1 Timoteo 3 - Mixteco del suroeste de Tlaxiaco Oaxaca

Na̱sa koo rá te̱e yósóꞌ nu̱u̱nꞌ rá ñɨvɨ yɨ́ꞌɨ́ nu̱u̱nꞌ Cristo

¹ Tu̱ꞌun na̱a̱ꞌ ví yaꞌá. Retú ne̱ ni ɨɨn te̱e ya̱ kuíni re̱ꞌ kunisotíñú re̱ꞌ ya̱ kuneen kuéntáꞌ re̱ꞌ rá ñɨvɨ yɨ́ꞌɨ́ nu̱u̱nꞌ Cristo, jee yaꞌá ví ɨɨn tiñu váꞌa kuíni re̱ꞌ saꞌá re̱ꞌ.

² Ɨɨn te̱e níso tiñu vá, íyó kuvi re̱ꞌ ɨɨn te̱e, ya̱ ntu kúvi chikua̱chi ñɨvɨ re̱ꞌ, jín ya̱ kuvi re̱ꞌ yɨɨ́ métúꞌún ñaꞌan ni, jín ya̱ ñúꞌún ñáꞌnú iniꞌ re̱ꞌ, jín ya̱ ñúꞌún kájí iniꞌ re̱ꞌ, jín ya̱ jiáꞌnu ñáꞌnú re̱ꞌ nu̱u̱nꞌ rá ñɨvɨ, jín ya̱ íyó mániꞌ iniꞌ re̱ꞌ ya̱ ku̱ꞌva re̱ꞌ ntíꞌ veꞌi kino̱o ñɨvɨ jíka ichi. Jee kuvi xinéꞌénꞌ re̱ꞌ.

³ Íyó kuvi re̱ꞌ ɨɨn te̱e ya̱ ntu jíꞌi víꞌí nixiꞌ jee ntu jíni‑i, jín ya̱ ntu núkú‑u tuntíxín, jín ya̱ ntu ñúnúunꞌ re̱ꞌ xu̱ꞌún ya̱ nsáꞌ níꞌínꞌ ninuꞌun, chisaꞌ koo másúꞌ iniꞌ re̱ꞌ, jín ya̱ ntu kántátúꞌun re̱ꞌ, jín ya̱ ntu nóꞌónꞌ ka̱ꞌ iniꞌ re̱ꞌ xu̱ꞌún.

⁴ Jee íyó kosoꞌ va̱ꞌa re̱ꞌ nu̱u̱nꞌ táꞌán veꞌi maáréꞌ, ya̱ kɨꞌɨ rá se̱ꞌya re̱ꞌ naꞌá re̱ꞌ, jee kueꞌnu ñáꞌnú ráa.

⁵ (Retú néni ɨɨn te̱e ntu jíníꞌ‑i kosoꞌ‑o nu̱u̱nꞌ táꞌán veꞌi maáa, ¿na̱sa kuvi kuneen kuéntáꞌ re̱ꞌ ɨɨn grupo rá ñɨvɨ kúneí iniꞌ ráa Ndiosíꞌ rúsa?)

⁶ Jee rá te̱e yósóꞌ nu̱u̱nꞌ rá ñɨvɨ yɨ́ꞌɨ́ nu̱u̱nꞌ Cristo, nsú te̱e sukuán ni̱nu̱ꞌ iniꞌ Cristo kúvi re̱ꞌ, sáva nkúꞌun téyɨ́ɨ́ iniꞌ re̱ꞌ, jee sáva suꞌva nkíninkava re̱ꞌ nu̱u̱nꞌ kua̱chi sáva ntu sijíta Ndiosíꞌ re̱ꞌ, sánikua̱ꞌ nkininkava kui̱ꞌna̱ꞌ kúñáꞌnú jee nsi̱jíta Ndiosíꞌ maa.

⁷ Jee suni íyó kueꞌnu na̱a̱ꞌ re̱ꞌ, sáva rá inka ñɨvɨ, ya̱ ntu kúneí iniꞌ ráa Cristo, kuva̱ꞌa iniꞌ ráa kune̱ꞌyá ráa re̱ꞌ. Jee sáva nnániꞌinꞌ ráa kaꞌanꞌ u̱ꞌvi̱ꞌ ráa si̱kɨ̱ꞌ re̱ꞌ. Jee sáva nkíninkava re̱ꞌ nu̱u̱nꞌ máñáꞌ kui̱ꞌna̱ꞌ kúñáꞌnú.

Na̱sa koo rá te̱e ya̱ nééꞌ si̱kɨ̱ꞌ ráa sáva chíneí ráa rá ñɨvɨ ya̱ kúneí iniꞌ rává Cristo

⁸ Suni sukuán, rá te̱e ya̱ nééꞌ si̱kɨ̱ꞌ ráa ya̱ chíneí ráa rá ñɨvɨ kúneí iniꞌ rává Cristo, íyó kuvi ráa te̱e jiáꞌnu ñáꞌnú, jee íyó kuvi ráa te̱e saɨn iniꞌ jín ya̱ nsú máá tiñu jíꞌi sáꞌá ráa, jín ya̱ nkóo uꞌvi iniꞌ ráa ya̱ nku̱núunꞌ ráa xu̱ꞌún ya̱ nsáꞌ níꞌínꞌ ninuꞌun.

