1 Pedro 4 - Mixteco del suroeste de Tlaxiaco Oaxaca

Kueꞌnu‑ó sánikua̱ꞌ ñaꞌnu Cristo

¹ Saáva jie̱ꞌe̱ꞌ ya̱ nnoꞌo Cristo jín ñunéꞌyúꞌ re̱ꞌ, jee suni sukuán ránoꞌó ranika̱ꞌ íyó satúꞌva rán antúníꞌ rán nuún kuꞌun iniꞌ rán jín re̱ꞌ. Chi ñɨvɨ ya̱ nnoꞌo jín yɨkɨkúñu‑u, jee nxi̱nóo‑o saꞌá‑a kua̱chi,

² sáva ntu kueꞌnu‑u ka̱ꞌ nu̱u̱nꞌ rá tiñu níváꞌa ya̱ níyo iniꞌ rá ñɨvɨ rá tiempúꞌ tékúꞌ‑u iniꞌ yɨkɨkúñu‑u. Chisaꞌ kueꞌnu‑u sáni kuíni Ndiosíꞌ.

³ Chi ya̱ nkuvi sukuáni ya̱ nsa̱ꞌá rán tiempúꞌ ya̱ta̱ꞌ rá tiñu niváꞌa níyo iniꞌ rá ñɨvɨ ntu jíníꞌ ráa iniꞌ Ndiosíꞌ. Ñaꞌnu rán jín rá tiñu kánéꞌí, jín rá tiñu téní sɨ̱ɨ̱ꞌ iniꞌ, jín rá tiñu jíni, rá tiñu viko néꞌí sɨ̱ɨ̱ꞌ iniꞌ, rá viko néꞌí tu̱nkánuun, jee nneñu̱ꞌun rán rá nantíñú ya̱ ntu kúvi ráa Ndiosíꞌ ya̱ kúníichiꞌ Ndiosíꞌ néꞌyá re̱ꞌ maa.

⁴ Jee vitan jee kúsɨ́ɨ́n iniꞌ rá ñɨvɨ ya̱ ránoꞌó ntu kútáꞌán rán ká jín ráa ntu sáꞌá rán ka̱ꞌ rá tiñu néꞌí níváꞌa ntántúníꞌ jín ráa, jee saáva ténúunꞌ ráa ránoꞌó.

⁵ Soo suviráa chi naku̱ꞌva ráa kuéntáꞌ na̱ja ñáꞌnu ráa nu̱u̱nꞌ máá Ndiosíꞌ ya̱ íyó túꞌva re̱ꞌ sáva sanáaꞌ re̱ꞌ jie̱ꞌe̱ꞌ kua̱chi rá ñɨvɨ tékúꞌ jín rá ñɨvɨ níꞌiꞌ.

⁶ Chi jie̱ꞌe̱ꞌ saáva suni nte̱ku̱tu̱ꞌún tu̱ꞌun váꞌa Ndiosíꞌ nu̱u̱nꞌ rá ñɨvɨ [ne̱ sáá ntekuꞌ ráa] jee níꞌiꞌ ráa ntañúꞌún, sáva síjíta Ndiosíꞌ ráa ya̱ kuviꞌ ráa sánikua̱ꞌ síjíta re̱ꞌ kua̱chi nɨꞌɨ rá ñɨvɨ ñunéꞌyúꞌ ya̱ jíꞌíꞌ ráa, soo ré ntɨɨn ráa tu̱ꞌun vá sáá ntekuꞌ ráa, jee sanáaꞌ Ndiosíꞌ ya̱ kutekuꞌ ráa jín re̱ꞌ nɨ́ɨ́nkání saꞌá Ta̱chi̱ꞌ Ííꞌ re̱ꞌ.

⁷ Soo ya̱ va̱kuyatin ya̱ nɨꞌɨ ntáká rá íyó, saáva nito koo rán kuꞌun kájí iniꞌ rán sáva kuvi kaꞌanꞌ rán jín Ndiosíꞌ.

