1 Pedro 1 - Mixteco del suroeste de Tlaxiaco Oaxaca

Chúichí Pedro tu̱ꞌun káva̱ꞌa nu̱u̱nꞌ rá ñɨvɨ ya̱ kúneí iniꞌ ráa Jesús

¹ Nuꞌuꞌ Pedro níso ni̱ꞌ tiñu apóstol chúichí Jesús nuꞌuꞌ. Níso re̱ꞌ tiñu Cristo ya̱ chúichí re̱ꞌ nuꞌuꞌ sáva stékútu̱ꞌún ni̱ꞌ tu̱ꞌun re̱ꞌ. Tée ni̱ꞌ tutuꞌ yaꞌá kua̱jiááꞌ nu̱u̱nꞌ ránoꞌó ñɨvɨ ya̱ nka̱ji Ndiosíꞌ ya̱ kúvi rán to̱ꞌo̱ꞌ inka ñuunꞌ ñe̱te̱nuun rán nééꞌ rán nu̱u̱nꞌ rá ñuunꞌ Ponto, Galacia, Capadocia, Asia jín Bitinia.

² Jee máá Tátáꞌ‑ó Ndiosíꞌ nka̱ji re̱ꞌ ránoꞌó, sánikua̱ꞌ nkuna̱a̱ꞌ iniꞌ re̱ꞌ ne̱ yanaꞌán jee nsásɨ́ɨ́n Ta̱chi̱ꞌ Ííꞌ re̱ꞌ ránoꞌó kɨtíñú rán nu̱u̱nꞌ Ndiosíꞌ sáva kaníjiá rán re̱ꞌ jee sáva nasánoo re̱ꞌ ránoꞌó nu̱u̱nꞌ kua̱chi rán jín ni̱ñɨ̱ꞌ Jesucristo ya̱ ñatɨ re̱ꞌ sáá níꞌiꞌ re̱ꞌ jie̱ꞌe̱ꞌ rán. Na̱ ka̱ꞌ ntántúníꞌ ka̱ꞌ koo ya̱ máníꞌ iniꞌ Ndiosíꞌ jín rán jín ya̱ kino̱o va̱ꞌa iniꞌ ánímaꞌ rán saꞌá re̱ꞌ.

Íyó kutú tu̱neí iniꞌ‑ó nétu‑ó kutekuꞌ‑ó nɨ́ɨ́nkání jín Cristo

³ Na̱ ka̱ꞌ nakuetúꞌún‑ó Ndiosíꞌ ya̱ kúvi re̱ꞌ Tátáꞌ I̱toꞌoꞌ‑ó Jesús ya̱ kúvi Cristo, chi jie̱ꞌe̱ꞌ ntántúníꞌ nasɨ́kuitɨꞌ náꞌví iniꞌ re̱ꞌ yó, jee nsama re̱ꞌ iniꞌ‑ó nna̱sikáku jiáá re̱ꞌ yó jee íyó kutú tu̱neí iniꞌ‑ó nétu‑ó kutekuꞌ‑ó nɨ́ɨ́nkání jín re̱ꞌ, jie̱ꞌe̱ꞌ ya̱ nna̱tekuꞌ i̱i̱ꞌ Jesús ya̱ kúvi Cristo nene re̱ꞌ nteñu rá níyɨ.

⁴ Jee ni̱ꞌi̱nꞌ‑ó ta̱ꞌvi̱ꞌ vá ya̱ taji Ndiosíꞌ nu̱u̱nꞌ‑ó ya̱ nchu̱va̱ꞌa re̱ꞌ ne̱ antivɨ́ súkún ya̱ kúvi ta̱ꞌvi̱ꞌ ránoꞌó, ya̱ ni ntu tívɨ́‑ɨ, jee ni ntu̱náꞌ níváꞌa kútáꞌán jín‑i, jee ni ntu nɨ́ꞌɨ‑ɨ.

⁵ Chi jie̱ꞌe̱ꞌ ya̱ kúneí iniꞌ rán ya̱ sáꞌá Ndiosíꞌ jie̱ꞌe̱ꞌ rán, saáva kúmí re̱ꞌ ránoꞌó jín fuersáꞌ ííꞌ ni̱ꞌin re̱ꞌ sáva ni̱ꞌi̱nꞌ rán xinánitáꞌvíꞌ re̱ꞌ ránoꞌó ya̱ íyó stákoo‑o nsa̱ꞌá re̱ꞌ sáva stúvi nijinꞌ re̱ꞌ maa sáá kenta tióꞌ nu̱u̱nꞌ nɨ́ꞌɨ.

