2 Pedro 3 - Mixteco del suroeste de Tlaxiaco Oaxaca

Nenta tuku I̱toꞌoꞌ‑ó

¹ Ránoꞌó ya̱ ñúnúunꞌ ni̱ꞌ, yaꞌá kúvi tutuꞌ uvíꞌ ya̱ tée ni̱ꞌ nu̱u̱nꞌ ránoꞌó. Jee tée ni̱ꞌ nu̱u̱nꞌ ni núvíꞌ rá tutuꞌ yaꞌá sáva xinákúꞌun ni̱ꞌ iniꞌ rán sáva xiníꞌvɨ́ꞌ ni̱ꞌ iniꞌ rán ya̱ kani ninuꞌun antúníꞌ rán,

² sáva naku̱ꞌun iniꞌ rán rá tu̱ꞌun ya̱ nkachiꞌ ya̱chi̱ꞌ rá te̱e nyɨ̱tíñú nu̱u̱nꞌ Ndiosíꞌ ya̱ nna̱kani ráa tu̱ꞌun nkene yuꞌú máá maá Ndiosíꞌ ne̱ yanaꞌán, jee sáva naku̱ꞌun iniꞌ rán rá tu̱ꞌun ya̱ nkachiꞌ rá te̱e níso ráa tiñu apóstol ya̱ nchu̱ichí Cristo ráa nu̱u̱nꞌ ránoꞌó sáva nna̱kani ráa rá tu̱ꞌun ya̱ nta̱túníꞌ re̱ꞌ. Jee maáréꞌ ví I̱toꞌoꞌ‑ó jee nátavaꞌ re̱ꞌ yó nu̱u̱nꞌ kua̱chi‑ó xinánitáꞌvíꞌ re̱ꞌ yó.

³ Soo ya̱ xíꞌnañúꞌún ka̱ꞌ ví ya̱ íyó kuniꞌ rán ya̱ rá ki̱vɨ̱ꞌ nu̱u̱nꞌ nɨ́ꞌɨ, jee kiji rá ñɨvɨ ya̱ káꞌánꞌ kátá iniꞌ ráa jie̱ꞌe̱ꞌ tu̱ꞌun na̱a̱ꞌ Ndiosíꞌ, jee kueꞌnu ráa sánikua̱ꞌ ñúꞌún iniꞌ ráa saꞌá ráa rá tiñu néꞌí ya̱ níyo iniꞌ maáráa.

⁴ Jee kachiꞌ ráa: “¿Né núꞌ íyó ya̱ nchi̱sóyuꞌú Cristo ya̱ nenta tuku re̱ꞌ rúja? Chi ne̱ ki̱vɨ̱ꞌ ya̱ níꞌiꞌ rá tataꞌ jííꞌ‑ó yanaꞌán jee ne̱ vitan, jee íyó i̱i̱ꞌ sáá íyó nɨꞌɨ kuitɨꞌ ne̱ sáá ña̱ko̱o ñɨ̱vɨ́ nékúvi”, kachiꞌ ráa.

⁵ Chi jie̱ꞌe̱ꞌ ya̱ ntu kuíni ráa tɨɨn kuéntáꞌ ráa ya̱ ne̱ yanaꞌán nta̱túníꞌ Ndiosíꞌ ya̱ ña̱ko̱o súkún jín ñɨ̱vɨ́, jee jín tu̱ꞌun yuꞌuꞌ Ndiosíꞌ nsa̱ꞌá re̱ꞌ ñuꞌun jín nute, jee nta̱túníꞌ re̱ꞌ ya̱ kusɨ́ɨ́n ñuíchí ma̱ꞌñú nute jee nkene ñuíchí vá nu̱u̱nꞌ nute.

⁶ Jee suni jín nute nxi̱náánꞌ re̱ꞌ ñɨ̱vɨ́ yanaꞌán, chi nnu̱kueꞌeꞌ nute ya̱ nkuun sa̱vi̱ꞌ xéénꞌ nchi̱tú nute kua̱íyó nu̱u̱nꞌ ñuꞌun ñɨ̱vɨ́ yaꞌá.

