2 Corintios 6 - Mixteco del suroeste de Tlaxiaco Oaxaca

¹ Jee saáva ránuꞌuꞌ, táꞌán sátíñú kúvi ránꞌ jín Ndiosíꞌ, jee jíkánꞌ táꞌvíꞌ ránꞌ nu̱u̱nꞌ ránoꞌó ya̱ koto níꞌínꞌ ka̱ꞌá rán ya̱ ma̱ni̱ꞌ iniꞌ Ndiosíꞌ néꞌyá re̱ꞌ ránoꞌó.

² Chi káchíꞌ Ndiosíꞌ nu̱u̱nꞌ Tutuꞌ Ííꞌ níso tu̱ꞌun re̱ꞌ ya̱: Maá tiempúꞌ ñani ni̱ꞌ jee ntɨɨn kuéntáꞌ ni̱ꞌ tu̱ꞌun ni̱ka̱nꞌ táꞌvíꞌ nú. Jee maá ki̱vɨ̱ꞌ ya̱ nsi̱káku ni̱ꞌ ñɨvɨ nu̱u̱nꞌ kua̱chi‑i, jee nchi̱neí ni̱ꞌ noꞌó. Tɨɨn kuéntáꞌ rán, vitan ví maá tiempúꞌ ya̱ ñani Ndiosíꞌ. Tɨɨn kuéntáꞌ rán, vitan ví maá ki̱vɨ̱ꞌ ya̱ sikáku re̱ꞌ ñɨvɨ.

³ Jee ni ntu̱náꞌ sáꞌá ráníꞌ sáva ntu xinínkava ránꞌ ñɨvɨ sáva ntu kasɨꞌ ránꞌ tɨɨn ráa Tu̱ꞌun Ndiosíꞌ, sáva nku̱ví chikua̱chi ráa si̱kɨ̱ꞌ tiñu sáꞌá ránꞌ nu̱u̱nꞌ Ndiosíꞌ.

⁴ Chisaꞌ, nta̱ká nu̱u̱nꞌ ya̱ kúvi, stúvi ránꞌ ya̱ kúvi ránꞌ musúꞌ ya̱ sátíñú nu̱u̱nꞌ Ndiosíꞌ, jie̱ꞌe̱ꞌ ya̱ kúníꞌin ránꞌ íñɨ́ ni̱ꞌin rán jín Cristo, jín nu̱u̱nꞌ ya̱ kúmániꞌ nu̱u̱nꞌ ránꞌ, jín nu̱u̱nꞌ ya̱ víjí sáꞌá‑a nu̱u̱nꞌ ránꞌ,

⁵ jín nu̱u̱nꞌ ya̱ njia̱ꞌa ñɨvɨ ránuꞌuꞌ, jín nu̱u̱nꞌ ya̱ nchiꞌi ñɨvɨ ránuꞌuꞌ iniꞌ veka̱a, jín nu̱u̱nꞌ ya̱ nnenta kue̱ꞌe̱ꞌ ñɨvɨ si̱kɨ̱ꞌ ránuꞌuꞌ ya̱ nukú ráa tuntíxín jín ránꞌ, jín nu̱u̱nꞌ tiñu véi nsa̱ꞌá ránꞌ, jín nu̱u̱nꞌ kue̱ꞌe̱ꞌ íchí ntu nkixiꞌ va̱ꞌa ránꞌ, jín nu̱u̱nꞌ ya̱ nneeꞌ niteꞌ ránꞌ,