⁶ Jee jie̱ꞌe̱ꞌ vá ví ya̱ kusɨ̱ɨ̱ꞌ víꞌí iniꞌ rán, asúnika̱ꞌ sáá íyó koo tu̱nkuíꞌyáꞌ iniꞌ rán vitan jie̱ꞌe̱ꞌ kéꞌín tu̱nóꞌó táꞌánꞌ rán yakuꞌ ni tióꞌ.

⁷ Sáva kototúníꞌ tu̱nóꞌó ránoꞌó sáva stúvi maá nááꞌ nijia íñɨ́ ni̱ꞌi̱nꞌ rán kúneí iniꞌ rán Cristo, kuéntáꞌ kua̱ꞌ jítotúníꞌ ñɨvɨ ka̱a kuáán oro sáá náteñuꞌunꞌ ráa maa jín ñuꞌunꞌ, sáá jítotúníꞌ ráa oro retú ya̱ váꞌa ví‑i áxí ntu̱ví, soo ya̱ kúneí iniꞌ rán Cristo yɨ́yáꞌvi víꞌí‑i ka̱ꞌ nsú káꞌ oro, ya̱ kúvi‑i nantíñú náánꞌ. Jee retú nkene na̱a̱ꞌ va̱ꞌa ya̱ kúneí iniꞌ rán, jee ni̱ꞌi̱nꞌ rán nakuetúꞌún Ndiosíꞌ ránoꞌó, jee saꞌá yɨ́ñúꞌún jín rán, jee saꞌá ñáꞌnú re̱ꞌ ránoꞌó, ki̱vɨ̱ꞌ nenta nijinꞌ tuku Cristo.

⁸ Maáréꞌ ví ya̱ ñúnúunꞌ rán re̱ꞌ súnika̱ꞌ ntu jíníꞌ jínúunꞌ rán re̱ꞌ, jee jínúꞌ iniꞌ rán re̱ꞌ sú ntu néꞌyá rán re̱ꞌ vitan jee ne̱ sɨ̱ɨ̱ꞌ kúvi iniꞌ rán kúsɨ́ɨꞌ iniꞌ rán ya̱ ntántúníꞌ nasɨ́kuitɨꞌ viiꞌ ya̱ ni ntu kúvi ni̱ꞌi̱nꞌ rán ka̱ꞌ tu̱ꞌun na̱ja vá kachiꞌ rán maa.

⁹ Chi níꞌínꞌ rán natavaꞌ Cristo ránoꞌó nu̱u̱nꞌ kua̱chi rán sikáku re̱ꞌ ránoꞌó ya̱ váji nu̱u̱nꞌ ya̱ kúneí iniꞌ rán ínúꞌ iniꞌ rán Cristo.

¹⁰ Rá te̱e ya̱ nna̱kani ráa tu̱ꞌun vá ya̱ nkene yuꞌú Ndiosíꞌ jie̱ꞌe̱ꞌ na̱ja natavaꞌ Ndiosíꞌ yó nu̱u̱nꞌ kua̱chi‑ó sikáku re̱ꞌ yó, jee nna̱nukú tu̱ꞌun ñunkúún váꞌa ráa jie̱ꞌe̱ꞌ tu̱ꞌun nákani ráa ya̱ sikútaꞌviꞌ re̱ꞌ ta̱ꞌvi̱ꞌ vá nu̱u̱nꞌ‑ó jie̱ꞌe̱ꞌ íyó mániꞌ iniꞌ re̱ꞌ néꞌyá re̱ꞌ yó vitan.

¹¹ Jee nna̱nukú ráa na̱ tiempúꞌ jín na̱ja koo ntáká tu̱ꞌun stúvi ya̱chi̱ꞌ Ta̱chi̱ꞌ Ííꞌ Cristo ya̱ yɨ́ꞌɨ́ iniꞌ ráa nu̱u̱nꞌ ráa, ya̱ nkachiꞌ ya̱chi̱ꞌ‑i ya̱ kiji tu̱nóꞌó kunoꞌo Cristo, jín na̱ja vá viiꞌ nuñáꞌnú nasɨ́kuitɨꞌ re̱ꞌ sáá jiáꞌa tu̱nóꞌó vá.

