1 Pedro 5 - Mixteco del suroeste de Tlaxiaco Oaxaca

Tiñu nákutíñú Pedro nu̱u̱nꞌ rá te̱e nísotíñú jín rá te̱e súchí

¹ Vitan jee nákutíñú ni̱ꞌin ni̱ꞌ nu̱u̱nꞌ rá te̱e kúñáꞌnú nu̱u̱nꞌ ránoꞌó ya̱ yɨ́ꞌɨ́ xi̱ntíín Cristo, chi nuꞌuꞌ jee suni te̱e kúñáꞌnú kúvi ni̱ꞌ jín ráa nu̱u̱nꞌ rá ñɨvɨ yɨ́ꞌɨ́ xi̱ntíín Cristo, jee kúvi ni̱ꞌ ɨɨn te̱e ya̱ jiáꞌa ni̱ꞌ ya̱ nááꞌ ya̱ ya niniꞌ jínúunꞌ ni̱ꞌ rá tu̱nóꞌó nnoꞌo Cristo. Jee suni ni̱ꞌi̱nꞌ ni̱ꞌ kuñáꞌnú ni̱ꞌ kuéntáꞌ maáréꞌ sáá nenta nijinꞌ re̱ꞌ jín tiñu níso re̱ꞌ.

² Saáva kumí váꞌa rán rá ñɨvɨ ya̱ kúvi ráa kuéntáꞌ lanchi Ndiosíꞌ ya̱ néen kuéntáꞌ rán ráa, jee nsú ɨɨn kuéntáꞌ tétuvi ví ya̱ saꞌá rán maa, chisaꞌ ne̱ koo iniꞌ rán saꞌá rán maa sáni kuíni Ndiosíꞌ, jee nsú jie̱ꞌe̱ꞌ ya̱ koo u̱ꞌvi̱ꞌ iniꞌ rán ni̱ꞌi̱nꞌ rán xu̱ꞌún saꞌá rán maa, chisaꞌ ne̱ kuꞌun káñá iniꞌ rán saꞌá rán maa.

³ Jee koto tátúníꞌ ni̱ꞌin rán ntáká tiñu nu̱u̱nꞌ rá ñɨvɨ ya̱ néen kuéntáꞌ rán. Chisaꞌ kueꞌnu va̱ꞌa rán ichi Ndiosíꞌ sáva suꞌva ku̱ꞌva rán ɨɨn ichi váꞌa nu̱u̱nꞌ ráa na̱ja kueꞌnu ráa.

⁴ Saájee sáá nenta nijinꞌ maáréꞌ ya̱ néen kuéntáꞌ re̱ꞌ yó ya̱ kúñáꞌnú re̱ꞌ nu̱u̱nꞌ nɨꞌɨ rá te̱e néen kuéntáꞌ ráa rá ñɨvɨ Ndiosíꞌ, jee ni̱ꞌi̱nꞌ rán ta̱ꞌvi̱ꞌ taji re̱ꞌ nu̱u̱nꞌ rán ya̱ viiꞌ nasɨ́kuitɨꞌ kúñáꞌnú rán ya̱ ntu náánꞌ‑a.

⁵ Jee sunisaá ni ránoꞌó te̱súchí, chiꞌi rán maárán xi̱ntíín rá te̱e kúñáꞌnú nu̱u̱nꞌ rán. Jee ntáká rán kuꞌun tu̱ꞌun ñúꞌún láꞌví iniꞌ rán jín ɨɨn inka táꞌán rán chi: Ndiosíꞌ jee íñɨ́ re̱ꞌ si̱kɨ̱ꞌ rá ñɨvɨ ñútéyɨ́ɨ́ iniꞌ, soo va̱ꞌa iniꞌ re̱ꞌ chíneí re̱ꞌ rá ñɨvɨ ya̱ ñúꞌún tu̱ꞌun láꞌví iniꞌ ráa.

⁶ Jee xinúun rán maárán kuláꞌví iniꞌ rán chiꞌi rán maárán xi̱ntíín Ndiosíꞌ ya̱ níso re̱ꞌ fuersáꞌ ííꞌ níꞌin, sáva xináa re̱ꞌ ránoꞌó nuñáꞌnú rán tiempúꞌ ñani re̱ꞌ.

⁷ Naku̱ꞌva rán nu̱u̱nꞌ Ndiosíꞌ ntáká rá tiñu xínániꞌvɨꞌ iniꞌ íyó rán, chi máá re̱ꞌ ví ya̱ kúmí re̱ꞌ ránoꞌó.

