1 Corintios 4 - Mixteco del suroeste de Tlaxiaco Oaxaca

Tiñu sáꞌá rá najiáꞌáꞌ chúichí Jesús ya̱ níso ráa tiñu apóstol

¹ Saáva ránuꞌuꞌ jee tɨɨn kuéntáꞌ ránú ya̱ musúꞌ ni kúvi ránuꞌuꞌ nu̱u̱nꞌ Cristo ya̱ nte̱tíñú re̱ꞌ ránuꞌuꞌ sáva néen kuéntáꞌ ráníꞌ tiñu re̱ꞌ sáva xínéꞌénꞌ ránꞌ Tu̱ꞌun Ndiosíꞌ ya̱ nyɨ̱yuꞌuꞌ nékúvi.

² Chi rá ñɨvɨ ya̱ néen kuéntáꞌ tiñu i̱toꞌoꞌ ráa íyó sikúnkuvi va̱ꞌa ráa maa.

³ Jee nuꞌuꞌ Pablo chi, ntu jítú iniꞌ ni̱ꞌ ya̱ sánáaꞌ rán áxí inka ñɨvɨ jie̱ꞌe̱ꞌ nuꞌuꞌ. Jee suni ne̱ nuꞌuꞌ ntu sánáaꞌ ni̱ꞌ jie̱ꞌe̱ꞌ nuꞌuꞌ.

⁴ Chi jíníꞌ ni̱ꞌ ya̱ ntu̱náꞌ kua̱chi ni̱ꞌ íyó jín tiñu sáꞌá ni̱ꞌ, soo nsú jín nu̱u̱nꞌ yukuán kúvi ya̱ kino̱o na̱a̱ꞌ ni̱ꞌ nu̱u̱nꞌ Ndiosíꞌ, chi maá I̱toꞌoꞌ‑ó kúvi ya̱ sanáaꞌ jie̱ꞌe̱ꞌ nuꞌuꞌ.

⁵ Saáva, koto sáꞌá náaꞌ rán si̱kɨ̱ꞌ táꞌán rán nekuaꞌ niji maá I̱toꞌoꞌ‑ó. Maáréꞌ nastúvi nijinꞌ re̱ꞌ rá tiñu nsa̱ꞌá yuꞌuꞌ‑ó nu̱u̱nꞌ neenꞌ, jee nastúvi re̱ꞌ ya̱ ñúꞌún iniꞌ ánímaꞌ‑ó. Saájee nakuetúꞌún Ndiosíꞌ ta ɨɨn ɨɨn ñɨvɨ sánikua̱ꞌ íyó ni̱ꞌi̱nꞌ maa.

⁶ Jee saáva ránoꞌó, ñaniꞌ jín ku̱ꞌva, káchíꞌ ni̱ꞌ rá tu̱ꞌun yaꞌá jie̱ꞌe̱ꞌ nuꞌuꞌ jín jie̱ꞌe̱ꞌ Apolos sáva kúvi ɨɨn ichi váꞌa nu̱u̱nꞌ rán, sáva sáá tésóꞌo ránú jie̱ꞌe̱ꞌ ránuꞌuꞌ jee kutu̱ꞌva rán ya̱ koto jiáꞌa rán ka̱ꞌ nu̱u̱nꞌ tu̱ꞌun níso nu̱u̱nꞌ Tutuꞌ níso Tu̱ꞌun Ndiosíꞌ sáva ntu kani téyíí iniꞌ rán jie̱ꞌe̱ꞌ ɨɨn ñɨvɨ jee kuniichiꞌ rán rá inka ka̱ꞌ.

⁷ Chi, ¿né ɨɨn sáꞌá sɨ́ɨ́n noꞌó nsú káꞌ inka ñɨvɨ rúja?, jee, ¿na̱ kuvi ya̱ kúmí nú ya̱ ntu nkútaꞌviꞌ nú maa nu̱u̱nꞌ Ndiosíꞌ rúja? Jee retú íyó nijia ya̱ nku̱taꞌviꞌ nú maa, jee, ¿na̱ kuvi chi kútéyɨ́ɨ́ nú jín maánú kuéntáꞌ retánꞌ nsáꞌ nku̱taꞌviꞌ nú kúvi‑i rúja?

⁸ Chi ya kúváꞌa iniꞌ rán ya̱ jiáni iniꞌ rán ya̱ kúmí rán nɨꞌɨ ya̱ jíniñúꞌún rán, ya̱ kuéntáꞌ retú ya nkukúká rán. Jee jiáni iniꞌ rán ya̱ kuvi tatúníꞌ maárán, jee ni ntu ka̱ꞌ jíniñúꞌún rán ránuꞌuꞌ kúníꞌ rán. Jee varésukuán jee kuvi tatúníꞌ nijia rán, sáva suni kuvi tatúníꞌ ránuꞌuꞌ jín ránoꞌó.