¹² Soo nstúvi Ndiosíꞌ nu̱u̱nꞌ ráa ya̱ nsú ya̱ kuvi maáráa ni ví jie̱ꞌe̱ꞌ rá tiñu ya̱ nkachiꞌ ráa vá, chisaꞌ ya̱ kuvi ya̱ váꞌa maáránoꞌó ví jie̱ꞌe̱ꞌ rá tu̱ꞌun ya̱ nna̱kani ráa vá, jee vitan tu̱ꞌun vá tékútu̱ꞌún nu̱u̱nꞌ ránoꞌó ya̱ stékútu̱ꞌún rá ñɨvɨ tu̱ꞌun váꞌa nsa̱ꞌá Ta̱chi̱ꞌ Ííꞌ Ndiosíꞌ ya̱ nta̱jí re̱ꞌ nkiji‑i ne̱ antivɨ́ súkún. Jee ne̱ rá najiáꞌáꞌ ííꞌ Ndiosíꞌ ñúkúvi iniꞌ ráa ranika̱ꞌ kuniꞌ ráa maa.

Kána Ndiosíꞌ yó sáva kueꞌnu noo‑ó nkɨ́ꞌɨ‑ó nu̱u̱nꞌ ya̱ niváꞌa

¹³ Saáva saꞌá túꞌva rán antúníꞌ maárán nu̱u̱nꞌ tiñu sáꞌá rán nu̱u̱nꞌ Ndiosíꞌ, kani kájí iniꞌ rán, íchí kuneenu̱u̱nꞌ noo rán koo kutú tu̱neí iniꞌ rán kunetu rán ya̱ ni̱ꞌi̱nꞌ rán ya̱ váꞌa ya̱ máníꞌ iniꞌ Ndiosíꞌ sikútaꞌviꞌ re̱ꞌ ránoꞌó ki̱vɨ̱ꞌ nenta nijinꞌ tuku Jesús ya̱ kúvi Cristo.

¹⁴ Jee kuéntáꞌ se̱ꞌya ya̱ káníjiá, jee koto jiáꞌnu rán ka̱ꞌ sáni ñaꞌnu rán jín ya̱ sɨ́ɨ́ꞌ néꞌí níyo iniꞌ rán tióꞌ ya̱ta̱ꞌ ne̱ sáá ntiáꞌan ka̱ꞌ kuniꞌ rán Tu̱ꞌun Ndiosíꞌ.

¹⁵ Chisaꞌ sánikua̱ꞌ íyó sɨ́ɨ́n Ndiosíꞌ ntu yɨ́ꞌɨ́ re̱ꞌ nu̱u̱nꞌ ya̱ niváꞌa, jee suni sukuán koo sɨ́ɨ́n rán nkɨ́ꞌɨ rán nu̱u̱nꞌ ya̱ niváꞌa nu̱u̱nꞌ ntáká tiñu jiáꞌnu rán kɨtíñú rán nu̱u̱nꞌ Ndiosíꞌ ya̱ nkana re̱ꞌ ránoꞌó.

¹⁶ Chi sukuán káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ: “Koo sɨ́ɨ́n rán nkɨ́ꞌɨ rán nu̱u̱nꞌ ya̱ niváꞌa, chi nuꞌuꞌ jee i̱i̱ꞌ ni̱ꞌ ntu yɨ́ꞌɨ́ ni̱ꞌ nu̱u̱nꞌ ya̱ niváꞌa.”

¹⁷ Jee ya̱ káchíꞌ rán ya̱ Ndiosíꞌ ví Tátáꞌ rán ya̱ maáréꞌ vá ntu tɨ́ɨn kuéntáꞌ re̱ꞌ ne̱ ɨɨn kúvi ta ɨɨn ɨɨn ñɨvɨ, chi ɨɨn nuún ni sánáaꞌ re̱ꞌ jie̱ꞌe̱ꞌ ta ɨɨn ɨɨn ráa sánikua̱ꞌ tiñu sáꞌá ráa. Jee saáva kuꞌun yúꞌví iniꞌ rán kɨtíñú rán nu̱u̱nꞌ re̱ꞌ tiempúꞌ ya̱ nééꞌ rán tékúꞌ rán iniꞌ ñɨ̱vɨ́ yaꞌá.