⁸ Jee kuꞌun ñáꞌnú iniꞌ rán nito koo rán, chi kui̱ꞌna̱ꞌ kúñáꞌnú ya̱ túfíꞌ ta̱ꞌán re̱ꞌ jín ránoꞌó, jíkanuun re̱ꞌ kuéntáꞌ ɨɨn nikaꞌa ya̱ ne̱ nɨ́ꞌɨn sáxéenꞌ ti̱ꞌ núkú ti̱ꞌ kajiꞌ ti̱ꞌ chi núkú re̱ꞌ ɨɨn ñɨvɨ sáva xináánꞌ re̱ꞌ maa.

⁹ Soo nunasɨ́ rán nu̱u̱nꞌ re̱ꞌ, jee kuiñɨ kutú rán kuneí iniꞌ rán ínúꞌ iniꞌ rán Ndiosíꞌ, chi jíníꞌ rán ya̱ suni sukuán ranika̱ꞌ nóꞌo rá ñanitáꞌán rán yɨ́ꞌɨ́ ráa xi̱ntíín Cristo ya̱ nééꞌ ráa nɨ́ɨ́nkáꞌnú né ni ví nkuvi iniꞌ ñɨ̱vɨ́ yaꞌá.

¹⁰ Jee máá Ndiosíꞌ ya̱ nta̱ká íchí íyó mániꞌ nasɨ́kuitɨꞌ iniꞌ re̱ꞌ néꞌyá re̱ꞌ yó, ya̱ maáréꞌ nkana re̱ꞌ yó sáva viiꞌ kuñáꞌnú‑ó jín Cristo nɨ́ɨ́nkání jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo. Sáá jiáꞌa ya̱ kunoꞌo rán yakuꞌ ni̱ꞌ tiempúꞌ, soo máá Ndiosíꞌ saꞌá ya̱ kujia na̱a̱ꞌ va̱ꞌa iniꞌ rán nu̱u̱nꞌ tu̱ꞌun re̱ꞌ, jín ya̱ kuiñɨ ni̱ꞌin rán, jín ya̱ nachuneí re̱ꞌ iniꞌ ránoꞌó, jín ya̱ kukutú rán nu̱u̱nꞌ tu̱ꞌun re̱ꞌ.

¹¹ Na̱ ka̱ꞌ viiꞌ nasɨ́kuitɨꞌ ka̱ꞌ kúñáꞌnú Cristo, jee nɨꞌɨ yɨ́ꞌɨ́ xi̱ntíín re̱ꞌ tátúníꞌ re̱ꞌ nɨ́ɨ́nkání. Sukuán koo.

Tu̱ꞌun nu̱u̱nꞌ nɨ́ꞌɨ

¹² Ñani‑ó Silvano, ya̱ jíníꞌ ni̱ꞌ ya̱ síkúnkuvi va̱ꞌa re̱ꞌ nɨꞌɨ, jee nchi̱neí re̱ꞌ nuꞌuꞌ tée ni̱ꞌ yakuꞌ ni tu̱ꞌun yaꞌá kua̱jiaaꞌ nu̱u̱nꞌ rán, sáva nasáneí ni̱ꞌ iniꞌ ránoꞌó jee sáva ku̱ꞌva ni̱ꞌ ya̱ nááꞌ ya̱ tu̱ꞌun ntee ni̱ꞌ nu̱u̱nꞌ tutuꞌ yaꞌá káꞌánꞌ jie̱ꞌe̱ꞌ ya̱ váꞌa ya̱ nááꞌ nijia sikútaꞌviꞌ Ndiosíꞌ yó ya̱ íyó mániꞌ iniꞌ re̱ꞌ néꞌyá re̱ꞌ yó. Kuiñɨ kutú rán jín‑i.

¹³ Rá ñɨvɨ ya̱ kúneí iniꞌ ráa Jesús ya̱ kútútú ráa ya̱ nka̱ji Ndiosíꞌ ña jín ránoꞌó, ya̱ nééꞌ ña nu̱u̱nꞌ ñuunꞌ Babilonia, tájí ña tu̱ꞌun káꞌánꞌ va̱ꞌa kua̱jiaaꞌ nu̱u̱nꞌ rán. Jee Marcos, ya̱ kúvi kuéntáꞌ se̱ꞌya ni̱ꞌ, suni tájí re̱ꞌ tu̱ꞌun káꞌánꞌ va̱ꞌa nu̱u̱nꞌ rán.

¹⁴ Kaꞌanꞌ rán tu̱ꞌun káꞌánꞌ va̱ꞌa teyuꞌú yɨ́ñúꞌún rán jín ɨɨn inka rá táꞌán rán jie̱ꞌe̱ꞌ ñúnúunꞌ rán ɨɨn inka rán. Máá Ndiosíꞌ saꞌá ya̱ ne̱ va̱ꞌa kuvi ánímaꞌ rán kuneeꞌ ñunkúún ntáká rán ya̱ yɨ́ꞌɨ́ rán nu̱u̱nꞌ Cristo. Sukuán koo. Amén.