1 Corintios 15 - Mixteco del suroeste de Tlaxiaco Oaxaca

Nna̱tekuꞌ Cristo

¹ Ránoꞌó ñaniꞌ jín ku̱ꞌva, vitan jee sáꞌá ni̱ꞌ ya̱ nna̱ku̱ꞌun iniꞌ rán tu̱ꞌun váꞌa Ndiosíꞌ jie̱ꞌe̱ꞌ Cristo ya̱ nkachitu̱ꞌún ni̱ꞌ nu̱u̱nꞌ rán. Jee tu̱ꞌun yaꞌá kúvi ya̱ ntɨɨn rán, jee suni íñɨ́ níꞌin rán níkɨ́nꞌ rán maa.

² Jee suni jín tu̱ꞌun váꞌa vá ví ya̱ natavaꞌ re̱ꞌ ránoꞌó nu̱u̱nꞌ kua̱chi rán síkáku re̱ꞌ ránoꞌó, retú íñɨ́ ni̱ꞌin rán níkɨ́nꞌ rán tu̱ꞌun vá ya̱ nstékútu̱ꞌún ni̱ꞌ nu̱u̱nꞌ rán jee ni̱nu̱ꞌ iniꞌ rán ntɨɨn rán maa, soo retú ntu̱ví, jee kua̱chi ni̱nu̱ꞌ ka̱ꞌá iniꞌ rán maa.

³ Chi tu̱ꞌun ñáꞌnú ka̱ꞌ ya̱ nxi̱néꞌénꞌ ni̱ꞌ ránoꞌó, kúvi tu̱ꞌun ya̱ suni ni̱ꞌi̱nꞌ ni̱ꞌ maa nu̱u̱nꞌ maá Ndiosíꞌ ranika̱ꞌ. Jee suvi kúvi tu̱ꞌun vá ya̱ níꞌiꞌ Cristo sáva natavaꞌ re̱ꞌ yó nu̱u̱nꞌ kua̱chi‑ó, kuéntáꞌ sánikua̱ꞌ káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ, ya̱ naní Escritura,

⁴ jín ya̱ nse̱ꞌí ráa re̱ꞌ, jín ya̱ nna̱tekuꞌ i̱i̱ꞌ re̱ꞌ jee nkene re̱ꞌ nteñu rá níyɨ ki̱vɨ̱ꞌ uníꞌ, sánikua̱ꞌ káchíꞌ ya̱chi̱ꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ.

⁵ Jee suni nenta nijinꞌ kájí re̱ꞌ nu̱u̱nꞌ Pedro nne̱ꞌyá‑a re̱ꞌ, jee kuíre suni nu̱u̱nꞌ rá inka u̱ji̱ꞌ te̱e nku̱táꞌán jín re̱ꞌ nsu̱kuáꞌa re̱ꞌ ráa,

⁶ jee kuíre suni nu̱u̱nꞌ víꞌí ka̱ꞌ u̱ꞌu̱nꞌ sientúꞌ (500) ñanitáꞌán‑ó nne̱ꞌyá ráa re̱ꞌ métúꞌún hora. Jee kue̱ꞌe̱ꞌ ráa ka̱ꞌ tékúꞌ ne̱ vitan, soo sava ráa ya ni̱ꞌi̱ꞌ.

⁷ Jee kuíre suni ntu̱ví re̱ꞌ nu̱u̱nꞌ Jacobo, jee kuíre suni tuku nu̱u̱nꞌ ntáká rá te̱e níso ráa tiñu apóstol re̱ꞌ.

⁸ Jee ne̱ nu̱u̱nꞌ nɨ́ꞌɨ ka̱ꞌ ntu̱vi re̱ꞌ nu̱u̱nꞌ nuꞌuꞌ nne̱ꞌyá ni̱ꞌ re̱ꞌ, ya̱ kúvi ni̱ꞌ kuéntáꞌ kúvi ɨɨn nchíkɨ́n lúlí ya̱ nnuun, jee nkaku yúté‑e.

