2 Corintios 8 - Mixteco del suroeste de Tlaxiaco Oaxaca

Ne̱ jín ánímaꞌ‑ó násokoꞌ‑ó rénákúvi‑i

¹ Ránoꞌó ñanitáꞌán, vitan jee síkúkáꞌnú ni̱ꞌ iniꞌ ránú jie̱ꞌe̱ꞌ ya̱ nsa̱ꞌá re̱ꞌ tiñu váꞌa iniꞌ rá ñɨvɨ rá grupo kútútú ráa ya̱ kúneí iniꞌ ráa Cristo, ya̱ nééꞌ ráa rá ñuunꞌ tɨɨn ñuunꞌ Macedonia chi íyó mániꞌ iniꞌ Ndiosíꞌ néꞌyá re̱ꞌ ráa.

² Chi súka̱ꞌ nóꞌo ráa kue̱ꞌe̱ꞌ tu̱nóꞌó, ya̱ stúvi‑i ya̱ íñɨ́ kutú ráa jín Cristo. Soo ntántúníꞌ kúsɨ́ɨꞌ iniꞌ ánímaꞌ ráa ya̱ yɨ́ꞌɨ́ ráa nu̱u̱nꞌ Cristo, jee súnika̱ꞌ níviniꞌ nóꞌo láꞌví ráa, soo ntántúníꞌ ma̱ni̱ꞌ iniꞌ ráa, kuéntáꞌ kúká ráa, ya̱ jiáꞌa ráa nu̱u̱nꞌ ñɨvɨ ya̱ jíniñúꞌún rává.

³ Jiáꞌa ni̱ꞌ ya̱ naáꞌ ya̱ nkene xi̱ni̱ꞌ maáráa njia̱ꞌa ráa na̱sa kua̱ꞌ kúvi ku̱ꞌva ráa, jee njia̱ꞌa ráa ka̱ꞌ nsú káꞌ kua̱ꞌ kuvi ku̱ꞌva ráa. Jee jie̱ꞌe̱ꞌ kuíni máá maáráa nsa̱ꞌá ráa maa.

⁴ Chi nkakua̱chi nasɨ́kuitɨꞌ ráa nu̱u̱nꞌ ráníꞌ ya̱ koo maniꞌ iniꞌ ránꞌ ya̱ ku̱ꞌva ránꞌ ya̱ jíꞌín ráa tetáꞌán ráa ya̱ chineí ráa rá ñɨvɨ láꞌví ya̱ yɨ́ꞌɨ́ nu̱u̱nꞌ Cristo.

⁵ Jee nsa̱ꞌá ráa ka̱ꞌ nsú káꞌ kua̱ꞌ ñúꞌún iniꞌ ránꞌ, chi xíꞌna ka̱ꞌ nna̱sokoꞌ ráa maáráa nu̱u̱nꞌ I̱toꞌoꞌ‑ó, jee kuíre nu̱u̱nꞌ ránuꞌuꞌ, sánikua̱ꞌ kuíni Ndiosíꞌ.

⁶ Saáva ni̱ka̱nꞌ táꞌvíꞌ ránꞌ nu̱u̱nꞌ Tito ya̱ sijínu re̱ꞌ tiñu vá, ya̱ ya nka̱jiéꞌé re̱ꞌ nteñu ránoꞌó ya̱ kɨ̱nastútú re̱ꞌ ya̱ íyó ma̱ni̱ꞌ iniꞌ ránú ku̱ꞌva rán nu̱u̱nꞌ rá láꞌví.

⁷ Jee sánikua̱ꞌ kua̱ꞌa̱nꞌ kéne rán ka̱ꞌ ichinúúnꞌ jín nta̱ká nu̱u̱nꞌ, na̱sa kúneí iniꞌ rán Cristo, jín na̱sa káꞌánꞌ rán tu̱ꞌun, jín na̱sa jíníꞌ víꞌí rán jie̱ꞌe̱ꞌ Ndiosíꞌ, jín na̱sa ñúkáñá iniꞌ rán chineí rán, jín na̱sa ñúnúunꞌ rán ránuꞌuꞌ. Jee suni sukuán kua̱ꞌa̱nꞌ kene rán ka̱ꞌ ichinúúnꞌ jín tiñu yaꞌá ya̱ koo ma̱ni̱ꞌ iniꞌ rán chineí rán rá láꞌví.

⁸ Soo nsáꞌ káchíꞌ ni̱ꞌ yaꞌá sáva tatúníꞌ ni̱ꞌ maa nu̱u̱nꞌ ránoꞌó. Chisaꞌ kuíni ni̱ꞌ ya̱ kuniꞌ rán na̱sa ñúkáñá iniꞌ rá inka ñanitáꞌán, sáva kototúníꞌ ni̱ꞌ ránoꞌó sáva stúvi rán ya̱ máá naáꞌ nijia ya̱ ñúnúunꞌ rán ñɨvɨ.

