1 Corintios 11 - Mixteco del suroeste de Tlaxiaco Oaxaca

¹ Kune̱ꞌyá rán na̱ja jiáꞌnu ni̱ꞌ, jee tɨɨn rán ichi ni̱ꞌ jee naku rán nuꞌuꞌ, kuéntáꞌ sáꞌá nuꞌuꞌ ya̱ ntɨɨn ni̱ꞌ ichi Cristo jee naku ni̱ꞌ re̱ꞌ.

Jie̱ꞌe̱ꞌ na̱sa íyó saꞌá rá ñaꞌan ya̱ nútútú jín rá ñanitáꞌán

² Nákuetúꞌún ni̱ꞌ ránoꞌó [rá ñaniꞌ jín ku̱ꞌva], chi níní sukuáni nákúꞌun iniꞌ rán nuꞌuꞌ, jee kuiñɨ kutú rán jín Tu̱ꞌun Ndiosíꞌ sánikua̱ꞌ nxi̱néꞌénꞌ ni̱ꞌ ránoꞌó.

³ Soo kuíni ni̱ꞌ ya̱ kuniꞌ rán ya̱ yósóꞌ Cristo nu̱u̱nꞌ ntáká te̱e kuéntáꞌ yósóꞌ xi̱ni̱ꞌ nu̱u̱nꞌ yɨkɨkúñu. Jee yósóꞌ ɨɨn te̱e nu̱u̱nꞌ ñasɨ́ꞌɨ́ re̱ꞌ kuéntáꞌ yósóꞌ xi̱ni̱ꞌ. Jee yósóꞌ Ndiosíꞌ nu̱u̱nꞌ Cristo.

⁴ Jee saáva ntáká te̱e ya̱ násɨ́ꞌ xi̱ni̱ꞌ re̱ꞌ sáá káꞌánꞌ re̱ꞌ jín Ndiosíꞌ, áxí retú sáá káchítu̱ꞌún re̱ꞌ tu̱ꞌun kéne yuꞌú Ndiosíꞌ nu̱u̱nꞌ rá ñɨvɨ nútútú ya̱ jínúꞌ iniꞌ ráa Ndiosíꞌ, jee yukuán sáre jiáꞌa re̱ꞌ tu̱nkánuun maáréꞌ ya̱ retú sáꞌá re̱ꞌ sukuán.

⁵ Soo ntáká ñaꞌan ya̱ retú ntu násɨ́ꞌ xi̱ni̱ꞌ ña sáá káꞌánꞌ ña jín Ndiosíꞌ, áxí sáá káchítu̱ꞌún ña tu̱ꞌun kéne yuꞌú Ndiosíꞌ, jee suni tu̱nkánuun jiáꞌa ña maáña ya̱ retú núne xi̱ni̱ꞌ ña. Chi ɨɨn ni kúvi‑i jín ya̱ kuéntáꞌ retánꞌ nse̱té ñɨɨ́n ña xi̱ni̱ꞌ ña.

⁶ Saájee retú ntu̱ví jiásɨ́ꞌ ɨɨn ñaꞌan xi̱ni̱ꞌ ña, jee va̱ꞌa ka̱ꞌ ví ña ya̱ íchí keꞌneꞌ ña ixi ña. Jee retú kúkanuun ña ya̱ jiéꞌnéꞌ ña ixi ña, áxí retú sété ñɨɨ́n ña xi̱ni̱ꞌ ña, jee retú sukuán jee va̱ꞌa ka̱ꞌ ya̱ íyó kasɨꞌ ña xi̱ni̱ꞌ ña.

⁷ Chi te̱e jee ntu̱ví íyó kunasɨꞌ xi̱ni̱ꞌ re̱ꞌ, chi íyó re̱ꞌ sánikua̱ꞌ íyó Ndiosíꞌ, ya̱ naku re̱ꞌ iniꞌ Ndiosíꞌ, jee yukuán stúvi ya̱ máá viiꞌ kúñáꞌnú nasɨ́kuitɨꞌ ka̱ꞌ ví Ndiosíꞌ. Soo ñaꞌan chi stúvi ña ya̱ viiꞌ kúñáꞌnú te̱e.

⁸ Chi sáá nsa̱ꞌá Ndiosíꞌ te̱e, jee nsú jín yɨkɨ íkáꞌ ñaꞌan nsa̱ꞌá re̱ꞌ te̱e. Chisaꞌ jín yɨkɨ íkáꞌ te̱e nsa̱ꞌá re̱ꞌ ñaꞌan.

⁹ Chi ntu nsa̱ꞌá Ndiosíꞌ te̱e jie̱ꞌe̱ꞌ ñaꞌan, chisaꞌ nsa̱ꞌá re̱ꞌ ñaꞌan jie̱ꞌe̱ꞌ te̱e.