⁹ Chi nuꞌuꞌ jee núun ka̱ꞌ kúñáꞌnú ni̱ꞌ nsú káꞌ rá inka ka̱ꞌ te̱e níso ráa tiñu apóstol nchu̱ichí Jesús, chi ni nsú te̱e va̱ꞌa kúvi ni̱ꞌ ya̱ ntu̱né íyó níꞌinꞌ ni̱ꞌ ya̱ kuna̱ní ni̱ꞌ apóstol, chi nsa̱ꞌá kini ni̱ꞌ rá ñɨvɨ ya̱ kúneí iniꞌ ráa Jesús ya̱ yɨ́ꞌɨ́ ráa naꞌá Ndiosíꞌ.

¹⁰ Soo jie̱ꞌe̱ꞌ ni ka̱ꞌ ya̱ níyo ma̱ni̱ꞌ iniꞌ Ndiosíꞌ nku̱náꞌví iniꞌ re̱ꞌ nuꞌuꞌ, saáva nsi̱kútaꞌviꞌ re̱ꞌ nu̱u̱nꞌ ni̱ꞌ ya̱ kúvi ni̱ꞌ apóstol nchu̱ichí re̱ꞌ jín tiñu níso ni̱ꞌ vitan. Jee nsáꞌ ka̱ꞌá níyo ma̱ni̱ꞌ iniꞌ Ndiosíꞌ néꞌyá re̱ꞌ nuꞌuꞌ ya̱ nka̱ji re̱ꞌ nuꞌuꞌ saꞌá ni̱ꞌ tiñu re̱ꞌ, chi saꞌ víꞌí ka̱ꞌ nsa̱tíñú yɨ́ɨ́ ni̱ꞌ nu̱u̱nꞌ re̱ꞌ nsú káꞌ ntáká rá inka ka̱ꞌ te̱e kúvi apóstol. Soo nsú nuꞌuꞌ ví ya̱ sáꞌá tiñu vá, chisaꞌ Ndiosíꞌ ví ya̱ chíneí chítuvi re̱ꞌ nuꞌuꞌ jín tiñu sáꞌá ni̱ꞌ.

¹¹ Saáva va̱ni nuꞌuꞌ áxí va̱ni rá inka ka̱ꞌ rá apóstol, jee ɨɨn nuún ni tu̱ꞌun suꞌva káchítu̱ꞌún ni̱ꞌ jín ráa, jee tu̱ꞌun yaꞌá kúvi ya̱ nka̱níjiá rán ni̱nu̱ꞌ iniꞌ rán ntɨɨn rán maa.

Natekuꞌ rá ñɨvɨ níꞌiꞌ

¹² Soo retú káchítu̱ꞌún ránuꞌuꞌ tu̱ꞌun váꞌa jie̱ꞌe̱ꞌ Cristo ya̱ nnátekuꞌ i̱i̱ꞌ re̱ꞌ nxi̱nákóo Ndiosíꞌ re̱ꞌ nkene re̱ꞌ nteñu rá ni̱yɨ, jee, ¿na̱ kuvi chi káchíꞌ sava ñɨvɨ nteñu rán ya̱ ntu̱ví natekuꞌ i̱i̱ꞌ rá ni̱yɨ rúja?

¹³ Chi retánꞌ nsáꞌ natekuꞌ rá ni̱yɨ, jee suni ni maá Cristo ntu̱ví nna̱tekuꞌ re̱ꞌ nékúvi.

¹⁴ Jee retánꞌ ntu̱ví nna̱tekuꞌ i̱i̱ꞌ Cristo, saájee kua̱chi káchítu̱ꞌún ka̱ꞌá ráníꞌ tu̱ꞌun vá nékúvi retánꞌ sukuán, jee suni kúneí ka̱ꞌá iniꞌ rán Cristo nékúvi.