⁹ Chi ránuꞌuꞌ, rá te̱e ñani Jesús ya̱ kunisotíñú ráníꞌ tiñu apóstol ya̱ chúichí re̱ꞌ ránuꞌuꞌ nákani ránꞌ tu̱ꞌun váꞌa jie̱ꞌe̱ꞌ re̱ꞌ, jee jiáni iniꞌ ni̱ꞌ ya̱ kuéntáꞌ Ndiosíꞌ nsa̱ꞌá ya̱ ránuꞌuꞌ kuiñɨ ránꞌ ne̱ nu̱u̱nꞌ nɨ́ꞌɨ rá ñɨvɨ, jee túvi ránꞌ kuéntáꞌ rá te̱e ya̱ nna̱sikúniꞌi ráa si̱kɨ̱ꞌ ránuꞌuꞌ kua̱ꞌa̱nꞌ ránꞌ kuviꞌ ránꞌ, chi jiáni ráa ránuꞌuꞌ nu̱u̱nꞌ chitú kúvi ya̱ sɨ́ɨꞌ iniꞌ rá ñɨvɨ néꞌyá ráa ránuꞌuꞌ jee néꞌyá rá najiáꞌáꞌ ííꞌ Ndiosíꞌ ya̱ kunoꞌo ráníꞌ tu̱nóꞌó.

¹⁰ Jee ránuꞌuꞌ chi káꞌvi iniꞌ rá ñɨvɨ ya̱ sáꞌá xíniꞌ ránꞌ jie̱ꞌe̱ꞌ yɨ́tíñú ránꞌ nu̱u̱nꞌ Cristo, soo ránoꞌó chi káꞌvi iniꞌ ránú ya̱ níchí víꞌí xi̱ni̱ꞌ ránú. Jee ránuꞌuꞌ chi jiáni iniꞌ ráa ya̱ táyáꞌ iniꞌ ránꞌ, soo ránoꞌó jiáni iniꞌ ránú ya̱ tiɨ́kɨ́ víꞌí iniꞌ rán. Jee ránoꞌó chi sáꞌá ñáꞌnú rá ñɨvɨ nu̱u̱nꞌ ránoꞌó, soo ránuꞌuꞌ chi kúníichiꞌ ráa néꞌyá ráa ránuꞌuꞌ.

¹¹ Jee ne̱ tiempúꞌ vitan nóꞌo ráníꞌ jie̱ꞌe̱ꞌ tu̱ꞌun jíꞌíꞌ so̱ko, jee jíchíꞌ ránꞌ nute, jee kúmániꞌ saꞌma kuꞌun ránꞌ, jee sáꞌá kini rá ñɨvɨ ránuꞌuꞌ, jee ni ntu̱ví íyó ɨɨn veꞌi nu̱u̱nꞌ íchí kuneeꞌ ránꞌ.

¹² Jee suni jiáví ráníꞌ sátíñú yɨ́ɨ́ ránꞌ jín naꞌá maáránꞌ, jee chísónínu rá ñɨvɨ ránuꞌuꞌ jín tu̱ꞌun níváꞌa néꞌyá ráa ránuꞌuꞌ, soo káꞌánꞌ ránꞌ tu̱ꞌun váꞌa jie̱ꞌe̱ꞌ ráa, jee jíto u̱ꞌvi̱ꞌ ráa ránuꞌuꞌ, jee jiéꞌnéꞌ iniꞌ ráníꞌ ya̱ sukuán nóꞌo ránꞌ,

¹³ jee kákuíyuꞌú ráa si̱kɨ̱ꞌ ránuꞌuꞌ, soo másúꞌ iniꞌ ránꞌ nákama̱ni̱ꞌ ránꞌ. Jee ne̱ vitan sáꞌá rá ñɨvɨ ñɨ̱vɨ́ jín ránuꞌuꞌ kuéntáꞌ ya̱ká kúvi ránꞌ ya̱ kúníichiꞌ ráa.

¹⁴ Jee nsáꞌ tée ni̱ꞌ tu̱ꞌun yaꞌá nu̱u̱nꞌ ránú sáva sikánuun ni̱ꞌ ránoꞌó, chisaꞌ tée ni̱ꞌ maa nu̱u̱nꞌ rán sáva nakutíñú ni̱ꞌ nu̱u̱nꞌ rán kuéntáꞌ nu̱u̱nꞌ se̱ꞌya ni̱ꞌ ya̱ ñúnúunꞌ ni̱ꞌ.

