1 Timoteo 4 - Mixteco del suroeste de Tlaxiaco Oaxaca

Rá ñɨvɨ níkóyátá ichi Cristo

¹ Soo Ta̱chi̱ꞌ Ííꞌ Ndiosíꞌ káchíꞌ kájíkuitɨꞌ ya̱ tiempúꞌ kuánɨꞌɨ sava ñɨvɨ xinóo ráa tu̱ꞌun Cristo ya̱ kúneí iniꞌ‑ó. Jee tɨɨn kuéntáꞌ ráa ta̱chi̱ꞌ xínáꞌví jín tu̱ꞌun xínéꞌénꞌ rá kui̱ꞌna̱ꞌ.

² Rá tu̱ꞌun vá xínéꞌénꞌ ñɨvɨ sansuꞌva ya̱ kúvi ñɨvɨ túꞌún, chi jíjia iniꞌ ráa kátúꞌún ráa, chi ntu nákani iniꞌ ráa kuéntáꞌ níꞌiꞌ ráa.

³ Kunii̱yo ráa tana̱ꞌá ñɨvɨ. Jee tatúníꞌ ráa ya̱ chusává ñɨvɨ kajiꞌ‑i sava nu̱u̱nꞌ neyu ya̱ yájíꞌ‑ó. Soo ya̱ yájíꞌ‑ó vá nsa̱ꞌá Ndiosíꞌ, sáva kajiꞌ ñɨvɨ ya̱ kúneí iniꞌ ráa Cristo, jín ya̱ jíníꞌ ráa ya̱ naáꞌ, jee ku̱ꞌva‑ó ya̱ kútaꞌviꞌ nu̱u̱nꞌ re̱ꞌ jie̱ꞌe̱ꞌ‑e.

⁴ Chi nɨꞌɨ ya̱ nsa̱ꞌá Ndiosíꞌ íyó va̱ꞌa. Jee ntu íyó kuichi iniꞌ‑ó ni ɨɨn, retú nakuatáꞌví‑ó re̱ꞌ sáá níꞌínꞌ‑ó maa.

⁵ Chi íyó ninuꞌun neyu yájíꞌ‑ó jie̱ꞌe̱ꞌ ya̱ káchíꞌ Tu̱ꞌun Ndiosíꞌ jín jie̱ꞌe̱ꞌ ya̱ káꞌánꞌ‑ó jín re̱ꞌ jie̱ꞌe̱ꞌ‑e.

Musúꞌ va̱ꞌa ya̱ kuatíñú Cristo

⁶ Retú nakutíñú nú rá tu̱ꞌun yaꞌá nu̱u̱nꞌ rá ñaniꞌ jín rá ku̱ꞌva yɨ́ꞌɨ́ ichi Cristo, jee kuvi nú ɨɨn te̱e ya̱ sikúnkuvi va̱ꞌa nú nu̱u̱nꞌ Cristo Jesús. Jee kujia nú jín rá tu̱ꞌun, ya̱ kúneí iniꞌ‑ó jín ya̱ xínéꞌénꞌ‑ó ya̱ ya níkɨ́nꞌ nú.

⁷ Chusává maánú nu̱u̱nꞌ rá kuentúꞌ yanaꞌán, ya̱ kúvi kuentúꞌ ni, jín ya̱ ntu sáꞌá ñáꞌnú‑u nu̱u̱nꞌ Ndiosíꞌ, kuéntáꞌ nákani ka̱ꞌá sava ñaꞌan ñáꞌnú. Chisaꞌ sikújia nú kueꞌnu nú ichi na̱a̱ꞌ sáni kuíni Ndiosíꞌ.

⁸ Chi sikújia‑ó yɨkɨkúñu‑ó jee íyótiñu yakuꞌ, soo retú kueꞌnu‑ó ichi na̱a̱ꞌ sáni kuíni Ndiosíꞌ íyótiñu nɨꞌɨ nu̱u̱nꞌ. Chi suꞌva ni̱ꞌi̱nꞌ‑ó ya̱ váꞌa ya̱ nchi̱sóyuꞌú Ndiosíꞌ taji re̱ꞌ ni ya̱ tékúꞌ‑ó tiempúꞌ vitan, jín tiempúꞌ kiji ichinúúnꞌ sáá kutekuꞌ‑ó nɨ́ɨ́nkání jín re̱ꞌ.