¹⁵ Jee retánꞌ sukuán kúvi, jee suni kene ya̱ kúvi ráníꞌ te̱e túꞌún ya̱ káchíꞌ nika̱ꞌ ya̱ jiáꞌa ránꞌ ya̱ nááꞌ jie̱ꞌe̱ꞌ Ndiosíꞌ nékúvi, chi káchíꞌ ránꞌ ya̱ nna̱stekúꞌ ííꞌ Ndiosíꞌ Cristo nteñu rá ni̱yɨ. Soo retánꞌ nsú ya̱ nááꞌ kúvi ya̱ nastekúꞌ Ndiosíꞌ rá ni̱yɨ nékúvi sáni káchíꞌ ráa, jee saáva ntu nnástekúꞌ ííꞌ Ndiosíꞌ Cristo nxi̱nákóo re̱ꞌ maa nteñu rá ni̱yɨ nékúvi.

¹⁶ Chi retánꞌ nsáꞌ natekuꞌ rá ni̱yɨ, jee suni ni maá Cristo ntu nna̱tekuꞌ re̱ꞌ nékúvi.

¹⁷ Jee retánꞌ ntu̱ví nna̱tekuꞌ Cristo, jee kua̱chi kúneí ka̱ꞌá iniꞌ rán retánꞌ sukuán, jee níso i̱i̱ꞌ ránꞌ rá kua̱chi sáꞌá rán retánꞌ sukuán.

¹⁸ Jee retánꞌ sukuán kúvi nijia, jee suni ne̱ rá ñɨvɨ níꞌiꞌ ya̱ nyɨꞌɨ ráa nu̱u̱nꞌ Cristo jee íchí naanꞌ ráa retánꞌ sukuán nékúvi.

¹⁹ Chi retánꞌ nsáꞌ natekuꞌ rá ni̱yɨ, jee retú kua̱chi kuitɨꞌ íyó tu̱neí iniꞌ‑ó ya̱ sáꞌá Cristo ya̱ váꞌa yó ni nééꞌ‑ó tékúꞌ‑ó iniꞌ ñɨ̱vɨ́ yaꞌá, saájee na̱ ka̱ꞌ náꞌví‑ó ka̱ꞌ nsú ka̱ꞌ rá inka ka̱ꞌ ñɨvɨ chi kua̱chi kúneí ka̱ꞌá iniꞌ‑ó nékúvi retánꞌ nsáꞌ natekuꞌ‑ó.

²⁰ Soo ntu̱ví, chi ya̱ nááꞌ kúvi nijia ya̱ nxi̱nátekuꞌ Ndiosíꞌ Cristo nkene re̱ꞌ nteñu rá ni̱yɨ. Jee maáréꞌ kúvi ya̱ xíꞌnañúꞌún ka̱ꞌ nu̱u̱nꞌ rá ñɨvɨ níꞌiꞌ ya̱ natekuꞌ i̱i̱ꞌ ráa saꞌá Ndiosíꞌ.

²¹ Chi si̱kɨ̱ꞌ kua̱chi ya̱ nsa̱ꞌá ɨɨn ni te̱e, ya̱ naní Adán, kúvi ya̱ nki̱jiéꞌé ya̱ jíꞌíꞌ ñɨvɨ, jee suni jie̱ꞌe̱ꞌ ya̱ nsa̱ꞌá ɨɨn ni te̱e, ya̱ kúvi Cristo, kuvi ya̱ natekuꞌ i̱i̱ꞌ ñɨvɨ.

²² Chi kuéntáꞌ kua̱ꞌ jíꞌíꞌ kua̱íyó kuitɨꞌ ñɨvɨ jie̱ꞌe̱ꞌ nika̱ꞌ ya̱ kúvi ráa tataꞌ ichiyúkúnꞌ nkene ráa ne̱ nu̱u̱nꞌ Adán, jee suni sukuán natekuꞌ kua̱íyó kuitɨꞌ‑ó jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo.

²³ Soo ta ɨɨn ɨɨn ñɨvɨ sánikua̱ꞌ níkɨ́nꞌ táꞌán‑a. Xíꞌnañúꞌún ka̱ꞌ Cristo ya nna̱tekuꞌ i̱i̱ꞌ, jee kuíre natekuꞌ ntáká rá ñɨvɨ ya̱ yɨ́ꞌɨ́ ráa nu̱u̱nꞌ re̱ꞌ, sáá niji tuku re̱ꞌ iniꞌ ñɨ̱vɨ́ yaꞌá.

