1 Timoteo 1 - Mixteco del suroeste de Tlaxiaco Oaxaca

Pablo ntee nu̱u̱nꞌ Timoteo

¹ Nuꞌuꞌ Pablo, ya̱ níso ni̱ꞌ tiñu apóstol Cristo Jesús, ya̱ nchu̱ichí re̱ꞌ nuꞌuꞌ sánikua̱ꞌ nta̱túníꞌ Ndiosíꞌ jín Cristo Jesús, ya̱ níso ni̱ꞌ tiñu yaꞌá. Jee Ndiosíꞌ ví ya̱ natavaꞌ re̱ꞌ yó nu̱u̱nꞌ kua̱chi‑ó síkáku re̱ꞌ yó. Jee Jesús nísotíñú re̱ꞌ ya̱ kúvi re̱ꞌ Cristo, [ya̱ ñani Ndiosíꞌ maáréꞌ sáva tatúníꞌ re̱ꞌ ñɨ̱vɨ́], jee íyó tu̱neí iniꞌ‑ó ya̱ saꞌá re̱ꞌ ya̱ nkachiꞌ re̱ꞌ.

² Tée ni̱ꞌ tutuꞌ yaꞌá nu̱u̱nꞌ nú, Timoteo. Suvinú ví nijia kuéntáꞌ se̱ꞌya ni̱ꞌ, chi nsi̱kújia ni̱ꞌ iniꞌ nú kuneí iniꞌ nú Cristo. Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Cristo Jesús kune̱ꞌyá ráa noꞌó, jín ya̱ kunáꞌví iniꞌ ráa kune̱ꞌyá ráa noꞌó, jín ya̱ kuneeꞌ va̱ꞌa nú saꞌá ráa.

Nstúꞌva Pablo Timoteo ya̱ kumí‑i maáa nu̱u̱nꞌ rá tu̱ntúꞌún ya̱ xínéꞌénꞌ rá ñɨvɨ

³ Sáá kua̱ꞌa̱nꞌ ni̱ꞌ ñuunꞌ sánitɨ́ɨn Macedonia, jee ni̱ka̱nꞌ ni̱ꞌ ya̱ kino̱o nú ñuunꞌ Éfeso, sáva tatúníꞌ nú nu̱u̱nꞌ ñɨvɨ káꞌvi ni, ya̱ koto xínéꞌénꞌ ráa tu̱ntúꞌún, ya̱ sɨ́ɨ́n káꞌánꞌ nu̱u̱nꞌ tu̱ꞌun váꞌa jie̱ꞌe̱ꞌ Cristo.

⁴ Jee suni tatúníꞌ nú nu̱u̱nꞌ ráa, ya̱ koto sáꞌá ráa kuéntáꞌ rá kuentúꞌ yanaꞌán, ya̱ kúvi kuentúꞌ ni, jín rá tu̱ꞌun ya̱ ntu jínu, ya̱ káꞌánꞌ jie̱ꞌe̱ꞌ na̱sa va̱ji rá jííꞌ‑ó yanaꞌán. Rá tu̱ꞌun suꞌva sikántátúꞌun ka̱ꞌá rá ñɨvɨ, nsú káꞌ síkúnkuvi ráa nu̱u̱nꞌ Ndiosíꞌ jie̱ꞌe̱ꞌ tu̱ꞌun re̱ꞌ ya̱ kúneí iniꞌ‑ó.

⁵ Jee tátúníꞌ‑ó suꞌva nu̱u̱nꞌ ñanitáꞌán‑ó ya̱ kúneí iniꞌ ráa Cristo, sáva kunu̱u̱nꞌ ráa ɨɨn inka ráa, ya̱ kene‑e ne̱ ánímaꞌ noo, jín ne̱ ya̱ kuniꞌ ráa ya̱ ntu̱ví níso kua̱chi si̱kɨ̱ꞌ ráa, jín ne̱ ya̱ ntu ñúnkúún ni ka̱ꞌ sáꞌá ráa ya̱ kúneí nijia iniꞌ ráa Cristo.

⁶ Soo sava ñɨvɨ nnu̱sɨ́ɨ́n ráa nu̱u̱nꞌ ichi íyó suꞌva, jee ntɨɨn ráa inka ichi, ya̱ nékáíyó káꞌánꞌ sɨ̱ɨ̱ꞌ ni.

⁷ Chi kuíni ráa xinéꞌénꞌ ráa tu̱ꞌun ley, ya̱ njia̱ꞌa Ndiosíꞌ nu̱u̱nꞌ Moisés, soo ntu jiáku̱ꞌun iniꞌ ráa jie̱ꞌe̱ꞌ tu̱ꞌun ya̱ káchíꞌ ráa, jín jie̱ꞌe̱ꞌ ya̱ íchí sanáaꞌ ráa.

