2 Corintios 1 - Mixteco del suroeste de Tlaxiaco Oaxaca

Ntee Pablo tutuꞌ nu̱u̱nꞌ rá ñɨvɨ ya̱ kúneí iniꞌ ráa Cristo, ya̱ nééꞌ ráa ñuunꞌ Corinto

¹ Nuꞌuꞌ Pablo, Cristo Jesús nte̱tíñú re̱ꞌ nuꞌuꞌ, kuniso ni̱ꞌ tiñu apóstol ya̱ chúichí re̱ꞌ nuꞌuꞌ sáva stúvi ni̱ꞌ tu̱ꞌun re̱ꞌ, sáni kuíni Ndiosíꞌ. Nuꞌuꞌ jín ñaniꞌ‑ó Timoteo táji ránꞌ tutuꞌ yaꞌá nu̱u̱nꞌ ránoꞌó, ya̱ kúvi ñɨvɨ Ndiosíꞌ ya̱ jínúꞌ iniꞌ rán Jesús, ya̱ nééꞌ rán ñuunꞌ Corinto, ya̱ kútútú rán yukuán. Jee suni táji ránꞌ maa nu̱u̱nꞌ ntáká rá ñɨvɨ ya̱ nsásɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ, ya̱ nééꞌ ráa ntáká rá ñuunꞌ sánitɨ́ɨn Acaya.

² Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ kúvi Cristo kune̱ꞌyá ráa ránoꞌó jín ya̱ kuneeꞌ va̱ꞌa rán saꞌá ráa.

Tu̱nóꞌó nóꞌo Pablo

³ Nákuetúꞌún‑ó Ndiosíꞌ, ya̱ kúvi re̱ꞌ Ndiosíꞌ nu̱u̱nꞌ I̱toꞌoꞌ‑ó Jesús ya̱ kúvi Cristo jee Tátáꞌ Jesús kúvi re̱ꞌ. Kúvi re̱ꞌ Tátáꞌ‑ó ya̱ kúnáꞌví iniꞌ re̱ꞌ néꞌyá re̱ꞌ yó, jee kúvi re̱ꞌ Ndiosíꞌ ya̱ sukuáni násáneí re̱ꞌ iniꞌ‑ó.

⁴ Chi suvire̱ꞌ násaváꞌa re̱ꞌ iniꞌ‑ó nu̱u̱nꞌ nta̱ká rá tu̱nóꞌó nóꞌo‑ó, sáva suni maáó ranika̱ꞌ kuvi nasaváꞌa‑ó iniꞌ rá ñɨvɨ ya̱ nóꞌo rá na̱ni tu̱nóꞌó. Chi nasaváꞌa‑ó iniꞌ ráa sánikua̱ꞌ nna̱saváꞌa Ndiosíꞌ iniꞌ‑ó.

⁵ Chi sáni nnoꞌo víꞌí Cristo tu̱nóꞌó, suni sukuán nóꞌo‑ó tu̱nóꞌó jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ re̱ꞌ. Jee retú kúkueꞌeꞌ víꞌí tu̱nóꞌó nóꞌo‑ó vá, jee suni sukuán kúkueꞌeꞌ víꞌí násaváꞌa Ndiosíꞌ iniꞌ‑ó jie̱ꞌe̱ꞌ ya̱ sáꞌá Cristo.

⁶ Saájee, retú sáá nóꞌo ráníꞌ tu̱nóꞌó, jee nóꞌo ránꞌ jie̱ꞌe̱ꞌ táji ránꞌ Tu̱ꞌun Ndiosíꞌ sáva nasáneí ránꞌ iniꞌ ránú, jín sáva xinánitáꞌvíꞌ Ndiosíꞌ ránoꞌó jie̱ꞌe̱ꞌ kua̱chi ránoꞌó. Áxí retú sáá nasáneí iniꞌ ráníꞌ, jee íyó sukuán sáva nasáneí Ndiosíꞌ iniꞌ ránoꞌó [jín ya̱ nanitáꞌvíꞌ rán], jee sukuán sáꞌá‑a ya̱ kuiñɨ ni̱ꞌin rán nu̱u̱nꞌ Cristo jee keꞌneꞌ iniꞌ rán jín tu̱nóꞌó kunoꞌo rán kua̱ꞌ nóꞌo ránuꞌuꞌ.

