2 Corintios 9 - Mixteco del suroeste de Tlaxiaco Oaxaca

Jie̱ꞌe̱ꞌ xu̱ꞌún ya̱ nástútú ya̱ kuvi rá ñanitáꞌán‑ó

¹ Jee vitan jee ntu̱ví jíniñúꞌún ni̱ꞌ ya̱ tee ni̱ꞌ nu̱u̱nꞌ rán jie̱ꞌe̱ꞌ tiñu ya̱ chineí rán rá ñɨvɨ láꞌví ya̱ yɨ́ꞌɨ́ nu̱u̱nꞌ Cristo.

² Chi ya jíníꞌ ni̱ꞌ ya̱ ñúꞌún káñá iniꞌ rán chineí rán. Jee jie̱ꞌe̱ꞌ vá káꞌánꞌ téyɨ́ɨ́ ni̱ꞌ nu̱u̱nꞌ rá ñɨvɨ ñuunꞌ Macedonia. Jee káchíꞌ ni̱ꞌ nu̱u̱nꞌ ráa ya̱ ránoꞌó, ñɨvɨ nééꞌ rán rá ñuunꞌ tɨ́ɨn Acaya, ya̱ nsa̱túꞌva rán ne̱ kiava. Jee jie̱ꞌe̱ꞌ ya̱ ñúkáñá iniꞌ rán chineí rán, jee nchuꞌun káñá‑a iniꞌ ráa ya̱ kue̱ꞌe̱ꞌ víꞌí ráa nóꞌónꞌ iniꞌ ráa chineí ráa.

³ Jee chúichí ni̱ꞌ rá ñaniꞌ‑ó yaꞌá kua̱jiaaꞌ ráa nu̱u̱nꞌ ránoꞌó, sáva ntu kene ka̱ꞌá tu̱ꞌun nkaꞌanꞌ téyɨ́ɨ́ ni̱ꞌ jie̱ꞌe̱ꞌ ránoꞌó jie̱ꞌe̱ꞌ tiñu yaꞌá. Sáva koo tu̱ꞌva rán sánikua̱ꞌ nkachiꞌ ni̱ꞌ.

⁴ Sáva nki̱nóo kanuun ni̱ꞌ jie̱ꞌe̱ꞌ ne̱ yuchí kúneí iniꞌ ni̱ꞌ ránoꞌó, chi kino̱o kanuun ni̱ꞌ retú koto sa̱naanꞌ jee kua̱jiaaꞌ sava rá ñɨvɨ ñuunꞌ tɨ́ɨn Macedonia jín ni̱ꞌ yukuán, jee kuniꞌ ráa ya̱ ntu̱ví íyó tu̱ꞌva rán. Jee ntu jíniñúꞌún ni̱ꞌ kaꞌanꞌ ni̱ꞌ jie̱ꞌe̱ꞌ ránoꞌó chi suni kino̱o kanuun rán ranika̱ꞌ.

⁵ Saáva ñani iniꞌ ni̱ꞌ ya̱ íyó ka̱ka̱nꞌ ni̱ꞌ nu̱u̱nꞌ rá ñaniꞌ‑ó yaꞌá sáva xíꞌna ráa ka̱ꞌ kua̱jiaaꞌ ráa nu̱u̱nꞌ nééꞌ rán jee sástákoo ráa xíꞌna ka̱ꞌ ya̱ tetáꞌán rán, ya̱ nchi̱sóyuꞌú rán, sáva saꞌá rán ya̱ netuꞌ kuvi rá ñaniꞌ láꞌví. Jee suꞌva koo tu̱ꞌva nɨꞌɨ, sáva kuva̱ꞌa iniꞌ rán tetáꞌán rán jee nsú jie̱ꞌe̱ꞌ sáꞌá u̱ꞌvi̱ꞌ iniꞌ ráníꞌ.

⁶ Soo tɨɨn kuéntáꞌ rán ya̱ ñɨvɨ ya̱ yakuꞌ taji re̱ꞌ tataꞌ sáꞌá, suni sukuán yakuꞌ nastútú re̱ꞌ. Jee suni ɨɨn ñɨvɨ taji víꞌí‑i suni sukuán nastútú víꞌí‑i.

⁷ Jee ta ɨɨn ɨɨn rán ku̱ꞌva rán na̱sa kua̱ꞌ ñúꞌún iniꞌ ánímaꞌ maárán ku̱ꞌva rán, jee nsú jín tu̱ꞌun kúxi̱í iniꞌ rán ku̱ꞌva rán maa, ni nsú ne̱ fuersáꞌ íyó koo iniꞌ rán ku̱ꞌva rán. Chi Ndiosíꞌ ñúnúunꞌ re̱ꞌ ñɨvɨ ya̱ kúsɨ́ɨꞌ iniꞌ‑i jiáꞌa‑a.

