1 Corintios 10 - Mixteco del suroeste de Tlaxiaco Oaxaca

Tu̱ꞌun nákutíñú Pablo jie̱ꞌe̱ꞌ ya̱ néñu̱ꞌun ñɨvɨ rá santúꞌ

¹ Ránoꞌó ñaniꞌ jín ku̱ꞌva, kuíni ni̱ꞌ ya̱ kuniꞌ rán ya̱ na̱sa nika rá tátáꞌ jííꞌ ráníꞌ ya̱ ni̱yo ne̱ yanaꞌán nasɨ́kuitɨꞌ. Chi ntáká ráa nika chi̱ji vi̱ko̱ꞌ ya̱ nstúvi‑i nu̱u̱nꞌ ráa né ɨɨn ichi kɨ̱ꞌɨ̱nꞌ ráa. Jee ntáká kuitɨꞌ ráa njia̱ꞌa nteñu nu̱u̱nꞌ nnine ma̱ꞌñú nteñúꞌún, ya̱ naní nteñúꞌún kuéꞌé.

² Jee sukuán nchiꞌi ráa maáráa xi̱ntíín Moisés, kuéntáꞌ ña̱nuté ráa, chi nnikɨnꞌ ráa re̱ꞌ chi̱ji vi̱ko̱ꞌ, jín ya̱ njiáꞌa ráa jín re̱ꞌ ma̱ꞌñú nteñúꞌún.

³ Jee ntáká ráa nyajiꞌ ráa ɨɨn ni nu̱u̱nꞌ ya̱ yájíꞌ ya̱ njiáꞌa Ndiosíꞌ nu̱u̱nꞌ ráa.

⁴ Jee suni ntáká ráa nni̱ꞌi̱nꞌ ráa nute njiáꞌa Ndiosíꞌ nu̱u̱nꞌ ráa, chi jíꞌíꞌ ráa nute ya̱ nsa̱ꞌá re̱ꞌ ya̱ nkene‑e i̱ka̱ꞌ niyo ya̱ njiáꞌa Ndiosíꞌ jín ya̱ kútáꞌán niyo vá jín ráa sáá kua̱ꞌa̱nꞌ ráa jíka ráa. Jee Cristo kúvi kava vá.

⁵ Soo súka̱ꞌ sukuán nkuvi, jee kúnɨꞌɨ ráa nkuni̱ꞌin iniꞌ ánímaꞌ ráa, jee ntu̱ví nkúváꞌa iniꞌ Ndiosíꞌ nne̱ꞌyá re̱ꞌ yatin ntáká ráa, jee saáva ni̱ꞌi̱ꞌ ráa nkino̱o ráa nu̱u̱nꞌ ñu̱ꞌún sáɨn nu̱u̱nꞌ kuáꞌánꞌ ráa.

⁶ Jee rá nkuvi jín ráa tiempúꞌ yukuán, jee ɨɨn ichi táji‑i nu̱u̱nꞌ‑ó, sáva ntu níyo iniꞌ‑ó rá níváꞌa, kuéntáꞌ nniyo iniꞌ ráa rá níváꞌa.

⁷ Jee saáva koto néñu̱ꞌun rán rá nantíñú ya̱ ntu kúvi Ndiosíꞌ, kuéntáꞌ nsa̱ꞌá sava ráa. Chi sukuán káchíꞌ nu̱u̱nꞌ Tutuꞌ níso Tu̱ꞌun Ndiosíꞌ: “Ña̱kuneeꞌ rá ñɨvɨ nyajiꞌ ráa jee niꞌi ráa, jee kuíre nna̱kuiñɨꞌ ráa nka̱tiéꞌé ráa”, káchíꞌ nu̱u̱nꞌ Tutuꞌ [jie̱ꞌe̱ꞌ ya̱ nsa̱ꞌá ráa viko santúꞌ nneñu̱ꞌun ráa maa].

