1 Pedro 3 - Mixteco del suroeste de Tlaxiaco Oaxaca

Na̱ja íyó kueꞌnu rá ñɨvɨ ntánáꞌá

¹ Jee suni sukuán ránoꞌó ñaꞌan íyó yɨɨ́, koo maniꞌ rán chiꞌi rán maárán xi̱ntíín yɨɨ́ rán, sáva retú néni ɨɨn rá yɨɨ́ rán vá ntu jínúꞌ iniꞌ ráa ntu káníjiá ráa Tu̱ꞌun Ndiosíꞌ, jee sijínúꞌ rán iniꞌ rá yɨɨ́ rán jín máá ni tiñu na̱ja va̱ꞌa na̱a̱ꞌ jiáꞌnu rán jee nsú jín tu̱ꞌun káꞌánꞌ rán.

² Chi kuniꞌ ráa na̱ja ninuꞌun jiáꞌnu rán jín saꞌá ñáꞌnú rán nu̱u̱nꞌ ráa.

³ Jee nsú jín nantíñú túvi nu̱u̱nꞌ nijínꞌ nasaꞌá viiꞌ rán maárán, sú kuéntáꞌ sáá nákoto rán ixi xíníꞌ rán jee násikútú rán maárán jín rá nantíñú ya̱ kúvi oro áxí jín rá saꞌma ya̱ kuꞌun rán.

⁴ Chisaꞌ íyó nasikútú rán maárán jín ya̱ váꞌa viiꞌ ya̱ ñúꞌún yuꞌuꞌ ne̱ ánímaꞌ rán, ya̱ ni nsáꞌ náánꞌ‑a, yukuán kúvi ya̱ viiꞌ ñunkúún iniꞌ rán jee kuꞌun másúꞌ vi̱tá iniꞌ ánímaꞌ rán, chi suvi‑i vá yɨ́yáꞌvi nasɨ́kuitɨꞌ nu̱u̱nꞌ Ndiosíꞌ.

⁵ Chi suni sukuán nna̱síkútú rá ñaꞌan maáráa ya̱ ni̱yo ne̱ yanaꞌán, ya̱ nsásɨ́ɨ́n Ndiosíꞌ ráña yɨ́ꞌɨ́ ráña xi̱ntíín re̱ꞌ, ya̱ ni̱yo tu̱neí iniꞌ ráña Ndiosíꞌ, jee nchiꞌi ráña maáráña xi̱ntíín yɨɨ́ ráña,

⁶ sánikua̱ꞌ nsa̱ꞌá Sara, ya̱ nka̱níjiá ña yɨɨ́ ña Abraham, sáá nkachiꞌ ña nu̱u̱nꞌ re̱ꞌ, “i̱toꞌoꞌ ni̱ꞌ”. Jee ránoꞌó kúvi rán kuéntáꞌ se̱ꞌya sɨ́ꞌɨ́ ña sáá sáꞌá rán ya̱ váꞌa jee ni nsáꞌ kuyu̱ꞌví rán ni ɨɨn na̱ni jie̱ꞌe̱ꞌ a̱nasɨ́ chúꞌun yúꞌví iniꞌ rán.

⁷ Jee suni sukuán ránoꞌó, te̱e íyó ñasɨ́ꞌɨ́, kuneeꞌ ñunkúún rán jín ñasɨ́ꞌɨ́ rán kani va̱ꞌa iniꞌ rán jie̱ꞌe̱ꞌ ya̱ jíniñúꞌún ráña, jee koo yɨ́ñúꞌún ñáꞌnú rán nu̱u̱nꞌ ráña, chi táyáꞌ iniꞌ ráña ka̱ꞌ nsú ka̱ꞌ ránoꞌó. Jee koo yɨ́ñúꞌún ñáꞌnú rán nu̱u̱nꞌ ráña chi suni ne̱ jíꞌín ráña jín ránoꞌó ni̱ꞌi̱nꞌ rán ɨɨn ni ta̱ꞌvi̱ꞌ sikútaꞌviꞌ Ndiosíꞌ ránoꞌó kutekuꞌ rán nɨ́ɨ́nkání jín re̱ꞌ saꞌá re̱ꞌ. Sukuán íyó saꞌá rán sáva ntu̱náꞌ kasɨꞌ nu̱u̱nꞌ ya̱ káꞌánꞌ rán jín Ndiosíꞌ.

Sáá íyó kueꞌnu ntáká ñɨvɨ yɨ́ꞌɨ́ ráa nu̱u̱nꞌ Cristo

⁸ Jee nu̱u̱nꞌ nɨꞌɨ ɨɨn nuún ni kuꞌun iniꞌ ɨɨn inka ntáká rán, kunáꞌví iniꞌ rán táꞌán rán ré na̱kuáꞌ nóꞌo‑o, kunu̱u̱nꞌ rán ɨɨn inka ñanitáꞌán rán, kuñunkúún iniꞌ ánímaꞌ rán jee kuꞌun láꞌví iniꞌ rán.