⁶ jín jie̱ꞌe̱ꞌ ninuꞌun jiáꞌnu ránꞌ, jín jie̱ꞌe̱ꞌ jíníꞌ va̱ꞌa ránꞌ sáni kuíni Ndiosíꞌ, jín jie̱ꞌe̱ꞌ ya̱ káꞌnú víꞌí íyó iniꞌ ránꞌ jiéꞌnéꞌ iniꞌ ránꞌ nu̱u̱nꞌ tu̱nóꞌó va̱ji si̱kɨ̱ꞌ ránꞌ, jín jie̱ꞌe̱ꞌ kúváꞌa iniꞌ ránꞌ jín ñɨvɨ, jín jie̱ꞌe̱ꞌ yɨ́ꞌɨ́ Ta̱chi̱ꞌ Ííꞌ iniꞌ ránuꞌuꞌ, jín jie̱ꞌe̱ꞌ saɨn ñúꞌún iniꞌ ránꞌ ñúnúunꞌ ránꞌ ñɨvɨ,

⁷ jín jie̱ꞌe̱ꞌ káꞌánꞌ ránꞌ ya̱ naáꞌ, jín jie̱ꞌe̱ꞌ sátíñú fuersáꞌ ííꞌ Ndiosíꞌ jín ránuꞌuꞌ, jín jie̱ꞌe̱ꞌ jiáꞌnu na̱a̱ꞌ ránꞌ nu̱u̱nꞌ Ndiosíꞌ, jín jie̱ꞌe̱ꞌ ya̱ ntaji Ndiosíꞌ nu̱u̱nꞌ ránꞌ sáva saꞌá ránꞌ tiñu na̱a̱ꞌ sáva nama ránꞌ tu̱ꞌun na̱a̱ꞌ kuáꞌá sátín.

⁸ Jee suni stúvi ránꞌ sáá sátíñú ránꞌ nu̱u̱nꞌ Ndiosíꞌ sáá sáꞌá ñáꞌnú ñɨvɨ nu̱u̱nꞌ ránuꞌuꞌ, jín sáá jiáꞌa ráa tu̱ꞌun kánuun nu̱u̱nꞌ ránuꞌuꞌ, jín sáá káꞌánꞌ va̱ꞌa ñɨvɨ jie̱ꞌe̱ꞌ ránꞌ, jín sáá káꞌánꞌ niva̱ꞌa ñɨvɨ jie̱ꞌe̱ꞌ ránꞌ, jín sáá káchíꞌ ñɨvɨ ya̱ te̱e xínáꞌví ví ránꞌ sú te̱e na̱a̱ꞌ ví ránꞌ,

⁹ jín sáá káchíꞌ ñɨvɨ ya̱ ntu jíníꞌ ráa ránuꞌuꞌ, soo jíníꞌ va̱ꞌa Ndiosíꞌ ránuꞌuꞌ, jín sáá káchíꞌ ráa ya̱ jíꞌíꞌ ránꞌ, jee tɨɨn kuéntáꞌ ránꞌ ya̱ tékúꞌ i̱i̱ꞌ ránꞌ, jín sáá xínóꞌo ráa ránuꞌuꞌ, soo ntu ñaꞌniꞌ ráa ránuꞌuꞌ,

¹⁰ jín sáá kúkuéká iniꞌ ránꞌ, soo sukuáni íyó tu̱ꞌun kúsɨ́ɨꞌ iniꞌ ánímaꞌ ránꞌ, jín te̱e láꞌví kúvi ránꞌ, soo jiáꞌa ránꞌ nu̱u̱nꞌ kue̱ꞌe̱ꞌ ñɨvɨ ya̱ yɨ́yáꞌvi ka̱ꞌ ya̱ jiáꞌa Ndiosíꞌ, jín sáá ni ntu̱náꞌ kúmí ránꞌ, soo kúmí ránꞌ nɨꞌɨ ya̱ yɨ́yáꞌvi ka̱ꞌ ya̱ níꞌínꞌ ránꞌ nu̱u̱nꞌ Ndiosíꞌ.

¹¹ Jee ránoꞌó ñanitáꞌán ya̱ nééꞌ ñuunꞌ Corinto, núne yuꞌú ráníꞌ kájí káchíꞌ ránꞌ nu̱u̱nꞌ ránoꞌó nɨꞌɨ ya̱ naáꞌ, jee nsine ránꞌ nɨꞌɨ ánímaꞌ ránꞌ nu̱u̱nꞌ ránoꞌó.

