1 Juan 2 - Mixteco del suroeste de Tlaxiaco Oaxaca

Cristo káꞌánꞌ jie̱ꞌe̱ꞌ yó náma re̱ꞌ yó

¹ Ránoꞌó ya̱ kúneí iniꞌ rán Jesús, ya̱ kúvi rán kuéntáꞌ se̱ꞌya ni̱ꞌ, tée ni̱ꞌ rá tu̱ꞌun yaꞌá nu̱u̱nꞌ rán sáva nsáꞌá rán kua̱chi. Soo retú néni ɨɨn‑ó saꞌá kua̱chi, jee íyó ɨɨn re̱ꞌ ya̱ yɨ́tuvi re̱ꞌ náma re̱ꞌ yó ichinúúnꞌ Tátáꞌ‑ó Ndiosíꞌ, jee suvire̱ꞌ kúvi Jesús ya̱ kúvi Cristo ya̱ na̱a̱ꞌ kúvi re̱ꞌ.

² Jee suvire̱ꞌ nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ sáva kunekáꞌnú iniꞌ Ndiosíꞌ kua̱chi‑ó. Jee nsáꞌ níꞌiꞌ re̱ꞌ kua̱chi kuitɨꞌ jie̱ꞌe̱ꞌ kua̱chi maáó ni, chi suni ni̱ꞌi̱ꞌ re̱ꞌ jie̱ꞌe̱ꞌ kua̱chi ntáká rá ñɨvɨ íyó ñɨ̱vɨ́ yaꞌá.

³ Nu̱u̱nꞌ síkúnkuvi‑ó rá tiñu tátúníꞌ re̱ꞌ, jee suꞌva kukáꞌnú nijia iniꞌ‑ó ya̱ ma̱ni̱ꞌ‑ó jín Ndiosíꞌ.

⁴ Soo ñɨvɨ ya̱ káchíꞌ: “Nuꞌuꞌ chi ma̱ni̱ꞌ ni̱ꞌ jín Ndiosíꞌ”, káchíꞌ ráa, soo ntu̱ví síkúnkuvi ráa rá tu̱ꞌun tátúníꞌ re̱ꞌ, jee kúvi ráa ñɨvɨ túꞌún jee ntu̱ví ñúꞌún tu̱ꞌun na̱a̱ꞌ iniꞌ ñɨvɨ vá.

⁵ Soo néni ɨɨn ñɨvɨ ya̱ síkúnkuvi ráa tu̱ꞌun re̱ꞌ, jee ñɨvɨ yaꞌá máá naáꞌ nijia ya̱ nijia iniꞌ ráa ñúnúunꞌ ráa Ndiosíꞌ, jee jie̱ꞌe̱ꞌ yaꞌá jíníꞌ‑ó ya̱ yɨ́ꞌɨ́‑ó nu̱u̱nꞌ re̱ꞌ.

⁶ Jee ñɨvɨ ya̱ káchíꞌ ya̱ kino̱o kutú‑u kɨꞌɨ‑ɨ nu̱u̱nꞌ re̱ꞌ, jee íyó ya̱ kueꞌnu‑u kuéntáꞌ ñaꞌnu Jesús.

Tu̱ꞌun tátúníꞌ jiáá

⁷ Ránoꞌó ya̱ ñúnúunꞌ ni̱ꞌ kuéntáꞌ ñaniꞌ ni̱ꞌ, nsú tu̱ꞌun ya̱ tátúníꞌ jiáá re̱ꞌ ví ya̱ tée ni̱ꞌ nu̱u̱nꞌ rán, chisaꞌ tu̱ꞌun ya̱ nta̱túníꞌ re̱ꞌ ne̱ yanaꞌán ya̱ ya nni̱ꞌi̱nꞌ rán ne̱ xíꞌnañúꞌún ya̱ ni̱nu̱ꞌ iniꞌ rán kúvi‑i. Jee tu̱ꞌun vá kúvi ya̱ nteso̱ꞌo rán ne̱ ki̱vɨ̱ꞌ nka̱jiéꞌé ni̱nu̱ꞌ iniꞌ rán.

