1 Tesalonicenses 2 - Mixteco del suroeste de Tlaxiaco Oaxaca

Tiñu nsa̱ꞌá Pablo ñuunꞌ Tesalónica

¹ Ránoꞌó ñanitáꞌán, ránoꞌó vá jíníꞌ ya̱ ntu nkenta ka̱ꞌá ránꞌ nteñu ránoꞌó.

² Chi sú nnoꞌo ránuꞌuꞌ xi̱ntíín rá te̱e nísotíñú ñuunꞌ Filipos jee ntenu̱u̱nꞌ ráa ránuꞌuꞌ yukuán, sáni jíníꞌ ránoꞌó, soo nna̱sáneí Ndiosíꞌ iniꞌ ránꞌ sáva kachiꞌ ránꞌ tu̱ꞌun váꞌa Ndiosíꞌ nu̱u̱nꞌ ránoꞌó. Nnu̱nasɨ́ víꞌí ránꞌ nsa̱ꞌá ránꞌ suꞌva sú nkenta víꞌí rá ñɨvɨ yukuán si̱kɨ̱ꞌ ránuꞌuꞌ.

³ Chi tu̱ꞌun káchítu̱ꞌún ráníꞌ nsáꞌ váji‑i nu̱u̱nꞌ tu̱ꞌun kúsanaanꞌ, ni nsáꞌ váji‑i nu̱u̱nꞌ tu̱ꞌun jiáni néꞌí iniꞌ ránꞌ, ni nsáꞌ váji‑i nu̱u̱nꞌ ya̱ xínáꞌví ránꞌ ránoꞌó.

⁴ Chisaꞌ Ndiosíꞌ ni̱totúníꞌ ránuꞌuꞌ sáva tetíñú re̱ꞌ ránuꞌuꞌ sáva stékútu̱ꞌún ránꞌ tu̱ꞌun váꞌa jie̱ꞌe̱ꞌ Cristo. Saáva ntu káꞌánꞌ ránꞌ sáva kuva̱ꞌa iniꞌ rá ñɨvɨ kune̱ꞌyá ráa ránuꞌuꞌ. Chisaꞌ káꞌánꞌ ránꞌ sáva kuva̱ꞌa iniꞌ Ndiosíꞌ kune̱ꞌyá re̱ꞌ ránuꞌuꞌ. Maáréꞌ ví ya̱ jítotúníꞌ re̱ꞌ ya̱ ñúꞌún ánímaꞌ‑ó.

⁵ Chi jíníꞌ ránú ya̱ ni ɨɨn íchí ntu̱né ne̱ jiákɨ́nꞌ ráníꞌ ta̱chi̱ꞌ ránꞌ káꞌánꞌ ránꞌ jín ñɨvɨ, sáva xináꞌví ránꞌ ráa. Ni ntu káñunkúún sáꞌá uꞌvi iniꞌ ránꞌ. Ndiosíꞌ kúvi stúvi ya̱ naáꞌ jie̱ꞌe̱ꞌ vá.

⁶ Ni ntu̱náꞌ núkú ránꞌ ya̱ nakuetúꞌún ñɨvɨ ránuꞌuꞌ, ni ya̱ nakuetúꞌún rán ránuꞌuꞌ, ni ya̱ nakuetúꞌún inka ñɨvɨ ránuꞌuꞌ. Sú níso ránꞌ tiñu apóstol, ya̱ nchu̱ichí Cristo, jee kúvi tetuvi ráníꞌ ránoꞌó ya̱ koto rán ránuꞌuꞌ,

⁷ sosaꞌ ñunkúún iniꞌ ránꞌ kuéntáꞌ ɨɨn nánáꞌ jíto ñunkúún ña rá se̱ꞌya ña, ya̱ síkáxínꞌ ña ráa.

⁸ Na̱ ka̱ꞌ ñunkúún víꞌí iniꞌ ránꞌ néꞌyá ránꞌ ka̱ꞌ ránoꞌó, jee kúváꞌa víꞌí iniꞌ ránꞌ táji ránꞌ nu̱u̱nꞌ ránoꞌó tu̱ꞌun váꞌa Ndiosíꞌ. Jee nsú kua̱chi ntaji ránꞌ tu̱ꞌun vá ni, chi suni nku̱sɨ̱ɨ̱ꞌ víꞌí iniꞌ ránꞌ nneeꞌ ránꞌ jín ránoꞌó jee nchi̱neí táꞌán ránꞌ jín ránoꞌó. Chi nkenta ñúnúunꞌ ránꞌ ránoꞌó.