¹² Jee ntu jiásɨ́ꞌ ráníꞌ nu̱u̱nꞌ ánímaꞌ ránoꞌó ya̱ kunu̱u̱nꞌ rán ránuꞌuꞌ, chisaꞌ sukuán jiásɨ́ꞌ ránú ánímaꞌ maárán.

¹³ Soo káchíꞌ ni̱ꞌ nu̱u̱nꞌ ránoꞌó kuéntáꞌ nu̱u̱nꞌ se̱ꞌya ni̱ꞌ, ya̱ nasaꞌá ránú sáni nsa̱ꞌá ráníꞌ nu̱u̱nꞌ ránoꞌó, jee sine rán ánímaꞌ rán nu̱u̱nꞌ ránuꞌuꞌ.

Kúvi‑ó veñu̱ꞌun Ndiosíꞌ tékúꞌ

¹⁴ Koto síkánitáꞌán rán maárán jín rá ñɨvɨ ya̱ ntu ínúꞌ iniꞌ ráa Cristo sáva kueꞌnu rán sáni ya̱ ntu kunuún iniꞌ jín Tu̱ꞌun Ndiosíꞌ, chi sukuán kúvi kuéntáꞌ néta̱ꞌán sɨ́ɨ́n sɨ́ɨ́n nu̱u̱nꞌ u̱vi̱ꞌ kitɨ ɨɨn yugúꞌ. ¿Soo na̱sa kúvi kanitáꞌán rá ñɨvɨ kínóo na̱a̱ꞌ nu̱u̱nꞌ Ndiosíꞌ jín rá ñɨvɨ ntu kínóo na̱a̱ꞌ ráa nu̱u̱nꞌ re̱ꞌ rúja? Jee, ¿na̱sa kanitáꞌán ñuꞌunꞌ jín ya̱ neenꞌ rúja?

¹⁵ Jee, ¿á kúvi koo nuún iniꞌ Cristo jín Belial, ya̱ [suni naní Satanás] rúja? Jee, ¿ná kúvi ya̱ ketáꞌán iniꞌ ñɨvɨ ya̱ kúneí iniꞌ ráa Cristo jín ñɨvɨ ya̱ ntu kúneí iniꞌ ráa re̱ꞌ, rúsa?

¹⁶ Jee, ¿ná kúvi ya̱ kétáꞌán veñu̱ꞌun Ndiosíꞌ jín rá nantíñú ya̱ nsú Ndiosíꞌ ví‑i ya̱ néñu̱ꞌun ñɨvɨ rúja? Chi maáó kúvi‑ó veñu̱ꞌun Ndiosíꞌ tékúꞌ, chi yɨ́ꞌɨ́ re̱ꞌ iniꞌ‑ó, sáni nkachiꞌ re̱ꞌ: Kuneeꞌ ni̱ꞌ nteñu ráa jee kakanuun ni̱ꞌ satíñú ni̱ꞌ iniꞌ ráa. Jee maáníꞌ kuvi Ndiosíꞌ ráa. Jee suviráa kuvi ñɨvɨ maáníꞌ.

¹⁷ Jee suni sukuán nta̱túníꞌ I̱toꞌoꞌ‑ó: Saáva kene ránú nteñu ráa, jee saꞌá sɨ́ɨ́n rán maárán, jee koto na̱ kéꞌí rán rá tiñu ya̱ ntu̱ví íyó ninuꞌun. Jee ku̱ꞌvayuꞌú ni̱ꞌ ya̱ kuvi rán ñɨvɨ ni̱ꞌ.

¹⁸ Jee kuvi ni̱ꞌ Tátáꞌ rán, jee kuvi rán rá se̱ꞌya yɨ́ɨ́ ni̱ꞌ jín rá se̱ꞌya sɨ́ꞌɨ́ ni̱ꞌ, káchíꞌ I̱toꞌoꞌ‑ó Ndiosíꞌ ya̱ níso nɨꞌɨ fuersáꞌ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó.