2 Timoteo 2 - Mixteco del suroeste de Tlaxiaco Oaxaca

Ɨɨn soldado va̱ꞌa ya̱ kuatíñú Cristo

¹ Saáva noꞌó, ya̱ kúvi kuéntáꞌ se̱ꞌya maáníꞌ, chuneí iniꞌ nú jie̱ꞌe̱ꞌ ya̱ íyó mániꞌ iniꞌ Ndiosíꞌ néꞌyá re̱ꞌ yó, ya̱ yɨ́ꞌɨ́‑ó nu̱u̱nꞌ Cristo Jesús.

² Jee nta̱ká tu̱ꞌun, ya̱ nteso̱ꞌo nú ya̱ nkachiꞌ ni̱ꞌ nu̱u̱nꞌ nú ichinúúnꞌ kue̱ꞌe̱ꞌ ñɨvɨ ya̱ kúvi stúvi ráa maa, jee natetíñú nú tu̱ꞌun vá nu̱u̱nꞌ inka rá te̱e na̱a̱ꞌ, ya̱ síkúnkuvi va̱ꞌa ráa, ya̱ kuvi naxinéꞌénꞌ ráa maa nu̱u̱nꞌ rá inka ñɨvɨ.

³ Noꞌó, keꞌneꞌ iniꞌ nú jín ránꞌ rá tu̱nóꞌó kunoꞌo nú kuéntáꞌ ɨɨn soldado va̱ꞌa ya̱ jiátíñú Cristo Jesús.

⁴ Ni ɨɨn te̱e ya̱ sáꞌá tiñu soldado ntu̱ví chítéñú re̱ꞌ jín tiñu maáréꞌ saꞌá re̱ꞌ, chi íyó ya̱ sáꞌá re̱ꞌ tiñu ya̱ sáni kúváꞌa iniꞌ te̱e tátúníꞌ nu̱u̱nꞌ re̱ꞌ.

⁵ Jee suni sukuán súnika̱ꞌ ɨɨn te̱e síkɨ́ nsáꞌ ni̱ꞌi̱nꞌ‑i ta̱ꞌvi̱ꞌ, retú ntu̱ví síkɨ́ re̱ꞌ sánikua̱ꞌ íyótúníꞌ sáá síkɨ́ ráa.

⁶ Jee ɨɨn te̱e ya̱ sátíñú ni̱ꞌin chi̱kuꞌuꞌ, jee xíꞌna re̱ꞌ vá íyó ya̱ ni̱ꞌi̱nꞌ re̱ꞌ tataꞌ kene nu̱u̱nꞌ tiñu sáꞌá re̱ꞌ.

⁷ Kani iniꞌ nú jie̱ꞌe̱ꞌ ya̱ káchíꞌ ni̱ꞌ, jee máá I̱toꞌoꞌ‑ó saꞌá ya̱ ki̱ku̱ꞌun iniꞌ nú nɨꞌɨ yaꞌá.

⁸ Jee naku̱ꞌun iniꞌ nú Jesús ya̱ kúvi Cristo ya̱ nna̱tekuꞌ i̱i̱ꞌ re̱ꞌ nkene re̱ꞌ nteñu rá níꞌiꞌ. Jee nkuvi re̱ꞌ Se̱ꞌya ichiyúkúnꞌ nkene ne̱ nu̱u̱nꞌ David. Yaꞌá ví sánikua̱ꞌ tu̱ꞌun váꞌa jie̱ꞌe̱ꞌ Cristo ya̱ káchítu̱ꞌún ni̱ꞌ.

⁹ Jee jie̱ꞌe̱ꞌ tu̱ꞌun yaꞌá nóꞌo ni̱ꞌ tu̱nóꞌó, jee ne̱ núꞌníꞌ ni̱ꞌ jín cadena ka̱a, yɨ́ꞌɨ́ ni̱ꞌ iniꞌ veka̱a, kuéntáꞌ ɨɨn te̱e sáꞌá kua̱chi ni̱ꞌin ví ni̱ꞌ. Soo Tu̱ꞌun Ndiosíꞌ, nsáꞌ núꞌníꞌ‑i.

¹⁰ Saáva jiéꞌnéꞌ iniꞌ ni̱ꞌ nɨꞌɨ tu̱nóꞌó yaꞌá jie̱ꞌe̱ꞌ rá ñɨvɨ nkáji Ndiosíꞌ, sáva ni̱ꞌi̱nꞌ ráa ya̱ nanitáꞌvíꞌ ráa jie̱ꞌe̱ꞌ yɨ́ꞌɨ́ ráa nu̱u̱nꞌ Cristo Jesús, jee viiꞌ nasɨ́kuitɨꞌ kuneeꞌ ráa nɨ́ɨ́nkání jín re̱ꞌ.