¹⁰ Jie̱ꞌe̱ꞌ ya̱ nsa̱ꞌá Ndiosíꞌ te̱e jín ñaꞌan sukuán, jee saáva ñaꞌan íyó kasɨꞌ ña xi̱ni̱ꞌ ña, jee yukuán jee xtúvi ña ya̱ yósóꞌ yɨɨ́ ña nu̱u̱nꞌ ña. Chi suni jie̱ꞌe̱ꞌ nika̱ꞌ ya̱ ne̱ rá najiáꞌáꞌ ííꞌ Ndiosíꞌ néꞌyá na̱sa sáꞌá ña.

¹¹ Soo súka̱ꞌ sukuán íyó, soo maáó ya̱ kúvi‑ó ñɨvɨ ya̱ yɨ́ꞌɨ́‑ó nu̱u̱nꞌ I̱toꞌoꞌ‑ó Jesús, ya̱ ni te̱e nkóo retú ntu̱ví ñaꞌan, jee ni ñaꞌan nkóo retú ntu̱ví te̱e.

¹² Chi sánikua̱ꞌ nkene ñaꞌan ne̱ nu̱u̱nꞌ te̱e sáá nsa̱ꞌá Ndiosíꞌ ñaꞌan, jee suni sukuán váji te̱e ne̱ nu̱u̱nꞌ ñaꞌan sáá káku‑u. Jee ntáká ráa va̱ji ne̱ nu̱u̱nꞌ Ndiosíꞌ.

¹³ Jee ránoꞌó chi sanáaꞌ rán na̱ kúvi ya̱ nááꞌ jie̱ꞌe̱ꞌ yaꞌá, chi, ¿á nsáꞌ jíníꞌ rán ya̱ ntu íyó va̱ꞌa retú kunune xi̱ni̱ꞌ ɨɨn ñaꞌan sáá káꞌánꞌ ña jín Ndiosíꞌ résa?

¹⁴ Jee sánikua̱ꞌ íyó ñujiínꞌ iniꞌ ñɨ̱vɨ́ yaꞌá, ¿á nsáꞌ xínéꞌénꞌ‑e yó ya̱ tu̱nkánuun jiáꞌa te̱e maáréꞌ retú kání ixi re̱ꞌ rúja?

¹⁵ Soo ñaꞌan chisaꞌ viiꞌ ka̱ꞌ túvi ña retú jiáꞌa ña kueꞌnu kání ixi ña, chi, ¿á nsáꞌ ñáꞌnú túvi ña rúja?, chi ixi nání ña ví ya̱ njiáꞌa Ndiosíꞌ ya̱ kunasɨꞌ‑ɨ xi̱ni̱ꞌ ña.

¹⁶ Jee retú íyó ñɨvɨ ya̱ ntu̱ví nánu iniꞌ‑i jie̱ꞌe̱ꞌ rá tu̱ꞌun ya̱ nkachiꞌ ni̱ꞌ ya̱ kuíni‑i kantátúꞌun‑u jie̱ꞌe̱ꞌ tu̱ꞌun yaꞌá, soo ránuꞌuꞌ, jín ni rá inka ka̱ꞌ grupo ñɨvɨ ya̱ jínúꞌ iniꞌ ráa Ndiosíꞌ, ni ntu̱ví íyó na̱ inka ka̱ꞌ ñujiínꞌ ya̱ na̱sa koo.

Jiáꞌa sáꞌá ráa nu̱u̱nꞌ Xíní I̱toꞌoꞌ‑ó

¹⁷ Soo siáꞌa ni̱ꞌ inka ka̱ꞌ jie̱ꞌe̱ꞌ tu̱ꞌun ya̱ tatúníꞌ ni̱ꞌ nu̱u̱nꞌ rán, jee jie̱ꞌe̱ꞌ vá ntu̱ví nákuetúꞌún ni̱ꞌ ránoꞌó. Chi sáá nútútú rán jee ntu̱ví sáꞌá váꞌa rán chisaꞌ sáꞌá niva̱ꞌa rán.

¹⁸ Chi xíꞌnañúꞌún ka̱ꞌ kachiꞌ ni̱ꞌ rá tu̱ꞌun sukuán jín rán, chi tésóꞌo ni̱ꞌ tu̱ꞌun ya̱ sáá nútútú rán, jee sáꞌá sɨ́ɨ́n rán maárán nteñu rá táꞌán rán. Jee sava tu̱ꞌun vá ínúꞌ iniꞌ ni̱ꞌ.