⁸ Jee suni koto sáꞌá‑ó tiñu téní, kuéntáꞌ nsa̱ꞌá sava rá ñɨvɨ vá tiñu téní, jee ntají Ndiosíꞌ tu̱nóꞌó kunoꞌo ráa, jee métúꞌún ki̱vɨ̱ꞌ jee ni̱ꞌi̱ꞌ o̱ko̱ꞌ u̱ni̱ꞌ mil (23,000) ñɨvɨ.

⁹ Jee ni koto jítotúníꞌ‑ó iniꞌ Cristo, kuéntáꞌ ni̱totúníꞌ sava rá ñɨvɨ vá iniꞌ Ndiosíꞌ sáá nsi̱kítɨ́ꞌ ráa iniꞌ re̱ꞌ, jee nsa̱ꞌá re̱ꞌ ya̱ nkenta rá ko̱o̱ꞌ jee ñaꞌniꞌ rátíꞌ ráa.

¹⁰ Jee ni koto táyuꞌú rán si̱kɨ̱ꞌ Ndiosíꞌ, kuéntáꞌ nta̱yuꞌú sava rá ñɨvɨ vá, jee ntají re̱ꞌ najiáꞌáꞌ ííꞌ re̱ꞌ nkiji‑i jee ñaꞌniꞌ‑i rá ñɨvɨ vá.

¹¹ Saájee ntáká ya̱ nnoꞌo rá ñɨvɨ vá, táji ɨɨn ichi nu̱u̱nꞌ‑ó sáva ntu saꞌá‑ó sukuán. Chi rá tu̱ꞌun yaꞌá jee nkino̱o nééꞌ‑e nu̱u̱nꞌ Tutuꞌ níso Tu̱ꞌun Ndiosíꞌ sáva kaꞌvi‑ó maa, jee stúꞌva tu̱ꞌun vá yó sáva nkúꞌun iniꞌ‑ó ya̱ saꞌá‑ó tiñu níváꞌa sukuán, chi maáó kúvi‑ó ñɨvɨ ya̱ tékúꞌ ka̱ꞌ rá tiempúꞌ kuánɨꞌɨ.

¹² Jee saáva ɨɨn ñɨvɨ ya̱ jiáni iniꞌ‑i ya̱ íñɨ́ ni̱ꞌin‑i jín tu̱ꞌun I̱toꞌoꞌ‑ó, soo kumí‑i maáa nsuñájee kininkava‑a nu̱u̱nꞌ kua̱chi.

¹³ Chi íyó ya̱ nóꞌo rán ya̱ núkú‑u sikívɨ‑ɨ ránoꞌó nu̱u̱nꞌ kua̱chi, chi suni kua̱ꞌ nóꞌo rán suni sukuán nóꞌo rá inka ka̱ꞌ rá ñɨvɨ. Soo na̱a̱ꞌ síkúnkuvi Ndiosíꞌ jee kúvi kuneí iniꞌ rán re̱ꞌ, chi ntu yɨ́netuꞌ re̱ꞌ sikúvi iniꞌ rán ka̱ꞌ nsú ká kuvi kúneí rán jín‑i. Chisaꞌ sáá síkúvi iniꞌ rán saꞌá rán kua̱chi, jee máá Ndiosíꞌ chineí re̱ꞌ ránoꞌó sáva kuvi kuneí rán ka̱ku rán nu̱u̱nꞌ kua̱chi vá sáva kuvi keꞌneꞌ iniꞌ rán ya̱ nóꞌo rán.

¹⁴ Jee saáva ránoꞌó ya̱ ñúnúunꞌ ni̱ꞌ, siíyo rán maárán ya̱ koto néñu̱ꞌun kuitɨꞌ rán ka̱ꞌ rá nantíñú ya̱ ntu kúvi Ndiosíꞌ.

¹⁵ Jee káꞌánꞌ ni̱ꞌ jín rán kuéntáꞌ kúvi rán ñɨvɨ ya̱ tánɨ́ꞌ xi̱ni̱ꞌ, jee sanáaꞌ ránoꞌó jie̱ꞌe̱ꞌ ya̱ káchíꞌ ni̱ꞌ retú ya̱ va̱tu̱ni káchíꞌ ni̱ꞌ, áxí, ntu̱ví.

