2 Pedro 1 - Mixteco del suroeste de Tlaxiaco Oaxaca

Ntee Pedro nu̱u̱nꞌ rá ñɨvɨ ya̱ jínúꞌ iniꞌ ráa Jesús

¹ Nuꞌuꞌ, Simón Pedro, ya̱ kúvi ni̱ꞌ musúꞌ nu̱u̱nꞌ I̱toꞌoꞌ‑ó Jesús ya̱ níso re̱ꞌ tiñu Cristo [ya̱ ñani Ndiosíꞌ sáva tatúníꞌ re̱ꞌ nu̱u̱nꞌ nɨꞌɨ] jee níso ni̱ꞌ tiñu apóstol chúichí re̱ꞌ nuꞌuꞌ nakani ni̱ꞌ tu̱ꞌun re̱ꞌ. Jee tée ni̱ꞌ tutuꞌ yaꞌá nu̱u̱nꞌ ránoꞌó ya̱ suni nni̱ꞌi̱nꞌ rán ya̱ kúneí iniꞌ rán Cristo kuéntáꞌ kua̱ꞌ ránuꞌuꞌ, jee máá viiꞌ yɨ́yáꞌvi ya̱ kúneí iniꞌ‑ó Cristo. Nni̱ꞌi̱nꞌ rán maa jie̱ꞌe̱ꞌ na̱a̱ꞌ ví Jesús ya̱ kúvi Cristo ya̱ kúvi re̱ꞌ Ndiosíꞌ‑ó jee nátavaꞌ re̱ꞌ yó nu̱u̱nꞌ kua̱chi‑ó xinánitáꞌvíꞌ re̱ꞌ yó.

² Na̱ ka̱ꞌ koo ma̱ni̱ꞌ iniꞌ Ndiosíꞌ kune̱ꞌyá re̱ꞌ ránoꞌó, jín ya̱ va̱ꞌa koo iniꞌ ánímaꞌ rán saꞌá re̱ꞌ jie̱ꞌe̱ꞌ ya̱ jíníꞌ va̱ꞌa rán na̱ja kúvi Ndiosíꞌ‑ó jín Jesús ya̱ kúvi re̱ꞌ I̱toꞌoꞌ‑ó.

Jie̱ꞌe̱ꞌ na̱ja íyó koo rá ñɨvɨ káníjiá jínúꞌ iniꞌ ráa Cristo

³ Chi jín fuersáꞌ ííꞌ níso Ndiosíꞌ jee ntaji re̱ꞌ nɨꞌɨ nu̱u̱nꞌ‑ó ya̱ jíniñúꞌún‑ó sáva kueꞌnu na̱a̱ꞌ‑ó ñɨ̱vɨ́ yaꞌá sáni kuíni re̱ꞌ jín sáva kɨtíñú‑ó nu̱u̱nꞌ Ndiosíꞌ. Ntaji re̱ꞌ maa jie̱ꞌe̱ꞌ jíníꞌ‑ó na̱ja iniꞌ maáréꞌ, chi maáréꞌ ví ya̱ nkana re̱ꞌ yó, jie̱ꞌe̱ꞌ ya̱ kúñáꞌnú nasɨ́kuitɨꞌ re̱ꞌ jín jie̱ꞌe̱ꞌ va̱ꞌa iniꞌ re̱ꞌ.

⁴ Jee saáva jie̱ꞌe̱ꞌ nni̱ꞌi̱nꞌ‑ó nɨꞌɨ rá yaꞌá jee nchi̱sóyuꞌú re̱ꞌ nu̱u̱nꞌ‑ó ya̱ saꞌá re̱ꞌ rá tiñu jín‑ó ya̱ máá ñáꞌnú víꞌí ka̱ꞌ ya̱ váꞌa yɨ́yáꞌvi víꞌí ka̱ꞌ. Jee jie̱ꞌe̱ꞌ ya̱ nchi̱sóyuꞌú re̱ꞌ jee kuvi kenta koo rán kuéntáꞌ maáréꞌ, chi síkáku re̱ꞌ ránoꞌó nu̱u̱nꞌ ya̱ niváꞌa ya̱ nkúꞌun ka̱ꞌ iniꞌ rán rá tiñu néꞌí sɨ̱ɨ̱ꞌ iniꞌ ya̱ níyo iniꞌ rá ñɨvɨ ñɨ̱vɨ́ yaꞌá.

⁵ Jee saáva jie̱ꞌe̱ꞌ yukuán vá nu̱u̱nꞌ kúneí iniꞌ rán ínúꞌ iniꞌ rán Cristo jee nikó nei rán nachisó rán ka̱ꞌ ya̱ kueꞌnu va̱ꞌa rán. Jee jie̱ꞌe̱ꞌ kueꞌnu va̱ꞌa rán jee nachisó rán ka̱ꞌ ya̱ kukáꞌnú iniꞌ rán ka̱ꞌ jie̱ꞌe̱ꞌ Ndiosíꞌ.