⁸ Jíníꞌ‑ó ya̱ va̱ꞌa ví ley vá, retú jiátíñú‑ó maa sánikua̱ꞌ káchíꞌ Ndiosíꞌ.

⁹ Íyó tɨɨn kuéntáꞌ‑ó, ya̱ nsú jie̱ꞌe̱ꞌ ñɨvɨ na̱a̱ꞌ ví ya̱ njia̱ꞌa Ndiosíꞌ tu̱ꞌun ley nta̱túníꞌ re̱ꞌ. Chisaꞌ njia̱ꞌa re̱ꞌ maa jie̱ꞌe̱ꞌ ñɨvɨ ntu káníjiá ley jín nu̱u̱nꞌ ñɨvɨ kújiááꞌ iniꞌ, jín nu̱u̱nꞌ ñɨvɨ ntu̱ví íyó Ndiosíꞌ nu̱u̱nꞌ ráa, jee sáꞌá ráa kua̱chi, jín nu̱u̱nꞌ ñɨvɨ ntu̱ví íyó ya̱ ñáꞌnú nu̱u̱nꞌ ráa nu̱u̱nꞌ Ndiosíꞌ, jee kúíchi iniꞌ ráa re̱ꞌ, jín nu̱u̱nꞌ ñɨvɨ ya̱ jiáꞌníꞌ ráa tátáꞌ ráa, jín nánáꞌ ráa, jín inka ñɨvɨ,

¹⁰ jín nu̱u̱nꞌ ñɨvɨ kúsíkɨ́ jín inka ñɨvɨ ya̱ ntu kúvi ñasɨ́ꞌɨ́ re̱ꞌ áxí ntu kúvi yɨɨ́ ña, jín nu̱u̱nꞌ rá ñɨvɨ kívɨ ráa ñujiínꞌ xeꞌne, jín nu̱u̱nꞌ ñɨvɨ sákuíꞌná ráa ñɨvɨ, jín nu̱u̱nꞌ ñɨvɨ túꞌún, jín nu̱u̱nꞌ ñɨvɨ sánáaꞌ ráa nu̱u̱nꞌ tu̱ꞌun káꞌánꞌ ráa jín tu̱ntúꞌún nu̱u̱nꞌ ñɨvɨ, jín nu̱u̱nꞌ ñɨvɨ ya̱ sáꞌá néni ɨɨn tiñu, ya̱ íyó sɨ́ɨ́n nu̱u̱nꞌ tu̱ꞌun jíníꞌ‑ó ya̱ tu̱ꞌun na̱a̱ꞌ ví ya̱ káꞌánꞌ‑a

¹¹ sánikua̱ꞌ káchíꞌ tu̱ꞌun váꞌa Ndiosíꞌ jie̱ꞌe̱ꞌ Cristo, ya̱ kúvi tu̱ꞌun viiꞌ máá ñáꞌnú. Jee na̱ ka̱ꞌ netuꞌ ka̱ꞌ kúvi Ndiosíꞌ. Jee nte̱tíñú re̱ꞌ nuꞌuꞌ, ya̱ stekútu̱ꞌún ni̱ꞌ maa.

Nna̱kuatáꞌví Pablo jie̱ꞌe̱ꞌ ya̱ kúnáꞌví iniꞌ Ndiosíꞌ néꞌyá‑a re̱ꞌ

¹² Jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ I̱toꞌoꞌ‑ó Cristo Jesús, ya̱ chíneí chítuvi re̱ꞌ nuꞌuꞌ. Jee jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ re̱ꞌ, chi nku̱neí iniꞌ re̱ꞌ ya̱ síkúnkuvi ni̱ꞌ nta̱ká tiñu, ya̱ tátúníꞌ re̱ꞌ nu̱u̱nꞌ nuꞌuꞌ, jee ñani re̱ꞌ nuꞌuꞌ saꞌá ni̱ꞌ tiñu yaꞌá.

¹³ Ñani re̱ꞌ nuꞌuꞌ nu̱u̱nꞌ tiñu vá, súnika̱ꞌ nkaꞌanꞌ niva̱ꞌa ni̱ꞌ si̱kɨ̱ꞌ re̱ꞌ, jee nito u̱ꞌvi̱ꞌ ni̱ꞌ si̱kɨ̱ꞌ rá ñɨvɨ re̱ꞌ, jee ntenu̱u̱nꞌ ni̱ꞌ nne̱ꞌyá ni̱ꞌ ráa. Soo nku̱náꞌví iniꞌ re̱ꞌ nne̱ꞌyá re̱ꞌ nuꞌuꞌ, chi nsa̱ꞌá naanꞌ ni̱ꞌ yaꞌá, chi ntiáꞌan i̱nu̱ꞌ iniꞌ ni̱ꞌ Cristo.