²⁴ Jee kuíre kenta ji̱nu tiempúꞌ nu̱u̱nꞌ nɨ́ꞌɨꞌ, sáá naku̱ꞌva re̱ꞌ tiñu níso re̱ꞌ xi̱ntíín Ndiosíꞌ, ya̱ kúvi Tátáꞌ re̱ꞌ, jee sáá xináánꞌ ntáká rá kúñáꞌnú, jín ntáká rá nísotíñú, jín rá níso fuersáꞌ.

²⁵ Chi íyó tatúníꞌ Cristo nu̱u̱nꞌ nɨꞌɨ ne̱ kuneí Ndiosíꞌ si̱kɨ̱ꞌ ntáká rá túfíꞌ ta̱ꞌán jín re̱ꞌ jee kuéntáꞌ chiꞌi Ndiosíꞌ ntáká ráa chi̱ji jie̱ꞌe̱ꞌ re̱ꞌ.

²⁶ Jee xináánꞌ Ndiosíꞌ maa ya̱ nu̱u̱nꞌ nɨꞌɨ ví ya̱ túfíꞌ ta̱ꞌán jín‑ó ya̱ kúvi ya̱ jíꞌíꞌ ñɨvɨ.

²⁷ Chi chiꞌi Ndiosíꞌ kua̱íyó chi̱ji xi̱ntíín Cristo, soo sáá káchíꞌ Tu̱ꞌun Ndiosíꞌ níso nu̱u̱nꞌ Tutuꞌ Ííꞌ ya̱ chiꞌi re̱ꞌ kua̱íyó chi̱ji xi̱ntíín Cristo, jee nijinꞌ kájí ya̱ ntu̱ví nchíꞌi Ndiosíꞌ maáa xi̱ntíín Cristo, chi maá Ndiosíꞌ ví ya̱ chiꞌi kua̱íyó kuitɨꞌ ya̱ íyó xi̱ntíín Cristo.

²⁸ Jee sáá nɨꞌɨ ki̱vɨ xi̱ntíín Cristo, saájee suni maá Cristo, ya̱ kúvi re̱ꞌ Se̱ꞌya Ndiosíꞌ, jee suni chiꞌi‑i maáa xi̱ntíín Tátáꞌ‑a Ndiosíꞌ, ya̱ nchiꞌi kua̱íyó kuitɨꞌ ya̱ íyó xi̱ntíín‑i. Saꞌá ráa suꞌva sáva nakɨ̱ꞌɨ kua̱íyó kuitɨꞌ xi̱ntíín maá Ndiosíꞌ ya̱ kúñáꞌnú nasɨ́kuitɨꞌ, chi nɨꞌɨ kua̱íyó nakɨ̱ꞌɨ xi̱ntíín métúꞌún re̱ꞌ.

²⁹ Saájee rá ñɨvɨ ya̱ jiánuté ráa jie̱ꞌe̱ꞌ rá ni̱yɨ, jee, ¿ná kúvi ya̱ saꞌá ráa rúja?, chi retú ni nsáꞌ natekuꞌ i̱i̱ꞌ rá ni̱yɨ, ¿na̱ jie̱ꞌe̱ꞌ chi jiánuté ráa jie̱ꞌe̱ꞌ rá ni̱yɨ rúja?

³⁰ Jee ránuꞌuꞌ, ¿na̱ jie̱ꞌe̱ꞌ chi jiéꞌnéꞌ iniꞌ ráníꞌ i̱yo nóꞌo ráníꞌ ntáká tiempúꞌ [jie̱ꞌe̱ꞌ sátíñú ránꞌ nu̱u̱nꞌ Cristo retú ntu natekuꞌ i̱i̱ꞌ rá ni̱yɨ] rúja?

