1 Corintios 1 - Mixteco del suroeste de Tlaxiaco Oaxaca

Ntee Pablo tutuꞌ nu̱u̱nꞌ rá ñɨvɨ ya̱ kúneí iniꞌ ráa Cristo, ya̱ nééꞌ ráa ñuunꞌ Corinto

¹ Nuꞌuꞌ Pablo, ya̱ nkana Ndiosíꞌ nuꞌuꞌ sáva kuvi ni̱ꞌ najiáꞌáꞌ Jesús sánikua̱ꞌ kuíni Ndiosíꞌ, sáva kuniso ni̱ꞌ tiñu apóstol ya̱ máá Jesús chúichí re̱ꞌ nuꞌuꞌ nákani ni̱ꞌ tu̱ꞌun jie̱ꞌe̱ꞌ re̱ꞌ. Jesús kúvi re̱ꞌ maá Cristo [ya̱ ñaniꞌ Ndiosíꞌ sáva natavaꞌ re̱ꞌ ñɨvɨ nu̱u̱nꞌ kua̱chi sikáku re̱ꞌ ráa]. Nuꞌuꞌ jín ñaniꞌ‑ó Sóstenes

² tájí ráníꞌ tutuꞌ yaꞌá ya̱ tée ni̱ꞌ nu̱u̱nꞌ ránoꞌó ñɨvɨ kúneí iniꞌ rán Jesús ya̱ yɨ́ꞌɨ́ rán naꞌá Ndiosíꞌ, ya̱ nééꞌ rán nu̱u̱nꞌ ñuunꞌ Corinto. Nsa̱ꞌá sɨ́ɨ́n Ndiosíꞌ ránoꞌó kɨꞌɨ rán nu̱u̱nꞌ Cristo Jesús. Nkana re̱ꞌ ránoꞌó sáva koo sɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ kua̱chi rán jee kɨꞌɨ rán naꞌá Cristo Jesús, sánikua̱ꞌ nsa̱ꞌá re̱ꞌ jín ntáká rá ñɨvɨ nééꞌ nta̱ká nu̱u̱nꞌ ya̱ kákua̱chi ráa nu̱u̱nꞌ I̱toꞌoꞌ‑ó Jesús ya̱ níso re̱ꞌ tiñu ya̱ kúvi re̱ꞌ Cristo. Kúvi re̱ꞌ I̱toꞌoꞌ ráa jín I̱toꞌoꞌ‑ó.

³ Na̱ ka̱ꞌ koo ya̱ máníꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ kúvi Cristo kune̱ꞌyá ráa ránoꞌó, jín ya̱ saꞌá ráa ya̱ kuneeꞌ va̱ꞌa rán.

Jiáꞌa Pablo ya̱ kútaꞌviꞌ nu̱u̱nꞌ Ndiosíꞌ

⁴ Sukuáni jiáꞌa ni̱ꞌ ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ ránoꞌó, chi ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó jee ntaji re̱ꞌ ya̱ váꞌa nu̱u̱nꞌ ránoꞌó jie̱ꞌe̱ꞌ yɨ́ꞌɨ́ rán nu̱u̱nꞌ Cristo Jesús,

⁵ chi jie̱ꞌe̱ꞌ yɨ́ꞌɨ́ rán nu̱u̱nꞌ Jesús jee nta̱ká nu̱u̱nꞌ nku̱kúká rán jín nɨꞌɨ tu̱ꞌun káꞌánꞌ va̱ꞌa rán jín nɨꞌɨ ya̱ jíníꞌ rán jie̱ꞌe̱ꞌ Ndiosíꞌ.

⁶ Chi kuéntáꞌ sáni nkachiꞌ ni̱ꞌ nu̱u̱nꞌ rán tu̱ꞌun na̱a̱ꞌ jie̱ꞌe̱ꞌ Cristo nkino̱o kutú iniꞌ ánímaꞌ rán,

⁷ jee suꞌva ntu̱náꞌ kúmániꞌ ni ɨɨn ta̱ꞌvi̱ꞌ táji Ndiosíꞌ ni nétu kuvi‑ó ya̱ niji nijinꞌ I̱toꞌoꞌ‑ó Jesús ya̱ kúvi Cristo.

⁸ Jee saꞌá re̱ꞌ ya̱ kuiñɨ ni̱ꞌin rán kuneí iniꞌ rán Cristo ne̱kua̱ꞌ ji̱nu ya̱ tékúꞌ nú, sáva ni ɨɨn ntu̱náꞌ kuvi chikua̱chi ránoꞌó sáá kenta nikó I̱toꞌoꞌ‑ó Jesús ya̱ kúvi Cristo.

