1 Corintios 9 - Mixteco del suroeste de Tlaxiaco Oaxaca

Rá tiñu ya̱ íyó núne kuvi saꞌá rá te̱e kúvi najiáꞌáꞌ Cristo ya̱ nísotíñú ráa tiñu apóstol

¹ ¿Á nsáꞌ íyó núne ni̱ꞌ ya̱ íyó ni̱ꞌi̱nꞌ ni̱ꞌ jie̱ꞌe̱ꞌ tiñu sáꞌá ni̱ꞌ rúja? Jee, ¿á nsáꞌ kúvi ni̱ꞌ najiáꞌáꞌ Cristo ya̱ nísotíñú ni̱ꞌ tiñu apóstol chúichí re̱ꞌ nuꞌuꞌ nákani ni̱ꞌ tu̱ꞌun váꞌa re̱ꞌ rúja? Jee, ¿á nsáꞌ niniꞌ ni̱ꞌ maá I̱toꞌoꞌ‑ó Jesús rúja? Jee, ¿á nsú ránoꞌó kúvi tiñu nsa̱ꞌá ni̱ꞌ jín I̱toꞌoꞌ‑ó, ya̱ nsi̱kívɨ ni̱ꞌ ránoꞌó xi̱ntíín I̱toꞌoꞌ‑ó rúja?

² Retú inka rá ñɨvɨ ntu̱ví jiáꞌayuꞌú ráa ya̱ nuꞌuꞌ nísotíñú ni̱ꞌ tiñu apóstol chúichí Cristo nuꞌuꞌ nakani ni̱ꞌ tu̱ꞌun re̱ꞌ nu̱u̱nꞌ ráa, soo nu̱u̱nꞌ ránoꞌó chi íyó nijia ya̱ kúvi ni̱ꞌ apóstol nu̱u̱nꞌ rán. Chi ránoꞌó chi, stúvi nijia rán ya̱ nísotíñú nijia ni̱ꞌ tiñu apóstol nu̱u̱nꞌ I̱toꞌoꞌ‑ó kuéntáꞌ ɨɨn seyúꞌ, chi nsi̱kívɨ ni̱ꞌ ránoꞌó xi̱ntíín re̱ꞌ.

³ Jee tu̱ꞌun yaꞌá kúvi tu̱ꞌun ya̱ nama ni̱ꞌ maáníꞌ nu̱u̱nꞌ rá ñɨvɨ ya̱ kákuíyuꞌú ráa jie̱ꞌe̱ꞌ ni̱ꞌ.

⁴ Jee, ¿á nsáꞌ íyó níꞌinꞌ ráníꞌ kajiꞌ ránꞌ jee koꞌo ránꞌ [ya̱ táji ñɨvɨ nu̱u̱nꞌ ráníꞌ jie̱ꞌe̱ꞌ ya̱ sáꞌá ránꞌ tiñu Ndiosíꞌ] rúja?

⁵ Jee, ¿á nsáꞌ íyó kuvi kunaka ráníꞌ ñasɨ́ꞌɨ́ ya̱ jínúꞌ iniꞌ ráa tu̱ꞌun jie̱ꞌe̱ꞌ Jesús sáva kutáꞌán ráa jín ránꞌ ré né núꞌ kua̱ꞌa̱nꞌ ránꞌ, kuéntáꞌ íyó ñasɨ́ꞌɨ́ rá inka ka̱ꞌ rá tée kúvi apóstol, jín rá te̱e ya̱ kúvi ñaniꞌ I̱toꞌoꞌ‑ó, jín suni Pedro rúja?

⁶ Áxí, ¿á kua̱chi nuꞌuꞌ jín Bernabé ví rá apóstol ya̱ íyó satíñú ráníꞌ sáva ni̱ꞌi̱nꞌ ránꞌ kutekuꞌ ránꞌ [sáva kuvi kɨtíñú ránꞌ stékútu̱ꞌún ránꞌ tu̱ꞌun váꞌa I̱toꞌoꞌ‑ó] rúja?

⁷ ¿Né ɨɨn soldado sátíñú saɨn jee tékúꞌ re̱ꞌ xu̱ꞌún veꞌi maáréꞌ rúsa? Áxí, ¿né ɨɨn te̱e ya̱ tée re̱ꞌ tataꞌ uva jee ntu̱ví yájíꞌ re̱ꞌ ya̱ vixíꞌ vá rúja? Áxí, ¿né ɨɨn ñɨvɨ ya̱ kúmí‑i rá lanchi jee ntu̱ví jíꞌi‑i xu̱kui rátíꞌ rúja? Ntu̱ví íyó sukuán.