³¹ Nuꞌuꞌ, ya̱ nááꞌ vá káchíꞌ ni̱ꞌ nu̱u̱nꞌ ránoꞌó ñaniꞌ jín ku̱ꞌva, ya̱ vitan nteenꞌ núkú rá ñɨvɨ kaꞌniꞌ ráa nuꞌuꞌ jie̱ꞌe̱ꞌ ya̱ sáꞌá ni̱ꞌ tiñu I̱toꞌoꞌ‑ó. Jee jiáꞌa ni̱ꞌ ya̱ nááꞌ vá káchíꞌ ni̱ꞌ nu̱u̱nꞌ ránoꞌó ya̱ sukuán íyó sánikua̱ꞌ jiáni téyɨ́ɨ́ iniꞌ ni̱ꞌ jie̱ꞌe̱ꞌ ránoꞌó, [rá ñanitáꞌán ni̱ꞌ] ya̱ jínúꞌ iniꞌ rán káníjiá rán I̱toꞌoꞌ‑ó Cristo Jesús.

³² Jee retú sáꞌá ni̱ꞌ tiñu Ndiosíꞌ jee nnoꞌo ni̱ꞌ nsa̱ꞌá rá te̱e xe̱e̱nꞌ nu̱u̱nꞌ ñuunꞌ Éfeso kuéntáꞌ ɨɨn te̱e ya̱ kántáꞌán‑a jín kitɨ xéénꞌ, jee, ¿na̱kuá kúvi ya̱ váꞌa ni̱ꞌi̱nꞌ ni̱ꞌ jie̱ꞌe̱ꞌ sáꞌá ni̱ꞌ vá rúja?, retánꞌ ntu natekuꞌ rá ni̱yɨ jee ntu̱náꞌ ni̱ꞌi̱nꞌ ni̱ꞌ, jee sáni káchíꞌ ráa: Kajiꞌ‑ó jee koꞌo‑ó, chi kuviꞌ‑ó steñu̱ꞌún.

³³ Koto jiáꞌa rán xináꞌví rá ñɨvɨ ránoꞌó jín tu̱ꞌun káꞌánꞌ ráa, chi: “Retú jíka nú jín rá ñɨvɨ kánéꞌén, jee stívɨ́ ráa ránoꞌó nu̱u̱nꞌ ñujiínꞌ váꞌa jíka rán.”

³⁴ Naku̱ꞌun kájí iniꞌ rán jee kaka rán ichi tiñu na̱a̱ꞌ váꞌa, jee koto sáꞌá rán kua̱chi, chi sava ránoꞌó ntu̱ví jíníꞌ ráa iniꞌ Ndiosíꞌ. Jee káchíꞌ ni̱ꞌ rá tu̱ꞌun yaꞌá sukuán sáva koo tu̱nkánuun nu̱u̱nꞌ rán.

Na̱sa natekuꞌ rá ñɨvɨ níꞌiꞌ

³⁵ Soo sa̱naanꞌ jee ɨɨn rán kachiꞌ: “¿Na̱sa natekuꞌ rá ni̱yɨ rúja?, jee, ¿na̱sa koo yɨkɨkúñu ráa sáá natekuꞌ ráa rúja?”

³⁶ Na̱ ka̱ꞌ naanꞌ ka̱ꞌ jiáni iniꞌ ñɨvɨ vá, chi kúvi kuéntáꞌ kúvi jín nikɨn tataꞌ ya̱ chíꞌi nú chi̱ji ñuꞌun, chi kéne yuku‑u soo xíꞌna íyó kuviꞌ ku̱ñu nikɨn vá.

³⁷ Jee nsú maá yuku ya̱ táꞌvíꞌ ví ya̱ chiꞌi nú chi̱ji ñuꞌun, chisaꞌ maá nikɨn tataꞌ ví ya̱ táji nú chi̱ji ñuꞌun, va̱ni trigúꞌ áxí va̱ni inka nikɨn,

³⁸ jee táꞌvíꞌ yuku vá, soo jiáꞌa Ndiosíꞌ nu̱u̱nꞌ yuku vá na̱sa koo sáni kuíni re̱ꞌ, jee jiáꞌa re̱ꞌ na̱sa kua̱ꞌ koo yu̱ku̱ꞌ ta ɨɨn ɨɨn nu̱u̱nꞌ rá nikɨn tataꞌ vá.