⁶ Jee jie̱ꞌe̱ꞌ ya̱ kúkáꞌnú iniꞌ rán ka̱ꞌ jie̱ꞌe̱ꞌ Ndiosíꞌ jee nachisó rán ya̱ nakeꞌen rán maárán. Jee jie̱ꞌe̱ꞌ nákeꞌen rán maárán jee nachisó rán ya̱ kuni̱ꞌin rán kuiñɨ kutú rán jín Cristo. Jee jie̱ꞌe̱ꞌ kúníꞌin rán íñɨ́ rán jín Cristo jee nachisó rán kɨtíñú rán nu̱u̱nꞌ Cristo.

⁷ Jee jie̱ꞌe̱ꞌ ya̱ yɨ́tíñú rán nu̱u̱nꞌ Cristo jee nachisó rán ya̱ kunu̱u̱nꞌ rán ɨɨn inka ñanitáꞌán rán ya̱ yɨ́ꞌɨ́ ráa nu̱u̱nꞌ Cristo, jee jie̱ꞌe̱ꞌ ñúnúunꞌ rán rá ñanitáꞌán jee nachisó rán ya̱ kunu̱u̱nꞌ rán rá ñɨvɨ.

⁸ Chi retú sáꞌá rán rá tiñu yaꞌá jee saꞌ víꞌí káꞌ sáꞌá rán maa, jee ni nsáꞌ kueꞌnu ka̱ꞌá rán, jee kene tiñu váꞌa ya̱ váji nu̱u̱nꞌ ya̱ jíníꞌ rán iniꞌ I̱toꞌoꞌ‑ó Jesús ya̱ kúvi Cristo.

⁹ Soo rá ñɨvɨ ya̱ ntu jiáꞌnu na̱a̱ꞌ ráa rá tiñu yukuán, jee saáva kuéntáꞌ ñɨvɨ kuáá kúvi ráa, kuéntáꞌ ɨɨn ya̱ ntu kúvi kune̱ꞌyá íká‑a, chi ya nnaanꞌ iniꞌ ráa ya̱ nna̱sánoo re̱ꞌ ráa jie̱ꞌe̱ꞌ kua̱chi ya̱ nsa̱ꞌá ráa ne̱ tiempúꞌ ya̱ta̱ꞌ.

¹⁰ Saáva, ránoꞌó ñanitáꞌán, nikó néí rán kueꞌnu rán sánikua̱ꞌ kuíni re̱ꞌ sáva tu̱vi niji ya̱ nkana Ndiosíꞌ ránoꞌó jín ya̱ nkáji re̱ꞌ ránoꞌó kuvi rán ñɨvɨ re̱ꞌ. Jee retú saꞌá nijia rán ntáká rá tiñu yaꞌá jee ni nsáꞌ kininkava rán ntu íyó nanikó ya̱ta̱ꞌ iniꞌ rán ichi Cristo.

¹¹ Chi retú sukuán nijia, saájee taji Ndiosíꞌ nu̱u̱nꞌ rán ya̱ núne va̱ꞌa ichi nu̱u̱nꞌ ki̱vɨ rán nu̱u̱nꞌ tátúníꞌ máá I̱toꞌoꞌ‑ó Jesús ya̱ kúvi Cristo nɨ́ɨ́nkání ya̱ maáréꞌ ví ya̱ nsa̱ꞌá‑a ya̱ nanitáꞌvíꞌ‑ó.

¹² Jee jie̱ꞌe̱ꞌ yaꞌá, saáva sukuáni kunikɨnꞌ ni̱ꞌ xinákúꞌun ni̱ꞌ iniꞌ ránoꞌó jie̱ꞌe̱ꞌ rá tiñu yaꞌá, súka̱ꞌ ya̱ jíníꞌ rán jie̱ꞌe̱ꞌ rá tu̱ꞌun yaꞌá, jín ya̱ íñɨ́ níꞌin rán jín rá tu̱ꞌun na̱a̱ꞌ ya̱ ya nni̱ꞌi̱nꞌ rán.

¹³ Chi jiáni iniꞌ ni̱ꞌ ya̱ íyó va̱ꞌa ya̱ xinákúꞌun ni̱ꞌ iniꞌ ránoꞌó jie̱ꞌe̱ꞌ rá tu̱ꞌun yaꞌá vitan tékúꞌ ni̱ꞌ ka̱ꞌ

¹⁴ chi máá I̱toꞌoꞌ‑ó Jesús ya̱ kúvi Cristo nsi̱kúkáꞌnú kájí re̱ꞌ iniꞌ nuꞌuꞌ ya̱ va̱kuyatin ya̱ kuviꞌ ni̱ꞌ xinóo ni̱ꞌ ñunéꞌyúꞌ ni̱ꞌ.