¹⁵ Chi súnika̱ꞌ koo ne̱ u̱ji̱ꞌ mil (10,000) te̱e ya̱ xínéꞌénꞌ tu̱ꞌun váꞌa Cristo nu̱u̱nꞌ ránoꞌó, soo nsáꞌ kue̱ꞌe̱ꞌ tátáꞌ rán íyó, chi kúvi ni̱ꞌ tátáꞌ rán ya̱ yɨ́ꞌɨ́ rán nu̱u̱nꞌ Cristo chi nuꞌuꞌ ví ya̱ nna̱kani ni̱ꞌ tu̱ꞌun váꞌa Jesús nu̱u̱nꞌ ránoꞌó jee nka̱níjiá rán ni̱nu̱ꞌ iniꞌ rán tu̱ꞌun vá jee sukuán nna̱kaku jiáá rán nsa̱ꞌá ni̱ꞌ.

¹⁶ Jee saáva jíkánꞌ táꞌvíꞌ ni̱ꞌ nu̱u̱nꞌ ránoꞌó ya̱ kunikɨnꞌ rán kueꞌnu rán ichi kuéntáꞌ jiáꞌnu nuꞌuꞌ.

¹⁷ Jee jie̱ꞌe̱ꞌ rá tu̱ꞌun ya̱ káchíꞌ ni̱ꞌ yaꞌá kúvi ya̱ nchu̱ichí ni̱ꞌ Timoteo kua̱jiaaꞌ re̱ꞌ nu̱u̱nꞌ rán. Jee Timoteo kúvi kuéntáꞌ se̱ꞌya ni̱ꞌ ya̱ ñúnúunꞌ ni̱ꞌ, jee káníjiá re̱ꞌ síkúnkuvi va̱ꞌa re̱ꞌ nu̱u̱nꞌ I̱toꞌoꞌ‑ó. Jee maáréꞌ ví ya̱ xinákúꞌun re̱ꞌ iniꞌ rán jie̱ꞌe̱ꞌ na̱sa jiáꞌnu ni̱ꞌ ichi Cristo Jesús, jín ya̱ jiáꞌnu ni̱ꞌ sánikua̱ꞌ xínéꞌénꞌ ni̱ꞌ tu̱ꞌun váꞌa Cristo nu̱u̱nꞌ ntáká ichi nu̱u̱nꞌ jíka ni̱ꞌ xínéꞌénꞌ ni̱ꞌ nu̱u̱nꞌ ntáká grupo rá ñɨvɨ ya̱ jínúꞌ iniꞌ ráa Cristo.

¹⁸ Soo ñúꞌún víꞌí tu̱ꞌun téyɨ́ɨ́ iniꞌ sava rán, chi jiáni iniꞌ ráa ya̱ nsáꞌ kua̱jiaaꞌ néꞌyá ni̱ꞌ ránoꞌó.

¹⁹ Soo ya̱chi̱ꞌ ni kua̱jiaaꞌ néꞌyá ni̱ꞌ ránoꞌó, retú maá I̱toꞌoꞌ‑ó kuíni ya̱ sukuán kuvi, jee kukáꞌnú iniꞌ ni̱ꞌ nsú tu̱ꞌun káꞌánꞌ rá ñɨvɨ téyɨ́ɨ́ vá, chisaꞌ kukáꞌnú iniꞌ ni̱ꞌ retánꞌ sátíñú fuersáꞌ ííꞌ Ndiosíꞌ iniꞌ ráa jee ná kúvi ya̱ kuvi saꞌá ráa.

²⁰ Chi sáá yɨ́ꞌɨ́ ñɨvɨ xi̱ntíín Ndiosíꞌ tátúníꞌ re̱ꞌ nu̱u̱nꞌ‑u, jee stúvi ñɨvɨ maa jie̱ꞌe̱ꞌ tiñu sáꞌá‑a ya̱ váji‑i ne̱ nu̱u̱nꞌ fuersáꞌ ííꞌ Ndiosíꞌ ya̱ sátíñú‑u iniꞌ ñɨvɨ vá, jee ntu stúvi‑ó maa jie̱ꞌe̱ꞌ kua̱chi tu̱ꞌun káꞌánꞌ‑ó ni.

²¹ Áxí, ¿ná kúvi ya̱ kuíni rán ya̱ va̱ꞌa ka̱ꞌ rúja? ¿Á kuíni rán ya̱ kua̱jiaaꞌ néꞌyá ni̱ꞌ ránoꞌó jee kuxeenꞌ ni̱ꞌ nu̱u̱nꞌ rán, áxí ya̱ kaꞌanꞌ ñunkúún ni̱ꞌ jín rán jín tu̱ꞌun káꞌánꞌ másúꞌ iniꞌ rúja?