³⁹ Jee suni sukuán kúvi jín rá yɨkɨkúñu, chi nsáꞌ ɨɨn nuún íyó ntáká rá yɨkɨkúñu. Chi sɨ́ɨ́n íyó yɨkɨkúñu rá ñɨvɨ, jee sɨ́ɨ́n íyó yɨkɨkúñu rá kitɨ, jee sɨ́ɨ́n íyó yɨkɨkúñu rá saaꞌ, jee sɨ́ɨ́n íyó yɨkɨkúñu rá tia̱ká.

⁴⁰ Jee suni sukuán ranika̱ꞌ kúvi jín rá íyó súkún, jín rá íyó iniꞌ ñɨ̱vɨ́ yaꞌá. Chi sɨ́ɨ́n viiꞌ rá íyó súkún, jee sɨ́ɨ́n viiꞌ rá íyó iniꞌ ñɨ̱vɨ́ yaꞌá.

⁴¹ Chi sɨ́ɨ́n jiánu̱te̱ꞌ nka̱niiꞌ, jee suni sɨ́ɨ́n jíánu̱te̱ꞌ yo̱o̱ꞌ, jee suni sɨ́ɨ́n jiánu̱te̱ꞌ rá tiu̱u̱nꞌ, jee suni sɨ́ɨ́n sɨ́ɨ́n jiánu̱te̱ꞌ ɨɨn inka rá tiu̱u̱nꞌ.

⁴² Jee suni sukuán koo rá ñɨvɨ sáá natekuꞌ i̱i̱ꞌ ráa kene nteñu rá ni̱yɨ, chi yɨkɨkúñu ya̱ jíꞌíꞌ se̱ꞌí maa jee tívɨ́‑ɨ, soo nastekúꞌ Ndiosíꞌ maa xinákóo re̱ꞌ maa, jee sɨ́ɨ́n koo‑o, chi ni nsáꞌ ti̱vɨ́‑ɨ ka̱ꞌ.

⁴³ Jee séꞌí‑ó yɨkɨkúñu náꞌví‑ó ya̱ jiáꞌa‑a tu̱ꞌun kánuun nu̱u̱nꞌ‑ó, soo nastekúꞌ re̱ꞌ maa ya̱ viiꞌ kuñáꞌnú‑u. Jee yɨkɨkúñu ya̱ séꞌí‑ó jee táyáꞌ‑a, soo yɨkɨkúñu ya̱ nastekúꞌ re̱ꞌ maa jee koo fuersáꞌ kuniso‑o.

⁴⁴ Jee yɨkɨkúñu ya̱ séꞌí‑ó chi̱ji ñuꞌun, jee kúvi‑i ɨɨn ñɨvɨ ya̱ íyó iniꞌ ñɨ̱vɨ́ yaꞌá ni. Soo yɨkɨkúñu ya̱ nastekúꞌ Ndiosíꞌ ví yɨkɨkúñu ya̱ nasama re̱ꞌ maa kuéntáꞌ yɨkɨkúñu maáráa ya̱ nééꞌ antivɨ́ súkún. Retú íyó yɨkɨkúñu ñɨvɨ íyó ñɨ̱vɨ́ yaꞌá, jee suni íyó yɨkɨkúñu maáráa ya̱ nééꞌ antivɨ́ súkún.