⁹ Koto násaꞌá niva̱ꞌa rán nu̱u̱nꞌ ɨɨn ñɨvɨ ya̱ sáꞌá niva̱ꞌa‑a jín ránoꞌó, jee koto nátenu̱u̱nꞌ rán ñɨvɨ ya̱ ténúunꞌ‑u ránoꞌó, chisaꞌ nakaꞌanꞌ rán tu̱ꞌun váꞌa ya̱ kuvi ya̱ váꞌa nu̱u̱nꞌ ráa. Chi nkana Ndiosíꞌ ránoꞌó sáva saꞌá rán suꞌva sáva ni̱ꞌi̱nꞌ rán ta̱ꞌvi̱ꞌ taji re̱ꞌ nu̱u̱nꞌ rán ya̱ kuvi ya̱ váꞌa ránoꞌó.

¹⁰ Káchíꞌ nu̱u̱nꞌ Tutuꞌ Ííꞌ ya̱: Ñɨvɨ ya̱ ñúnúunꞌ‑u kutekuꞌ‑u, jee kuíni‑i ya̱ koo va̱ꞌa rá ki̱vɨ̱ꞌ tékúꞌ‑u nakaꞌnu‑u yáá‑a nkaꞌanꞌ‑a rá tu̱ꞌun níváꞌa, jín ya̱ koto kene tu̱ꞌun xínáꞌví yuꞌú‑u.

¹¹ Jee kuiyo‑o nu̱u̱nꞌ rá tiñu níváꞌa, jee saꞌá‑a rá tiñu váꞌa, nukú‑u kuneeꞌ ñunkúún váꞌa‑a jín ɨɨn inka táꞌán‑a, jee kunikɨnꞌ‑ɨ vá.

¹² Chi máá I̱toꞌoꞌ‑ó Ndiosíꞌ néꞌyá re̱ꞌ rá ñɨvɨ na̱a̱ꞌ jee kúmí re̱ꞌ ráa, jee tésóꞌo re̱ꞌ ya̱ káꞌánꞌ ráa jín re̱ꞌ. Soo ntu nénu̱u̱nꞌ re̱ꞌ rá ñɨvɨ ya̱ sáꞌá tiñu níváꞌa kénta re̱ꞌ si̱kɨ̱ꞌ ráa.

¹³ ¿Né ɨɨn kúvi ya̱ saꞌá kini‑i ránoꞌó, retú ñúꞌún káñá iniꞌ rán sáꞌá rán mani tiñu váꞌa rúja?

¹⁴ Soo asúnika̱ꞌ nóꞌo rán jie̱ꞌe̱ꞌ tiñu ya̱ jiáꞌnu na̱a̱ꞌ rán, jee na̱ ka̱ꞌ netuꞌ ka̱ꞌ kúvi rán. Jee saáva koto yúꞌví rán kune̱ꞌyá rán rá ñɨvɨ ya̱ siúꞌví‑i ránoꞌó, ni koto nániꞌvɨꞌ iniꞌ rán.

¹⁵ Chisaꞌ ne̱ ánímaꞌ rán íyó chiñúꞌún rán Cristo jee íyó ku̱ꞌvayuꞌú rán ya̱ kúvi re̱ꞌ I̱toꞌoꞌ rán, jee sukuáni íyó satúꞌva rán maárán sáva naxiníkó váꞌa rán nu̱u̱nꞌ ntáká ñɨvɨ ya̱ jíkátu̱ꞌún‑u ránoꞌó jie̱ꞌe̱ꞌ ya̱ váꞌa ya̱ nétu rán íyó tu̱neí iniꞌ rán ya̱ saꞌá Cristo jín rán.

¹⁶ Soo másúꞌ koo iniꞌ rán naxiníkó rán nu̱u̱nꞌ ráa, jee kaꞌanꞌ yɨ́ñúꞌún rán jín ráa, jee kueꞌnu na̱a̱ꞌ rán ya̱ jíníꞌ rán ya̱ ntu íyó si̱kɨ̱ꞌ rán, sáva sáá káꞌánꞌ niva̱ꞌa ráa si̱kɨ̱ꞌ rán kukanuun ráa jie̱ꞌe̱ꞌ tu̱ꞌun niváꞌa ya̱ káꞌánꞌ ráa jie̱ꞌe̱ꞌ va̱ꞌa jiáꞌnu rán jie̱ꞌe̱ꞌ yɨ́ꞌɨ́ rán nu̱u̱nꞌ Cristo.