¹⁶ Jee sáá jíꞌi tútú‑ó copa ííꞌ nixiꞌ nu̱xi jee jiáꞌa‑ó ya̱ kútaꞌviꞌ‑ó nu̱u̱nꞌ Cristo, ¿á nsáꞌ sáꞌá‑ó maa chi násánuún‑ó iniꞌ‑ó jín ya̱ ni̱ꞌi̱ꞌ Cristo jie̱ꞌe̱ꞌ‑ó jee ñatɨ ni̱ñɨ̱ꞌ re̱ꞌ rúsa? Jee sunisaá sáá tásáva‑ó i̱xta̱tíláꞌ ya̱ yájíꞌ tútú nkáá‑ó maa, jee, ¿á nsáꞌ sáꞌá‑ó maa chi násánuún‑ó iniꞌ‑ó jín ya̱ nso̱ko̱ꞌ Cristo yɨkɨkúñu re̱ꞌ sáá ni̱ꞌi̱ꞌ re̱ꞌ nu̱u̱nꞌ kurúsiꞌ jie̱ꞌe̱ꞌ‑ó rúsa?

¹⁷ Jee súka̱ꞌ kue̱ꞌe̱ꞌ‑ó íyó, soo ɨɨn yɨkɨkúñu kúvi‑ó ya̱ yɨ́ꞌɨ́‑ó nu̱u̱nꞌ Cristo, chi métúꞌún ni ví i̱xta̱tíláꞌ ya̱ yájíꞌ tútú ntáká‑ó, jie̱ꞌe̱ꞌ ya̱ jínúꞌ iniꞌ‑ó I̱toꞌoꞌ‑ó Cristo.

¹⁸ Jee kune̱ꞌyá rán sáá sáꞌá rá ñɨvɨ ni̱ꞌ ñuunꞌ Israel, chi rá ñɨvɨ Israel yájíꞌ ráa sava ku̱ñu rá kitɨ ya̱ sókóꞌ ráa nu̱u̱nꞌ Ndiosíꞌ nu̱u̱nꞌ altar nu̱u̱nꞌ nte̱ñuꞌunꞌ ráa rá kitɨ vá, jee, ¿á nsáꞌ níꞌínꞌ ráa yájíꞌ tútú nkáá ráa ya̱ nso̱ko̱ꞌ ráa nu̱u̱nꞌ altar [sáva nasánuún ráa iniꞌ ráa nu̱u̱nꞌ Ndiosíꞌ] résa?

¹⁹ ¿Ná kúvi ya̱ káchíꞌ ni̱ꞌ résa? ¿Á káchíꞌ ni̱ꞌ ya̱ íyótíñú ɨɨn ku̱ñu ya̱ sókóꞌ rá ñɨvɨ nu̱u̱nꞌ ɨɨn nantíñú ya̱ ntu kúvi Ndiosíꞌ?, áxí, ¿á íyótíñú ɨɨn nantíñú nsa̱ꞌá jín naꞌá vá ya̱ néñu̱ꞌun ráa résa?

²⁰ ¡Ntu̱ví!, chi káchíꞌ ni̱ꞌ ya̱ rá nantíñú ya̱ sókóꞌ ráa jee nu̱u̱nꞌ rá kui̱ꞌna̱ꞌ sókóꞌ ráa rává, jee nsú nu̱u̱nꞌ Ndiosíꞌ sókóꞌ ráa rává. Jee saáva ntu̱ví kuíni ni̱ꞌ ya̱ taꞌanꞌ ránoꞌó túví rán maárán nu̱u̱nꞌ rá kui̱ꞌna̱ꞌ.