⁴⁵ Chi suni sukuán níso nu̱u̱nꞌ Tutuꞌ nééꞌ Tu̱ꞌun Ndiosíꞌ ya̱: “Adán nkuvi re̱ꞌ te̱e ya̱ nsa̱ꞌá xíꞌnañúꞌún Ndiosíꞌ maa, jee nkenta kuvi re̱ꞌ ɨɨn ya̱ tékúꞌ.” Soo maá Cristo ya̱ kúvi kuéntáꞌ Adán nu̱u̱nꞌ nɨ́ꞌɨ, jee nkene‑e ne̱ antivɨ́ súkún va̱ji‑i iniꞌ ñɨ̱vɨ́ yaꞌá jín tiñu níso re̱ꞌ ya̱ nastekúꞌ‑u rá ñɨvɨ níꞌi.

⁴⁶ Soo nsú xíꞌnañúꞌún ví yɨkɨkúñu‑ó ya̱ kuvi kuéntáꞌ yɨkɨkúñu maáráa ya̱ nééꞌ antivɨ́ súkún, chisaꞌ yɨkɨkúñu‑ó ya̱ íyó iniꞌ ñɨ̱vɨ́ yaꞌá vitan ví ya̱ xíꞌnañúꞌún, jee kuíre koo yɨkɨkúñu‑ó ya̱ koo kuéntáꞌ íyó yɨkɨkúñu maáráa ya̱ nééꞌ antivɨ́ súkún.

⁴⁷ Chi Adán ya̱ nkuvi te̱e xíꞌnañúꞌún jee nkiji re̱ꞌ ne̱ nu̱u̱nꞌ ñu̱ꞌún, chi jín ti̱ka̱cha̱a̱ꞌ ñuꞌun nsa̱ꞌá Ndiosíꞌ re̱ꞌ. Soo inka te̱e uvíꞌ, ya̱ kúvi Cristo, chi ne̱ antivɨ́ súkún nkiji re̱ꞌ.

⁴⁸ Jee sánikua̱ꞌ Adán nkuvi re̱ꞌ te̱e ya̱ nsa̱ꞌá Ndiosíꞌ jín ti̱ka̱cha̱a̱ꞌ ñuꞌun, suni sukuán ñɨvɨ ti̱ka̱cha̱a̱ꞌ ñuꞌun kúvi rá ñɨvɨ va̱ji ne̱ ñɨ̱vɨ́ yaꞌá. Jee sánikua̱ꞌ kúvi Cristo ya̱ nkiji re̱ꞌ ne̱ antivɨ́ súkún, jee suni sukuán kúvi rá ñɨvɨ ya̱ kúvi se̱ꞌya ñuunꞌ antivɨ́ súkún.

⁴⁹ Jee naku‑ó iniꞌ te̱e ti̱ka̱cha̱a̱ꞌ ñuꞌun, jee suni sukuán ranika̱ꞌ naku‑ó iniꞌ te̱e nkiji re̱ꞌ ne̱ antivɨ́ súkún.

⁵⁰ Jee ránoꞌó ñaniꞌ jín ku̱ꞌva, káchíꞌ ni̱ꞌ rá tu̱ꞌun yaꞌá nu̱u̱nꞌ rán, ya̱ yɨkɨkúñu‑ó ya̱ kúmí‑ó iniꞌ ñɨ̱vɨ́ yaꞌá, jee nsáꞌ ni̱ꞌi̱nꞌ‑i ki̱vɨ‑ɨ nu̱u̱nꞌ tátúníꞌ Ndiosíꞌ. Jee suni yɨkɨkúñu‑ó ya̱ ti̱vɨ́‑ɨ, jee ntu̱ví ni̱ꞌi̱nꞌ‑i ki̱vɨ‑ɨ nu̱u̱nꞌ nsáꞌ ti̱vɨ́‑ɨ ka̱ꞌ.

⁵¹ Teso̱ꞌo rán, chi káchíꞌ ni̱ꞌ nu̱u̱nꞌ rán ɨɨn tu̱ꞌun ya̱ nyɨ́ꞌɨ se̱ꞌí ya̱ nñúꞌun yuꞌú iniꞌ Ndiosíꞌ, ya̱ nsú ntáká‑ó vá kuviꞌ‑ó, soo ntáká‑ó vá nasama Ndiosíꞌ yɨkɨkúñu‑ó.