¹¹ Yaꞌá ví tu̱ꞌun ya̱ maa na̱a̱ꞌ nijia: Chi retú ni̱ꞌi̱ꞌ‑ó jie̱ꞌe̱ꞌ yɨ́ꞌɨ́‑ó nu̱u̱nꞌ re̱ꞌ jee suni kutekuꞌ‑ó jín re̱ꞌ.

¹² Jee retú kuni̱ꞌin‑ó kuiñɨ‑ó jín re̱ꞌ sú nóꞌo‑ó jee suni tatúníꞌ‑ó jín re̱ꞌ. Soo retú kúíchi iniꞌ‑ó re̱ꞌ ya̱ nsú I̱toꞌoꞌ‑ó ví re̱ꞌ, jee suni kuichi iniꞌ re̱ꞌ kune̱ꞌyá re̱ꞌ yó ya̱ nsú ñɨvɨ re̱ꞌ kúvi‑ó.

¹³ Retú ntu̱ví síkúnkuvi na̱a̱ꞌ‑ó nu̱u̱nꞌ re̱ꞌ, jee maáréꞌ chi íchí níkɨ́nꞌ re̱ꞌ síkúnkuvi na̱a̱ꞌ re̱ꞌ ya̱ nchi̱sóyuꞌú re̱ꞌ nu̱u̱nꞌ‑ó. Chi Cristo ntu kúvi kumaniꞌ re̱ꞌ sikúnkuvi na̱a̱ꞌ re̱ꞌ nu̱u̱nꞌ maáréꞌ ya̱ káchíꞌ re̱ꞌ.

Ɨɨn te̱e ya̱ kene na̱a̱ꞌ tiñu sáꞌá‑a

¹⁴ Xinákúꞌun nú iniꞌ rá ñɨvɨ tu̱ꞌun yaꞌá. Jee ichinúúnꞌ Ndiosíꞌ, tatúníꞌ ni̱ꞌin nú nu̱u̱nꞌ ráa ya̱ koto kántátúꞌun ráa jie̱ꞌe̱ꞌ ntáká tu̱ꞌun saɨn. Chi ntu̱náꞌ íyótiñu‑u nintíꞌínꞌ saꞌá ráa suꞌva, chi stívɨ́‑ɨ ñɨvɨ ya̱ tésóꞌo maa.

¹⁵ Nunasɨ́ nú sáva kene na̱a̱ꞌ tiñu sáꞌá nú nu̱u̱nꞌ Ndiosíꞌ, ya̱ ntu íyó kukanuun nú, chi xínéꞌénꞌ na̱a̱ꞌ nú tu̱ꞌun na̱a̱ꞌ re̱ꞌ.

¹⁶ Soo chusává nú rá tu̱ꞌun saɨn nékáíyó káꞌánꞌ ya̱ ntu íyó ñáꞌnú Ndiosíꞌ nu̱u̱nꞌ ráa, chi ñɨvɨ káꞌánꞌ suꞌva kúkueꞌeꞌ ráa ka̱ꞌ kuíká ráa nu̱u̱nꞌ ichi Ndiosíꞌ.

¹⁷ Jee kutenuun ka̱ꞌ rá tu̱ꞌun xínéꞌénꞌ ráa kuéntáꞌ jíka kueꞌiꞌ ti̱no̱ó. Suꞌva kúvi yaꞌá jín rá te̱e naní Himeneo jín Fileto.

¹⁸ Chi nku̱sɨ́ɨ́n ráa nu̱u̱nꞌ ya̱ nááꞌ, jee káchíꞌ ráa ya̱ ya njia̱ꞌa ya̱ nna̱tekuꞌ i̱i̱ꞌ rá ni̱yɨ jee ya nna̱noto rá ñunéꞌyúꞌ rává, jee suꞌva síjíta ráa ya̱ kúneí iniꞌ sava rá ñɨvɨ Cristo.