⁹ Chi, ránoꞌó ñanitáꞌán, náꞌán rán ya̱ nsa̱tíñú ni̱ꞌin ráníꞌ jee nnu̱nasɨ́ yɨ́ɨ́ ránꞌ. Nuví niñuꞌ nsa̱tíñú ránꞌ sáva ni̱ꞌi̱nꞌ ránꞌ ya̱ jíniñúꞌún ránꞌ, sáva ntu nkúvi ránꞌ ɨɨn tiñu véi nu̱u̱nꞌ ni ɨɨn ránoꞌó, sáá káchítu̱ꞌún ránꞌ tu̱ꞌun váꞌa Ndiosíꞌ nu̱u̱nꞌ ránoꞌó.

¹⁰ Ránoꞌó jín Ndiosíꞌ jíníꞌ rán ya̱ nááꞌ jee kúvi stúvi rán ya̱ nsa̱ꞌá sɨ́ɨ́n ráníꞌ maáránuꞌuꞌ ya̱ ntu yɨ́ꞌɨ́ ránꞌ nu̱u̱nꞌ ya̱ níváꞌa, jee nika na̱a̱ꞌ ránꞌ nteñu ránoꞌó, jee ntu kúvi chikua̱chi ñɨvɨ ránuꞌuꞌ, jie̱ꞌe̱ꞌ ya̱ nsa̱ꞌá ránꞌ nteñu ránoꞌó, ya̱ ínúꞌ iniꞌ rán tu̱ꞌun Cristo.

¹¹ Jee suni jíníꞌ ránú ya̱ nsa̱ꞌá ráníꞌ jín ta ɨɨn ránoꞌó kuéntáꞌ sáꞌá ɨɨn tátáꞌ jín rá se̱ꞌya re̱ꞌ, chi nna̱sáneí ránꞌ iniꞌ ránoꞌó jee nna̱saꞌá sɨ́ɨꞌ ránꞌ iniꞌ ránoꞌó,

¹² jee tétíñú ránꞌ ránoꞌó ya̱ kaka na̱a̱ꞌ rán sáni íyó kaka rá ñɨvɨ Ndiosíꞌ. Maáréꞌ nkana ránoꞌó kɨꞌɨ rán naꞌá re̱ꞌ nu̱u̱nꞌ tátúníꞌ re̱ꞌ nu̱u̱nꞌ ñɨvɨ, jín nu̱u̱nꞌ viiꞌ kuñáꞌnú rán jín re̱ꞌ.

¹³ Jee suni yɨ́táꞌán jiáꞌa ráníꞌ ya̱ kútaꞌviꞌ ránꞌ nu̱u̱nꞌ Ndiosíꞌ, chi ntɨɨn ránú tu̱ꞌun nteso̱ꞌo rán ya̱ nkachitu̱ꞌún ráníꞌ. Soo ntu̱ví ntɨ́ɨn ránú tu̱ꞌun vá kuéntáꞌ tu̱ꞌun káꞌánꞌ métúꞌún te̱e ni. Chisaꞌ ntɨɨn rán maá kuéntáꞌ Tu̱ꞌun Ndiosíꞌ kúvi‑i, ya̱ máá nááꞌ nijia ya̱ Tu̱ꞌun Ndiosíꞌ kúvi‑i. Jee tu̱ꞌun vá sátíñú iniꞌ ránoꞌó ya̱ kúneí iniꞌ rán Cristo.

¹⁴ Chi, ránoꞌó ñanitáꞌán, nkenta nuún nnoꞌo rán kuéntáꞌ nnoꞌo rá grupo ñɨvɨ, ya̱ ínúꞌ iniꞌ ráa Cristo, ya̱ nééꞌ ráa rá ñuunꞌ tɨ́ɨn Judea, ya̱ yɨ́ꞌɨ́ ráa nu̱u̱nꞌ Ndiosíꞌ jín nu̱u̱nꞌ Cristo Jesús. Chi suni nito u̱ꞌvi̱ꞌ rá táꞌán ránú ránoꞌó, kuéntáꞌ nito u̱ꞌvi̱ꞌ rá táꞌán ñɨvɨ ñuunꞌ ráa Israel maáráa.

