Rá ñaniꞌ yaꞌá ya̱ ma̱ni̱ꞌ jín‑ó, tájí ráa tu̱ꞌun ya̱ jíkátu̱ꞌún ráa jie̱ꞌe̱ꞌ noꞌó. Jee ku̱ꞌva nú tu̱ꞌun ni̱ꞌ nu̱u̱nꞌ ta ɨɨn rá ñaniꞌ, ya̱ ma̱ni̱ꞌ jín‑ó ya̱ íyó i̱ña̱ꞌ, ya̱ jíkátu̱ꞌún ni̱ꞌ jie̱ꞌe̱ꞌ ráa.