2 Corintios 13 - Mixteco del suroeste de Tlaxiaco Oaxaca

Nu̱u̱nꞌ nɨ́ꞌɨ stúꞌva Pablo nu̱u̱nꞌ rá ñɨvɨ Corinto jee jiáꞌa re̱ꞌ tu̱ꞌun káva̱ꞌa nu̱u̱nꞌ ráa

¹ Yaꞌá kúvi ya̱ uníꞌ íchí ya̱ kua̱jiane̱ꞌyá ni̱ꞌ ránoꞌó. Jee íyó koo u̱vi̱ꞌ áxí u̱ni̱ꞌ ñɨvɨ ya̱ stúvi ráa ya̱ naáꞌ sáva kuna̱a̱ꞌ iniꞌ rán nta̱ká tu̱ꞌun xíkóñáꞌán ñɨvɨ inka ñɨvɨ.

² Sáni ya̱ nkachiꞌ ni̱ꞌ sáá nneeꞌ ni̱ꞌ jín rán ya̱ uvíꞌ íchí, jee vitan sáá íyó íká ni̱ꞌ nu̱u̱nꞌ rán, jee suni sukuán stúꞌva ya̱chi̱ꞌ ni̱ꞌ nu̱u̱nꞌ rá ñɨvɨ rán ya̱ nsa̱ꞌá ráa kua̱chi, jín nu̱u̱nꞌ nta̱ká rá inka rán ka̱ꞌ, ya̱ sáá kenta tuku ni̱ꞌ i̱ña̱ꞌ, jee nkɨ́netu ni̱ꞌ jín rá nsa̱ꞌá kua̱chi.

³ Nu̱u̱nꞌ nánukú rán ya̱ naáꞌ ya̱ jiátíñú Cristo nuꞌuꞌ sáva káꞌánꞌ re̱ꞌ tu̱ꞌun re̱ꞌ. Suvire̱ꞌ ntu táyáꞌ iniꞌ re̱ꞌ sáá sáꞌá re̱ꞌ tiñu nu̱u̱nꞌ rán. Chisaꞌ íyó nasɨ́kuitɨꞌ fuersáꞌ ííꞌ níso re̱ꞌ jín tiñu sáꞌá re̱ꞌ nteñu rán.

⁴ Chi máá naáꞌ nijia ya̱ níꞌiꞌ re̱ꞌ nu̱u̱nꞌ kurúsiꞌ jie̱ꞌe̱ꞌ ña̱netuꞌ re̱ꞌ ya̱ ntayaꞌ iniꞌ re̱ꞌ. Soo vitan fuersáꞌ ííꞌ níꞌin níso Ndiosíꞌ sáꞌá‑a ya̱ tékúꞌ re̱ꞌ. Jee suni sukuán táyáꞌ iniꞌ ráníꞌ kuéntáꞌ Cristo jie̱ꞌe̱ꞌ yɨ́ꞌɨ́ ránꞌ nu̱u̱nꞌ re̱ꞌ, soo suni kutekuꞌ ránꞌ jín re̱ꞌ sáꞌá fuersáꞌ ííꞌ níso Ndiosíꞌ ya̱ táji re̱ꞌ nu̱u̱nꞌ ránꞌ sáva saꞌá ránꞌ tiñu re̱ꞌ nu̱u̱nꞌ ránú.

⁵ Kototúníꞌ rán maárán, sáva kuniꞌ rán retú máá naáꞌ nijia kúneí iniꞌ rán Cristo. Kototúníꞌ rán maárán. ¿Á ntu tɨ́ɨn kuéntáꞌ rán ya̱ yɨ́ꞌɨ́ Cristo iniꞌ rán rúja? Áxí, ¿á ni̱ta rán ntu kéne na̱a̱ꞌ ya̱ máá naáꞌ nijia kúneí iniꞌ rán Cristo rúja?

⁶ Soo íyó tu̱ꞌun neí iniꞌ ni̱ꞌ ya̱ kukáꞌnú iniꞌ ránú ya̱ kéne na̱a̱ꞌ ráníꞌ ya̱ yɨ́ꞌɨ́ nijia Cristo iniꞌ ránuꞌuꞌ jee ntu níta ránꞌ ya̱ jítotúníꞌ ránú ránuꞌuꞌ.