⁸ Chisaꞌ tée ni̱ꞌ nu̱u̱nꞌ rán ɨɨn tu̱ꞌun ya̱ tátúníꞌ jiáá re̱ꞌ, ya̱ nstúvi re̱ꞌ ya̱ máá naáꞌ kúvi nijia tu̱ꞌun vá jie̱ꞌe̱ꞌ na̱sa ñaꞌnu re̱ꞌ, jee suni maárán, chi jíka‑ó ichi nu̱u̱nꞌ nijinꞌ sáꞌá re̱ꞌ, chi suꞌva kua̱nɨꞌɨ nu̱u̱nꞌ neenꞌ, jee kúvi re̱ꞌ ñuꞌunꞌ nijia ya̱ ya túúnꞌ.

⁹ Jee ñɨvɨ ya̱ káchíꞌ ya̱ íñɨ́‑ɨ nu̱u̱nꞌ túúnꞌ ñuꞌunꞌ re̱ꞌ, soo táꞌvi iniꞌ‑i néꞌyá‑a ñanitáꞌán‑a ya̱ kúneí iniꞌ vá Jesús, jee ñɨvɨ vá íñɨ́ i̱i̱ꞌ nu̱u̱nꞌ neenꞌ ne̱ vitan.

¹⁰ Soo ñɨvɨ ya̱ ñúnúunꞌ‑u ñanitáꞌán‑a, jee kínóo kutú‑u nu̱u̱nꞌ túúnꞌ ñuꞌunꞌ re̱ꞌ, jee ni ntu̱náꞌ íyó ya̱ ñúꞌún iniꞌ ñɨvɨ vá ya̱ xinínkava maa nu̱u̱nꞌ kua̱chi.

¹¹ Soo ñɨvɨ ya̱ táꞌvi iniꞌ‑i néꞌyá‑a ñanitáꞌán‑a, jee íñɨ́‑ɨ nu̱u̱nꞌ neenꞌ, chi íyó‑o jín ya̱ niváꞌa, jee jiáꞌnu‑u nu̱u̱nꞌ neenꞌ, chi ni ntu̱ví jíníꞌ‑i né ɨɨn ichi kua̱ꞌa̱nꞌ‑a chi ya̱ neenꞌ vá ñasɨꞌ nchinúún‑u kuéntáꞌ kuáá‑a.

¹² Tée ni̱ꞌ rá tu̱ꞌun yaꞌá nu̱u̱nꞌ ránoꞌó ya̱ kúvi kuéntáꞌ se̱ꞌya ni̱ꞌ, chi Ndiosíꞌ nne̱káꞌnú iniꞌ‑i jie̱ꞌe̱ꞌ rá kua̱chi rán jie̱ꞌe̱ꞌ ya̱ nsa̱ꞌá Jesús.

¹³ Tée ni̱ꞌ nu̱u̱nꞌ ránoꞌó, rá tátáꞌ, chi ma̱ni̱ꞌ rán jín maáréꞌ ya̱ ya íyó ne̱ tiempúꞌ xíꞌnañúꞌún. Tée ni̱ꞌ nu̱u̱nꞌ ránoꞌó, rá te̱e súchí, chi nku̱neí rán jín kui̱ꞌna̱ꞌ kúñáꞌnú ya̱ ntu kúvi sikúvi re̱ꞌ iniꞌ ránoꞌó nu̱u̱nꞌ kua̱chi. Tée ni̱ꞌ nu̱u̱nꞌ ránoꞌó rá kuáchí lúlí, chi ma̱ni̱ꞌ rán jín Tátáꞌ‑ó Ndiosíꞌ.

¹⁴ Ntee ni̱ꞌ nu̱u̱nꞌ ránoꞌó, rá tátáꞌ, chi ma̱ni̱ꞌ rán jín maáréꞌ ya̱ ya íyó ne̱ tiempúꞌ xíꞌnañúꞌún. Ntee ni̱ꞌ nu̱u̱nꞌ ránoꞌó rá te̱e súchí, chi neí iniꞌ rán, jee kínóo kutú Tu̱ꞌun Ndiosíꞌ ñúꞌún iniꞌ ánímaꞌ rán, jee nku̱neí rán jín kui̱ꞌna̱ꞌ kúñáꞌnú.