⁹ Tu̱ꞌun na̱a̱ꞌ ví yaꞌá, jee íyó tɨɨn ñɨvɨ ñɨ̱vɨ́ maa.

¹⁰ Chi jie̱ꞌe̱ꞌ yaꞌá sátíñú ni̱ꞌin‑ó jee núnasɨ́‑ó sátíñú‑ó, chi njia̱ꞌa‑ó tu̱neí iniꞌ‑ó Ndiosíꞌ ya̱ tékúꞌ. Jee suvire̱ꞌ ví ya̱ kúvi saꞌá re̱ꞌ ya̱ kúvi natavaꞌ re̱ꞌ nta̱ká ñɨvɨ nu̱u̱nꞌ kua̱chi ráa xinánitáꞌvíꞌ re̱ꞌ ráa. Jee sáni máá rá ñɨvɨ ya̱ ínúꞌ iniꞌ ráa Cristo ví ya̱ sáꞌá re̱ꞌ ya̱ nanitáꞌvíꞌ ráa.

¹¹ Tatúníꞌ jee xinéꞌénꞌ rá tu̱ꞌun yaꞌá.

¹² Kumí nú maánú, Timoteo, sáva nkújiááꞌ iniꞌ ni ɨɨn ñɨvɨ noꞌó, jie̱ꞌe̱ꞌ te̱e súchí ka̱ꞌ kúvi nú. Soo kaꞌanꞌ va̱ꞌa, kaka na̱a̱ꞌ, kunu̱u̱nꞌ nú ñɨvɨ jín Ndiosíꞌ, jee kuneí iniꞌ nú Cristo, jee ninuꞌun koo nú. Jee suꞌva suvinú kuvi ɨɨn ichi nu̱u̱nꞌ rá ñɨvɨ ínúꞌ iniꞌ ráa Cristo, ya̱ kunikɨnꞌ ráa ichi yaꞌá.

¹³ Ne̱ kua̱jiaaꞌ ni̱ꞌ, jee kɨtíñú nú kaꞌvi nú nu̱chitú Tu̱ꞌun Ndiosíꞌ nu̱u̱nꞌ rá ñɨvɨ kúneí iniꞌ ráa Cristo, jee nakutíñú nu̱u̱nꞌ ráa sáá saꞌá ráa, jee xinéꞌénꞌ nú tu̱ꞌun re̱ꞌ.

¹⁴ Koto xínóo nú saꞌá nú tiñu Ndiosíꞌ ya̱ kúvi ta̱ꞌvi̱ꞌ ntaji Ta̱chi̱ꞌ Ííꞌ Ndiosíꞌ nu̱u̱nꞌ nú ya̱ chíneí re̱ꞌ noꞌó sáꞌá nú maa, chi rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ rává Cristo nchi̱só ráa naꞌá ráa xi̱ni̱ꞌ nú, sáva kani ráa noꞌó kuniso nú tiñu vá, jee ɨɨn ráa nna̱kani‑i tu̱ꞌun nkene yuꞌú Ndiosíꞌ ya̱ taji re̱ꞌ ta̱ꞌvi̱ꞌ vá nu̱u̱nꞌ nú.

¹⁵ Naniꞌvɨꞌ iniꞌ nú rá tiñu yaꞌá. Jee kɨtíñú saꞌá maa, sáva tu̱vi kájí nu̱u̱nꞌ nɨꞌɨ ñɨvɨ, ya̱ jíjia iniꞌ nú.

¹⁶ Nito koo nú maánú na̱sa jiáꞌnu nú jín nu̱u̱nꞌ tu̱ꞌun xínéꞌénꞌ nú. Jee kuni̱ꞌin nú nu̱u̱nꞌ tiñu yaꞌá, chi retú sáꞌá nú suꞌva, jee saꞌá nú ya̱ maánú jín suni rá ñɨvɨ tésóꞌo ya̱ káchíꞌ nú, kunikɨnꞌ va̱ꞌa rán ichi nátavaꞌ Ndiosíꞌ ránoꞌó nu̱u̱nꞌ kua̱chi rán síkáku re̱ꞌ ránoꞌó.