⁹ Jee kueꞌnu na̱a̱ꞌ ráa, sáva kuniꞌ ráa ya̱ ntu níso kua̱chi si̱kɨ̱ꞌ ráa, sáá kuiñɨ ni̱ꞌin ráa jín tu̱ꞌun yuꞌuꞌ jie̱ꞌe̱ꞌ Cristo, ya̱ kúneí iniꞌ‑ó, ya̱ sukuán nstúvi Ndiosíꞌ nu̱u̱nꞌ ñɨvɨ.

¹⁰ Xíꞌnañúꞌún kototúníꞌ‑ó ráa. Jee retú ntu̱náꞌ íyó chikua̱chi ñɨvɨ ráa, jee ku̱ꞌva‑ó saꞌá ráa tiñu yaꞌá.

¹¹ Suni sukuán, rá ñaꞌan íyó kueꞌnu ñáꞌnú ráña, jee íyó kuvi ráa rá ñaꞌan, ya̱ ntu sátúꞌún ráña si̱kɨ̱ꞌ inka ñɨvɨ, jín ya̱ ntu jíꞌi víꞌí ráña nixiꞌ, jín ya̱ sukuáni síkúnkuvi ráña nɨꞌɨ ya̱ káchíꞌ ráña ya̱ kúvi kuneí iniꞌ ñɨvɨ ráña.

¹² Jee te̱e ya̱ nééꞌ si̱kɨ̱ꞌ ráa sáva chíneí ráa rá ñɨvɨ kúneí iniꞌ Cristo, íyó kuvi re̱ꞌ yɨɨ́ métúꞌún ñaꞌan ni ne̱ kuviꞌ ña, jee íyó kosoꞌ va̱ꞌa re̱ꞌ nu̱u̱nꞌ se̱ꞌya re̱ꞌ jín táꞌán veꞌi maáréꞌ.

¹³ Jee rá te̱e chíneí vá, ya̱ síkúnkuvi va̱ꞌa ráa rá tiñu ráa, jee ni̱ꞌi̱nꞌ ráa ya̱ koo ñáꞌnú ñɨvɨ nu̱u̱nꞌ ráa, jee ni̱ꞌi̱nꞌ ráa ka̱ꞌ ya̱ kaꞌanꞌ neí iniꞌ ráa jie̱ꞌe̱ꞌ tu̱ꞌun Cristo Jesús ya̱ kúneí iniꞌ ráa.

Tu̱ꞌun na̱a̱ꞌ yuꞌuꞌ ya̱ nna̱stúvi Ndiosíꞌ jie̱ꞌe̱ꞌ ichi Cristo

¹⁴ Tée ni̱ꞌ rá tu̱ꞌun yaꞌá nu̱u̱nꞌ nú, Timoteo, jee jiáni iniꞌ ni̱ꞌ kua̱jiaaꞌ ya̱chi̱ꞌ ni̱ꞌ nu̱u̱nꞌ nééꞌ nú.

¹⁵ Soo retú kukuéé ni̱ꞌ, jee tée ni̱ꞌ tu̱ꞌun yaꞌá, sáva kukáꞌnú iniꞌ nú sáá íyó kuneeꞌ viiꞌ rá ñɨvɨ ya̱ kúneí iniꞌ ráa Cristo jín ɨɨn inka ráa. Suviráa kúvi táꞌán veꞌi Ndiosíꞌ. Suviráa kúvi ñɨvɨ Ndiosíꞌ tékúꞌ, ya̱ stútú re̱ꞌ ráa. Kuéntáꞌ ɨɨn nekaꞌ yɨ́tuvi xi̱ni̱ꞌ ve̱ꞌí, jee kuéntáꞌ yósóꞌ veꞌi nu̱u̱nꞌ koo, chi maáráa yɨ́tuvi ráa tu̱ꞌun nááꞌ re̱ꞌ.

¹⁶ Va̱tu̱ꞌ nijia ya̱ kúvi ya̱ naáꞌ, ya̱ mánasɨ́ ví tu̱ꞌun yuꞌuꞌ jie̱ꞌe̱ꞌ ichi na̱a̱ꞌ Ndiosíꞌ, ya̱ sukuán ntañúꞌún nstúvi re̱ꞌ nu̱u̱nꞌ‑ó: Ndiosíꞌ ntu̱vi nu̱u̱nꞌ ñɨ̱vɨ́, jee ni̱yo yɨkɨkúñu re̱ꞌ, chi nkenta kúvi re̱ꞌ ɨɨn te̱e. Nstúvi kájí nijia Ta̱chi̱ꞌ Ííꞌ re̱ꞌ, ya̱ na̱a̱ꞌ ví re̱ꞌ. Ntu̱vi re̱ꞌ nu̱u̱nꞌ rá najiáꞌáꞌ ííꞌ Ndiosíꞌ. Nte̱ku̱tu̱ꞌún jie̱ꞌe̱ꞌ re̱ꞌ nu̱u̱nꞌ rá ñɨvɨ ñɨ̱vɨ́. Ni̱nu̱ꞌ iniꞌ ñɨvɨ ñɨ̱vɨ́ re̱ꞌ. Nnaa re̱ꞌ kua̱noꞌonꞌ re̱ꞌ súkún nu̱u̱nꞌ ñuunꞌ viiꞌ nasɨ́kuitɨꞌ nu̱u̱nꞌ tátúníꞌ Ndiosíꞌ.