⁷ Jee jíkánꞌ táꞌvíꞌ ráníꞌ nu̱u̱nꞌ Ndiosíꞌ, ya̱ ni nsáꞌá ránú ni ɨɨn ya̱ níváꞌa. Soo jíkánꞌ táꞌvíꞌ ráníꞌ suꞌva nsú sáva túvi ráníꞌ nu̱u̱nꞌ rán ya̱ kéne na̱a̱ꞌ ráníꞌ, chisaꞌ sáva saꞌá ránú ya̱ váꞌa, súnika̱ꞌ jiáni iniꞌ ránú ya̱ ránuꞌuꞌ ntu kéne na̱a̱ꞌ ráníꞌ.

⁸ Chi ntu kúvi saꞌá ráníꞌ si̱kɨ̱ꞌ tu̱ꞌun na̱a̱ꞌ Ndiosíꞌ, chisaꞌ kua̱chi sátíñú ránꞌ nu̱u̱nꞌ tu̱ꞌun na̱a̱ꞌ re̱ꞌ.

⁹ Chi kúsɨ́ɨꞌ iniꞌ ánímaꞌ ránꞌ sáá táyáꞌ iniꞌ ráníꞌ jee ránoꞌó íyó fuersáꞌ ránú ya̱ kúneí iniꞌ rán Cristo. Jee suni sukuán jíkánꞌ táꞌvíꞌ ránꞌ yaꞌá nu̱u̱nꞌ Ndiosíꞌ sáva kenta kujia ránú kuneí noo iniꞌ rán Cristo.

¹⁰ Saáva tée ni̱ꞌ rá tu̱ꞌun yaꞌá ni íyó íká ni̱ꞌ nu̱u̱nꞌ rán, sáva nkóo xichiꞌ ni̱ꞌ ránoꞌó sánikua̱ꞌ tiñu níso ni̱ꞌ, sáá kuneeꞌ ni̱ꞌ jín rán. Ntaji I̱toꞌoꞌ‑ó tiñu vá nu̱u̱nꞌ ni̱ꞌ, sáva sikújia ni̱ꞌ iniꞌ ránoꞌó, jee nsú sáva xináánꞌ ni̱ꞌ ránoꞌó.

¹¹ Nu̱u̱nꞌ nɨ́ꞌɨ, tátúníꞌ ni̱ꞌ nu̱u̱nꞌ ránoꞌó ñanitáꞌán ya̱, na̱ ka̱ꞌ kusɨ̱ɨ̱ꞌ iniꞌ ánímaꞌ rán, na̱ ka̱ꞌ kujia noo iniꞌ rán nu̱u̱nꞌ Cristo ne̱ kuna̱a̱ꞌ rán, jee na̱ ka̱ꞌ tɨɨn kuéntáꞌ rán rá tu̱ꞌun ya̱ xínániꞌvɨꞌ ni̱ꞌ iniꞌ rán, jee na̱ ka̱ꞌ nuún kuꞌun iniꞌ rán, jee na̱ ka̱ꞌ ñunkúún kuneeꞌ rán jín ɨɨn inka táꞌán rán. Jee maá Ndiosíꞌ, ya̱ sáꞌá ya̱ kunu̱u̱nꞌ‑ó ɨɨn inka‑ó jín ya̱ kuneeꞌ ñunkúún‑ó jín ɨɨn inka‑ó, jee koo re̱ꞌ jín rán.

¹² Jee kaꞌanꞌ rán tu̱ꞌun káꞌánꞌ va̱ꞌa teyuꞌú yɨ́ñúꞌún rán jín ɨɨn inka rá táꞌán rán.

¹³ Jee ntáká rá ñanitáꞌán‑ó yaꞌá ya̱ nsa̱ꞌá sɨ́ɨ́n Ndiosíꞌ sáva kɨꞌɨ ráa nu̱u̱nꞌ Cristo, jee táji ráa tu̱ꞌun káva̱ꞌa nu̱u̱nꞌ ránoꞌó.

¹⁴ Jee na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús ya̱ kúvi Cristo kune̱ꞌyá re̱ꞌ nta̱ká ránoꞌó, jín ya̱ kunu̱u̱nꞌ Ndiosíꞌ nta̱ká rán, jín ya̱ koo nkáꞌnú Ta̱chi̱ꞌ Ííꞌ Ndiosíꞌ jín rán. Sukuán koo. Amén.