2 Tesalonicenses 3 - Mixteco del suroeste de Tlaxiaco Oaxaca

Kaꞌanꞌ rán jín Ndiosíꞌ jie̱ꞌe̱ꞌ ránuꞌuꞌ

¹ Jee íyó inka tu̱ꞌun kachiꞌ ráníꞌ nu̱u̱nꞌ ránoꞌó, ñanitáꞌán, ya̱ ka̱ka̱nꞌ táꞌvíꞌ ránú nu̱u̱nꞌ Ndiosíꞌ jie̱ꞌe̱ꞌ ránuꞌuꞌ. Sáva kutenuun ya̱chi̱ꞌ tu̱ꞌun jie̱ꞌe̱ꞌ I̱toꞌoꞌ‑ó, jee sáva koo ñáꞌnú tu̱ꞌun vá nu̱u̱nꞌ rá ñɨvɨ, sáni nkuvi nteñu ránoꞌó.

² Jee ka̱ka̱nꞌ táꞌvíꞌ rán, ya̱ sikáku Ndiosíꞌ ránuꞌuꞌ nu̱u̱nꞌ rá ñɨvɨ kánéꞌén kánéꞌí, chi nsú nɨꞌɨ ñɨvɨ kúneí iniꞌ ráa Jesús.

³ Soo kúvi kúneí iniꞌ‑ó I̱toꞌoꞌ‑ó chi síkúnkuvi na̱a̱ꞌ re̱ꞌ nɨꞌɨ ya̱ káchíꞌ re̱ꞌ, jee saꞌá re̱ꞌ ya̱ kuiñɨ ni̱ꞌin rán jín re̱ꞌ jee kumí re̱ꞌ ránoꞌó nu̱u̱nꞌ ya̱ kíni.

⁴ Jee ne̱ yuchí kúkáꞌnú iniꞌ ráníꞌ I̱toꞌoꞌ‑ó jie̱ꞌe̱ꞌ ránoꞌó, ya̱ síkúnkuvi ránú ya̱ tátúníꞌ ráníꞌ nu̱u̱nꞌ ránoꞌó, jín ya̱ saꞌá rán ka̱ꞌ sukuán.

⁵ Jee na̱ ka̱ꞌ nachuꞌun I̱toꞌoꞌ‑ó ichi ánímaꞌ rán sáva saꞌá Ndiosíꞌ ya̱ kunu̱u̱nꞌ rán re̱ꞌ jín ñɨvɨ. Jee sáva kuni̱ꞌin ránú kuiñɨ ni̱ꞌin rán jín Cristo.

Néíká satíñú‑ó

⁶ Ránoꞌó ñanitáꞌán, jee nu̱u̱nꞌ súví I̱toꞌoꞌ‑ó Jesús ya̱ kúvi Cristo, jee tátúníꞌ ráníꞌ nu̱u̱nꞌ ránoꞌó, ya̱ kusɨ́ɨ́n ránú nu̱u̱nꞌ nta̱ká ñaniꞌ jíka kúxí jee ya̱ ntu sáꞌá ráa sáni tu̱ꞌun níꞌinꞌ rán nu̱u̱nꞌ ránuꞌuꞌ.

⁷ Chi suviránú jíníꞌ rán na̱ja íyó saꞌá nuún rán kua̱ꞌ nsa̱ꞌá ránuꞌuꞌ, chi ntu nika kúxí ráníꞌ sáá nééꞌ ránꞌ nteñu ránoꞌó.

⁸ Ni ntu nyájíꞌ ráníꞌ ya̱ nsi̱kútaꞌviꞌ ni ɨɨn ñɨvɨ nu̱u̱nꞌ ránuꞌuꞌ. Chi va̱ni nuví va̱ni yakuááꞌ, nni̱kó néí ránꞌ nsa̱tíñú téyɨ́ɨ́ ránꞌ, sáva ntu kúvi ránꞌ tiñu véi nu̱u̱nꞌ ni ɨɨn ránoꞌó, jie̱ꞌe̱ꞌ ya̱ kutekuꞌ ránꞌ.