⁸ Jee ya̱ ñáꞌnú ka̱ꞌ nu̱u̱nꞌ nɨꞌɨ vá kukáñá iniꞌ rán kunu̱u̱nꞌ rán ɨɨn inka táꞌán rán, chi retú ñúnúunꞌ táꞌán‑ó, jee jiásɨ́ꞌ‑ó nu̱u̱nꞌ kue̱ꞌe̱ꞌ rá kua̱chi sáꞌá‑ó jie̱ꞌe̱ꞌ ya̱ nékáꞌnú iniꞌ‑ó ɨɨn inka táꞌán‑ó.

⁹ Ku̱ꞌva rán veꞌi rán kino̱o rá ñɨvɨ ya̱ kenta veꞌi rán, jee koto táyuꞌú rán jie̱ꞌe̱ꞌ‑e.

¹⁰ Jee nu̱u̱nꞌ ta ɨɨn ɨɨn rán nsi̱kútaꞌviꞌ Ndiosíꞌ ɨɨn ta̱ꞌvi̱ꞌ nu̱u̱nꞌ ránoꞌó ya̱ kuvi saꞌá rán ɨɨn tiñu, jee sánikua̱ꞌ íyó ta̱ꞌvi̱ꞌ rán jee íyó saꞌá rán tiñu vá sáva chineí rán ɨɨn inka ka̱ꞌ rá táꞌán rán, jee suꞌva sikúnkuvi na̱a̱ꞌ va̱ꞌa rán maa sánikua̱ꞌ sɨ́ɨ́n sɨ́ɨ́n nu̱u̱nꞌ ta̱ꞌvi̱ꞌ ví‑i nsi̱kútaꞌviꞌ Ndiosíꞌ maa nu̱u̱nꞌ rán.

¹¹ Retú níꞌínꞌ ɨɨn ránoꞌó ɨɨn ta̱ꞌvi̱ꞌ ya̱ chíneí Ndiosíꞌ nó kaꞌanꞌ nú, jee kaꞌanꞌ sáni káꞌánꞌ nú Tu̱ꞌun Ndiosíꞌ. Jee retú ɨɨn ránoꞌó ni̱ꞌi̱nꞌ nú ta̱ꞌvi̱ꞌ ya̱ chineí nú táꞌán nú, jee saꞌá nú maa jín fuersáꞌ táji Ndiosíꞌ nu̱u̱nꞌ nú, sáva nakuetúꞌún rá ñɨvɨ Ndiosíꞌ jie̱ꞌe̱ꞌ ntáká tiñu sáꞌá rán jie̱ꞌe̱ꞌ Jesús ya̱ kúvi Cristo, jee kúñáꞌnú nasɨ́kuitɨꞌ re̱ꞌ tátúníꞌ re̱ꞌ nɨ́ɨ́nkání. Sukuán koo.

Tu̱nóꞌó kunoꞌo‑ó jie̱ꞌe̱ꞌ ya̱ kúvi‑ó ñɨvɨ ya̱ níkɨ́nꞌ‑ó ichi Cristo

¹² Ránoꞌó ñanitáꞌán ya̱ ñúnúunꞌ ni̱ꞌ, koto tívɨ́ xíniꞌ rán retú ñúꞌún rán nu̱u̱nꞌ ñúꞌúnꞌ sáá jítotúníꞌ rá tu̱nóꞌó xéénꞌ ránoꞌó, jee koto tívɨ́ xíniꞌ rán jie̱ꞌe̱ꞌ vá chi nsú kua̱chi ránoꞌó ni ya̱ nóꞌo maa.