¹⁷ Chi retú kuíni máá Ndiosíꞌ ya̱ kunoꞌo rán, jee íyó va̱ꞌa ka̱ꞌ ya̱ kunoꞌo rán jie̱ꞌe̱ꞌ ya̱ sáꞌá rán tiñu váꞌa, nsú káꞌ jie̱ꞌe̱ꞌ tiñu níváꞌa.

¹⁸ Chi suni íyó nijia ya̱ Cristo nnoꞌo re̱ꞌ jee ɨɨn íchíni ni̱ꞌi̱ꞌ re̱ꞌ nchu̱náán re̱ꞌ nu̱u̱nꞌ rá kua̱chi rá ñɨvɨ íyótiñu‑u nɨ́ɨ́nkání. Súka̱ꞌ te̱e na̱a̱ꞌ kúvi re̱ꞌ ntu kuáchi re̱ꞌ, soo nnoꞌo re̱ꞌ jie̱ꞌe̱ꞌ ya̱ váꞌa nu̱u̱nꞌ rá ñɨvɨ ya̱ ntu kúvi ñɨvɨ na̱a̱ꞌ, sáva na̱siáꞌa re̱ꞌ yó nu̱u̱nꞌ Ndiosíꞌ. Jee súka̱ꞌ ni̱ꞌi̱ꞌ nijia re̱ꞌ sáá ntekuꞌ re̱ꞌ jín yɨkɨkúñu re̱ꞌ, soo nna̱tekuꞌ i̱i̱ꞌ tuku re̱ꞌ nsa̱ꞌá Ta̱chi̱ꞌ Ííꞌ Ndiosíꞌ.

¹⁹ Jee suni suꞌva ña̱ꞌa̱nꞌ re̱ꞌ jín Ta̱chi̱ꞌ Ííꞌ vá nu̱u̱nꞌ rá ñɨvɨ ya̱ yɨ́ꞌɨ́ kutú ta̱chi̱ꞌ káꞌánꞌ ráa nu̱u̱nꞌ kua̱ꞌa̱nꞌ rá ñɨvɨ níꞌiꞌ kuéntáꞌ yɨ́ꞌɨ́ ráa veka̱a, jee nkachitu̱ꞌún re̱ꞌ nu̱u̱nꞌ ráa.

²⁰ Maáráa ví ya̱ ntu nkáníjiá ráa nu̱u̱nꞌ Tu̱ꞌun Ndiosíꞌ ne̱ yanaꞌán rá ki̱vɨ̱ꞌ ntekuꞌ Noé, sáá káꞌnú ni̱yo iniꞌ Ndiosíꞌ nnetu re̱ꞌ sáá sátúꞌva Noé barkúꞌ naní arca. Jee iniꞌ arca yukuán nkaku yakuꞌ ni rá ñɨvɨ ya̱ kua̱chi u̱na̱ꞌ ráa vá nkaku nu̱u̱nꞌ nute.

²¹ Jee kuéntáꞌ kua̱ꞌ nkáku ráa nu̱u̱nꞌ nute vá, jee suni kuéntáꞌ sukuán kúnkunuún kúvi‑i ya̱ jiánuté‑ó tiempúꞌ vitan síkáku‑u ñɨvɨ, jie̱ꞌe̱ꞌ ya̱ nna̱tekuꞌ i̱i̱ꞌ Jesús ya̱ kúvi Cristo nkene‑e nteñu rá níyɨ. Soo nsú jie̱ꞌe̱ꞌ ya̱ siíyo rá téꞌén ñunéꞌyúꞌ‑ó jín nute, chisaꞌ jiánuté‑ó sáva stúvi‑ó ya̱ ne̱ ánímaꞌ‑ó chisóyuꞌú‑ó kueꞌnu na̱a̱ꞌ‑ó nu̱u̱nꞌ Ndiosíꞌ jín ya̱ jíkánꞌ táꞌvíꞌ‑ó nu̱u̱nꞌ Ndiosíꞌ ya̱ sííyo kua̱chi‑ó nonoo ánímaꞌ‑ó ya̱ jíníꞌ‑ó ya̱ ntu níso‑ó kua̱chi.

²² Jee nnaa Cristo kua̱noꞌonꞌ‑o antivɨ́ súkún, jee nééꞌ re̱ꞌ ichi kuáꞌá Ndiosíꞌ nu̱u̱nꞌ kúñáꞌnú nasɨ́kuitɨꞌ re̱ꞌ tátúníꞌ re̱ꞌ, jee rá najiáꞌáꞌ ííꞌ, jín rá nísotíñú, jín rá níso fuersáꞌ, nchiꞌi Ndiosíꞌ ráa xi̱ntíín re̱ꞌ.