⁹ Ntu ni̱ka̱nꞌ ráníꞌ ya̱ koto rán ránuꞌuꞌ, súnika̱ꞌ nísotíñú ráníꞌ tiñu ntaji Ndiosíꞌ jee kuvi ka̱ka̱nꞌ ránꞌ maa nu̱u̱nꞌ ránoꞌó. Chisaꞌ nsa̱tíñú ránꞌ sáva taji ránꞌ ɨɨn ichi nu̱u̱nꞌ ránoꞌó na̱sa nasaꞌá rán.

¹⁰ Chi sáá nneeꞌ ránꞌ jín ránoꞌó, nta̱túníꞌ ránꞌ tu̱ꞌun yaꞌá: “Retú ɨɨn ñɨvɨ ntu kuíni satíñú, jee nka̱jíꞌ‑i, rúsa.”

¹¹ Káꞌánꞌ ránꞌ suꞌva, chi tésóꞌo ránꞌ ya̱ íyó ñɨvɨ nteñu ránoꞌó ya̱ jíka kúxí, chi ni ntu sátíñú ráa, chisaꞌ kua̱chi kíní ráa maáráa nu̱u̱nꞌ tiñu inka ñɨvɨ.

¹² Nu̱u̱nꞌ súví I̱toꞌoꞌ‑ó Jesús ya̱ kúvi Cristo, tátúníꞌ ránꞌ nu̱u̱nꞌ rá ñɨvɨ vá, jee xíníꞌvɨ́ꞌ ránꞌ iniꞌ ráa, ya̱ nini̱ꞌin satíñú ráa, sáva ni̱ꞌi̱nꞌ ráa ya̱ kajiꞌ ráa.

¹³ Soo ránoꞌó ñanitáꞌán, koto núun iniꞌ rán saꞌá rán ya̱ váꞌa.

¹⁴ Retú néni ɨɨn ñɨvɨ ntu íyó maniꞌ iniꞌ‑i tu̱ꞌun ntee ráníꞌ nu̱u̱nꞌ tutuꞌ yaꞌá, jee kune̱ꞌyá rán né ɨɨn ví‑i, jee koto kútáꞌán rán jín‑i, sáva kukanuun ñɨvɨ vá, jee nikó iniꞌ‑i.

¹⁵ Soo koto ñúꞌún iniꞌ rán kuéntáꞌ retánꞌ tu̱fi̱ꞌ ta̱ꞌán‑a jín rán, jee nakutíñú rán nu̱u̱nꞌ‑u kuéntáꞌ ɨɨn ñaniꞌ.

Tu̱ꞌun nu̱u̱nꞌ nɨ́ꞌɨ ya̱ jíkánꞌ táꞌvíꞌ Pablo nu̱u̱nꞌ Ndiosíꞌ ya̱ saꞌá‑a ya̱ netuꞌ kuvi ráa

¹⁶ Saájee máá maá I̱toꞌoꞌ‑ó ví ya̱ sáꞌá ya̱ kuneeꞌ ñunkúún ñɨvɨ. Jee na̱ ka̱ꞌ saꞌá re̱ꞌ ka̱ꞌ ya̱ ñunkúún kuneeꞌ rán nɨꞌɨ tiempúꞌ jín nta̱ká íchí. Jee kuneeꞌ I̱toꞌoꞌ‑ó jín nta̱ká ránoꞌó.

¹⁷ Nuꞌuꞌ Pablo, tée ni̱ꞌ tu̱ꞌun káva̱ꞌa jín naꞌá maáníꞌ nu̱u̱nꞌ tutuꞌ yaꞌá. Yaꞌá kúvi ɨɨn seña nu̱u̱nꞌ nta̱ká tutuꞌ táji ni̱ꞌ, chi suꞌva tée ni̱ꞌ nu̱u̱nꞌ nɨꞌɨ tutuꞌ táji ni̱ꞌ.

¹⁸ Na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús ka̱ꞌ, ya̱ kúvi re̱ꞌ Cristo, kune̱ꞌyá re̱ꞌ nta̱ká ránoꞌó. Sukuán koo.