⁹ Chi síkúnkuvi na̱a̱ꞌ Ndiosíꞌ ya̱ nkana re̱ꞌ ránoꞌó sáva kanitáꞌán iniꞌ rán jín Se̱ꞌya re̱ꞌ Jesús ya̱ kúvi Cristo ya̱ kúvi I̱toꞌoꞌ‑ó.

Sáꞌá sɨ́ɨ́n rá ñɨvɨ maáráa nteñu rá táꞌán ráa

¹⁰ Jee jíkánꞌ táꞌvíꞌ ni̱ꞌ nu̱u̱nꞌ ránoꞌó ñaniꞌ jín ku̱ꞌva, nu̱u̱nꞌ súví I̱toꞌoꞌ‑ó Jesús ya̱ kúvi Cristo ya̱ ɨɨn ni kuvi‑ó ya̱ ɨɨn nuún ni natúꞌún rán, jee koto sáꞌá sɨ́ɨ́n rán maárán nteñu rá táꞌán rán, chisaꞌ ɨnuún koo iniꞌ antúníꞌ rán jín nuún kuꞌun iniꞌ rán.

¹¹ Jee káchíꞌ ni̱ꞌ rá yaꞌá nu̱u̱nꞌ ránoꞌó ñanitáꞌán maáníꞌ, chi rá ñɨvɨ táꞌán veꞌi Cloé nsi̱kúkáꞌnú ráa iniꞌ ni̱ꞌ ya̱ íyó tuntíxín nteñu ránoꞌó.

¹² Káchíꞌ ni̱ꞌ yaꞌá chi ta ɨɨn ránoꞌó káchíꞌ rán: “Nuꞌuꞌ chi íñɨ́ ni̱ꞌ jín Pablo”, áxí: “Nuꞌuꞌ chi íñɨ́ ni̱ꞌ jín Apolos”, áxí: “Nuꞌuꞌ íñɨ́ ni̱ꞌ jín Cefas”, áxí: “Nuꞌuꞌ chi íñɨ́ ni̱ꞌ jín Cristo”, káchíꞌ rán.

¹³ ¿Á nku̱sáva Cristo rúja? ¿Á nuꞌuꞌ Pablo ni̱ꞌi̱ꞌ ni̱ꞌ nu̱u̱nꞌ kurúsiꞌ jie̱ꞌe̱ꞌ ránoꞌó rúja? Áxí, ¿á ña̱nuté ránoꞌó nu̱u̱nꞌ súví nuꞌuꞌ sáva stúvi ya̱ yɨ́ꞌɨ́ rán xi̱ntíín ni̱ꞌ rúja? ¡Ntu̱ví!

¹⁴ Jee jiáꞌa ni̱ꞌ ya̱ kútaꞌviꞌ nu̱u̱nꞌ Ndiosíꞌ ya̱ ni ɨɨn ránoꞌó ntu̱ví nsi̱kuánuté ni̱ꞌ, chisaꞌ kua̱chi Crispo jín Gayo ví ya̱ nsi̱kuánuté ni̱ꞌ,

¹⁵ sáva ni ɨɨn rán ntu kachiꞌ ya̱ ña̱nuté nu̱u̱nꞌ súví ni̱ꞌ sáva stúvi ya̱ yɨ́ꞌɨ́ rán nu̱u̱nꞌ ni̱ꞌ sáá ña̱nuté rán.

¹⁶ (Jee suni nsi̱kuánuté ni̱ꞌ ñɨvɨ táꞌán veꞌi Estéfanas, soo ntu̱ví náꞌán ni̱ꞌ retú nsi̱kuánuté ni̱ꞌ néni ɨɨn ka̱ꞌ ñɨvɨ.)

¹⁷ Chi nsáꞌ nchu̱ichí Cristo nuꞌuꞌ sáva sikuánuté ni̱ꞌ, chisaꞌ nchu̱ichí re̱ꞌ nuꞌuꞌ stékútu̱ꞌún ni̱ꞌ tu̱ꞌun váꞌa jie̱ꞌe̱ꞌ Jesús, soo ntu káꞌánꞌ ni̱ꞌ jín rán jín tu̱ꞌun ya̱ váji xi̱ni̱ꞌ ñɨvɨ ya̱ jiáni iniꞌ rá ñɨvɨ ñɨ̱vɨ́ ya̱ kúvi tu̱ꞌun níchí, chi retú kaꞌanꞌ ni̱ꞌ suꞌva nékúvi kasɨꞌ ni̱ꞌ ya̱ satíñú iniꞌ ánímaꞌ rán tu̱ꞌun jie̱ꞌe̱ꞌ ná kúvi tiñu ya̱ nsa̱ꞌá Cristo sáá ni̱ꞌi̱ꞌ re̱ꞌ nu̱u̱nꞌ kurúsiꞌ, jee nsáꞌ sáꞌá ni̱ꞌ suꞌva.

