1 Corintios 16 - Mixteco del suroeste de Tlaxiaco Oaxaca

Xu̱ꞌún nástútú rá ñanitáꞌán ya̱ sókóꞌ sáva chineí rá ñanitáꞌán ya̱ kúmániꞌ

¹ Soo vitan jee káchíꞌ ni̱ꞌ nu̱u̱nꞌ rán jie̱ꞌe̱ꞌ xu̱ꞌún ya̱ kútútú ya̱ kɨ̱ꞌɨ̱nꞌ nu̱u̱nꞌ rá ñanitáꞌán nééꞌ Jerusalén ya̱ yɨ́ꞌɨ́ ráa nu̱u̱nꞌ Cristo sáva chineí rán ráa. Saꞌá rán maa sánikua̱ꞌ nta̱túníꞌ ni̱ꞌ nu̱u̱nꞌ rá grupo rá ñanitáꞌán nééꞌ ñuꞌun tɨ́ɨn Galacia.

² Ta ki̱vɨ̱ꞌ xíꞌnañúꞌún ya̱ kájiéꞌé ta semana, jee ta ɨɨn rán íyó teva̱ꞌa sɨ́ɨ́n rán yakuꞌ xu̱ꞌún sánikua̱ꞌ kénta níꞌínꞌ rán maa. Sáva sáá kenta ni̱ꞌ jee ntu íyó nástútú numíjiꞌíꞌ rán maa.

³ Jee sáá kenta ni̱ꞌ, jee tee ni̱ꞌ tutuꞌ ya̱ nákutíñú jie̱ꞌe̱ꞌ néni ɨɨn rá te̱e ya̱ nkáji rán, jee maáráa tají ni̱ꞌ ráa kɨ̱ꞌɨ̱nꞌ ráa ñuunꞌ Jerusalén jín xu̱ꞌún vá ya̱ nsi̱kútaꞌviꞌ rán.

⁴ Jee retú íyó váꞌa ya̱ ne̱ nuꞌuꞌ ranika̱ꞌ kɨ̱ꞌɨ̱nꞌ ni̱ꞌ, jee kɨ̱ꞌɨ̱nꞌ ráa jín nuꞌuꞌ.

Ya̱ jiáni iniꞌ Pablo saꞌá re̱ꞌ

⁵ Jee kua̱jiane̱ꞌyá ni̱ꞌ ránoꞌó, ré ña̱ꞌa̱nꞌ ni̱ꞌ ñuunꞌ Macedonia, chi jiáni iniꞌ ni̱ꞌ jia̱ꞌa ni̱ꞌ ñuunꞌ Macedonia.

⁶ Sa̱naanꞌ jee kino̱o ni̱ꞌ kuneeꞌ ni̱ꞌ jín rán yakuꞌ tiempúꞌ, áxí sa̱naanꞌ kino̱o ni̱ꞌ jín rán ne̱ nɨꞌɨ tiempúꞌ víjin, sáva chineí rán nuꞌuꞌ kɨ̱ꞌɨ̱nꞌ ni̱ꞌ ichi nu̱u̱nꞌ íyó kɨ̱ꞌɨ̱nꞌ ni̱ꞌ.

⁷ Chi ntu kuíni ni̱ꞌ kua̱chi kua̱jiaaꞌ jínu ni̱ꞌ nu̱u̱nꞌ nééꞌ rán, chi ñúꞌún iniꞌ ni̱ꞌ ya kunee ni̱ꞌ yakuꞌ tiempúꞌ jín ránoꞌó retú maá Ndiosíꞌ kuíni.

⁸ Soo kino̱o ni̱ꞌ ñuunꞌ Éfeso yaꞌá nekuaꞌ koo viko naní Pentecostés.

⁹ Chi nine ɨɨn ichi máá káꞌnú nu̱u̱nꞌ tiñu ya̱ kuvi saꞌá ni̱ꞌ ya̱ kéne ya̱ váꞌa, asúnika̱ꞌ íyó kue̱ꞌe̱ꞌ víꞌí rá ñɨvɨ kénta síkɨꞌ ni̱ꞌ.

¹⁰ Jee retú kenta Timoteo nu̱u̱nꞌ nééꞌ rán, naniꞌvɨꞌ iniꞌ rán ya̱ koto na̱ yúꞌví re̱ꞌ jie̱ꞌe̱ꞌ ni ɨɨn nantíñú ni nééꞌ re̱ꞌ jín rán, chi sáꞌá re̱ꞌ tiñu I̱toꞌoꞌ‑ó kuéntáꞌ kua̱ꞌ nuꞌuꞌ.

¹¹ Saáva koto kúníichiꞌ iniꞌ ni ɨɨn rán maa, chisaꞌ chineí rán maa kɨ̱ꞌɨ̱nꞌ va̱ꞌa‑a ichi nu̱u̱nꞌ kɨ̱ꞌɨ̱nꞌ‑ɨ sáva kiji‑i nu̱u̱nꞌ ni̱ꞌ, chi nétu ni̱ꞌ kiji‑i jín rá inka ka̱ꞌ ñanitáꞌán.