¹⁵ Jee koto ñúnúunꞌ rán rá tiñu níyo iniꞌ ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa nu̱u̱nꞌ Ndiosíꞌ, ni rá nantíñú íyó iniꞌ ñɨ̱vɨ́. Jee retú néni ɨɨn ñɨvɨ ñúnúunꞌ ichi jíka rá ñɨvɨ ñɨ̱vɨ́ yaꞌá, jee ntu̱ví ñúnúunꞌ ñɨvɨ vá Tátáꞌ‑ó Ndiosíꞌ.

¹⁶ Chi nsú nu̱u̱nꞌ Tátáꞌ‑ó Ndiosíꞌ va̱ji nta̱ká ya̱ íyó ñujiínꞌ ñɨ̱vɨ́: ya̱ níyo néꞌén iniꞌ saꞌá‑ó jín yɨkɨkúñu‑ó, jín ya̱ níyo iniꞌ‑ó ya̱ néꞌyá‑ó jín nchinúún‑ó, jín ya̱ kúvíxiꞌ‑ó ya̱ kúmí‑ó jín ya̱ sáꞌá‑ó. Chisaꞌ káku rá yaꞌá iniꞌ ñɨ̱vɨ́ yaꞌá.

¹⁷ Jee ñɨ̱vɨ́ chi kua̱nɨꞌɨ‑ɨ, jín rá íyó iniꞌ‑i ya̱ níyo iniꞌ‑ó. Soo ñɨvɨ ya̱ sáꞌá sánikua̱ꞌ kuíni Ndiosíꞌ kino̱o kutú‑u jín re̱ꞌ nɨ́ɨ́nkání.

Ya̱ nááꞌ jín tuntúꞌún

¹⁸ Ránoꞌó ya̱ kúvi kuéntáꞌ se̱ꞌya ni̱ꞌ, tiempúꞌ nu̱u̱nꞌ nɨꞌɨ ví yaꞌá. Jee kiji maá te̱e ya̱ kenta si̱kɨ̱ꞌ Cristo, sánikua̱ꞌ ya̱ nteso̱ꞌo rán. Jee vitan jee ña̱ko̱o kue̱ꞌe̱ꞌ rá ñɨvɨ ya̱ kénta si̱kɨ̱ꞌ Cristo, saáva jíníꞌ‑ó ya̱ kúvi‑i tiempúꞌ kua̱nɨꞌɨ.

¹⁹ Jee nteñu maáórán nkene ráa, soo ntu̱ví nkúvi ráa táꞌán‑órán ya̱ yɨ́ꞌɨ́‑órán nu̱u̱nꞌ Jesús. Chi retánꞌ nkuvi ráa táꞌán‑órán, jee nkino̱o ráa jín‑ó, nékúvi. Soo nkene ráa nteñu‑ó kua̱ꞌa̱nꞌ ráa sáva túvi kájí ya̱ nsú táꞌán‑ó kúvi nta̱ká ráa.

²⁰ Soo ránoꞌó chi nni̱ꞌi̱nꞌ rán Ta̱chi̱ꞌ Ííꞌ Ndiosíꞌ yɨ́ꞌɨ́‑ɨ iniꞌ rán, ya̱ táji Cristo ya̱ ííꞌ kúvi re̱ꞌ, jee saáva jíníꞌ nta̱ká rán ya̱ naáꞌ.

²¹ Nsáꞌ tée ni̱ꞌ tutuꞌ yaꞌá nu̱u̱nꞌ rán jie̱ꞌe̱ꞌ ya̱ ntu̱ví jíníꞌ rán ya̱ naáꞌ. Chisaꞌ tée ni̱ꞌ maa nu̱u̱nꞌ rán chi jíníꞌ rán ya̱ naáꞌ. Jee ni ɨɨn tuntúꞌún ntu váji ne̱ nu̱u̱nꞌ ya̱ naáꞌ.