⁸ Rá tu̱ꞌun yaꞌá ya̱ káchíꞌ ni̱ꞌ ntu kúvi‑i kuáchi rá tu̱ꞌun kéne xi̱ni̱ꞌ rá ñɨvɨ ñɨ̱vɨ́ yaꞌá. Chi, ¿á ntu suni tu̱ꞌun nta̱túníꞌ Ndiosíꞌ ya̱ njiáꞌa re̱ꞌ nu̱u̱nꞌ Moisés, káchíꞌ‑i rá tu̱ꞌun yaꞌá résa?

⁹ Chi nu̱u̱nꞌ tu̱ꞌun ya̱ nta̱túníꞌ Ndiosíꞌ ya̱ ntee Moisés níso tu̱ꞌun ya̱ káchíꞌ suꞌva: “Koto chúꞌun nú ñunu yuꞌú xi̱ni̱kɨ̱ꞌ résá sátíñú ti̱ꞌ jín jie̱ꞌe̱ꞌ ti̱ꞌ sáva kene nikɨn trigúꞌ”, káchíꞌ tu̱ꞌun vá. ¿Á kua̱chi kuitɨꞌ jie̱ꞌe̱ꞌ xi̱ni̱kɨ̱ꞌ ví ya̱ nániꞌvɨꞌ iniꞌ Ndiosíꞌ ya̱ káchíꞌ re̱ꞌ sukuán résa?

¹⁰ Ntu̱ví chi, ¿á nsáꞌ káchíꞌ nijia re̱ꞌ maa jie̱ꞌe̱ꞌ maáó ranika̱ꞌ résa? Chi jie̱ꞌe̱ꞌ ya̱ váꞌa nu̱u̱nꞌ maáó kúvi ya̱ njiáꞌa re̱ꞌ tu̱ꞌun yaꞌá níso nu̱u̱nꞌ Tutuꞌ Ííꞌ, chi ñɨvɨ ya̱ nátaꞌví nu̱u̱nꞌ ñuꞌún jín ñɨvɨ ya̱ kúyutún nikɨn, jee íyó tu̱ꞌun neí iniꞌ ráa ya̱ ni̱ꞌi̱nꞌ ráa tataꞌ kéne nu̱u̱nꞌ tiñu sáꞌá ráa.

¹¹ Jee retú suni sukuán sáꞌá ránuꞌuꞌ nteñu ránoꞌó, kuéntáꞌ sáꞌá te̱e táji tataꞌ, suni kuéntáꞌ sukuán sáꞌá ráníꞌ ya̱ káchítu̱ꞌún ráníꞌ nu̱u̱nꞌ ránú Tu̱ꞌun Ndiosíꞌ ya̱ njia̱ꞌa Ta̱chi̱ꞌ Ííꞌ re̱ꞌ, sáva kuꞌun iniꞌ ánímaꞌ rán maa, jee, ¿á kue̱ꞌe̱ꞌ víꞌí ví retú nu̱u̱nꞌ ránú kene ya̱ jíniñúꞌún ráníꞌ sáva kutekuꞌ ránꞌ ya̱ sáꞌá ránꞌ tiñu I̱toꞌoꞌ‑ó résa?

¹² Jee retú íyó inka ñɨvɨ ya̱ íyó ni̱ꞌi̱nꞌ ráa nu̱u̱nꞌ rán ya̱ kutekuꞌ ráa jie̱ꞌe̱ꞌ xínéꞌénꞌ ráa ránoꞌó, saájee saꞌ víꞌí ka̱ꞌ íyó ni̱ꞌi̱nꞌ ráníꞌ nu̱u̱nꞌ ránoꞌó ya̱ kutekuꞌ ránꞌ résa. Soo ntu níkánꞌ ráníꞌ ya̱ taji ránú nu̱u̱nꞌ ránuꞌuꞌ ya̱ íyó ni̱ꞌi̱nꞌ ráníꞌ, chisaꞌ jiéꞌnéꞌ iniꞌ ránꞌ nɨꞌɨ, sáva ntu kasɨꞌ ránꞌ sikúténuun ránꞌ ka̱ꞌ tu̱ꞌun váꞌa jie̱ꞌe̱ꞌ Cristo.