¹⁵ Rá ñɨvɨ Israel vá ví ya̱ ñaꞌniꞌ ráa I̱toꞌoꞌ‑ó Jesús jín rá te̱e ya̱ nna̱kani ráa tu̱ꞌun nkene yuꞌú Ndiosíꞌ ne̱ yanaꞌán. Jee nta̱níkɨ́nꞌ rá ñɨvɨ vá ránuꞌuꞌ ñuunꞌ yukuán. Ntu kúváꞌa iniꞌ Ndiosíꞌ néꞌyá re̱ꞌ ráa. Jee kénta ráa si̱kɨ̱ꞌ nta̱ká ñɨvɨ.

¹⁶ Chi núkú ráa jiásɨ́ꞌ ráa nu̱u̱nꞌ ránuꞌuꞌ, sáá káchítu̱ꞌún ránꞌ tu̱ꞌun jie̱ꞌe̱ꞌ Jesús nu̱u̱nꞌ rá ñɨvɨ ntu kúvi Israel, sáva natavaꞌ Ndiosíꞌ rá ñɨvɨ vá nu̱u̱nꞌ kua̱chi ráa nanitáꞌvíꞌ ráa. Suꞌva sukuáni sáꞌá rá ñɨvɨ Israel vá ya̱ núkueꞌeꞌ ka̱ꞌ kua̱chi si̱kɨ̱ꞌ ráa. Saájee ne̱ nkúvi ka̱ꞌ, jee nkenta ya̱ kítɨ́ꞌ iniꞌ Ndiosíꞌ néꞌyá re̱ꞌ ráa jee xinóꞌo re̱ꞌ ráa.

Pablo kuíni re̱ꞌ kɨ̱ne̱ꞌyá tuku re̱ꞌ rá ñɨvɨ ñuunꞌ Tesalónica

¹⁷ Soo, ránoꞌó ñanitáꞌán, nkuiyo ráníꞌ nu̱u̱nꞌ ránú unúún. Sú nsáꞌ íñɨ́ ránꞌ nu̱u̱nꞌ ránoꞌó, soo ñúꞌún víꞌí iniꞌ ránꞌ ránoꞌó. Saájee kuíni nasɨ́kuitɨꞌ ránꞌ kua̱jiane̱ꞌyá ránꞌ ránoꞌó.

¹⁸ Saáva nkaꞌvi iniꞌ ránꞌ kɨ̱ne̱ꞌyá ránꞌ ránoꞌó. Jee nuꞌuꞌ, Pablo, nkaꞌvi iniꞌ ni̱ꞌ kɨ̱ne̱ꞌyá ni̱ꞌ ránoꞌó, ɨɨn u̱vi̱ꞌ íchí, soo ñasɨꞌ Satanás nu̱u̱nꞌ nuꞌuꞌ.

¹⁹ ¿Chi na̱ jie̱ꞌe̱ꞌ íyó tu̱neí iniꞌ ráníꞌ? Ránoꞌó ví nijia jie̱ꞌe̱ꞌ íyó tu̱neí iniꞌ ráníꞌ. Ránoꞌó kúvi ya̱ sáꞌá‑a kúsɨ́ɨꞌ iniꞌ ránꞌ. Jee jie̱ꞌe̱ꞌ ránoꞌó kuneí ráníꞌ ni̱ꞌi̱nꞌ ráníꞌ ta̱ꞌvi̱ꞌ jee kuvi kaꞌanꞌ téyɨ́ɨ́ ránꞌ jie̱ꞌe̱ꞌ vá ichinúúnꞌ I̱toꞌoꞌ‑ó Jesús sáá niji tuku re̱ꞌ.

²⁰ Saáva níꞌínꞌ neí téyɨ́ɨ́ iniꞌ ráníꞌ jie̱ꞌe̱ꞌ ránoꞌó. Jee sáꞌá ránú ya̱ ne̱ ánímaꞌ ránꞌ kúsɨ́ɨꞌ iniꞌ ránꞌ, [chi íñɨ́ ránú jín Cristo].