²² Jee, ¿né ɨɨn kúvi ñɨvɨ túꞌún? Suvi‑i kúvi ñɨvɨ ya̱ káchíꞌ ya̱ Jesús ntu̱ví kúvi re̱ꞌ Cristo, ya̱ ñani Ndiosíꞌ sáva tatúníꞌ‑i nu̱u̱nꞌ ñɨ̱vɨ́. Jee ñɨvɨ yaꞌá kúvi ya̱ kénta‑a si̱kɨ̱ꞌ Cristo, jee kúíchi iniꞌ ñɨvɨ vá Tátáꞌ‑ó Ndiosíꞌ jín Se̱ꞌya re̱ꞌ.

²³ Jee nta̱ká ñɨvɨ ya̱ kúíchi iniꞌ ráa Jesús, jee ni ntu̱ví íyó Tátáꞌ‑ó Ndiosíꞌ jín ráa. Jee ñɨvɨ ya̱ jiáꞌayuꞌú ya̱ Se̱ꞌya Ndiosíꞌ kúvi re̱ꞌ I̱toꞌoꞌ‑o, jee suni íyó Tátáꞌ‑ó Ndiosíꞌ jín‑i.

²⁴ Chuꞌun va̱ꞌa rán iniꞌ ánímaꞌ rán tu̱ꞌun ya̱ ya nteso̱ꞌo rán ne̱ xíꞌnañúꞌún ya̱ ni̱nu̱ꞌ iniꞌ rán. Jee retú tu̱ꞌun nteso̱ꞌo rán ne̱ xíꞌnañúꞌún kínóo kutú‑u ñúꞌún iniꞌ ánímaꞌ rán, saájee suni kino̱o kutú rán yɨ́ꞌɨ́ rán nu̱u̱nꞌ Se̱ꞌya Ndiosíꞌ jín nu̱u̱nꞌ maá Tátáꞌ‑ó Ndiosíꞌ.

²⁵ Jee yaꞌá kúvi tu̱ꞌun na̱a̱ꞌ ya̱ nchi̱sóyuꞌú Ndiosíꞌ nu̱u̱nꞌ‑ó: ya̱ kutekuꞌ‑ó jín re̱ꞌ nɨ́ɨ́nkání.

²⁶ Tée ni̱ꞌ rá tu̱ꞌun yaꞌá nu̱u̱nꞌ rán jie̱ꞌe̱ꞌ rá ñɨvɨ ya̱ núkú ráa ya̱ xináꞌví ráa ránoꞌó.

²⁷ Soo ránoꞌó chi Ta̱chi̱ꞌ Ííꞌ ya̱ nníꞌinꞌ rán nu̱u̱nꞌ Jesús kínóo kutú‑u iniꞌ ránoꞌó. Jee saáva ntu̱ví jíniñúꞌún rán ya̱ xinéꞌénꞌ ni ɨɨn ñɨvɨ ránoꞌó [inka tu̱ꞌun], chi máá Ta̱chi̱ꞌ Ííꞌ re̱ꞌ xínéꞌénꞌ ránoꞌó nta̱ká tiñu. Jee na̱a̱ꞌ re̱ꞌ, jee ntu túꞌún re̱ꞌ. Saájee kino̱o kutú rán kɨꞌɨ rán nu̱u̱nꞌ Cristo, sánikua̱ꞌ ya̱ nxi̱néꞌénꞌ Ta̱chi̱ꞌ Ííꞌ ránoꞌó.

²⁸ Jee vitan ra, ránoꞌó ya̱ kúvi rán kuéntáꞌ se̱ꞌya ni̱ꞌ, kino̱o kutú rán kɨꞌɨ rán nu̱u̱nꞌ Cristo sáva sáá kitu̱vi re̱ꞌ sáá niji re̱ꞌ ñɨ̱vɨ́ yaꞌá, jee kuneí iniꞌ‑ó kuiñɨ‑ó ichinúúnꞌ re̱ꞌ, jee nkúkanuun‑ó nu̱u̱nꞌ re̱ꞌ sáá niji re̱ꞌ.

²⁹ Jee nu̱u̱nꞌ ya̱ jíníꞌ rán ya̱ na̱a̱ꞌ ví re̱ꞌ, jee suni jíníꞌ rán ya̱ nta̱ká ñɨvɨ ya̱ sáꞌá náaꞌ, jee nsa̱ꞌá re̱ꞌ nna̱kaku jiáá ráa kúvi nijia ráa se̱ꞌya Ndiosíꞌ.