1 Corintios 2 - Mixteco del suroeste de Tlaxiaco Oaxaca

Nákani Pablo tu̱ꞌun jie̱ꞌe̱ꞌ ya̱ níꞌi Cristo nu̱u̱nꞌ kurúsiꞌ

¹ Saáva ránoꞌó ñaniꞌ jín ku̱ꞌva, sáá njia̱a̱ꞌ ni̱ꞌ nu̱u̱nꞌ nééꞌ rán nu̱u̱nꞌ ñuunꞌ Corinto sáva kachitu̱ꞌún ni̱ꞌ nu̱u̱nꞌ rán tu̱ꞌun yuꞌuꞌ Ndiosíꞌ ya̱ nstúvi re̱ꞌ nu̱u̱nꞌ ni̱ꞌ, jee ntu nkaꞌanꞌ ni̱ꞌ tu̱ꞌun ñujiínꞌ víjí ni tu̱ꞌun níchí sáni káꞌánꞌ rá ñɨvɨ ñɨ̱vɨ́.

² Chi sáá nééꞌ ni̱ꞌ jín rán, jee nkuna̱a̱ꞌ iniꞌ ni̱ꞌ ya̱ ni ntu̱náꞌ inka ka̱ꞌ tu̱ꞌun kachitu̱ꞌún ni̱ꞌ nu̱u̱nꞌ rán, chisaꞌ ñuꞌun iniꞌ ni̱ꞌ kachitu̱ꞌún ni̱ꞌ kua̱chi tu̱ꞌun jie̱ꞌe̱ꞌ Jesús ya̱ kúvi Cristo nkachiꞌ ni̱ꞌ nu̱u̱nꞌ rán, jín jie̱ꞌe̱ꞌ ya̱ níꞌiꞌ re̱ꞌ nu̱u̱nꞌ kurúsiꞌ sáva natavaꞌ re̱ꞌ yó nu̱u̱nꞌ kua̱chi‑ó sikáku re̱ꞌ yó.

³ Jee sáá nneeꞌ ni̱ꞌ nteñu rán jee táyáꞌ ni̱ꞌ, jee yúꞌví víꞌí ni̱ꞌ, jee kísɨ ni̱ꞌ.

⁴ Jee sáá nna̱kani ni̱ꞌ tu̱ꞌun váꞌa jie̱ꞌe̱ꞌ Jesús jee nste̱kútu̱ꞌún ni̱ꞌ maa nu̱u̱nꞌ rán, jee ntu nkáꞌánꞌ ni̱ꞌ jín rán tu̱ꞌun ya̱ jiáni iniꞌ ñɨvɨ ñɨ̱vɨ́ yaꞌá ya̱ kúvi‑i tu̱ꞌun níchí sáva sijínúꞌ ni̱ꞌ iniꞌ rán, chisaꞌ nstúvi Ndiosíꞌ ya̱ nááꞌ kúvi tu̱ꞌun ni̱ꞌ chi nsa̱tíñú Ta̱chi̱ꞌ Ííꞌ Ndiosíꞌ jín fuersáꞌ ííꞌ níso re̱ꞌ.

⁵ Jee nsa̱ꞌá ni̱ꞌ suꞌva sáva ntu káníjiá rán ínúꞌ iniꞌ rán jie̱ꞌe̱ꞌ tu̱ꞌun níchí ya̱ káꞌánꞌ ñɨvɨ ñɨ̱vɨ́, chisaꞌ nsa̱ꞌá ni̱ꞌ suꞌva sáva saꞌá fuersáꞌ ííꞌ níꞌin níso Ndiosíꞌ ya̱ kaníjiá rán i̱nu̱ꞌ iniꞌ rán Jesús.

Stúvi Ta̱chi̱ꞌ Ííꞌ Ndiosíꞌ tu̱ꞌun níchí Ndiosíꞌ

⁶ Soo tu̱ꞌun níchí nijia káꞌánꞌ ráníꞌ jín rá ñɨvɨ nijia iniꞌ jín tu̱ꞌun kúneí iniꞌ ráa Cristo. Soo ntu káꞌánꞌ ránꞌ tu̱ꞌun níchí ya̱ ñúꞌún iniꞌ ñɨvɨ ñɨ̱vɨ́ yaꞌá tiempúꞌ vitan, jee ni ntu káꞌánꞌ ránꞌ tu̱ꞌun níchí ya̱ káꞌánꞌ rá te̱e nísotíñú ñɨ̱vɨ́ yaꞌá chi jínu tiñu ráa.