¹⁹ Soo jiákɨ́nꞌ kutú Ndiosíꞌ tu̱ꞌun re̱ꞌ, nu̱u̱nꞌ jiáni kutú re̱ꞌ rá ñɨvɨ re̱ꞌ. Jee níso vá tu̱ꞌun yaꞌá kuéntáꞌ ɨɨn seyúꞌ ya̱ káchíꞌ‑i: “Jíníꞌ I̱toꞌoꞌ‑ó rá ñɨvɨ yɨ́ꞌɨ́ nu̱u̱nꞌ re̱ꞌ”, jín, “Nta̱ká ñɨvɨ ya̱ jiáꞌayuꞌú ráa ya̱ I̱toꞌoꞌ ráa ví Cristo, íyó saꞌá sɨ́ɨ́n ráa maáráa nu̱u̱nꞌ rá níváꞌa.”

²⁰ Iniꞌ ɨɨn veꞌi káꞌnú, nsáꞌ kua̱chi ko̱ꞌo̱ꞌ yɨ́yáꞌvi íyó ya̱ kúvi jín oro áxí plata, chi suni íyó nantíñú kúvi jín yutun jín ñunkíxín. Jee sava ví nantíñú ya̱ jiátíñú ñunkúún. Jee sava ví nantíñú jiátíñú niva̱ꞌa ni.

²¹ Jee suni sukuán, retú ɨɨn ñɨvɨ saꞌá noo ninuꞌun‑u maáa nu̱u̱nꞌ rá tu̱ꞌun níváꞌa vá, jee kúvi vá ya̱ kuatíñú ñunkúún I̱toꞌoꞌ‑ó, kuéntáꞌ ɨɨn ko̱ꞌo̱ꞌ ñunkúún, chi nsa̱ꞌá sɨ́ɨ́n re̱ꞌ maa ya̱ kɨtíñú‑u nu̱u̱nꞌ re̱ꞌ, jee kootiñu‑u nu̱u̱nꞌ I̱toꞌoꞌ‑ó, chi ya̱ íyó stákoo‑o sáva saꞌá‑a nɨꞌɨ tiñu váꞌa.

²² Kunu nú chusává maánú nu̱u̱nꞌ ya̱ níyo iniꞌ nú ya̱ sɨ̱ɨ̱ꞌ iniꞌ ɨɨn te̱e súchí. Jee kunikɨnꞌ nú ichi ya̱ kino̱o na̱a̱ꞌ nú nu̱u̱nꞌ Ndiosíꞌ, ya̱ tu̱ꞌun kuneí iniꞌ nú Cristo, ya̱ tu̱ꞌun kunu̱u̱nꞌ nú Ndiosíꞌ jín ñɨvɨ, jín ya̱ tu̱ꞌun kuneeꞌ ñunkúún nú jín táꞌán nú. Jee saꞌá nú suꞌva jín rá ñɨvɨ ya̱ ni̱ka̱nꞌ táꞌvíꞌ ráa jín ánímaꞌ noo nu̱u̱nꞌ Cristo, ya̱ kuvi re̱ꞌ I̱toꞌoꞌ ráa.

²³ Jee chusává nú tu̱ꞌun naanꞌ ya̱ káꞌánꞌ sɨ̱ɨ̱ꞌ ni, jie̱ꞌe̱ꞌ ya̱ kántátúꞌun ñɨvɨ, chi jíníꞌ nú ya̱ suvivá sáꞌá ya̱ íyó ti̱xi̱nꞌ.

²⁴ Jee ɨɨn musúꞌ ya̱ jiátíñú maá I̱toꞌoꞌ‑ó ntu̱ví íyó saꞌá‑a tuntíxín, íyó ya̱ koo ñunkúún iniꞌ‑i jín nɨꞌɨ ñɨvɨ, jee íyó kuvi xinéꞌénꞌ‑e, íyó keꞌneꞌ iniꞌ‑i,

²⁵ jee íyó koo másúꞌ iniꞌ‑i sáá nachuꞌun‑u ichi váꞌa rá ñɨvɨ núníꞌin jín tu̱ꞌun na̱a̱ꞌ. Sa̱naanꞌ ku̱ꞌva Ndiosíꞌ nakani iniꞌ ráa, ne̱ kenta kukáꞌnú iniꞌ ráa tu̱ꞌun na̱a̱ꞌ.

²⁶ Jee suꞌva kenta nakukájí iniꞌ ráa jee ka̱ku ráa nu̱u̱nꞌ máñáꞌ kui̱ꞌna̱ꞌ kúñáꞌnú nu̱u̱nꞌ nkininkava ráa jee ntɨɨn re̱ꞌ ráa sáva saꞌá ráa ya̱ kuíni re̱ꞌ.