⁷ Jee íyó kutú tu̱ꞌun neí iniꞌ ráníꞌ ya̱ kuiñɨ ni̱ꞌin ránú, chi jíníꞌ ráníꞌ ya̱ sánikua̱ꞌ suni ne̱ taꞌanꞌ ránoꞌó nóꞌo rán tu̱nóꞌó jín ránuꞌuꞌ, jee suni sukuán ranika̱ꞌ nasáneí Ndiosíꞌ iniꞌ ne̱ jíꞌín ránoꞌó jín ránuꞌuꞌ.

⁸ Ránoꞌó ñanitáꞌán, kuíni ráníꞌ ya̱ kukáꞌnú iniꞌ ránú jie̱ꞌe̱ꞌ rá tu̱nóꞌó ya̱ nkiji si̱kɨ̱ꞌ ránuꞌuꞌ ni nneeꞌ ránꞌ ichi rá ñuunꞌ tɨ́ɨn Asia. Chi nnoꞌo ránꞌ tu̱nóꞌó maá ve̱i nasɨ́kuitɨꞌ nsú kua̱ꞌ kuneí ránꞌ ka̱ꞌ jín fuersáꞌ ránꞌ, ya̱ ni ntu̱ví níyo ka̱ꞌ tu̱neí iniꞌ ránꞌ ya̱ kutekuꞌ ránꞌ.

⁹ Chi nkuvi iniꞌ ránꞌ kuéntáꞌ nsa̱náaꞌ si̱kɨ̱ꞌ ránuꞌuꞌ ya̱ kuviꞌ ránꞌ. Soo nkuvi sukuán sáva ntu kúneí iniꞌ‑ó maáó, chisaꞌ sáva kuneí iniꞌ‑ó Ndiosíꞌ, ya̱ suvire̱ꞌ ví ya̱ nástekúꞌ re̱ꞌ rá ni̱yɨ.

¹⁰ Suvire̱ꞌ ví ya̱ nsi̱káku re̱ꞌ ránuꞌuꞌ nu̱u̱nꞌ tu̱nóꞌó manéátúꞌún kuviꞌ rán. Jee sikáku re̱ꞌ ránuꞌuꞌ. Chi íyó tu̱neí iniꞌ‑ó ya̱ kunikɨnꞌ re̱ꞌ sikáku re̱ꞌ ránuꞌuꞌ ichinúúnꞌ ka̱ꞌ,

¹¹ sáá chíneí táꞌán ránú ránuꞌuꞌ ya̱ jíkánꞌ táꞌvíꞌ rán nu̱u̱nꞌ Ndiosíꞌ jie̱ꞌe̱ꞌ ránuꞌuꞌ. Jee suni koo kue̱ꞌe̱ꞌ ñɨvɨ ku̱ꞌva ráa ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ ta̱ꞌvi̱ꞌ sikútaꞌviꞌ re̱ꞌ nu̱u̱nꞌ ránuꞌuꞌ ya̱ nama re̱ꞌ ránuꞌuꞌ jie̱ꞌe̱ꞌ jíkánꞌ táꞌvíꞌ kue̱ꞌe̱ꞌ ñɨvɨ jie̱ꞌe̱ꞌ ránuꞌuꞌ.

Nkachiꞌ Pablo na̱ jie̱ꞌe̱ꞌ chi ntu̱ví ñáꞌánꞌ re̱ꞌ inka íchí ñuunꞌ Corinto

¹² Suꞌva káꞌánꞌ téyɨ́ɨ́ ráníꞌ, ya̱ ne̱ ánímaꞌ ránꞌ jíníꞌ ránꞌ ya̱, ñaꞌnu na̱a̱ꞌ ránꞌ jee saɨn ni̱yo iniꞌ ránꞌ ñaꞌnu ránꞌ jín rá ñɨvɨ ñɨ̱vɨ́ yaꞌá, sáni kuíni Ndiosíꞌ. Jee víꞌí káꞌ jíníꞌ ránꞌ ya̱ nsa̱ꞌá ránꞌ sukuán nu̱u̱nꞌ ránoꞌó. Chi ntu ñáꞌnu ránꞌ sáni ya̱ níchí xíniꞌ maáránꞌ, chisaꞌ chíneí chituvi Ndiosíꞌ ránuꞌuꞌ saꞌá ránꞌ sukuán, chi íyó mániꞌ iniꞌ re̱ꞌ néꞌyá re̱ꞌ ránuꞌuꞌ.