¹² Jee ntañúꞌún kaꞌanꞌ ni̱ꞌ jie̱ꞌe̱ꞌ ñaniꞌ‑ó Apolos, chi ni̱ka̱nꞌ táꞌvíꞌ víꞌí ni̱ꞌ nu̱u̱nꞌ re̱ꞌ ya̱ kua̱jiane̱ꞌyá re̱ꞌ ránoꞌó jín rá inka ka̱ꞌ ñanitáꞌán, soo nintíꞌínꞌ ntu nñúꞌun iniꞌ re̱ꞌ kua̱jiaaꞌ re̱ꞌ vitan, soo inka íchí sáá kuvi jee kua̱jiane̱ꞌyá re̱ꞌ ránoꞌó.

Nákutíñú Pablo nu̱u̱nꞌ nɨ́ꞌɨ

¹³ Nito koo rán, kuiñɨ ni̱ꞌin rán kuneí iniꞌ rán Cristo, sáneí rán iniꞌ rán, jee tiɨ́kɨ́ koo iniꞌ rán.

¹⁴ Jee ntáká tiñu sáꞌá rán, jee saꞌá rán maa jie̱ꞌe̱ꞌ ñúnúunꞌ rán rá ñanitáꞌán‑ó jín inka ñɨvɨ.

¹⁵ Ránoꞌó ñanitáꞌán, ya jíníꞌ rán ya̱ xíꞌnañúꞌún rá táꞌán veꞌi Estéfanas ví ya̱ ntɨɨn ráa Tu̱ꞌun Ndiosíꞌ nu̱u̱nꞌ ñuunꞌ Acaya, jee yɨ́tíñú ráa nu̱u̱nꞌ chíneí ráa rá ñanitáꞌán ya̱ yɨ́ꞌɨ́ rává xi̱ntíín Ndiosíꞌ. Jíkánꞌ táꞌvíꞌ ni̱ꞌ nu̱u̱nꞌ rán ya̱

¹⁶ chiꞌi rán maárán xi̱ntíín ñɨvɨ ya̱ íyó suꞌva, jín xi̱ntíín ntáká rá ñɨvɨ chíneí táꞌán jín‑ó nu̱u̱nꞌ tiñu Ndiosíꞌ ya̱ sáꞌá yɨ́ɨ́ maa.

¹⁷ Kúsɨ́ɨꞌ iniꞌ ni̱ꞌ, sáá nkiaaꞌ Estéfanas jín Fortunato jín Acaico nu̱u̱nꞌ ni̱ꞌ yaꞌá, chi nchi̱neí ráa nuꞌuꞌ nasɨ ráa nu̱u̱nꞌ ránoꞌó, chi ntu nkúvi chineí rán nuꞌuꞌ jie̱ꞌe̱ꞌ ntu nééꞌ rán yaꞌá,

¹⁸ chi nna̱sáneí víꞌí ráa iniꞌ ni̱ꞌ, saáva saꞌá ñáꞌnú rán nu̱u̱nꞌ rá ñɨvɨ íyó sukuán.

Tu̱ꞌun káva̱ꞌa nu̱u̱nꞌ nɨ́ꞌɨ

¹⁹ Rá ñanitáꞌán ya̱ kúneí iniꞌ ráa Cristo ya̱ nééꞌ ráa sánitɨ́ɨn ñuꞌun Asia, tájí ráa tu̱ꞌun káva̱ꞌa nu̱u̱nꞌ ránoꞌó. Jee suni Aquila jín Priscila jín rá ñanitáꞌán ya̱ kúneí iniꞌ ráa Cristo ya̱ nútútú ráa veꞌi Aquila jín Priscila táji tu̱ꞌun káva̱ꞌa nu̱u̱nꞌ ránoꞌó.

²⁰ Táji ntáká rá ñaniꞌ jín ku̱ꞌva ya̱ kúneí iniꞌ ráa Cristo tu̱ꞌun káva̱ꞌa nu̱u̱nꞌ ránoꞌó. Jee kaꞌanꞌ rán tu̱ꞌun káꞌánꞌ va̱ꞌa yɨ́ñúꞌún jín ɨɨn inka rá táꞌán rán teyuꞌú yɨ́ñúꞌún ɨɨn inka rán táꞌán rán.

²¹ Nuꞌuꞌ Pablo, tée ni̱ꞌ tu̱ꞌun káva̱ꞌa yaꞌá kua̱jiaaꞌ nu̱u̱nꞌ ránoꞌó jín naꞌá maáníꞌ.

²² Retú néni ɨɨn ñɨvɨ ntu ñúnúunꞌ‑u I̱toꞌoꞌ‑ó, ¡kosoni̱nu ñɨvɨ vá! ¡I̱toꞌoꞌ‑ó neꞌenꞌ!

²³ Koo ya̱ maníꞌ iniꞌ I̱toꞌoꞌ‑ó jín ránoꞌó.

²⁴ Jee ñúnúunꞌ ni̱ꞌ ntáká ránoꞌó jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo Jesús.