⁷ Soo káꞌánꞌ ráníꞌ tu̱ꞌun níchí ya̱ váji nu̱u̱nꞌ maá Ndiosíꞌ ya̱ níyo yuꞌuꞌ, ya̱ nyɨ̱yuꞌuꞌ‑u, jee ne̱ ntiáꞌan ka̱ꞌ kiko̱o ñɨ̱vɨ́ yaꞌá nkuna̱a̱ꞌ iniꞌ Ndiosíꞌ sikúnkuvi re̱ꞌ maa, sáva saꞌá tu̱ꞌun vá ya̱ kutekuꞌ‑ó kuñáꞌnú‑ó nɨ́ɨ́nkání jín re̱ꞌ.

⁸ Jee ni ɨɨn te̱e kúñáꞌnú ya̱ nísotíñú iniꞌ ñɨ̱vɨ́ yaꞌá tiempúꞌ vitan, ntu̱ví ña̱ku̱ꞌun iniꞌ ráa tu̱ꞌun níchí Ndiosíꞌ ya̱ káꞌánꞌ jie̱ꞌe̱ꞌ Cristo. Chi retánꞌ ña̱ku̱ꞌun iniꞌ ráa maa, jee yukuán jee nka̱ꞌníꞌ ráa I̱toꞌoꞌ‑ó Cristo nékúvi, ya̱ maáréꞌ vá viiꞌ nasɨ́kuitɨꞌ kúñáꞌnú nu̱u̱nꞌ nɨꞌɨ.

⁹ Chi suꞌva nsi̱kúnkuvi Ndiosíꞌ sánikua̱ꞌ káꞌánꞌ tu̱ꞌun nééꞌ nu̱u̱nꞌ Tutuꞌ níso Tu̱ꞌun re̱ꞌ ya̱ káchíꞌ: Ya̱ váꞌa nsa̱ꞌá stákoo Ndiosíꞌ ya̱ kuvi ñɨvɨ ñúnúunꞌ ráa re̱ꞌ, jee yukuán ni ɨɨn ñɨvɨ ntu̱ví néꞌyá jínúunꞌ maa, jee ni ntu̱ví tésóꞌo ráa jín so̱ꞌo jie̱ꞌe̱ꞌ‑e, ni ntu̱ví jiáni iniꞌ ánímaꞌ ráa ya̱ sukuán koo káchíꞌ nu̱u̱nꞌ Tutuꞌ.

¹⁰ Chisaꞌ nsa̱ꞌá Ndiosíꞌ ya̱ stúvi Ta̱chi̱ꞌ Ííꞌ re̱ꞌ maa nu̱u̱nꞌ ráníꞌ, chi maá Ta̱chi̱ꞌ Ííꞌ Ndiosíꞌ vá nánukútúꞌun va̱ꞌa nɨꞌɨ kuitɨꞌ re̱ꞌ ná kúvi ya̱ yɨ́ꞌɨ́ yuꞌuꞌ ya̱ jiáni iniꞌ maá Ndiosíꞌ.

¹¹ Chi, ¿né ɨɨn jíníꞌ iniꞌ ɨɨn ñɨvɨ na̱ja jiáni iniꞌ inka ñɨvɨ rúja? Chi ni ɨɨn ñɨvɨ ntu̱ví jíníꞌ maa, chi kua̱chi ta̱chi̱ꞌ káꞌánꞌ ya̱ yɨ́ꞌɨ́ iniꞌ ñɨvɨ vá jíníꞌ. Jee suni sukuán ni ɨɨn ñɨvɨ ntu̱ví jíníꞌ na̱sa ñúꞌún iniꞌ Ndiosíꞌ, chi kua̱chi Ta̱chi̱ꞌ Ííꞌ re̱ꞌ vá jíníꞌ.

