1 Tesalonicenses 5 - Mixteco del suroeste de Tlaxiaco Oaxaca

¹ Soo, ránoꞌó ñanitáꞌán, ntu jíniñúꞌún ránú ya̱ tee ni̱ꞌ nu̱u̱nꞌ tutuꞌ nu̱u̱nꞌ ránoꞌó jie̱ꞌe̱ꞌ na̱ni tiempúꞌ na̱ni ki̱vɨ̱ꞌ na̱ma kuvi yaꞌá.

² Chi maáránoꞌó ya̱ jíníꞌ va̱ꞌa rán ya̱ kenta sa̱naanꞌ ni ki̱vɨ̱ꞌ ya̱ kiji I̱toꞌoꞌ‑ó kuéntáꞌ kénta sa̱naanꞌ ɨɨn te̱e sákuíꞌná yakuááꞌ.

³ Sáá káchíꞌ rá ñɨvɨ: “Níín íyó ntu íyó tu̱kantaꞌan”, jee, “íyó kutú váꞌa nɨꞌɨ”, jee sa̱naanꞌ ni kenta kɨ̱naanꞌ ráa, kuéntáꞌ sa̱naanꞌ ni kenta téꞌnéꞌ iniꞌ ɨɨn ñaꞌan ñúꞌún chíji. Jee ni nkáku ráa nu̱u̱nꞌ tu̱nóꞌó vá.

⁴ Soo, ránoꞌó ñanitáꞌán, jíníꞌ va̱ꞌa ránú maa, jee ntu jiáꞌnu naanꞌ rán kuéntáꞌ jíka ɨɨn ñɨvɨ nu̱u̱nꞌ neenꞌ jee ntu jíníꞌ‑i né núꞌ kua̱ꞌa̱nꞌ‑a. Saáva ntu tɨɨn sa̱naanꞌ ki̱vɨ̱ꞌ tiaaꞌ I̱toꞌoꞌ‑ó yó kuéntáꞌ kénta tɨ́ɨn sa̱naanꞌ te̱e sákuíꞌná veꞌi ñɨvɨ.

⁵ Chi yɨ́ꞌɨ́ rán nu̱u̱nꞌ Cristo, jee nátuunꞌ nuva re̱ꞌ nu̱u̱nꞌ ránoꞌó. Saáva káchíꞌ‑ó ya̱ kúvi ránoꞌó se̱ꞌya nuva ñuꞌunꞌ jín se̱ꞌya nuví, jee ntu kúvi‑ó se̱ꞌya ñu̱neenꞌ ni se̱ꞌya yakuááꞌ.

⁶ Saáva koto ñúꞌún iniꞌ‑ó kuéntáꞌ rá inka ñɨvɨ ya̱ kuéntáꞌ kíxíꞌ ráa chi ntu tɨ́ɨn ráa tu̱ꞌun Jesús. Chisaꞌ nito koo‑ó jee kuꞌun kájí iniꞌ‑ó.

⁷ Chi kíxíꞌ rá ñɨvɨ yakuááꞌ. Jee rá te̱e jíni jíꞌi ráa yakuááꞌ.

⁸ Soo maáó ya̱ kúvi‑ó se̱ꞌya nuví nu̱u̱nꞌ nijínꞌ, jee íyó kuꞌun kájí iniꞌ‑ó, jee kuneí iniꞌ‑ó Jesús jee kunu̱u̱nꞌ‑ó ɨɨn inka‑ó. Suꞌva nama‑ó maáó sáva ntu xínáꞌví ñɨvɨ yó, kuéntáꞌ nákúꞌun ɨɨn soldado saꞌma nama‑a maáa. Jee íyó tu̱neí iniꞌ‑ó ya̱ nanitáꞌvíꞌ‑ó. Suꞌva nama‑ó antúníꞌ‑ó, kuéntáꞌ nákúꞌun ɨɨn soldado ti̱kokoꞌ ka̱a sáva nama‑a xi̱ni̱ꞌ‑i.

⁹ Chi nsáꞌ ñani Ndiosíꞌ yó ya̱ xinóꞌo re̱ꞌ yó, jie̱ꞌe̱ꞌ kítɨ́ꞌ iniꞌ re̱ꞌ néꞌyá re̱ꞌ rá kua̱chi‑ó. Chisaꞌ ñani re̱ꞌ yó sáva ni̱ꞌi̱nꞌ‑ó ya̱ nanitáꞌvíꞌ‑ó, jie̱ꞌe̱ꞌ ya̱ nsa̱ꞌá I̱toꞌoꞌ‑ó Jesús ya̱ kúvi Cristo.

¹⁰ Chi suvire̱ꞌ vá ni̱ꞌi̱ꞌ re̱ꞌ jie̱ꞌe̱ꞌ‑ó, sáva kuvi kutekuꞌ nkáá‑ó jín re̱ꞌ, va̱ni tékúꞌ‑ó áxí va̱ni ya̱ ni̱ꞌi̱ꞌ‑ó.

¹¹ Saáva nasáneí rán iniꞌ ɨɨn inka rán, jee sikújia rán iniꞌ ɨɨn inka rán, sáva kuneí ka̱ꞌ iniꞌ rán Jesús, sánikua̱ꞌ ya̱ sáꞌá rán.

Pablo nákutíñú nu̱u̱nꞌ rá ñanitáꞌán

¹² Ránoꞌó ñaniꞌ jín ku̱ꞌva, ntañúꞌún jíkánꞌ táꞌvíꞌ ni̱ꞌ nu̱u̱nꞌ ránoꞌó, ya̱ kɨya̱ꞌvi nu̱u̱nꞌ rán kune̱ꞌyá rán rá te̱e ya̱ sáꞌá ráa tiñu I̱toꞌoꞌ‑ó nteñu ránoꞌó, ya̱ kúvi ráa rá te̱e kúñáꞌnú yósóꞌ nu̱u̱nꞌ ránoꞌó, jín ya̱ náchuꞌun ráa ránoꞌó ichi I̱toꞌoꞌ‑ó.