²¹ Jee nkúvi koꞌo rán copa I̱toꞌoꞌ‑ó ya̱ jíꞌi rán sáva nákúꞌun iniꞌ rán ya̱ ni̱ꞌi̱ꞌ I̱toꞌoꞌ‑ó jie̱ꞌe̱ꞌ‑ó, jín suni copa rá kui̱ꞌna̱ꞌ sáva néñu̱ꞌun rán ráa. Jee suni ni nkúvi kajiꞌ rán i̱xta̱tíláꞌ yájíꞌ tútú rán sáá nákúꞌun iniꞌ rán ya̱ ni̱ꞌi̱ꞌ I̱toꞌoꞌ‑ó jie̱ꞌe̱ꞌ‑ó, jín suni yájíꞌ rán ya̱ sókóꞌ rá ñɨvɨ nu̱u̱nꞌ rá kui̱ꞌna̱ꞌ.

²² Áxí, ¿á núkú‑ó ya̱ kukuíñɨ́ iniꞌ I̱toꞌoꞌ‑ó yó?, áxí, ¿á níso‑ó ka̱ꞌ fuersáꞌ nsú ka̱ꞌ maá I̱toꞌoꞌ‑ó résa?

Jie̱ꞌe̱ꞌ ya̱ íyó núne sáꞌá‑ó jee nɨꞌɨ ya̱ sáꞌá‑ó íyó stúvi‑i ya̱ viiꞌ kúñáꞌnú Ndiosíꞌ

²³ Káchíꞌ sava rá ñɨvɨ: “Yɨ́netuꞌ saꞌá ni̱ꞌ ntáká tiñu”, soo nsú ntáká tiñu vá íyó váꞌa nu̱u̱nꞌ ni̱ꞌ áxí nu̱u̱nꞌ rá inka ñɨvɨ. Jee káchíꞌ ráa: “Yɨ́netuꞌ saꞌá ni̱ꞌ ntáká tiñu”, soo nsú ntáká rá tiñu vá sáꞌá‑a ya̱ síkújia‑a iniꞌ‑ó nu̱u̱nꞌ tu̱ꞌun I̱toꞌoꞌ‑ó.

²⁴ Chi ni ɨɨn koto núkú‑u saꞌá‑a ya̱ váꞌa maáa, chisaꞌ nukú saꞌá ya̱ váꞌa nu̱u̱nꞌ inka ñɨvɨ.

²⁵ Jee kuvi kajiꞌ rán ntáká nu̱u̱nꞌ ku̱ñu ya̱ kúyáꞌvi nu̱yáꞌvi sáá kéꞌen rán ku̱ñu, jee koto ná jíkátu̱ꞌún rán retú nso̱ko̱ꞌ ñɨvɨ maa nu̱u̱nꞌ rá santúꞌ jee ntu̱ví íyó tu̱ꞌun jiáni iniꞌ ánímaꞌ rán.

²⁶ Chi nantíñú I̱toꞌoꞌ‑ó kúvi ñɨ̱vɨ́ jín nɨꞌɨ ya̱ íyó iniꞌ‑i.

²⁷ Jee retú néni ɨɨn ñɨvɨ ya̱ ntu̱ví kúneí iniꞌ‑i Cristo, jee retú kána‑a ránoꞌó ya̱ kɨ̱ꞌɨ̱nꞌ rán kajiꞌ rán jín‑i, jee retú kuíni rán kɨ̱ꞌɨ̱nꞌ rán, jee kuvi kɨ̱ꞌɨ̱nꞌ rán jee kajiꞌ rán ntáká nu̱u̱nꞌ ya̱ chísó ráa nu̱u̱nꞌ rán kajiꞌ rán, jee koto jíkátu̱ꞌún rán retú nsókoꞌ ñɨvɨ maa nu̱u̱nꞌ rá santúꞌ, jee koto na̱ jiáni iniꞌ ánímaꞌ rán jie̱ꞌe̱ꞌ vá.