Tu̱ꞌun jie̱ꞌe̱ꞌ Cristo kúvi‑i fuersáꞌ ííꞌ níꞌin níso Ndiosíꞌ ya̱ sátíñú re̱ꞌ jín‑i jín tu̱ꞌun níchí re̱ꞌ

¹⁸ Chi nu̱u̱nꞌ rá ñɨvɨ ya̱ xináánꞌ Ndiosíꞌ ráa jee tu̱ꞌun jie̱ꞌe̱ꞌ ya̱ níꞌiꞌ Cristo nu̱u̱nꞌ kurúsiꞌ kúvi tu̱ꞌun sáná xíniꞌ nu̱u̱nꞌ ráa, soo nu̱u̱nꞌ maáó ya̱ nátavaꞌ Cristo yó nu̱u̱nꞌ kua̱chi‑ó xinánitáꞌvíꞌ re̱ꞌ yó jee tu̱ꞌun vá kúvi fuersáꞌ níꞌin ííꞌ re̱ꞌ nu̱u̱nꞌ‑ó.

¹⁹ Chi káchíꞌ nu̱u̱nꞌ Tutuꞌ níso Tu̱ꞌun Ndiosíꞌ: Xináánꞌ ni̱ꞌ tu̱ꞌun níchí rá ñɨvɨ níchí xíniꞌ, jee siíyo ni̱ꞌ rá tu̱ꞌun tánɨ́ꞌ xi̱ni̱ꞌ rá ñɨvɨ nito xi̱ni̱ꞌ.

²⁰ Jee, ¿na̱ nu̱u̱nꞌ íyótiñu te̱e ya̱ káchíꞌ ñɨvɨ ñɨ̱vɨ́ yaꞌá ya̱ níchí xi̱ni̱ꞌ re̱ꞌ? Jee, ¿na̱ nu̱u̱nꞌ íyótiñu mestrúꞌ tiempúꞌ vitan ya̱ xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán? Jee, ¿na̱ nu̱u̱nꞌ íyótiñu ñɨvɨ tiempúꞌ vitan ya̱ jíníꞌ káꞌánꞌ viiꞌ sijínúꞌ‑u iniꞌ ñɨvɨ? Chi nsa̱ꞌá sáná Ndiosíꞌ ya̱ níchí íyó ñɨ̱vɨ́ yaꞌá.

²¹ Chi níchí nasɨ́kuitɨꞌ sáꞌá Ndiosíꞌ, chi nsú ya̱ níchí ñúꞌún xi̱ni̱ꞌ rá ñɨvɨ ñɨ̱vɨ́ sáꞌá ya̱ kuniꞌ ráa iniꞌ Ndiosíꞌ, chisaꞌ nkuva̱ꞌa iniꞌ Ndiosíꞌ ya̱ jiátíñú re̱ꞌ tu̱ꞌun váꞌa re̱ꞌ sáva natavaꞌ re̱ꞌ rá ñɨvɨ nu̱u̱nꞌ kua̱chi ráa sikáku re̱ꞌ ráa ya̱ kúneí iniꞌ ráa ínúꞌ iniꞌ ráa re̱ꞌ, asúꞌ jiáni iniꞌ rá ñɨvɨ ñɨ̱vɨ́ ya̱ tu̱ꞌun naanꞌ ví tu̱ꞌun re̱ꞌ ya̱ tékútu̱ꞌún nu̱u̱nꞌ ráa.

²² Chi rá ñɨvɨ ñuunꞌ ni̱ꞌ Israel jee jíkánꞌ ráa ya̱ saꞌá Ndiosíꞌ tiñu a̱nasɨ́ sáva i̱nu̱ꞌ iniꞌ ráa ya̱ Tu̱ꞌun Ndiosíꞌ ví‑i. Jee rá ñɨvɨ ntu kúvi ráa ñɨvɨ ñuunꞌ Israel núkú ráa tu̱ꞌun níchí ya̱ sijínúꞌ‑u iniꞌ ráa.