⁸ Jee kúvi saꞌá Ndiosíꞌ ya̱ nukueꞌeꞌ ka̱ꞌ nta̱ká nu̱u̱nꞌ ya̱ váꞌa nu̱u̱nꞌ rán chineí re̱ꞌ ránoꞌó, sáva sukuáni koo nñátin nta̱ká nu̱u̱nꞌ ya̱ jíniñúꞌún rán, sáva kukueꞌeꞌ ka̱ꞌ nta̱ká tiñu váꞌa sáꞌá rán nu̱u̱nꞌ ñɨvɨ.

⁹ Chi káchíꞌ Tu̱ꞌun Ndiosíꞌ nééꞌ nu̱u̱nꞌ Tutuꞌ Ííꞌ: Ñɨvɨ nsi̱kúténuun ya̱ váꞌa jee njia̱ꞌa‑a nu̱u̱nꞌ rá láꞌvíꞌ, tiñu váꞌa na̱a̱ꞌ nsa̱ꞌá‑a kino̱o kutú nɨ́ɨ́nkání.

¹⁰ Jee maá Ndiosíꞌ ví ya̱ jiáꞌa nikɨn tataꞌ nu̱u̱nꞌ ráa ya̱ taji ráa maa, jín ya̱ jiáꞌa re̱ꞌ ya̱ yájíꞌ ñɨvɨ. Jee suni maáréꞌ taji jee nasákuéꞌeꞌ re̱ꞌ ya̱ jíniñúꞌún rán sáva sáꞌá rán tiñu váꞌa, jee sikuéꞌnu re̱ꞌ tiñu váꞌa sáꞌá rán kuéntáꞌ tataꞌ sáꞌá rán.

¹¹ Jee sáva ntáká nu̱u̱nꞌ sákúká re̱ꞌ ánímaꞌ ránoꞌó sáva koo ma̱ni̱ꞌ iniꞌ rán ku̱ꞌva víꞌí rán. Jee yaꞌá sáꞌá‑a ya̱ ku̱ꞌva ñɨvɨ ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ tiñu sáꞌá‑ó.

¹² Chi tiñu yaꞌá sáꞌá ránú ya̱ chineí rán, jee nsú kua̱chi kuitɨꞌ kasɨꞌ‑ɨ nu̱u̱nꞌ ya̱ kúmániꞌ nu̱u̱nꞌ rá ñɨvɨ láꞌví ya̱ yɨ́ꞌɨ́ ráa nu̱u̱nꞌ Cristo. Chisaꞌ suni saꞌá‑a ya̱ ntántúníꞌ ku̱ꞌva nasɨ́kuitɨꞌ rá ñanitáꞌán ya̱ kútaꞌviꞌ nu̱u̱nꞌ Ndiosíꞌ.

¹³ Jee nakuetúꞌún rá ñanitáꞌán Ndiosíꞌ jie̱ꞌe̱ꞌ tiñu ya̱ chíneí rán ya̱ stúvi‑i ya̱ chíꞌi nijia rán maárán nu̱u̱nꞌ tu̱ꞌun váꞌa jie̱ꞌe̱ꞌ Cristo, sáni jiáꞌayuꞌú rán yɨ́tíñú rán nu̱u̱nꞌ tu̱ꞌun vá. Jee nakuetúꞌún ráa Ndiosíꞌ jie̱ꞌe̱ꞌ íyó mániꞌ iniꞌ rán ku̱ꞌva víꞌí rán nu̱u̱nꞌ ráa jín nu̱u̱nꞌ ntáká ñɨvɨ.

¹⁴ Jee suni ka̱ka̱nꞌ táꞌvíꞌ ráa nu̱u̱nꞌ Ndiosíꞌ jie̱ꞌe̱ꞌ ránoꞌó, chi ñúꞌún ñunkúún iniꞌ ráa néꞌyá ráa ránoꞌó, jie̱ꞌe̱ꞌ ya̱ ntántúníꞌ íyó mániꞌ nasɨ́kuitɨꞌ iniꞌ Ndiosíꞌ néꞌyá re̱ꞌ ránoꞌó, ya̱ sátíñú re̱ꞌ iniꞌ rán.

¹⁵ ¡Kútaꞌviꞌ‑ó nu̱u̱nꞌ Ndiosíꞌ!, chi ntaji re̱ꞌ nu̱u̱nꞌ‑ó ɨɨn ta̱ꞌvi̱ꞌ maá ñáꞌnú nasɨ́kuitɨꞌ ka̱ꞌ, ya̱ ntu níꞌínꞌ‑ó na̱ja kachiꞌ‑ó maa.