⁹ Chi ya̱ jíníꞌ rán ya̱ íyó mániꞌ iniꞌ I̱toꞌoꞌ‑ó Jesús ya̱ kúvi Cristo néꞌyá re̱ꞌ yó ya̱ sáꞌá re̱ꞌ ya̱ váꞌa jín‑ó. Chi sú kúká re̱ꞌ chi xi̱ntíín re̱ꞌ ví nɨꞌɨ ya̱ íyó, soo nna̱saꞌá láꞌví re̱ꞌ maáréꞌ jie̱ꞌe̱ꞌ ya̱ kúvi ya̱ váꞌa nu̱u̱nꞌ ránoꞌó, sáva ni̱ꞌi̱nꞌ‑órán ya̱ yɨ́yáꞌvi ka̱ꞌ ya̱ táji Ndiosíꞌ, jie̱ꞌe̱ꞌ ya̱ nnoꞌo láꞌví Cristo.

¹⁰ Jee kachiꞌ ni̱ꞌ sáni jiáni iniꞌ ni̱ꞌ jie̱ꞌe̱ꞌ tiñu yaꞌá, chi kúvi ya̱ váꞌa nu̱u̱nꞌ ránoꞌó. Maá ránoꞌó nsú kua̱chi nka̱jiéꞌé rán nástútú rá nantíñú sáva ku̱ꞌva nu̱u̱nꞌ rá láꞌví, chisaꞌ suni nka̱jiéꞌé rán nñu̱ꞌun iniꞌ rán saꞌá rán maa ne̱ kiava.

¹¹ Jee vitan jee suni íyó sijínu rán saꞌá rán maa. Sáva sijínu rán saꞌá rán maa sánikua̱ꞌ nñu̱ꞌun káñá iniꞌ rán, ya̱ ku̱ꞌva rán na̱ja kua̱ꞌ kénta kúmí rán.

¹² Chi retú ñúkáñá iniꞌ ɨɨn ñɨvɨ saꞌá‑a vá, jee kúváꞌa iniꞌ Ndiosíꞌ néꞌyá re̱ꞌ sáá ku̱ꞌva‑a sánikua̱ꞌ íyó kúmí‑i, jee nsáꞌ sánikua̱ꞌ ntu kúmí‑i.

¹³ Chi káchíꞌ ni̱ꞌ yaꞌá, nsú sáva kunoꞌo rán ya̱ kumaniꞌ nu̱u̱nꞌ rán sáva nakeni inka ñɨvɨ,

¹⁴ chisaꞌ sáva nuún ni̱ꞌi̱nꞌ‑o ya̱ jíniñúꞌún‑ó. Chi tiempúꞌ vitan, sáá íyó kue̱ꞌe̱ꞌ nu̱u̱nꞌ rán, jee kúvi jiáꞌa rán nu̱u̱nꞌ ráa ya̱ kúmániꞌ nu̱u̱nꞌ ráa. Jee suni sukuán sáá koo kue̱ꞌe̱ꞌ nu̱u̱nꞌ rá inka ñɨvɨ ranika̱ꞌ, jee kuvi taji ráa nu̱u̱nꞌ rán sáá kumaniꞌ ya̱ jíniñúꞌún rán. Sáva nuún ni̱ꞌi̱nꞌ‑ó ya̱ jíniñúꞌún‑ó.

¹⁵ Sánikua̱ꞌ káchíꞌ Tu̱ꞌun Ndiosíꞌ níso nu̱u̱nꞌ Tutuꞌ: “Rá ñɨvɨ ya̱ nna̱keꞌen kue̱ꞌe̱ꞌ ya̱ yájíꞌ ráa, ntu̱náꞌ nkínóo si̱kɨ̱ꞌ ka̱ꞌ nu̱u̱nꞌ ráa. Jee rá ñɨvɨ ya̱ nna̱keꞌen yakuꞌ ntu̱náꞌ nkúmániꞌ nu̱u̱nꞌ ráa.”

Tito jín rá te̱e kútáꞌán ráa jín re̱ꞌ

¹⁶ Soo kútaꞌviꞌ‑ó nu̱u̱nꞌ Ndiosíꞌ, ya̱ nsa̱ꞌá re̱ꞌ ya̱ nuún ñúꞌún káñá iniꞌ ánímaꞌ Tito jín nuꞌuꞌ jie̱ꞌe̱ꞌ ránoꞌó.