¹³ Jee íyó saꞌá ñáꞌnú víꞌí rán nu̱u̱nꞌ ráa jee íyó kunu̱u̱nꞌ rán ráa jie̱ꞌe̱ꞌ tiñu sáꞌá ráa. Jee ñunkúún kuneeꞌ ɨɨn inka rán.

¹⁴ Jee ntañúꞌún ránoꞌó ñanitáꞌán, náxiníꞌvɨ́ꞌ ráníꞌ iniꞌ ránoꞌó ya̱: nachúꞌún rán ichi rá ñɨvɨ kúxí, ya̱ ntu kúníꞌ ráa satíñú ráa. Jee nasáneí rán iniꞌ rá ñɨvɨ núun iniꞌ. Jee nasásɨ́ɨꞌ rán iniꞌ rá ñɨvɨ ntu neí iniꞌ. Jee koo káꞌnú iniꞌ rán jín nɨꞌɨ rá ñɨvɨ.

¹⁵ Nito koo rán maáránoꞌó ya̱ koto náchunáán ni ɨɨn rán ya̱ ni̱váꞌa nu̱u̱nꞌ ni ɨɨn ñɨvɨ sáꞌá niva̱ꞌa nu̱u̱nꞌ ránoꞌó. Chisaꞌ sukuáni nanukú rán ya̱ váꞌa kuvi nu̱u̱nꞌ ɨɨn inka rán jín nu̱u̱nꞌ nɨꞌɨ rá ñɨvɨ.

¹⁶ Sukuáni sɨ̱ɨ̱ꞌ koo iniꞌ ánímaꞌ rán.

¹⁷ Sukuáni yɨ́táꞌán kaꞌanꞌ rán jín Ndiosíꞌ.

¹⁸ Ntáká jie̱ꞌe̱ꞌ kúvi, ku̱ꞌva rán ya̱ kútaꞌviꞌ nu̱u̱nꞌ Ndiosíꞌ, chi sukuán kuíni re̱ꞌ saꞌá rán, ya̱ yɨ́ꞌɨ́ rán nu̱u̱nꞌ Cristo Jesús.

¹⁹ Koto jiásɨ́ꞌ rán ya̱ sáꞌá Ta̱chi̱ꞌ Ííꞌ Ndiosíꞌ.

²⁰ Koto kúníichiꞌ rán rá tu̱ꞌun nákani ñɨvɨ ya̱ kene yuꞌú Ndiosíꞌ.

²¹ Chisaꞌ kototúníꞌ rán nɨꞌɨ jee tɨɨn rán ya̱ váꞌa.

²² Chusává rán maárán nu̱u̱nꞌ nta̱ká nu̱u̱nꞌ ya̱ ni̱váꞌa.

²³ Ndiosíꞌ ví ya̱ sáꞌá‑a ya̱ kuneeꞌ ñunkúún ñɨvɨ. Jee ñúꞌún iniꞌ ni̱ꞌ ya̱ na̱ ka̱ꞌ sasɨ́ɨ́n re̱ꞌ ka̱ꞌ ránoꞌó ya̱ nkɨ́ꞌɨ rán ka̱ꞌ nu̱u̱nꞌ ya̱ níváꞌa, ya̱ kɨtíñú noo rán nu̱u̱nꞌ re̱ꞌ. Jee ñúꞌún iniꞌ ni̱ꞌ ya̱ na̱ ka̱ꞌ kumí re̱ꞌ ka̱ꞌ kávii kuitɨꞌ sáá íyó rán, va̱ni ánímaꞌ rán, va̱ni antúníꞌ rán, va̱ni yɨkɨkúñu rán, sáva ntu̱náꞌ kua̱chi koo si̱kɨ̱ꞌ ránoꞌó, sáá kiji tuku I̱toꞌoꞌ‑ó Jesús ya̱ kúvi Cristo.

²⁴ Ndiosíꞌ kána re̱ꞌ ránoꞌó. Jee síkúnkuvi na̱a̱ꞌ re̱ꞌ ya̱ káchíꞌ re̱ꞌ. Jee saꞌá nijia re̱ꞌ yaꞌá.

Jiáꞌa Pablo tu̱ꞌun káva̱ꞌa nu̱u̱nꞌ ráa jee jíkánꞌ táꞌvíꞌ re̱ꞌ ya̱ saꞌá Ndiosíꞌ ya̱ netuꞌ kuvi ráa

²⁵ Ránoꞌó rá ñanitáꞌán, suni ka̱ka̱nꞌ táꞌvíꞌ rán nu̱u̱nꞌ Ndiosíꞌ jie̱ꞌe̱ꞌ ránuꞌuꞌ.

²⁶ Jee ku̱ꞌva rán tu̱ꞌun káꞌánꞌ va̱ꞌa teyuꞌú yɨ́ñúꞌún rán jín ñanitáꞌán‑órán.

²⁷ Nu̱u̱nꞌ súví I̱toꞌoꞌ‑ó, tétíñú ni̱ꞌ ránoꞌó ya̱ kaꞌvi rán tutuꞌ yaꞌá nu̱u̱nꞌ nta̱ká rá ñanitáꞌán, ya̱ nsásɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ.

²⁸ Na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús, ya̱ kúvi re̱ꞌ Cristo, kune̱ꞌyá re̱ꞌ ránoꞌó. Sukuán koo.