⁷ Soo súkún jín ñɨ̱vɨ́ íyó vitan, jee jín máá tu̱ꞌun yuꞌuꞌ Ndiosíꞌ ya̱ ya íyó tu̱ꞌva tatúníꞌ re̱ꞌ sáva ka̱yu̱ꞌ ráa ki̱vɨ̱ꞌ sanáaꞌ re̱ꞌ kua̱chi jee xináánꞌ re̱ꞌ rá ñɨvɨ ya̱ ntu níkɨ́nꞌ ráa ichi Ndiosíꞌ.

⁸ Soo ránoꞌó ñanitáꞌán ya̱ ñúnúunꞌ ni̱ꞌ, koto náánꞌ iniꞌ rán tu̱ꞌun yaꞌá: ya̱ nu̱u̱nꞌ I̱toꞌoꞌ‑ó jee ɨɨn ki̱vɨ̱ꞌ kúvi kuéntáꞌ ɨɨn mil kui̱ya̱ꞌ, jee ɨɨn mil (1000) kui̱ya̱ꞌ kúvi kuéntáꞌ ɨɨn ki̱vɨ̱ꞌ ni.

⁹ Jee nsáꞌ kúkuéé I̱toꞌoꞌ‑ó síkúnkuvi re̱ꞌ ya̱ nchi̱sóyuꞌú re̱ꞌ ya̱ tiaaꞌ tuku re̱ꞌ kuéntáꞌ kua̱ꞌ ya̱ jiáni iniꞌ sava rá ñɨvɨ jie̱ꞌe̱ꞌ ya̱ kukuéé re̱ꞌ. Chisaꞌ nétukáꞌnú iniꞌ re̱ꞌ néꞌyá re̱ꞌ ránoꞌó, chi ntu kuíni re̱ꞌ ya̱ kɨ̱naanꞌ ni ɨɨn ñɨvɨ chisaꞌ kuíni re̱ꞌ ya̱ nta̱ká ñɨvɨ nakani iniꞌ ráa chiꞌi ráa maáráa xi̱ntíín re̱ꞌ.

¹⁰ Soo ki̱vɨ̱ꞌ ya̱ nenta I̱toꞌoꞌ‑ó sanáaꞌ re̱ꞌ jee sa̱naanꞌ ni nenta re̱ꞌ kuéntáꞌ kua̱ꞌ sa̱naanꞌ ni kenta ɨɨn te̱e kuíꞌná. Jee ki̱vɨ̱ꞌ nenta re̱ꞌ, jee nɨꞌɨn víꞌí súkún jee kɨ̱naanꞌ‑a. Jee nɨꞌɨ ya̱ íyó súkún jín ñɨ̱vɨ́ ka̱yu̱ꞌ‑u jee ta̱nɨ̱ꞌ‑ɨ jee nta̱ká ya̱ íyó iniꞌ ñɨ̱vɨ́ yaꞌá ka̱yu̱ꞌ‑u.

¹¹ Jee jie̱ꞌe̱ꞌ ya̱ kɨ̱naanꞌ nta̱ká rává sukuán, saáva íyó kueꞌnu na̱a̱ꞌ ninuꞌun rán sáni kuíni Ndiosíꞌ jee kɨtíñú rán nu̱u̱nꞌ re̱ꞌ,

¹² ni nétu rán kiji ki̱vɨ̱ꞌ sanáaꞌ Ndiosíꞌ rá kua̱chi jee sukuán sáꞌá rán ya̱ ñamani kenta ki̱vɨ̱ꞌ yukuán. Jee ki̱vɨ̱ꞌ yukuán tɨɨn ñuꞌunꞌ súkún jee naanꞌ‑a, jee nta̱ká ya̱ íyó iniꞌ‑i ka̱yu̱ꞌ‑u jee ta̱nɨ̱ꞌ‑ɨ.

¹³ Soo nétu‑ó ɨɨn súkún jiáá, jín ɨɨn ñɨ̱vɨ́ jiáá, sánikua̱ꞌ ya̱ nchi̱sóyuꞌú Ndiosíꞌ ya̱ koo. Jee yukuán koo maá tiñu na̱a̱ꞌ va̱ꞌa.