¹⁷ Chi maá nááꞌ nijia ñɨ̱netuꞌ re̱ꞌ ya̱ níka̱nꞌ ni̱ꞌ nu̱u̱nꞌ re̱ꞌ ya̱ kua̱jiane̱ꞌyá re̱ꞌ ránoꞌó. Chi ñúꞌún káñá víꞌí iniꞌ re̱ꞌ jie̱ꞌe̱ꞌ ránoꞌó, jee saáva sáni nkuini maáréꞌ nkene re̱ꞌ kua̱jiane̱ꞌyá re̱ꞌ ránoꞌó.

¹⁸ Jee chúichí ráníꞌ ɨɨn ñanitáꞌán‑ó jín Tito. Jee jie̱ꞌe̱ꞌ ñaniꞌ vá, nta̱ká rá grupo ñɨvɨ kútútú ráa ya̱ kúneí iniꞌ ráa Cristo nákuetúꞌún ráa maa jie̱ꞌe̱ꞌ sátíñú va̱ꞌa‑a nu̱u̱nꞌ tu̱ꞌun váꞌa jie̱ꞌe̱ꞌ Cristo.

¹⁹ Jee nsú kua̱chi yaꞌá, chisaꞌ suni ntáká rá grupo kútútú vá nka̱ji ráa re̱ꞌ sáva kutáꞌán re̱ꞌ jín ráníꞌ nu̱u̱nꞌ ñuunꞌ Jerusalén sáva chineí re̱ꞌ saꞌá ránꞌ tiñu máníꞌ iniꞌ yaꞌá. Sáꞌá ránꞌ suꞌva sáva stúvi ránꞌ ya̱ máá viiꞌ kúñáꞌnú ví I̱toꞌoꞌ‑ó, jín ya̱ ñúkáñá iniꞌ‑órán chineí‑ó.

²⁰ Jee suꞌva ntu jiáꞌa ránꞌ chikua̱chi néni ɨɨn ñɨvɨ si̱kɨ̱ꞌ ránuꞌuꞌ, jie̱ꞌe̱ꞌ na̱ja sátíñú ránꞌ jín kue̱ꞌe̱ꞌ víꞌí ya̱ tétáꞌán ránú.

²¹ Chi ñúꞌún iniꞌ ráníꞌ ya̱ sáꞌá na̱a̱ꞌ ránꞌ, jee nsú kua̱chi kuitɨꞌ ichinúúnꞌ maa I̱toꞌoꞌ‑ó ni, chisaꞌ suni ne̱ ichinúúnꞌ rá ñɨvɨ ranika̱ꞌ.

²² Jee suni chúichí ránꞌ inka ka̱ꞌ ñaniꞌ‑ó kua̱jiaaꞌ re̱ꞌ jín ráa. Jee kue̱ꞌe̱ꞌ íchí stúvi re̱ꞌ ya̱ ñúkáñá iniꞌ re̱ꞌ saꞌá re̱ꞌ kue̱ꞌe̱ꞌ tiñu Ndiosíꞌ. Jee vitan jee víꞌí ka̱ꞌ ñúkáñá iniꞌ re̱ꞌ saꞌá re̱ꞌ tiñu yaꞌá, chi ne̱ yuchí kúneí víꞌí iniꞌ re̱ꞌ jie̱ꞌe̱ꞌ ya̱ sáꞌá ránoꞌó.

²³ Jee jie̱ꞌe̱ꞌ Tito káchíꞌ ni̱ꞌ ya̱ kútáꞌán re̱ꞌ jín nuꞌuꞌ jín ya̱ kúvi re̱ꞌ te̱e táꞌán sátíñú nkáá jín nuꞌuꞌ ví re̱ꞌ nu̱u̱nꞌ ya̱ kúvi ya̱ váꞌa ránoꞌó. Jee jie̱ꞌe̱ꞌ rá ñaniꞌ‑ó yaꞌá, kúvi ráa te̱e ya̱ nchu̱ichí rá grupo rá ñɨvɨ ya̱ kúneí iniꞌ ráa Cristo. Jee na̱sa kua̱ꞌ sáꞌá ráa tiñu Cristo stúvi‑i ya̱ máá viiꞌ kúñáꞌnú ví Cristo.

²⁴ Jee saáva stúvi rán nu̱u̱nꞌ rá te̱e vá ya̱ ñúnúunꞌ nijia rán rá ñɨvɨ Ndiosíꞌ, jee suꞌva stúvi rán na̱ jie̱ꞌe̱ꞌ kúvi ya̱ káꞌánꞌ téyɨ́ɨ́ ráníꞌ jie̱ꞌe̱ꞌ ránoꞌó jee suꞌva tu̱vi vá ichinúúnꞌ rá grupo ñɨvɨ kúneí iniꞌ ráa Cristo.