¹⁵ Jee saáva suni núnasɨ́ ni̱ꞌ sáꞌá ni̱ꞌ ya̱ nɨ́ɨ́nkání naku̱ꞌun iniꞌ rán rá tu̱ꞌun yaꞌá réáꞌ njia̱ꞌa ya̱ ni̱ꞌi̱ꞌ ni̱ꞌ.

Rá niniꞌ ya̱ viiꞌ kúñáꞌnú Cristo

¹⁶ Chi ntu nníkɨ́nꞌ ránꞌ ntu ntɨ́ɨn kuéntáꞌ ránꞌ rá kuentúꞌ túꞌún máñáꞌ ya̱ nkene xi̱ni̱ꞌ ñɨvɨ sáá nsi̱kúkáꞌnú ránꞌ iniꞌ ránoꞌó jie̱ꞌe̱ꞌ ya̱ kenta I̱toꞌoꞌ‑ó Jesús ya̱ kúvi Cristo jín jie̱ꞌe̱ꞌ fuersáꞌ ííꞌ ni̱ꞌin níso re̱ꞌ, chisaꞌ niniꞌ jínúunꞌ ráníꞌ ya̱ viiꞌ kúñáꞌnú re̱ꞌ.

¹⁷ Jee nni̱ꞌi̱nꞌ re̱ꞌ ya̱ Tátáꞌ‑ó Ndiosíꞌ nkaꞌanꞌ yɨ́ñúꞌún‑u jín re̱ꞌ, jee nsa̱ꞌá ñáꞌnú‑u re̱ꞌ. Chi ne̱ súkún nkiji rá tu̱ꞌun ne̱ nu̱u̱nꞌ nuva máá Ndiosíꞌ máá viiꞌ kúñáꞌnú‑u, jee nkachiꞌ‑i: “Yaꞌá ví Se̱ꞌya ni̱ꞌ jee ñúnúunꞌ ni̱ꞌ re̱ꞌ, jee kúváꞌa iniꞌ ni̱ꞌ néꞌyá ni̱ꞌ re̱ꞌ”, nkachiꞌ Ndiosíꞌ.

¹⁸ Jee maáránuꞌuꞌ nteso̱ꞌo ráníꞌ nusuyuꞌú vá, nkaꞌanꞌ‑a ne̱ súkún, sáá íñɨ́ ráníꞌ yukuán jín máá I̱toꞌoꞌ‑ó ne̱ xi̱ni̱ꞌ yuku ííꞌ yukuán.

¹⁹ Jee kúmí‑ó tu̱ꞌun ya̱ íyó kutú ka̱ꞌ nsú káꞌ ya̱ niniꞌ ránꞌ jínúunꞌ ránꞌ. Tu̱ꞌun vá kúvi tu̱ꞌun nkene yuꞌú Ndiosíꞌ ya̱ njia̱ꞌa re̱ꞌ nu̱u̱nꞌ rá te̱e ya̱ ntee ráa maa nu̱u̱nꞌ Tutuꞌ Ííꞌ, jee va̱ꞌa saꞌá ránú ya̱ tɨɨn kuéntáꞌ va̱ꞌa rán rá tu̱ꞌun vá, kuéntáꞌ kua̱ꞌ tɨ́ɨn kuéntáꞌ rán kantil ya̱ túúnꞌ xúꞌún nu̱u̱nꞌ neenꞌ, jee tɨɨn kuéntáꞌ va̱ꞌa rán rá tu̱ꞌun vá ne̱kua̱ꞌ kenta Cristo kuéntáꞌ va̱kunijinꞌ ki̱vɨ̱ꞌ jee xtuúnꞌ re̱ꞌ iniꞌ ánímaꞌ rán kuéntáꞌ túúnꞌ tiu̱u̱nꞌ xúꞌún ya̱neꞌenꞌ.

²⁰ Soo xíꞌna ka̱ꞌ íyó tɨɨn kuéntáꞌ va̱ꞌa rán ya̱ ntáká rá tu̱ꞌun ya̱ nkene yuꞌú Ndiosíꞌ ya̱ nééꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ jee ni nsú tu̱ꞌun ya̱ ntavaꞌ ñɨvɨ xi̱ni̱ꞌ maáráa ni ví‑i.

²¹ Chi ni nsáꞌ va̱ji tu̱ꞌun vá ne̱ nu̱u̱nꞌ ya̱ kuíni iniꞌ ɨɨn ñɨvɨ. Chisaꞌ nsa̱tíñú Ta̱chi̱ꞌ Ííꞌ Ndiosíꞌ iniꞌ ráa sáva nna̱kani ráa rá tu̱ꞌun ya̱ njia̱ꞌa Ndiosíꞌ nu̱u̱nꞌ ráa sákachiꞌ ráa. [Suviráa kúvi ráa rá ñɨvɨ nsa̱ꞌá sɨ́ɨ́n Ndiosíꞌ ráa sáva kɨtíñú ráa nu̱u̱nꞌ re̱ꞌ.]