¹³ Jee, ¿á nsáꞌ jíníꞌ ránú ya̱ rá su̱tu̱ꞌ ya̱ yɨ́ꞌɨ́ ñujiínꞌ veñu̱ꞌun káꞌnú ííꞌ, jee yájíꞌ ráa rá nantíñú sókóꞌ rá ñɨvɨ ichinúúnꞌ veñu̱ꞌun vá rúja? Jee rá su̱tu̱ꞌ ya̱ yɨ́tíñú nu̱u̱nꞌ altar nu̱u̱nꞌ téñuꞌunꞌ rá ñɨvɨ ya̱ sókóꞌ rává nu̱u̱nꞌ Ndiosíꞌ ichinúúnꞌ veñu̱ꞌun, jee suni níꞌínꞌ ráa ya̱ yájíꞌ ráa sava ya̱ nsókoꞌ rá ñɨvɨ nu̱u̱nꞌ altar yukuán.

¹⁴ Jee suni sukuán nta̱túníꞌ maá I̱toꞌoꞌ‑ó ya̱ rá te̱e ya̱ nákani tu̱ꞌun váꞌa jie̱ꞌe̱ꞌ Cristo, jee íyó ni̱ꞌi̱nꞌ ráa rá kutekuꞌ ráa nu̱u̱nꞌ tiñu sáꞌá ráa vá.

¹⁵ Soo nuꞌuꞌ chi ni ntu̱náꞌ ni̱ka̱nꞌ ni̱ꞌ ya̱ taji rán nu̱u̱nꞌ ni̱ꞌ ya̱ íyó ni̱ꞌi̱nꞌ ni̱ꞌ ya̱ taji rán ya̱ kutekuꞌ ni̱ꞌ. Jee ntu tée ni̱ꞌ tu̱ꞌun yaꞌá nu̱u̱nꞌ rán sáva sukuán taji rán ya̱ kutekuꞌ ni̱ꞌ. Chi va̱ꞌa ka̱ꞌ ví nu̱u̱nꞌ nuꞌuꞌ ya̱ retánꞌ kuviꞌ ni̱ꞌ nsú ká kasɨꞌ ɨɨn ñɨvɨ nu̱u̱nꞌ nuꞌuꞌ ya̱ kúvi káꞌánꞌ téyɨ́ɨ́ ni̱ꞌ jie̱ꞌe̱ꞌ ya̱ ntu níꞌínꞌ ni̱ꞌ ya̱ kutekuꞌ ni̱ꞌ nu̱u̱nꞌ rán.

¹⁶ Soo sáá stékútu̱ꞌún ni̱ꞌ tu̱ꞌun váꞌa jie̱ꞌe̱ꞌ Jesús, jee ntu̱ví íyó kutéyɨ́ɨ́ ni̱ꞌ jie̱ꞌe̱ꞌ ya̱ sáꞌá ni̱ꞌ maa, chi jie̱ꞌe̱ꞌ nika̱ꞌ ya̱ nte̱tuvi Ndiosíꞌ nuꞌuꞌ ya̱ saá íyó saꞌá ni̱ꞌ maa, saájee na̱ ka̱ꞌ náꞌví ni̱ꞌ retú ntu̱ví stékútu̱ꞌún ni̱ꞌ tu̱ꞌun váꞌa re̱ꞌ.

¹⁷ Chi retú sáꞌá ni̱ꞌ tiñu vá jie̱ꞌe̱ꞌ kuíni ni̱ꞌ saꞌá ni̱ꞌ maa, jee yukuán jee íyó ni̱ꞌi̱nꞌ ni̱ꞌ ya̱ꞌvi ni̱ꞌ. Soo retú sáꞌá ni̱ꞌ maa nsú jie̱ꞌe̱ꞌ ya̱ kuíni ni̱ꞌ saꞌá ni̱ꞌ maa, jee sáꞌá ni̱ꞌ maa jie̱ꞌe̱ꞌ ntee Ndiosíꞌ tiñu vá si̱kɨ̱ꞌ nuꞌuꞌ.