¹³ Jee rá tu̱ꞌun ya̱ tée ráníꞌ nu̱u̱nꞌ tutuꞌ, nsú tu̱ꞌun ya̱ ntu kúvi ki̱ku̱ꞌun iniꞌ ránú ví‑i. Chi maá ni tu̱ꞌun ya̱ kúvi kaꞌvi rán jee kúvi ki̱ku̱ꞌun iniꞌ rán ví‑i. Jee íyó tu̱neí iniꞌ ni̱ꞌ ya̱ ki̱ku̱ꞌun noo iniꞌ rán na̱sa íyó ránuꞌuꞌ,

¹⁴ sánikua̱ꞌ ya̱ ña̱ku̱ꞌun iniꞌ rán sava. Chi maáráníꞌ kúvi jie̱ꞌe̱ꞌ kaꞌanꞌ téyɨ́ɨ́ ránú, sánikua̱ꞌ maáránú kúvi jie̱ꞌe̱ꞌ kaꞌanꞌ téyɨ́ɨ́ ráníꞌ ki̱vɨ̱ꞌ niji I̱toꞌoꞌ‑ó Jesús.

¹⁵ Kúneí iniꞌ ni̱ꞌ yukuán, saáva nkuna̱a̱ꞌ iniꞌ ni̱ꞌ ya̱ xíꞌnañúꞌún ka̱ꞌ kua̱jiane̱ꞌyá ni̱ꞌ ránoꞌó, sáva kuvi ya̱ váꞌa nu̱u̱nꞌ ránoꞌó ya̱ uvíꞌ íchí.

¹⁶ Ñani iniꞌ ni̱ꞌ ya̱ kua̱jiane̱ꞌyá ni̱ꞌ ránoꞌó ni ichi kua̱jiaaꞌ ni̱ꞌ nu̱u̱nꞌ ñuunꞌ Macedonia. Jee kua̱jiane̱ꞌyá tuku ni̱ꞌ ránoꞌó sáá nikó ni̱ꞌ ne̱ Macedonia. Sukuán jee sáva kuvi chineí rán nuꞌuꞌ, sáva kɨ̱ꞌɨ̱nꞌ ni̱ꞌ ichi ñuunꞌ Judea, nékúvi.

¹⁷ Sáá nkuna̱a̱ꞌ iniꞌ ni̱ꞌ yaꞌá, ¿á nka̱si̱kɨ́ ni̱ꞌ jie̱ꞌe̱ꞌ ya̱ ntu ñáne̱ꞌyá ni̱ꞌ ránoꞌó ya̱ uvíꞌ íchí, rúsa? Áxí, ¿á jiáni iniꞌ ni̱ꞌ ya̱ saꞌá ni̱ꞌ sáni níyo iniꞌ ni̱ꞌ kuéntáꞌ ñɨvɨ ya̱ ntu yɨ́ꞌɨ́ ráa nu̱u̱nꞌ Ndiosíꞌ, ya̱ u̱vi̱ꞌ nu̱u̱nꞌ jiáni iniꞌ‑i, ya̱ sa̱naanꞌ “kuvi, kuvi” káchíꞌ ni̱ꞌ soo tukuni “ntu̱ví, ntu̱ví” káchíꞌ ni̱ꞌ, rúsa?

¹⁸ Soo sánikua̱ꞌ na̱a̱ꞌ kúvi Ndiosíꞌ jee síkúnkuvi na̱a̱ꞌ re̱ꞌ ya̱ káchíꞌ re̱ꞌ, jee suni sukuán tu̱ꞌun káchíꞌ ráníꞌ nu̱u̱nꞌ ránoꞌó, nsáꞌ káchíꞌ ránꞌ “kuvi” soo tuku “ntu̱ví” káchíꞌ ránꞌ.