⁵² Chi tiempúꞌ ji̱nu nu̱u̱nꞌ nɨ́ꞌɨ ya̱ tivɨꞌ trompeta nu̱u̱nꞌ nɨ́ꞌɨ, chi tivɨꞌ trompeta jee kuíntañúꞌún kuéntáꞌ ɨɨn ya̱ núun su̱kua̱ꞌ ni, jee nastekúꞌ Ndiosíꞌ rá ñɨvɨ níꞌiꞌ xinákóo re̱ꞌ ráa nteñu rá ni̱yɨ, sáva ni nsáꞌ ti̱vɨ́‑ɨ ka̱ꞌ, jee nasama Ndiosíꞌ yɨkɨkúñu‑ó.

⁵³ Chi yɨkɨkúñu‑ó ya̱ tívɨ́‑ɨ jee saá íyó nuvi‑i ɨɨn yɨkɨkúñu ya̱ ni nsáꞌ ti̱vɨ́‑ɨ ka̱ꞌ. Jee yɨkɨkúñu‑ó ya̱ jíꞌíꞌ‑i jee saá íyó nuvi‑i ɨɨn yɨkɨkúñu ya̱ ni nku̱víꞌ‑ó ka̱ꞌ.

⁵⁴ Jee yɨkɨkúñu‑ó yaꞌá ya̱ tívɨ́‑ɨ jee sáá nuvi‑i ɨɨn yɨkɨkúñu ya̱ ni nsáꞌ ti̱vɨ́‑ɨ ka̱ꞌ, jee yɨkɨkúñu‑ó yaꞌá ya̱ jíꞌíꞌ‑i jee sáá nuvi‑i ɨɨn yɨkɨkúñu ya̱ ni nku̱víꞌ‑ó ka̱ꞌ, jee saájee sikúnkuvi rá tu̱ꞌun nééꞌ nu̱u̱nꞌ Tutuꞌ níso Tu̱ꞌun Ndiosíꞌ:

⁵⁵ Ya̱ jíꞌíꞌ ñɨvɨ, ¿na̱sa kuneí‑i si̱kɨ̱ꞌ yó résa? Jee ya̱ jíꞌíꞌ ñɨvɨ, ¿na̱sa kuvi saꞌá kini‑i yó kuéntáꞌ iñu ñu̱ñu̱ꞌ résa? káchíꞌ nu̱u̱nꞌ Tutuꞌ vá.

⁵⁶ Jee máá kua̱chi kúvi kuéntáꞌ iñu ya̱ sáꞌá‑a ya̱ kini nóꞌo ñɨvɨ jee jíꞌíꞌ ráa. Jee fuersáꞌ kua̱chi ví tu̱ꞌun nta̱túníꞌ Ndiosíꞌ ne̱ yanaꞌán ya̱ njiáꞌa re̱ꞌ nu̱u̱nꞌ Moisés chi jiátíñú kua̱chi maa sáva tɨɨn kua̱chi yó.

⁵⁷ Soo na̱ ka̱ꞌ kútaꞌviꞌ‑ó nu̱u̱nꞌ Ndiosíꞌ, chi jie̱ꞌe̱ꞌ ya̱ sáꞌá I̱toꞌoꞌ‑ó Jesús ya̱ kúvi Cristo ya̱ kúneí‑ó si̱kɨ̱ꞌ jíꞌíꞌ‑ó.

⁵⁸ Jee saáva ránoꞌó ñaniꞌ jín ku̱ꞌva maáníꞌ ya̱ ñúnúunꞌ ni̱ꞌ, kuiñɨ ni̱ꞌin rán jín ya̱ yɨ́táꞌán kunikɨnꞌ rán Cristo, sukuáni sáꞌá rán ka̱ꞌ tiñu I̱toꞌoꞌ‑ó. Chi jíníꞌ rán ya̱ ntu sátíñú ka̱ꞌá rán jie̱ꞌe̱ꞌ yɨ́ꞌɨ́ rán nu̱u̱nꞌ I̱toꞌoꞌ‑ó.