¹⁸ Jee saáva, ¿ná ya̱ꞌvi ni̱ꞌ koo‑o rúja? Ya̱ꞌvi ni̱ꞌ kúvi yaꞌá: sáá stékútu̱ꞌún ni̱ꞌ tu̱ꞌun váꞌa jie̱ꞌe̱ꞌ Jesús jee ntu kéya̱ꞌvi ni̱ꞌ nu̱u̱nꞌ rán jie̱ꞌe̱ꞌ táji ni̱ꞌ nu̱u̱nꞌ rán tu̱ꞌun váꞌa vá, sáva ntu̱náꞌ ñátíñú ni̱ꞌ ya̱ íyó ni̱ꞌi̱nꞌ ni̱ꞌ ya̱ kutekuꞌ ni̱ꞌ jie̱ꞌe̱ꞌ stékútu̱ꞌún ni̱ꞌ tu̱ꞌun I̱toꞌoꞌ‑ó.

¹⁹ Chi sú íñɨ́ núne ni̱ꞌ ya̱ ntu yɨ́ꞌɨ́ ni̱ꞌ xi̱ntíín ni ɨɨn ñɨvɨ, soo sáꞌá ni̱ꞌ maáníꞌ kuéntáꞌ ɨɨn musúꞌ kéꞌen ñɨvɨ nu̱u̱nꞌ ntáká rá ñɨvɨ ya̱ yɨ́tíñú ni̱ꞌ nu̱u̱nꞌ ráa, sáva ni̱ꞌi̱nꞌ ni̱ꞌ kue̱ꞌe̱ꞌ víꞌí ka̱ꞌ rá ñɨvɨ sáva kaníjiá ráa ji̱nu̱ꞌ iniꞌ ráa Cristo.

²⁰ Sáá nééꞌ ni̱ꞌ nteñu rá ñɨvɨ ñuunꞌ Israel, jee jiáꞌnu ni̱ꞌ kuéntáꞌ jiáꞌnu ráa, sáva ni̱ꞌi̱nꞌ ni̱ꞌ ráa sijínúꞌ ni̱ꞌ iniꞌ ráa kaníjiá ráa tu̱ꞌun váꞌa jie̱ꞌe̱ꞌ Jesús. Jee nteñu rá ñɨvɨ yɨ́ꞌɨ́ ráa xi̱ntíín tu̱ꞌun ley nta̱túníꞌ Ndiosíꞌ nu̱u̱nꞌ Moisés yanaꞌán jee jiáꞌnu ni̱ꞌ kuéntáꞌ retánꞌ yɨ́ꞌɨ́ ni̱ꞌ chi̱ji xi̱ntíín tu̱ꞌun vá, asúnika̱ꞌ ya̱ maáníꞌ ntu̱ví yɨ́ꞌɨ́ nijia ni̱ꞌ ka̱ꞌ xi̱ntíín tu̱ꞌun vá, soo jiáꞌnu ni̱ꞌ sukuán sáva kuvi ni̱ꞌi̱nꞌ ni̱ꞌ ráa sijínúꞌ ni̱ꞌ iniꞌ ráa kaníjiá ráa ji̱nu̱ꞌ iniꞌ ráa tu̱ꞌun jie̱ꞌe̱ꞌ Cristo.

²¹ Jee sáá nééꞌ ni̱ꞌ nteñu rá ñɨvɨ ya̱ ntu̱ví yɨ́ꞌɨ́ ráa xi̱ntíín tu̱ꞌun nta̱túníꞌ Ndiosíꞌ nu̱u̱nꞌ Moisés yanaꞌán, jee jiáꞌnu ni̱ꞌ kuéntáꞌ retánꞌ ntu̱ví yɨ́ꞌɨ́ ni̱ꞌ chi̱ji tu̱ꞌun vá, sáva ni̱ꞌi̱nꞌ ni̱ꞌ sijínúꞌ ni̱ꞌ iniꞌ ráa tu̱ꞌun váꞌa jie̱ꞌe̱ꞌ Jesús, asúka̱ꞌ ntu íñɨ́ núne ni̱ꞌ nu̱u̱nꞌ tu̱ꞌun tátúníꞌ Ndiosíꞌ, chi yɨ́ꞌɨ́ ni̱ꞌ xi̱ntíín tu̱ꞌun tátúníꞌ Cristo.