¹⁸ Chi ya̱ jíníꞌ rán ya̱ nchu̱náán Ndiosíꞌ sáva nsi̱káku re̱ꞌ ránoꞌó nna̱kani núne re̱ꞌ ránoꞌó nu̱u̱nꞌ rá ñujiínꞌ ka̱ꞌá ñaꞌnu rán nékúvi ya̱ nchuꞌun rá tátáꞌ rán maárán. Soo nsú jín nantíñú ya̱ kɨ̱naanꞌ kuéntáꞌ oro áxí plata nchu̱náán re̱ꞌ sáva nna̱kani núne re̱ꞌ ránoꞌó,

¹⁹ chisaꞌ nchu̱náán re̱ꞌ ni̱ñɨ̱ꞌ Cristo ya̱ máá viiꞌ yɨ́yáꞌvi ntántúníꞌ, ya̱ ñatɨ‑ɨ sáá nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ, kuéntáꞌ kua̱ꞌ ɨɨn lanchi lúlí maa váꞌa ya̱ íyó noo ya̱ ni ntu yɨ́kuéꞌí ya̱ sókóꞌ ñɨvɨ maa nu̱u̱nꞌ Ndiosíꞌ.

²⁰ Chi ne̱ sáá ntiáꞌan ka̱ꞌ kiko̱o ñɨ̱vɨ́ yaꞌá jee saá ya̱ ñani Ndiosíꞌ Cristo sáva kunoꞌo‑o sukuán, ya̱ saá nkiji nijinꞌ‑i tiempúꞌ kuánɨꞌɨ yaꞌá, nsa̱ꞌá Ndiosíꞌ sukuán jie̱ꞌe̱ꞌ ya̱ kuvi ya̱ váꞌa ránoꞌó.

²¹ Chi jie̱ꞌe̱ꞌ Cristo jee jínúꞌ iniꞌ rán Ndiosíꞌ, ya̱ kúvi re̱ꞌ ya̱ nna̱xinátekuꞌ i̱i̱ꞌ tuku re̱ꞌ Cristo nnene‑e nteñu rá níyɨ, jee nnu̱ñáꞌnú nasɨ́kuitɨꞌ‑ɨ nsa̱ꞌá re̱ꞌ, jee saáva kúneí iniꞌ rán ínúꞌ iniꞌ rán Ndiosíꞌ, jee íyó kutú tu̱neí iniꞌ rán nétu rán ya̱ saꞌá re̱ꞌ.

²² Soo vitan jee ya̱ nna̱saꞌá ninuꞌun re̱ꞌ iniꞌ ánímaꞌ rán, jie̱ꞌe̱ꞌ ya̱ [nsa̱ꞌá Ta̱chi̱ꞌ Ííꞌ re̱ꞌ] ya̱ nka̱níjiá rán tu̱ꞌun na̱a̱ꞌ re̱ꞌ, sáva kunu̱u̱nꞌ nijia rán rá ñanitáꞌán rán, saáva ne̱ ninuꞌun ánímaꞌ rán kunu̱u̱nꞌ ntántúníꞌ víꞌí rán ɨɨn inka táꞌán rán.

²³ Chi nna̱kaku jiáá tuku rán, soo nsáꞌ nna̱kaku rán se̱ꞌya ni̱ñɨ̱ꞌ nu̱u̱nꞌ sɨꞌɨ́ ya̱ jíꞌíꞌ‑i, chisaꞌ nna̱kaku rán sáꞌá Tu̱ꞌun Ndiosíꞌ ya̱ tékúꞌ‑u jee kino̱o‑o nɨ́ɨ́nkání.

²⁴ Chi káchíꞌ nu̱u̱nꞌ Tutuꞌ Ííꞌ ya̱: Ntáká ñɨvɨ ñɨ̱vɨ́ kúvi ráa kuéntáꞌ yu̱ku̱ꞌ, jee ntáká ya̱ viiꞌ íyó ñɨvɨ kúvi kuéntáꞌ itaꞌ yúkú, chi náchi yu̱ku̱ꞌ, jee jiétéꞌ itaꞌ.

²⁵ Soo tu̱ꞌun I̱toꞌoꞌ‑ó kínóo íyó‑o nɨ́ɨ́nkání, káchíꞌ nu̱u̱nꞌ Tutuꞌ Ííꞌ. Jee tu̱ꞌun yaꞌá kúvi‑i tu̱ꞌun váꞌa re̱ꞌ ya̱ ya nte̱ku̱tu̱ꞌún‑u nu̱u̱nꞌ ránoꞌó.