1 Tesalonicenses 4 - Mixteco del suroeste de Tlaxiaco Oaxaca

Sáá kueꞌnu na̱a̱ꞌ‑ó sáni kúváꞌa iniꞌ Ndiosíꞌ néꞌyá re̱ꞌ yó

¹ Jee ntañúꞌún kaꞌanꞌ ráníꞌ jie̱ꞌe̱ꞌ inka ka̱ꞌ tiñu. Ránoꞌó, ñaniꞌ jín ku̱ꞌva, jee jie̱ꞌe̱ꞌ yɨ́ꞌɨ́ ráníꞌ nu̱u̱nꞌ I̱toꞌoꞌ‑ó Jesús jee jíkánꞌ táꞌvíꞌ ránꞌ nu̱u̱nꞌ ránoꞌó jee xíníꞌvɨ́ꞌ ránꞌ iniꞌ ránoꞌó, ya̱ kukueꞌeꞌ víꞌí ka̱ꞌ kaka rán sánikua̱ꞌ nxi̱néꞌénꞌ ránꞌ ránoꞌó na̱sa íyó kaka rán sáva kuva̱ꞌa iniꞌ Ndiosíꞌ kune̱ꞌyá re̱ꞌ na̱sa jíka rán, sánikua̱ꞌ ya jiáꞌnu rán.

² Chi jíníꞌ ránoꞌó tu̱ꞌun nxi̱néꞌénꞌ ránꞌ nu̱u̱nꞌ ránoꞌó, chi I̱toꞌoꞌ‑ó Jesús ntaji re̱ꞌ tiñu níso ráníꞌ xinéꞌénꞌ ránꞌ maa.

³ Chi kuíni Ndiosíꞌ ya̱ kusɨ́ɨ́n ránú ya̱ nkɨ́ꞌɨ rán nu̱u̱nꞌ tiñu níváꞌa, ya̱ koto núnéꞌén rán jín inka ñɨvɨ ya̱ ntu ntánáꞌá‑a jín nú.

⁴ Jee ta ɨɨn ránoꞌó íyó kuniꞌ nú nakeꞌen nú maánú, ya̱ kɨtíñú nú nu̱u̱nꞌ Ndiosíꞌ, sáni kuíni re̱ꞌ, jín ya̱ kuneeꞌ ñáꞌnú nú.

⁵ Jee koto ísóꞌ ni̱ñɨ̱ꞌ nú sánikua̱ꞌ sáꞌá rá inka ñɨvɨ ya̱ ntu jíníꞌ ráa Ndiosíꞌ.

⁶ Jee koto jiáꞌa sáꞌá ni ɨɨn ránú nu̱u̱nꞌ ɨɨn ñaniꞌ nú jie̱ꞌe̱ꞌ vá. Jee koto xínáꞌví nú re̱ꞌ jie̱ꞌe̱ꞌ vá. Chi náchunáán I̱toꞌoꞌ‑ó xínóꞌo re̱ꞌ ñɨvɨ jie̱ꞌe̱ꞌ nta̱ká kua̱chi yaꞌá, sánikua̱ꞌ ya nstúꞌva ránꞌ nu̱u̱nꞌ ránoꞌó. Ya nstúvi na̱a̱ꞌ ránꞌ maa nu̱u̱nꞌ ránoꞌó.

⁷ Chi ntu nkána Ndiosíꞌ yó sáva saꞌá néꞌí‑ó. Chisaꞌ nkana re̱ꞌ yó sáva koo sɨ́ɨ́n‑ó ya̱ nkɨ́ꞌɨ‑ó nu̱u̱nꞌ ya̱ níváꞌa, jee kɨtíñú‑ó nu̱u̱nꞌ re̱ꞌ.

⁸ Saáva ɨɨn ñɨvɨ ya̱ kúíchi iniꞌ‑i tu̱ꞌun yaꞌá, ntu kúíchi iniꞌ ñɨvɨ vá ɨɨn te̱e, chisaꞌ kúíchi iniꞌ ñɨvɨ vá Ndiosíꞌ. Suvire̱ꞌ ví ya̱ táji re̱ꞌ Ta̱chi̱ꞌ Ííꞌ re̱ꞌ nu̱u̱nꞌ ránoꞌó.

⁹ Jee ntu jíniñúꞌún ránú ya̱ tee ráníꞌ tutuꞌ nu̱u̱nꞌ ránoꞌó sáva kunu̱u̱nꞌ rán rá ñanitáꞌán, ya̱ kúneí iniꞌ ráa Jesús. Chi máá maá Ndiosíꞌ xínéꞌénꞌ ránoꞌó sáva kunu̱u̱nꞌ rán ɨɨn inka rán.