²⁸ Soo retú néni ɨɨn ñɨvɨ kachiꞌ‑i nu̱u̱nꞌ rán ya̱: “Ku̱ñu ya̱ nsókoꞌ nu̱u̱nꞌ rá santúꞌ kúvi ku̱ñu vá”, jee koto yájíꞌ rán maa, chi ñɨvɨ vá nkachiꞌ maa nu̱u̱nꞌ rán jín jie̱ꞌe̱ꞌ ya̱ jiáni iniꞌ ñɨvɨ vá ya̱ kua̱chi kúvi ya̱ kajiꞌ rán ku̱ñu vá.

²⁹ Soo ntu káchíꞌ ni̱ꞌ ya̱ koto yájíꞌ rán maa sáva nkúkua̱chi iniꞌ rán retú kajiꞌ rán maa, chi ya jíníꞌ rán ya̱ nsú kua̱chi ví‑i, chisaꞌ káchíꞌ ni̱ꞌ sukuán jie̱ꞌe̱ꞌ inka ñɨvɨ ya̱ jiáni iniꞌ‑i ya̱ kua̱chi kúvi vá retú saꞌá rán maa. Soo sú íñɨ́ núne ni̱ꞌ kajiꞌ ni̱ꞌ ya̱ kuíni iniꞌ maáníꞌ jee, ¿na̱ kuvi chi sánáaꞌ ñɨvɨ si̱kɨ̱ꞌ nuꞌuꞌ jie̱ꞌe̱ꞌ vá chi jiáni iniꞌ‑i ya̱ kua̱chi kúvi vá retú saꞌá ni̱ꞌ maa rúja?

³⁰ Jee retú jiáꞌa ni̱ꞌ ya̱ kútaꞌviꞌ ni̱ꞌ nu̱u̱nꞌ Ndiosíꞌ jie̱ꞌe̱ꞌ ya̱ yájíꞌ ni̱ꞌ, ¿na̱ jie̱ꞌe̱ꞌ chi chíkuáchi ñɨvɨ si̱kɨ̱ꞌ ni̱ꞌ jie̱ꞌe̱ꞌ ya̱ yájíꞌ ni̱ꞌ ya̱ jiáꞌa ni̱ꞌ kútaꞌviꞌ ni̱ꞌ nu̱u̱nꞌ Ndiosíꞌ jie̱ꞌe̱ꞌ vá résa?

³¹ Saáva va̱ni yájíꞌ ránú áxí va̱ni jíꞌi rán áxí na̱ jie̱ꞌe̱ꞌ tiñu sáꞌá rán, jee saꞌá rán ntáká tiñu sáva nakuetúꞌún rá ñɨvɨ jie̱ꞌe̱ꞌ Ndiosíꞌ ya̱ kuniꞌ ráa ya̱ viiꞌ nasɨ́kuitɨꞌ kúñáꞌnú re̱ꞌ.

³² Jee saáva koto na̱ sáꞌá rán tiñu ya̱ sikúvi rán iniꞌ rá ñɨvɨ ya̱ nsíkíninkava rán ráa nu̱u̱nꞌ kua̱chi, va̱ni ñɨvɨ ñuunꞌ Israel, áxí va̱ni ñɨvɨ inka nación, áxí va̱ni rá ñɨvɨ ya̱ jínúꞌ iniꞌ ráa káníjiá ráa yɨ́ꞌɨ́ ráa xi̱ntíín Ndiosíꞌ.

³³ Kuéntáꞌ sáꞌá ni̱ꞌ, chi núkú ni̱ꞌ sáꞌá ni̱ꞌ ntáká tiñu sáva kuva̱ꞌa iniꞌ ntáká rá ñɨvɨ kune̱ꞌyá ráa maa. Chi ntu̱ví núkú ni̱ꞌ ya̱ kuvi ya̱ váꞌa maáníꞌ, chisaꞌ núkú ni̱ꞌ ya̱ saꞌá ni̱ꞌ ya̱ kuvi ya̱ váꞌa kue̱ꞌe̱ꞌ rá ñɨvɨ, sáva ni̱ꞌi̱nꞌ ráa ya̱ natavaꞌ Ndiosíꞌ ráa nu̱u̱nꞌ kua̱chi ráa sikáku re̱ꞌ ráa.