2 Corintios 3 - Mixteco del suroeste de Tlaxiaco Oaxaca

Tu̱ꞌun jie̱ꞌe̱ꞌ tratúꞌ jiáá

¹ ¿Á jiáni iniꞌ ránú ya̱ nákijiéꞌé tuku ráníꞌ ya̱ nákutíñú va̱ꞌa ránꞌ jie̱ꞌe̱ꞌ maáránꞌ rúja? Áxí, ¿á íyó taji ránꞌ nu̱u̱nꞌ ránoꞌó tutuꞌ ya̱ nákutíñú va̱ꞌa‑a jie̱ꞌe̱ꞌ ránuꞌuꞌ rúja?, áxí, ¿á íyó taji ránú tutuꞌ sukuán nu̱u̱nꞌ ránuꞌuꞌ, sáni jíniñúꞌún sava inka ñɨvɨ rúja?

² Soo ntu̱ví, chi ránoꞌó vá kúvi kuéntáꞌ ɨɨn tutuꞌ ya̱ nákutíñú va̱ꞌa‑a jie̱ꞌe̱ꞌ ránuꞌuꞌ. [Ñúꞌún iniꞌ ráníꞌ na̱sa kúneí va̱ꞌa iniꞌ ránú Jesús níkɨ́nꞌ rán re̱ꞌ] kuéntáꞌ ɨɨn tutuꞌ ya̱ nééꞌ iniꞌ ánímaꞌ ráníꞌ. Jee kuvi kuniꞌ nɨꞌɨ rá ñɨvɨ maa jee sukuán kuéntáꞌ kúvi káꞌvi ráa maa.

³ Chi nijinꞌ túvi ya̱ kúvi ránú kuéntáꞌ ɨɨn tutuꞌ ya̱ ntee maá Cristo, jie̱ꞌe̱ꞌ tiñu re̱ꞌ ya̱ nsa̱ꞌá ráníꞌ nu̱u̱nꞌ ránoꞌó. Soo nsú jín ɨɨn tutuꞌ jín tinta lapíꞌ ntee re̱ꞌ maa, chisaꞌ jín Ta̱chi̱ꞌ Ííꞌ Ndiosíꞌ, ya̱ tékúꞌ re̱ꞌ. Jee ni ntu̱ví ntée re̱ꞌ maa nu̱u̱nꞌ yu̱u̱ꞌ tiáxín [kuéntáꞌ ntee Ndiosíꞌ rá tu̱ꞌun ya̱ nta̱túníꞌ re̱ꞌ jee njia̱ꞌa re̱ꞌ maa nu̱u̱nꞌ Moisés, tióꞌ chíji]. Chisaꞌ ntee re̱ꞌ maa iniꞌ ánímaꞌ ñɨvɨ.

⁴ Jee káchíꞌ ráníꞌ sukuán, chi ne̱ yuchí kúneí iniꞌ ránꞌ Ndiosíꞌ sáꞌá Cristo.

⁵ Jee nsú nu̱u̱nꞌ ránuꞌuꞌ kéne ya̱ tu̱ꞌva ráníꞌ, saáva ntu kúvi kani iniꞌ rán ya̱ váji ne̱ nu̱u̱nꞌ maáránꞌ ya̱ kee kuneí ránꞌ saꞌá ránꞌ na̱ni tiñu táji Ndiosíꞌ. Chisaꞌ ne̱ nu̱u̱nꞌ maá Ndiosíꞌ va̱ji ya̱ tu̱ꞌva ránꞌ kuneí ránꞌ sáꞌá ránꞌ maa.

⁶ Chi suni maáréꞌ ví ya̱ nsa̱ꞌá re̱ꞌ ya̱ tu̱ꞌva ránꞌ sátíñú ránꞌ nu̱u̱nꞌ re̱ꞌ, jie̱ꞌe̱ꞌ tratúꞌ jiáá ya̱ ñakɨnꞌ Ndiosíꞌ na̱ja kɨꞌɨ ñɨvɨ nu̱u̱nꞌ re̱ꞌ. Jee tratúꞌ jiáá yaꞌá nsú ley ví‑i ya̱ ntee re̱ꞌ sáva tatúníꞌ re̱ꞌ nu̱u̱nꞌ rá ñɨvɨ. Chisaꞌ tratúꞌ jiáá ví ya̱ táji re̱ꞌ Ta̱chi̱ꞌ Ííꞌ re̱ꞌ nu̱u̱nꞌ‑ó sáva kɨꞌɨ‑ɨ iniꞌ ánímaꞌ‑ó. Chi ley ya̱ ntee nu̱u̱nꞌ tutuꞌ, jee síjíta‑a yó ya̱ kuéntáꞌ níꞌiꞌ‑ó nu̱u̱nꞌ Ndiosíꞌ. Soo Ta̱chi̱ꞌ Ííꞌ re̱ꞌ ví ya̱ xítékúꞌ‑u yó nɨ́ɨ́nkání nu̱u̱nꞌ re̱ꞌ.