¹³ Chisaꞌ na̱ ka̱ꞌ íyó kusɨ̱ɨ̱ꞌ iniꞌ rán ya̱ jíꞌín rán nóꞌo tu̱nóꞌó jie̱ꞌe̱ꞌ yɨ́ꞌɨ́ rán nu̱u̱nꞌ Cristo, sáva suni ntántúníꞌ nasɨ́kuitɨꞌ nusɨ̱ɨ̱ꞌ iniꞌ rán kaꞌanꞌ kuekuꞌ rán ki̱vɨ̱ꞌ nenta nijinꞌ Cristo stúvi re̱ꞌ ya̱ viiꞌ nasɨ́kuitɨꞌ kúñáꞌnú re̱ꞌ nísotíñú re̱ꞌ.

¹⁴ Na̱ ka̱ꞌ netuꞌ ka̱ꞌ kúvi ránoꞌó retú ténúunꞌ ráa ránoꞌó jie̱ꞌe̱ꞌ ya̱ níkɨ́nꞌ rán ichi Cristo, chi máá Ta̱chi̱ꞌ Ííꞌ Ndiosíꞌ ya̱ viiꞌ kúñáꞌnú nasɨ́kuitɨꞌ íyó‑o jín ránoꞌó. [Chi rá ñɨvɨ vá káꞌánꞌ niva̱ꞌa ráa si̱kɨ̱ꞌ Ta̱chi̱ꞌ Ííꞌ re̱ꞌ, soo ránoꞌó chi nákuetúꞌún rán maa.]

¹⁵ Jee saáva koto sáꞌá rán tiñu jiáꞌníꞌ ta̱ꞌán, áxí ya̱ sákuíꞌná, áxí rá tiñu níváꞌa, áxí rá tiñu ya̱ kíní‑i maáa nu̱u̱nꞌ ñujiínꞌ rá inka ñɨvɨ, jee saáva retú kunoꞌo‑ó soo ntu íyó kunoꞌo rán jie̱ꞌe̱ꞌ rá tiñu vá jie̱ꞌe̱ꞌ ya̱ ntu nsa̱ꞌá rán maa.

¹⁶ Soo retú nóꞌo ɨɨn ránoꞌó jie̱ꞌe̱ꞌ ya̱ kúvi‑i cristiano ya̱ níkɨ́nꞌ rán ichi nááꞌ Cristo, koto kúkanuun rán, chisaꞌ nakuetúꞌún rán Ndiosíꞌ jie̱ꞌe̱ꞌ ya̱ níkɨ́nꞌ rán ichi nááꞌ Cristo.

¹⁷ Chi ya nkenta tiempúꞌ ya̱ kijiéꞌé sanáaꞌ Ndiosíꞌ kua̱chi, soo xíꞌna ka̱ꞌ jín rá ñɨvɨ ya̱ kúvi ñɨvɨ veꞌi Ndiosíꞌ, jee retú ya nka̱jiéꞌé sanáaꞌ re̱ꞌ jie̱ꞌe̱ꞌ máá‑órán, ¿jee na̱ja ka̱ꞌ vá saꞌá na̱a̱ꞌ re̱ꞌ kua̱chi rá ñɨvɨ ya̱ ntu káníjiá ráa koo maniꞌ ráa tu̱ꞌun váꞌa re̱ꞌ rúja?

¹⁸ Retú kunoꞌo ñɨvɨ na̱a̱ꞌ tu̱nóꞌó ne̱ nanitáꞌvíꞌ ráa, ¿jee na̱ja ka̱ꞌ vá kuvi jee ka̱ku rá ñɨvɨ ntu níkɨ́nꞌ ráa Ndiosíꞌ jín ñɨvɨ yɨ́ꞌɨ́ nu̱u̱nꞌ kua̱chi rúja?

¹⁹ Jee saáva, ránoꞌó ñɨvɨ ya̱ nóꞌo rán sáni kuíni Ndiosíꞌ, jee naku̱ꞌva rán maárán xi̱ntíín maáréꞌ ya̱ nsa̱ꞌá re̱ꞌ ránoꞌó jee na̱a̱ꞌ síkúnkuvi re̱ꞌ nu̱u̱nꞌ ránoꞌó, jee kunikɨnꞌ rán saꞌá rán rá tiñu váꞌa.