1 Tesalonicenses 1 - Mixteco del suroeste de Tlaxiaco Oaxaca

Pablo jín rá te̱e nééꞌ jín re̱ꞌ nna̱ku̱ꞌva ráa tu̱ꞌun yuꞌuꞌ nu̱u̱nꞌ rá ñɨvɨ ya̱ kúneí iniꞌ ráa Cristo, ya̱ nééꞌ ráa ñuunꞌ Tesalónica

¹ Nuꞌuꞌ Pablo jín Silvano jín Timoteo, tée ránꞌ nu̱u̱nꞌ tutuꞌ nu̱u̱nꞌ ránoꞌó, ya̱ kúneí iniꞌ rán Cristo, ya̱ nééꞌ rán ñuunꞌ Tesalónica, jee nútútú rán yukuán. Yɨ́ꞌɨ́ rán nu̱u̱nꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo, [ya̱ ñani Ndiosíꞌ re̱ꞌ sáva tatúníꞌ re̱ꞌ nu̱u̱nꞌ nɨꞌɨ]. Na̱ ka̱ꞌ koo ma̱ni̱ꞌ iniꞌ ráa kune̱ꞌyá ráa ránoꞌó jín ya̱ kuneeꞌ va̱ꞌa rán saꞌá ráa.

Rá ñɨvɨ ñuunꞌ Tesalónica ya̱ ínúꞌ iniꞌ ráa Cristo kúvi ráa ɨɨn ichi váꞌa

² Sukuáni jiáꞌa ráníꞌ ya̱ kútaꞌviꞌ ránꞌ nu̱u̱nꞌ Ndiosíꞌ jie̱ꞌe̱ꞌ nta̱ká ránoꞌó. Chi jíkánꞌ táꞌvíꞌ ránꞌ jie̱ꞌe̱ꞌ ránoꞌó sáá káꞌánꞌ ráníꞌ jín Ndiosíꞌ.

³ Chi yɨ́táꞌán xínákúꞌun ráníꞌ iniꞌ Tátáꞌ‑ó Ndiosíꞌ jie̱ꞌe̱ꞌ tiñu váꞌa sáꞌá ránoꞌó, chi kúneí iniꞌ rán Cristo, jín jie̱ꞌe̱ꞌ ya̱ níkó néí rán sáꞌá rán ya̱ váꞌa, chi ñúnúunꞌ rán re̱ꞌ, jín jie̱ꞌe̱ꞌ ya̱ kúníꞌin íñɨ́ ni̱ꞌin rán jín re̱ꞌ, chi íyó tu̱neí iniꞌ rán ya̱ váꞌa sáꞌá I̱toꞌoꞌ‑ó Jesús ya̱ kúvi Cristo jín rán.

⁴ Ránoꞌó ñanitáꞌán, Ndiosíꞌ ñúnúunꞌ ránoꞌó. Jíníꞌ ráníꞌ ya̱ nka̱ji re̱ꞌ ránoꞌó sáva kɨꞌɨ rán nu̱u̱nꞌ re̱ꞌ.

⁵ Chi nsú kua̱chi tu̱ꞌun ni ví tu̱ꞌun jie̱ꞌe̱ꞌ Cristo ya̱ nkachitu̱ꞌún ráníꞌ nkenta‑a nu̱u̱nꞌ ránoꞌó. Chisaꞌ suni nkenta tu̱ꞌun váꞌa vá jín fuersáꞌ ííꞌ níso Ta̱chi̱ꞌ Ííꞌ Ndiosíꞌ. Jee kínóo kutú va̱ꞌa ráníꞌ ya̱ íyó kutú tu̱ꞌun ya̱ nkachiꞌ ránꞌ. Jíníꞌ va̱ꞌa ránoꞌó na̱ja ñaꞌnu va̱ꞌa ránuꞌuꞌ sáá nneeꞌ ránꞌ nteñu ránoꞌó, chi nnu̱kú ránꞌ ya̱ váꞌa ránoꞌó.

⁶ Jee nkenta sáꞌá ránú mákua sáꞌá ráníꞌ jín mákua sáꞌá I̱toꞌoꞌ‑ó, chi nuún násaꞌá ránoꞌó jín ránuꞌuꞌ, chi ntɨɨn rán tu̱ꞌun jie̱ꞌe̱ꞌ Cristo, súka̱ꞌ nóꞌo víꞌí rán, [ya̱ jíto u̱ꞌvi̱ꞌ ñɨvɨ ránoꞌó jie̱ꞌe̱ꞌ vá]. Jee ne̱ iniꞌ ánímaꞌ rán nku̱sɨ̱ɨ̱ꞌ nsa̱ꞌá Ta̱chi̱ꞌ Ííꞌ Ndiosíꞌ.

⁷ Saájee suꞌva nkenta kúvi ránoꞌó ɨɨn ichi na̱sa kúneí iniꞌ ñɨvɨ Cristo, nu̱u̱nꞌ ntáká rá ñɨvɨ rá ñuunꞌ tɨ́ɨn Macedonia jín Acaya, ya̱ jínúꞌ iniꞌ ráa tu̱ꞌun Cristo.

⁸ Chi síkúténuun ránú tu̱ꞌun I̱toꞌoꞌ‑ó nu̱u̱nꞌ rá ñuunꞌ Macedonia jín Acaya, soo nsú kua̱chi yukuán, chi suni ntáká nu̱u̱nꞌ jiéténuun tu̱ꞌun jie̱ꞌe̱ꞌ ya̱ kúneí iniꞌ rán Ndiosíꞌ. Saáva ntu̱náꞌ jíniñúꞌún ráníꞌ ka̱ꞌ kachiꞌ ránꞌ maa.

⁹ Chi maáráa nákani nu̱u̱nꞌ ránuꞌuꞌ ná nkuvi sáá nkenta ráníꞌ nteñu ránoꞌó. Jee nákani ráa na̱ja nna̱kani iniꞌ ránoꞌó jee nki̱vɨ ránú nu̱u̱nꞌ Ndiosíꞌ, jee nxi̱nóo rán ya̱ néñu̱ꞌun rán rá nantíñú ya̱ nsú Ndiosíꞌ ví‑i, sáva kɨñúꞌún rán nu̱u̱nꞌ Ndiosíꞌ, ya̱ tékúꞌ re̱ꞌ jee métúꞌún maáréꞌ ví Ndiosíꞌ nijia.

¹⁰ Jee nki̱vɨ rán nu̱u̱nꞌ re̱ꞌ sáva kunetu rán ya̱ kene Se̱ꞌya re̱ꞌ antivɨ́ jee niji‑i nu̱u̱nꞌ ñɨ̱vɨ́ yaꞌá. Se̱ꞌya Ndiosíꞌ ví ya̱ nxi̱nátekuꞌ re̱ꞌ nteñu rá níꞌiꞌ jee nxi̱nákóo Ndiosíꞌ ñunéꞌyúꞌ‑u. Jee maáa ví Jesús. Jee Jesús ví ya̱ sikáku re̱ꞌ yó sáva nxínóꞌo Ndiosíꞌ yó, ki̱vɨ̱ꞌ kiji re̱ꞌ xinóꞌo re̱ꞌ rá ñɨvɨ, chi kítɨ́ꞌ iniꞌ re̱ꞌ jie̱ꞌe̱ꞌ rá kua̱chi ráa.