⁷ Jee ley vá ya̱ sáꞌá‑a ya̱ kuéntáꞌ níꞌiꞌ ñɨvɨ nu̱u̱nꞌ Ndiosíꞌ, jee ntee Ndiosíꞌ maa nu̱u̱nꞌ yu̱u̱ꞌ tiáxín jee njia̱ꞌa re̱ꞌ maa nu̱u̱nꞌ Moisés, jee viiꞌ kúñáꞌnú ley vá ya̱ nkenta nu̱u̱nꞌ Moisés ya̱ ñanu̱te̱ꞌ nasɨ́kuitɨꞌ nu̱u̱nꞌ re̱ꞌ, ya̱ ni ntu̱ví nkúvi kune̱ꞌyá va̱ꞌa rá ñɨvɨ Israel nu̱u̱nꞌ re̱ꞌ. Saájee kuééni kuééni na̱ꞌva̱ꞌ nuva vá nu̱u̱nꞌ re̱ꞌ. Jee retú maá ñáꞌnú nasɨ́kuitɨꞌ kúvi ley vá ya̱ sáꞌá‑a ya̱ kuéntáꞌ níꞌiꞌ ñɨvɨ nu̱u̱nꞌ Ndiosíꞌ,

⁸ soo saꞌ víꞌí káꞌ viiꞌ kúñáꞌnú nasɨ́kuitɨꞌ tratúꞌ jiáá ya̱ sátíñú Ta̱chi̱ꞌ Ííꞌ re̱ꞌ iniꞌ‑ó.

⁹ Chi retú viiꞌ kúñáꞌnú nasɨ́kuitɨꞌ tiñu ya̱ síjíta‑a rá ñɨvɨ, soo saꞌ víꞌí káꞌ viiꞌ kúñáꞌnú nasɨ́kuitɨꞌ ka̱ꞌ tiñu ya̱ sííyo re̱ꞌ kua̱chi‑ó sáva ku̱ꞌvayuꞌú re̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ.

¹⁰ Chi sú ley vá nku̱ñáꞌnú víꞌí‑i ne̱ tiempúꞌ yukuán, jee ntu̱ví kúñáꞌnú‑u, nsú káꞌ kua̱ꞌ viiꞌ kúñáꞌnú nasɨ́kuitɨꞌ ka̱ꞌ tratúꞌ jiáá ñakɨnꞌ Ndiosíꞌ.

¹¹ Jee retú nkenta ru ley vá nku̱ñáꞌnú nasɨ́kuitɨꞌ‑ɨ ya̱ núun‑u vitan ne̱ jíta‑a, soo maá kúñáꞌnú nasɨ́kuitɨꞌ ka̱ꞌ ví tratúꞌ jiáá, ya̱ kínóo‑o nɨ́ɨ́nkání.

¹² Jee jie̱ꞌe̱ꞌ íyó kutú tu̱neí iniꞌ‑ó ya̱ saꞌá Ndiosíꞌ sukuán, jee saáva íyó neí iniꞌ‑ó.

¹³ Jee ntu̱ví sáꞌá ránꞌ kuéntáꞌ nsa̱ꞌá Moisés, ya̱ ñasɨꞌ re̱ꞌ nu̱u̱nꞌ re̱ꞌ jín ɨɨn saꞌma, sáva nku̱néꞌyá va̱ꞌa rá ñɨvɨ tataꞌ Israel na̱sa kua̱ꞌ náꞌváꞌ nuva jiánu̱te̱ꞌ nu̱u̱nꞌ re̱ꞌ ya̱ kua̱naanꞌ‑a.

¹⁴ Soo yúú antúníꞌ rá ñɨvɨ vá. Chi ne̱ vitan jee sáá káꞌvi ráa tratúꞌ túꞌú ñakɨnꞌ Ndiosíꞌ ne̱ yanaꞌán, kuéntáꞌ kínóo saꞌma vá jiásɨ́ꞌ antúníꞌ ráa jee ntu kuíyo‑o, chi kua̱chi kuíyo saꞌma vá sáá kɨꞌɨ ɨɨn ñɨvɨ nu̱u̱nꞌ Cristo.

¹⁵ Soo ne̱ vitan, chi sáá káꞌvi ráa tratúꞌ túꞌú vá ya̱ ntee Moisés, jee kuéntáꞌ retánꞌ jiásɨ́ꞌ ɨɨn saꞌma nu̱u̱nꞌ ánímaꞌ ráa.

¹⁶ Soo sáá ki̱vɨ ñɨvɨ nu̱u̱nꞌ I̱toꞌoꞌ‑ó, saájee kuéntáꞌ kuíyo saꞌma vá ya̱ ñasɨꞌ nu̱u̱nꞌ antúníꞌ ñɨvɨ vá.

¹⁷ Chi I̱toꞌoꞌ vá ví Ta̱chi̱ꞌ Ííꞌ. Jee nu̱u̱nꞌ íyó Ta̱chi̱ꞌ Ííꞌ I̱toꞌoꞌ‑ó iniꞌ ánímaꞌ ñɨvɨ, jee nákuíñɨꞌ núne ñɨvɨ vá nu̱u̱nꞌ xi̱ntíín ley vá.

¹⁸ Jee jie̱ꞌe̱ꞌ sukuán, váchóo nta̱ká maáó kuéntáꞌ ntu ka̱ꞌ násɨ́ꞌ nu̱u̱nꞌ‑ó. Chi kúvi‑ó kuéntáꞌ ɨɨn espejo néꞌyá‑ó ya̱ viiꞌ kúñáꞌnú I̱toꞌoꞌ‑ó jee jiánu̱te̱ꞌ‑ó nuva I̱toꞌoꞌ‑ó, chi maa Ta̱chi̱ꞌ Ííꞌ re̱ꞌ sáꞌá ya̱ ne̱ jíꞌín‑ó viiꞌ kua̱ꞌa̱nꞌ kua̱ꞌa̱nꞌ kúvi‑ó sánikua̱ꞌ viiꞌ kúñáꞌnú I̱toꞌoꞌ‑ó, chi ya̱ viiꞌ kua̱ꞌa̱nꞌ sáma re̱ꞌ iniꞌ‑ó sáva koo‑ó kuéntáꞌ íyó maá I̱toꞌoꞌ‑ó. Suꞌva sáꞌá I̱toꞌoꞌ‑ó ya̱ maáréꞌ ví Ta̱chi̱ꞌ Ííꞌ.