¹⁹ Chi saá íyó nijia ya̱ íyó kusɨ́ɨ́n rá grupo nteñu rán ya̱ níkɨ́nꞌ inka ñujiínꞌ sáva túvi nijinꞌ nteñu rán rá ñɨvɨ ya̱ ni̱totúníꞌ Ndiosíꞌ ya̱ kéne na̱a̱ꞌ ráa ya̱ íñɨ́ ni̱ꞌin ráa níkɨ́nꞌ ráa Cristo.

²⁰ Jee saáva sáá nútútú rán sáá násaꞌá rán xíní kua̱ꞌ nsa̱ꞌá I̱toꞌoꞌ‑ó sáá nákúꞌun iniꞌ‑ó re̱ꞌ ya̱ níꞌiꞌ re̱ꞌ jie̱ꞌe̱ꞌ‑ó, soo nsú káꞌ xíní I̱toꞌoꞌ‑ó ví ya̱ sáꞌá rán,

²¹ chi sáá yájíꞌ rán, jee ta ɨɨn rán xíꞌnañúꞌún ka̱ꞌ tɨ́ɨn‑ɨ xíní maáa ya̱ kajiꞌ‑i. Jee ɨɨn ñɨvɨ ntu̱ví níꞌínꞌ‑i ya̱ kajiꞌ‑i jee jíꞌíꞌ‑i so̱ko, jee inka ka̱ꞌ ñɨvɨ jíni‑i.

²² Soo ¿á ni ntu̱ví íyó veꞌi rán nu̱u̱nꞌ kajiꞌ rán jín nu̱u̱nꞌ koꞌo rán rúja? Chi ya̱ sáꞌá rán sukuán jee, ¿á nsáꞌ kúníichiꞌ iniꞌ rán rá ñɨvɨ ya̱ jínúꞌ iniꞌ ráa Ndiosíꞌ rúja? Jee sukuán jiáꞌa rán tu̱nkánuun nu̱u̱nꞌ rá ñɨvɨ ya̱ ntu̱náꞌ íyó ya̱ kajiꞌ ráa. Jee, ¿ná kúvi ya̱ kachiꞌ ni̱ꞌ nu̱u̱nꞌ rán rúsa? ¿Á nakuetúꞌún ni̱ꞌ ránoꞌó ya̱ sáꞌá rán sukuán? Nsáꞌ nakuetúꞌún ni̱ꞌ ránoꞌó jie̱ꞌe̱ꞌ ya̱ sáꞌá rán sukuán.

Xíní I̱toꞌoꞌ‑ó ya̱ sáꞌá‑ó sáva nákúꞌun iniꞌ‑ó ya̱ níꞌiꞌ re̱ꞌ jie̱ꞌe̱ꞌ‑ó

²³ Chi nuꞌuꞌ chi nni̱ꞌi̱nꞌ ni̱ꞌ tu̱ꞌun ya̱ ntaji I̱toꞌoꞌ‑ó nu̱u̱nꞌ ni̱ꞌ, jee tu̱ꞌun vá ví ya̱ ntaji ni̱ꞌ nu̱u̱nꞌ ránoꞌó ya̱ káchíꞌ‑i ya̱ máá yakuááꞌ ki̱vɨ̱ꞌ ya̱ nna̱ku̱ꞌva ɨɨn te̱e I̱toꞌoꞌ‑ó Jesús, jee saá nku̱xíní re̱ꞌ jín rá te̱e nsu̱kuáꞌa re̱ꞌ ráa, jee ntɨɨn re̱ꞌ i̱xta̱tíláꞌ,

²⁴ jee sáá nkuvi njia̱ꞌa re̱ꞌ ya̱ kútaꞌviꞌ re̱ꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ maa, jee nkachiꞌ re̱ꞌ: “[Tɨɨn rán maa, kajiꞌ rán maa.] Yaꞌá ví ñunéꞌyúꞌ ni̱ꞌ ya̱ jiáꞌa ni̱ꞌ maa sáva kuviꞌ ni̱ꞌ jie̱ꞌe̱ꞌ ya̱ váꞌa kuvi ránoꞌó. Jee suꞌva kajiꞌ rán yaꞌá sáva naku̱ꞌun iniꞌ rán nuꞌuꞌ”, nkachiꞌ Jesús.

²⁵ Jee suni sukuán nsa̱ꞌá re̱ꞌ sáá nkuvi nku̱xíní re̱ꞌ, jee ntɨɨn re̱ꞌ vasúꞌ ñúꞌún nixiꞌ nu̱xi uva, jee nkachiꞌ re̱ꞌ: “Vasúꞌ yaꞌá ví tratúꞌ jiáá ya̱ kakɨnꞌ Ndiosíꞌ jín ni̱ñɨ̱ꞌ ni̱ꞌ ya̱ katɨ‑ɨ sáá kuviꞌ ni̱ꞌ. Jee ntáká íchí ya̱ koꞌo rán maa, jee saꞌá rán maa sáva naku̱ꞌun iniꞌ rán nuꞌuꞌ”, nkachiꞌ Jesús.