¹⁰ Chi ya̱ sáꞌá nijia ránú maa nu̱u̱nꞌ nɨꞌɨ rá ñanitáꞌán nɨꞌɨ rá ñuunꞌ Macedonia. Jee xíníꞌvɨ́ꞌ ránꞌ iniꞌ ránoꞌó, ñanitáꞌán, ya̱ saꞌ víꞌí káꞌ saꞌá rán maa.

¹¹ Jee nakeni rán kuneeꞌ ñunkúún rán. Jee jitú iniꞌ rán tiñu sáꞌá maárán. Jee satíñú rán sáva koto rán maárán. Íyó saꞌá rán yaꞌá sáni ya̱ nta̱túníꞌ ránꞌ nu̱u̱nꞌ ránoꞌó.

¹² Íyó saꞌá suꞌva sáva kaka ñáꞌnú rán nu̱u̱nꞌ rá inka ñɨvɨ ntu yɨ́ꞌɨ́ ráa nu̱u̱nꞌ Jesús. Jee sákua nku̱mániꞌ nu̱u̱nꞌ rán.

Nikó tuku I̱toꞌoꞌ‑ó

¹³ Ránoꞌó ñanitáꞌán, ntu kuíni ránꞌ ya̱ nku̱níꞌ rán jie̱ꞌe̱ꞌ rá ñɨvɨ níꞌiꞌ, sáva nkúkuéká víꞌí iniꞌ rán, kuéntáꞌ rá inka ñɨvɨ ya̱ ntu yɨ́ꞌɨ́ ráa nu̱u̱nꞌ Jesús, jee ntu̱né íyó tu̱neí iniꞌ ráa ya̱ natekuꞌ ñunéꞌyúꞌ ráa.

¹⁴ Chi jínúꞌ iniꞌ‑ó ya̱ Jesús ni̱ꞌi̱ꞌ‑i jee nna̱tekuꞌ i̱i̱ꞌ re̱ꞌ jee nnako̱o yɨkɨkúñu re̱ꞌ. Jee retú jínúꞌ iniꞌ‑ó yaꞌá, suni sukuán jínúꞌ iniꞌ‑ó ya̱ saꞌá Ndiosíꞌ ya̱ kiji Jesús jín rá ñɨvɨ níꞌiꞌ ya̱ yɨ́ꞌɨ́ ráa nu̱u̱nꞌ Jesús.

¹⁵ Chi tu̱ꞌun káchíꞌ ránꞌ nu̱u̱nꞌ ránoꞌó ví tu̱ꞌun I̱toꞌoꞌ‑ó: Rá yó tékúꞌ ka̱ꞌ sáá kantaꞌ I̱toꞌoꞌ‑ó, nsú xíꞌna‑ó ka̱ꞌ naa‑ó súkún nsú káꞌ rá níꞌiꞌ.

¹⁶ Chi máá maá I̱toꞌoꞌ‑ó kinkuun súkún, sáá kanajíín Ndiosíꞌ tatúníꞌ re̱ꞌ, jee kanajíín ɨɨn ta̱chi̱yuꞌú ɨɨn najiáꞌáꞌ ííꞌ kúñáꞌnú ka̱ꞌ, ya̱ káchíꞌ‑ó arcángel, jee tivɨꞌ nusuꞌ ɨɨn trompeta Ndiosíꞌ. Saájee rá níꞌiꞌ ya̱ yɨ́ꞌɨ́ ráa nu̱u̱nꞌ Cristo, xíꞌnañúꞌún ráa ka̱ꞌ natekuꞌ i̱i̱ꞌ ráa jee nako̱o yɨkɨkúñu ráa.

¹⁷ Jee kuíre rá maáó ya̱ nkino̱o‑ó tékúꞌ i̱i̱ꞌ‑ó ka̱ꞌ, jee xináa tútú Ndiosíꞌ yó jín ráa nu̱u̱nꞌ rá vi̱ko̱ꞌ. Jee naketáꞌán‑ó I̱toꞌoꞌ‑ó nu̱u̱nꞌ ta̱chi̱ꞌ víjin súkún. Saájee kuneeꞌ‑ó jín I̱toꞌoꞌ‑ó nɨ́ɨ́nkání.

¹⁸ Saáva nasáneí rán iniꞌ ɨɨn inka rán jín rá tu̱ꞌun yaꞌá.