²² Jee sáá nééꞌ ni̱ꞌ jín rá ñaniꞌ‑ó ya̱ táyáꞌ iniꞌ tu̱jiáni iniꞌ ráa jie̱ꞌe̱ꞌ ya̱ ntiáꞌan kujia iniꞌ ráa nu̱u̱nꞌ Tu̱ꞌun Ndiosíꞌ, jee suni sukuán jiáꞌnu ni̱ꞌ sáni jiáꞌnu maáráa ya̱ táyáꞌ iniꞌ, sáva ni̱ꞌi̱nꞌ ni̱ꞌ ya̱ sijínúꞌ ni̱ꞌ iniꞌ ráa tu̱ꞌun vá. Jee sukuán násaꞌá ni̱ꞌ maáníꞌ, chi jiáꞌnu ni̱ꞌ sánikua̱ꞌ jiáꞌnu ntáká nu̱u̱nꞌ ñɨvɨ, sáva sú na̱ja ka̱ꞌ kuneí sijínúꞌ ni̱ꞌ iniꞌ sava ráa ji̱nu̱ꞌ iniꞌ ráa Jesús jee natavaꞌ re̱ꞌ ráa nu̱u̱nꞌ kua̱chi ráa sikáku re̱ꞌ ráa.

²³ Jee sáꞌá ni̱ꞌ ntáká rá yaꞌá sáva kutenuun ka̱ꞌ tu̱ꞌun váꞌa jie̱ꞌe̱ꞌ Cristo, sáva ni̱ꞌi̱nꞌ nkáá ni̱ꞌ jín ka̱ꞌ ñɨvɨ ya̱ váꞌa níso tu̱ꞌun yaꞌá.

²⁴ Jee, ¿á ntu jíníꞌ rán ya̱ sáá kunu rá ñɨvɨ jee ntáká kuitɨꞌ ráa jínu nijia, soo kua̱chi métúꞌún ɨɨn ni ví ya̱ kúneí‑i ni̱ꞌi̱nꞌ‑i kutaꞌviꞌ‑i ta̱ꞌvi̱ꞌ‑i rúja? Saáva suni sukuán kuéntáꞌ jínu ɨɨn ñɨvɨ, íyó kueꞌnu rán kuniꞌvɨꞌ iniꞌ rán kuiñɨ ni̱ꞌin rán jín tu̱ꞌun re̱ꞌ sáva kuneí rán ni̱ꞌi̱nꞌ rán ta̱ꞌvi̱ꞌ kutaꞌviꞌ rán ya̱ nachunáán re̱ꞌ nu̱u̱nꞌ ránoꞌó.

²⁵ Chi ntáká ñɨvɨ síkɨ́ jee núnasɨ́ ráa sátúꞌva ráa maáráa kúmí ráa ñunéꞌyúꞌ ráa sáva kuneí ráa jee ni̱ꞌi̱nꞌ ráa kutaꞌviꞌ ráa ɨɨn ta̱ꞌvi̱ꞌ, ya̱ ntu̱ví kínóo ntáká tiempúꞌ chi náánꞌ‑á. Soo maáó chi ni̱ꞌi̱nꞌ‑ó ɨɨn ta̱ꞌvi̱ꞌ ya̱ kutaꞌviꞌ‑ó ya̱ koo jín‑ó nɨ́ɨ́nkání ya̱ ntu̱ví náánꞌ‑a.

²⁶ Jee saáva nuꞌuꞌ, jee núnasɨ́ ni̱ꞌ kueꞌnu ni̱ꞌ sáni kuíni Ndiosíꞌ, kuéntáꞌ sáꞌá ɨɨn te̱e jínu, soo nsú kuéntáꞌ te̱e jínu saɨn. Jee núnasɨ́ ni̱ꞌ kuéntáꞌ te̱e kántáꞌán soo ntu̱ví sáꞌá ni̱ꞌ kuéntáꞌ sáꞌá ɨɨn te̱e ya̱ kántáꞌán jee jiáꞌa re̱ꞌ ta̱chi̱ꞌ víjin ni.

²⁷ Chisaꞌ, xichiꞌ nákeꞌen ni̱ꞌ yɨkɨkúñu ni̱ꞌ, jee chíꞌi ni̱ꞌ maa xi̱ntíín ni̱ꞌ, jee sáꞌá ni̱ꞌ sukuán sáva sáá nku̱neí ni̱ꞌ ya̱ nste̱kútu̱ꞌún ni̱ꞌ Tu̱ꞌun Ndiosíꞌ nu̱u̱nꞌ inka ñɨvɨ, jee retú ntu nákeꞌen ni̱ꞌ yɨkɨkúñu ni̱ꞌ jee sa̱naanꞌ jee ntu tɨɨn kuéntáꞌ Ndiosíꞌ ya̱ nsa̱ꞌá ni̱ꞌ jee xitá re̱ꞌ ta̱ꞌvi̱ꞌ nachunáán re̱ꞌ nu̱u̱nꞌ nuꞌuꞌ nékúvi.