²⁶ Jee saáva ntáká íchí ya̱ kajiꞌ rán i̱xta̱tíláꞌ yaꞌá jín ya̱ koꞌo rán ya̱ ñúꞌún iniꞌ vasúꞌ yaꞌá, jee stékútu̱ꞌún rán ya̱ ni̱ꞌi̱ꞌ I̱toꞌoꞌ‑ó jie̱ꞌe̱ꞌ kua̱chi‑ó nekuaꞌ niji tuku re̱ꞌ.

Jie̱ꞌe̱ꞌ na̱sa íyó kajiꞌ‑ó sáá násaꞌá‑ó xíní I̱toꞌoꞌ‑ó

²⁷ Jee saáva retú néni ɨɨn ñɨvɨ ya̱ yájíꞌ i̱xta̱tíláꞌ vá, áxí ya̱ koꞌo‑o ya̱ ñúꞌún iniꞌ vasúꞌ I̱toꞌoꞌ‑ó, jee retú ntu̱ví sáꞌá ñɨvɨ vá maa sánikua̱ꞌ íyó sáñáꞌnú‑ó nu̱u̱nꞌ I̱toꞌoꞌ‑ó, saájee íyó kua̱chi si̱kɨ̱ꞌ ñɨvɨ vá chi ntu̱ví sáꞌá ñáꞌnú‑u jie̱ꞌe̱ꞌ yɨkɨkúñu I̱toꞌoꞌ‑ó jín jie̱ꞌe̱ꞌ ni̱ñɨ̱ꞌ re̱ꞌ.

²⁸ Saájee retú sukuán íyó, jee xíꞌna ka̱ꞌ íyó kototúníꞌ va̱ꞌa ta ɨɨn ɨɨn‑ó iniꞌ maáó retú íyó kua̱chi‑ó jee nakani iniꞌ‑ó jie̱ꞌe̱ꞌ‑e, saájee kuvi kajiꞌ rán i̱xta̱tíláꞌ vá, jee kuvi koꞌo rán ya̱ ñúꞌún iniꞌ vasúꞌ vá.

²⁹ Chi ɨɨn ñɨvɨ ya̱ retú yájíꞌ‑i jee jíꞌi‑i vá, jee retú ni ntu̱ví ñúꞌún ñáꞌnú iniꞌ‑i jie̱ꞌe̱ꞌ yɨkɨkúñu I̱toꞌoꞌ‑ó, jee ni̱ꞌi̱nꞌ‑i ya̱ sijíta Ndiosíꞌ maa sáá yájíꞌ‑i jee jíꞌi‑i vá.

³⁰ Jee jie̱ꞌe̱ꞌ ya̱ sáꞌá rán sukuán saáva íyó kue̱ꞌe̱ꞌ ñɨvɨ kúꞌvíꞌ jín ñɨvɨ kuítá iniꞌ nteñu rán, jee sava rán ni̱ꞌi̱ꞌ.

³¹ Jee saáva, chi retánꞌ jítotúníꞌ‑ó maáó retú ntu̱náꞌ kua̱chi‑ó íyó, jee yukuán jee nsáꞌ sijíta I̱toꞌoꞌ‑ó maáó.

³² Soo sáá sanáaꞌ I̱toꞌoꞌ‑ó jie̱ꞌe̱ꞌ‑ó, jee kunoꞌo‑ó sáva nachuꞌun na̱a̱ꞌ re̱ꞌ ichi yó, sáva nsíjíta re̱ꞌ yó sáá sijíta re̱ꞌ rá ñɨvɨ ñɨ̱vɨ́.

³³ Jee saájee ránoꞌó ñaniꞌ jín ku̱ꞌva maáníꞌ, jee sáá nútútú rán sáva kajiꞌ rán xíní I̱toꞌoꞌ‑ó, jee íyó kunetu rán ɨɨn inka rá táꞌán rán, sáva ɨɨn nuún ni kajiꞌ tútú rán.

³⁴ Jee retú ɨɨn ñɨvɨ ví‑i jee jíso̱ko‑o, jee íyó kajiꞌ‑i xi̱ta̱ꞌ ne̱ veꞌi maáa, sáva ntu sijíta Ndiosíꞌ maáó sáá nútútú‑ó. Jee íyó ka̱ꞌ rá na̱ jie̱ꞌe̱ꞌ tiñu kaꞌanꞌ ni̱ꞌ jín rán, soo koo kí chi retú ki̱vɨ̱ꞌ kanta ni̱ꞌ nu̱u̱nꞌ nééꞌ rán, jee nasaꞌá na̱a̱ꞌ ni̱ꞌ maa.