¹⁴ Jee ni̱yo ma̱ni̱ꞌ nasɨ́kuitɨꞌ iniꞌ I̱toꞌoꞌ‑ó nne̱ꞌyá re̱ꞌ nuꞌuꞌ, sú ntu íyó níꞌin ni̱ꞌ maa. Suꞌva nsa̱ꞌá re̱ꞌ, ya̱ kuneí iniꞌ ni̱ꞌ re̱ꞌ, jín ya̱ kunu̱u̱nꞌ ni̱ꞌ rá ñɨvɨ, chi yɨ́ꞌɨ́ ni̱ꞌ nu̱u̱nꞌ Cristo Jesús.

¹⁵ Tu̱ꞌun na̱a̱ꞌ ví yaꞌá. Jee íyó tɨɨn nɨꞌɨ ñɨvɨ tu̱ꞌun yaꞌá, ya̱ káchíꞌ, ya̱ Cristo Jesús ya̱ nkiji nu̱u̱nꞌ ñɨ̱vɨ́, sáva natavaꞌ re̱ꞌ rá ñɨvɨ kua̱chi nu̱u̱nꞌ kua̱chi ráa sikáku re̱ꞌ ráa. Jee nuꞌuꞌ, ña̱ko̱so̱ꞌ ni̱ꞌ ka̱ꞌ nu̱u̱nꞌ ya̱ nsa̱ꞌá ni̱ꞌ kua̱chi mánasɨ́ nijia.

¹⁶ Soo jie̱ꞌe̱ꞌ mánasɨ́ nsa̱ꞌá ni̱ꞌ, jee nku̱náꞌví iniꞌ Cristo Jesús nne̱ꞌyá re̱ꞌ nuꞌuꞌ, sáva stúvi re̱ꞌ ya̱ ntu ñúkúꞌvá iniꞌ re̱ꞌ, ya̱ káꞌnú íyó iniꞌ re̱ꞌ. Suꞌva nstúvi re̱ꞌ maa jín ni̱ꞌ nu̱u̱nꞌ rá ñɨvɨ, sáva koo ɨɨn ichi ntaji re̱ꞌ nu̱u̱nꞌ rá ñɨvɨ i̱nu̱ꞌ iniꞌ ráa kune̱ꞌyá ráa re̱ꞌ, sáva ni̱ꞌi̱nꞌ ráa, ya̱ kutekuꞌ ráa nɨ́ɨ́nkání jín re̱ꞌ.

¹⁷ Saáva íyó saꞌá ñáꞌnú nɨꞌɨ ñɨvɨ nu̱u̱nꞌ Ndiosíꞌ, ya̱ kúñáꞌnú re̱ꞌ tátúníꞌ re̱ꞌ nu̱u̱nꞌ nɨꞌɨ nɨ́ɨ́nkání. Jee ni nsáꞌ jíꞌíꞌ re̱ꞌ. Jee maáréꞌ ví ya̱ ntu túvi kune̱ꞌyá‑ó. Métúꞌún Ndiosíꞌ vá kúvi re̱ꞌ. Íyó nakuetúꞌún nɨꞌɨ ñɨvɨ nɨ́ɨ́nkání ya̱ viiꞌ nasɨ́kuitɨꞌ kúñáꞌnú re̱ꞌ. Suꞌva koo. Amén.

¹⁸ Noꞌó, Timoteo, ya̱ kúvi kuéntáꞌ se̱ꞌya ni̱ꞌ. Tiñu yaꞌá tétíñú ni̱ꞌ noꞌó, sánikua̱ꞌ tu̱ꞌun nna̱kani sava rá ñanitáꞌán‑ó ya̱ nkene yuꞌú Ndiosíꞌ. Tétíñú ni̱ꞌ noꞌó, sáva nunasɨ́ nú sikúnkuvi va̱ꞌa nú tiñu vá, kuéntáꞌ kántáꞌán va̱ꞌa ɨɨn soldado.

¹⁹ Jee kuni̱ꞌin, ya̱ kúneí iniꞌ nú Cristo. Jee kueꞌnu na̱a̱ꞌ nú ya̱ kuniꞌ nú ya̱ ntu níso kua̱chi si̱kɨ̱ꞌ nú. Íyó sava ñɨvɨ nsu̱kuíta ichi vá, jee nxi̱náánꞌ ráa ya̱ kúneí iniꞌ ráa Cristo.

²⁰ Jee sava ráa nsa̱ꞌá suꞌva ví Himeneo jín Alejandro. Ya nsi̱áꞌa ni̱ꞌ ráa sáva ki̱vɨ ráa xi̱ntíín Satanás, sáva kunoꞌo ráa, sáva sukuáꞌa ráa maáráa, ya̱ nka̱ꞌánꞌ niva̱ꞌa ráa ka̱ꞌ si̱kɨ̱ꞌ Ndiosíꞌ.