¹⁴ Saáva ránoꞌó ya̱ ñúnúunꞌ ni̱ꞌ, jee ni nétu rán ya̱ kiji ntáká rá tiñu yaꞌá, jee kuniꞌvɨꞌ iniꞌ rán nikó néí rán ya̱ kino̱o noo ánímaꞌ rán jee ntu̱náꞌ kua̱chi kuniso ka̱ꞌ ánímaꞌ rán, jee kuniꞌ re̱ꞌ ya̱ ne̱ va̱ꞌa koo ntáká rán jín re̱ꞌ, sáá nenta re̱ꞌ.

¹⁵ Jee tɨɨn kuéntáꞌ rán ya̱ kúkuéé I̱toꞌoꞌ‑ó niji re̱ꞌ jie̱ꞌe̱ꞌ ya̱ káꞌnú íyó iniꞌ re̱ꞌ néꞌyá re̱ꞌ rá ñɨvɨ sáva koo ka̱ꞌ tiempúꞌ nakunikɨnꞌ rá ñɨvɨ ka̱ꞌ ichi re̱ꞌ sáva natavaꞌ re̱ꞌ ráa nu̱u̱nꞌ kua̱chi ráa nanitáꞌvíꞌ ráa. Jee suni sukuán ntee ñaniꞌ‑ó Pablo ya̱ ñúnúunꞌ‑ó nu̱u̱nꞌ rá tutuꞌ nu̱u̱nꞌ ránoꞌó sánikua̱ꞌ tu̱ꞌun níchí njia̱ꞌa Ndiosíꞌ nu̱u̱nꞌ re̱ꞌ.

¹⁶ Jee suꞌva káꞌánꞌ re̱ꞌ jie̱ꞌe̱ꞌ rá tu̱ꞌun yaꞌá nu̱u̱nꞌ ntáká rá tutuꞌ ntee re̱ꞌ. Jee nu̱u̱nꞌ rá tutuꞌ vá nééꞌ sava rá tu̱ꞌun víjí ki̱ku̱ꞌun iniꞌ ñɨvɨ. Jee rá ñɨvɨ ya̱ ntu nkútúꞌva va̱ꞌa ráa ya̱ xínéꞌénꞌ Tu̱ꞌun Ndiosíꞌ, jín ya̱ ntu íñɨ́ kutú ráa jín Tu̱ꞌun Ndiosíꞌ, sáꞌá tiákuá tu̱ꞌun káꞌánꞌ ráa Tu̱ꞌun Ndiosíꞌ ya̱ ntee Pablo násama ráa na̱sa kua̱ꞌ kuíni káchíꞌ tu̱ꞌun re̱ꞌ, kua̱ꞌ sáꞌá ráa jín rá inka Tu̱ꞌun Ndiosíꞌ níso nu̱u̱nꞌ Tutuꞌ Ííꞌ. Jee saáva jie̱ꞌe̱ꞌ vá kɨ̱naanꞌ ráa.

¹⁷ Soo ránoꞌó ñanitáꞌán ya̱ ñúnúunꞌ ni̱ꞌ, ya̱ jíníꞌ rán ya̱ íyó ñɨvɨ ya̱ násama ráa na̱sa kua̱ꞌ kuíni káchíꞌ Tu̱ꞌun Ndiosíꞌ, saájee kumí rán maárán, sáva ntu xtakaa rá te̱e kánéꞌén vá ránoꞌó sáva ntu chinikɨn rán rá tu̱ꞌun xtívɨ́ ya̱ xínéꞌénꞌ ráa, jee sáva ntu kininkava rán nu̱u̱nꞌ íñɨ́ kutú rán jín Tu̱ꞌun Ndiosíꞌ.

¹⁸ Chisaꞌ íyó kujia iniꞌ rán kueꞌnu rán jín Jesús ya̱ kúvi Cristo ya̱ máníꞌ iniꞌ re̱ꞌ chineí re̱ꞌ ka̱ꞌ ránoꞌó jee íyó kujia iniꞌ rán ka̱ꞌ jín tu̱ꞌun re̱ꞌ sáva kuniꞌ rán ka̱ꞌ iniꞌ re̱ꞌ. Jesús ví ya̱ nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó. Nákuetúꞌún‑ó re̱ꞌ vitan jín nɨ́ɨ́nkání. Sukuán koo. Amén.