¹⁹ Chi Se̱ꞌya Ndiosíꞌ kúvi Jesús ya̱ kúvi Cristo, [ya̱ ñani Ndiosíꞌ sáva tatúníꞌ nu̱u̱nꞌ nɨꞌɨ]. Jie̱ꞌe̱ꞌ Jesús ví ya̱ nste̱kútu̱ꞌún ránuꞌuꞌ nu̱u̱nꞌ ránoꞌó. Nuꞌuꞌ jín Silvano jín Timoteo ví ya̱ nste̱kútu̱ꞌún ránꞌ nu̱u̱nꞌ ránoꞌó jie̱ꞌe̱ꞌ re̱ꞌ. Jee nsáꞌ u̱vi̱ꞌ nu̱u̱nꞌ jiáni iniꞌ Cristo jee ntu̱ví nkáchíꞌ re̱ꞌ “kuvi” soo tuku “nkúvi” nkachiꞌ re̱ꞌ. Chisaꞌ Cristo sukuáni káchíꞌ re̱ꞌ ya̱ “kuvi”.

²⁰ Chi maá Cristo ví ya̱ síkúnkuvi nta̱ká rá tu̱ꞌun ya̱ nchi̱sóyuꞌú Ndiosíꞌ, jee káchíꞌ re̱ꞌ “kuvi”. Saáva jie̱ꞌe̱ꞌ Cristo káchíꞌ‑ó “sukuán koo”, “amén”, sáva nákuetúꞌún‑ó ya̱ viiꞌ nasɨ́kuitɨꞌ kúñáꞌnú Ndiosíꞌ.

²¹ Maá Ndiosíꞌ ví ya̱ sáꞌá ya̱ ránuꞌuꞌ jín ránoꞌó ya̱ íñɨ́ ni̱ꞌin kutú‑ó nu̱u̱nꞌ Cristo. Jee nte̱tíñú re̱ꞌ yó yɨ́tíñú‑ó nu̱u̱nꞌ re̱ꞌ.

²² Jee suni ntaji Ndiosíꞌ Ta̱chi̱ꞌ Ííꞌ re̱ꞌ kɨꞌɨ‑ɨ iniꞌ ánímaꞌ‑ó. Yukuán vá kúvi seyúꞌ ya̱ ntee re̱ꞌ ya̱ stúvi re̱ꞌ ya̱ kúvi‑ó ñɨvɨ re̱ꞌ. Ta̱chi̱ꞌ Ííꞌ re̱ꞌ ví ya̱ táji ya̱chi̱ꞌ re̱ꞌ nu̱u̱nꞌ‑ó ya̱ stúvi ya̱ naáꞌ ya̱ ni̱ꞌi̱nꞌ‑ó nɨꞌɨ ta̱ꞌvi̱ꞌ ya̱ táji Ndiosíꞌ nu̱u̱nꞌ‑ó ichinúúnꞌ ka̱ꞌ.

²³ Soo jíníꞌ va̱ꞌa Ndiosíꞌ ánímaꞌ ni̱ꞌ jee kána ni̱ꞌ re̱ꞌ ya̱ ku̱ꞌva re̱ꞌ ya̱ naáꞌ jie̱ꞌe̱ꞌ nuꞌuꞌ. Chi jíníꞌ re̱ꞌ ya̱ káchíꞌ na̱a̱ꞌ ni̱ꞌ, ya̱ ntiáꞌan kua̱jiaaꞌ ni̱ꞌ nu̱u̱nꞌ nééꞌ rán nu̱u̱nꞌ ñuunꞌ Corinto, sáva chusává ni̱ꞌ saꞌá ni̱ꞌ ya̱ koo tu̱nkuíꞌyáꞌ iniꞌ ránoꞌó.

²⁴ Jee nsáꞌ núníꞌin ránꞌ kosoꞌ ránꞌ nu̱u̱nꞌ ránoꞌó jie̱ꞌe̱ꞌ ichi ya̱ kúneí iniꞌ ránú Jesús. Chisaꞌ táꞌán sátíñú nkáá kúvi ránꞌ jín ránoꞌó, sáva kusɨ̱ɨ̱ꞌ iniꞌ ánímaꞌ ránú. Chi íñɨ́ ni̱ꞌin rán jie̱ꞌe̱ꞌ kúneí iniꞌ rán Cristo.