¹² Jee maáórán chi ntu níꞌínꞌ‑ó ta̱chi̱ꞌ váji ñɨ̱vɨ́ yaꞌá jee saáva ntu jiáni xi̱ni̱ꞌ‑ó sánikua̱ꞌ jiáni xi̱ni̱ꞌ rá ñɨvɨ ñɨ̱vɨ́ ya̱ ntu jíníꞌ ráa iniꞌ Ndiosíꞌ, chisaꞌ níꞌínꞌ‑ó Ta̱chi̱ꞌ Ííꞌ vá va̱ji nu̱u̱nꞌ maá Ndiosíꞌ, sáva kuniꞌ‑ó ya̱ váꞌa ya̱ nsi̱kútaꞌviꞌ saɨn re̱ꞌ maa nu̱u̱nꞌ‑ó.

¹³ Jee jie̱ꞌe̱ꞌ rá yaꞌá káꞌánꞌ ráníꞌ, soo ntu káꞌánꞌ ránꞌ jín rá tu̱ꞌun xínéꞌénꞌ rá ñɨvɨ íyó ñɨ̱vɨ́ yaꞌá ya̱ káchíꞌ ráa ya̱ tu̱ꞌun níchí ví‑i, chisaꞌ káꞌánꞌ ránꞌ sáni tu̱ꞌun ya̱ xínéꞌénꞌ Ta̱chi̱ꞌ Ííꞌ Ndiosíꞌ ránuꞌuꞌ. Jiátíñú ránꞌ tu̱ꞌun ya̱ ntaji Ta̱chi̱ꞌ Ííꞌ nu̱u̱nꞌ ránꞌ sáva xínéꞌénꞌ ránꞌ ya̱ nááꞌ ntaji Ta̱chi̱ꞌ Ííꞌ nu̱u̱nꞌ ránꞌ.

¹⁴ Soo ñɨvɨ ya̱ ntu̱ví íyó jín Ta̱chi̱ꞌ Ííꞌ Ndiosíꞌ jee ntu̱ví tɨ́ɨn ráa tu̱ꞌun váji nu̱u̱nꞌ Ta̱chi̱ꞌ Ííꞌ re̱ꞌ, chi káꞌvi iniꞌ ñɨvɨ vá ya̱ tu̱ꞌun naanꞌ ni ví‑i, jee saáva ntu̱ví kúvi ki̱ku̱ꞌun iniꞌ‑i tu̱ꞌun vá, chi ntu̱ví íyó‑o jín Ta̱chi̱ꞌ Ííꞌ ya̱ sáꞌá ya̱ ki̱ku̱ꞌun iniꞌ‑ó maa.

¹⁵ Soo ñɨvɨ yɨ́ꞌɨ́ xi̱ntíín Ta̱chi̱ꞌ Ííꞌ Ndiosíꞌ jee nánukútúꞌun ñɨvɨ vá kunuún iniꞌ‑i jín nɨꞌɨ tu̱ꞌun váꞌa va̱ji nu̱u̱nꞌ re̱ꞌ. Soo ni ɨɨn ñɨvɨ ya̱ ntu yɨ́ꞌɨ́ xi̱ntíín Ta̱chi̱ꞌ Ííꞌ re̱ꞌ ntu kúvi ki̱ku̱ꞌun iniꞌ‑i jie̱ꞌe̱ꞌ ñɨvɨ ya̱ yɨ́ꞌɨ́ xi̱ntíín Ta̱chi̱ꞌ Ííꞌ re̱ꞌ sáva sijíta‑a ráa.

¹⁶ Chi kuéntáꞌ káchíꞌ Tu̱ꞌun Ndiosíꞌ: ¿Né ɨɨn ñɨvɨ jíníꞌ ya̱ jiáni antúníꞌ I̱toꞌoꞌ rúja? Jee, ¿né ɨɨn kúvi xinéꞌénꞌ re̱ꞌ rúja? Káchíꞌ tu̱ꞌun níso nu̱u̱nꞌ Tutuꞌ Ííꞌ. Soo sú sukuán íyó, maáó chi, nuún jiáni iniꞌ‑ó sánikua̱ꞌ jiáni iniꞌ Cristo.