²³ Soo ránuꞌuꞌ chi káchítu̱ꞌún ráníꞌ jie̱ꞌe̱ꞌ ya̱ níꞌiꞌ nijia Cristo nu̱u̱nꞌ kurúsiꞌ sáva natavaꞌ re̱ꞌ rá ñɨvɨ nu̱u̱nꞌ kua̱chi ráa. Soo nu̱u̱nꞌ rá ñɨvɨ ñuunꞌ Israel chi tu̱ꞌun yaꞌá kúvi tu̱ꞌun chúníní iniꞌ nu̱u̱nꞌ ráa jee kúíchi iniꞌ ráa maa. Jee nu̱u̱nꞌ rá ñɨvɨ ntu kúvi ñuunꞌ Israel jee tu̱ꞌun naanꞌ ví tu̱ꞌun vá nu̱u̱nꞌ ráa.

²⁴ Soo ntáká rá ñɨvɨ ya̱ nkana Ndiosíꞌ kɨꞌɨ ráa naꞌá re̱ꞌ jee ínúꞌ iniꞌ ráa Cristo, va̱ni kúvi ráa ñɨvɨ ñuunꞌ Israel, áxí va̱ni ñɨvɨ ntu kúvi ñuunꞌ Israel, jee nu̱u̱nꞌ ráa tu̱ꞌun jie̱ꞌe̱ꞌ Cristo kúvi‑i fuersáꞌ ííꞌ níꞌin níso Ndiosíꞌ ya̱ sátíñú re̱ꞌ jín‑i jín tu̱ꞌun níchí re̱ꞌ.

²⁵ Chi rá tiñu sáꞌá Ndiosíꞌ ya̱ káchíꞌ rá ñɨvɨ ya̱ kúvi tiñu naanꞌ soo tiñu vá kúvi níchí ñúꞌún kájí xíniꞌ ka̱ꞌ nsú ka̱ꞌ ya̱ níchí ñúꞌún xi̱ni̱ꞌ rá ñɨvɨ tu̱ꞌva. Jee sú káꞌvi iniꞌ rá ñɨvɨ ya̱ táyáꞌ Ndiosíꞌ, soo saꞌ víꞌí káꞌ ví fuersáꞌ ííꞌ níso re̱ꞌ nsú ka̱ꞌ fuersáꞌ níso ñɨvɨ.

²⁶ Ránoꞌó, ñaniꞌ jín ku̱ꞌva, tɨɨn kuéntáꞌ rán ya̱ maá Ndiosíꞌ nkana ránoꞌó sáva i̱nu̱ꞌ iniꞌ rán Cristo jee ki̱vɨ rán naꞌá re̱ꞌ, jee ya jíníꞌ va̱ꞌa rán ya̱ ntu íyó kue̱ꞌe̱ꞌ rán ya̱ kúvi ñɨvɨ níchí sáni jiáni iniꞌ rá ñɨvɨ ñɨ̱vɨ́ ya̱ kúvi ya̱ níchí, jee ntu íyó kue̱ꞌe̱ꞌ rán ya̱ níso tiñu ñáꞌnú tatúníꞌ rán, jee ni ntu̱ví íyó kue̱ꞌe̱ꞌ rán ya̱ nkaku rán nu̱u̱nꞌ ñɨvɨ ya̱ kúñáꞌnú ka̱ꞌ.

²⁷ Chisaꞌ nka̱ji Ndiosíꞌ rá ñɨvɨ ya̱ jiáni iniꞌ rá ñɨvɨ ñɨ̱vɨ́ ya̱ kúvi ráa ñɨvɨ naanꞌ, sáva ku̱ꞌva re̱ꞌ tu̱nkánuun nu̱u̱nꞌ rá ñɨvɨ níchí xi̱ni̱ꞌ sáni jiáni iniꞌ rá ñɨvɨ ñɨ̱vɨ́. Jee nka̱ji Ndiosíꞌ rá ñɨvɨ táyáꞌ sáni káchíꞌ rá ñɨvɨ ñɨ̱vɨ́, sáva sikánuun re̱ꞌ rá ñɨvɨ tiɨ́kɨ́ iniꞌ ráa kúñáꞌnú ráa.

²⁸ Jee suni nka̱ji re̱ꞌ rá ñɨvɨ ya̱ nkaku nu̱u̱nꞌ ñɨvɨ ya̱ ntu kúñáꞌnú ka̱ꞌ nu̱u̱nꞌ rá ñɨvɨ ñɨ̱vɨ́, jee suni nka̱ji re̱ꞌ rá ñɨvɨ kúníichiꞌ rá ñɨvɨ ñɨ̱vɨ́ ráa. Jee suni nka̱ji re̱ꞌ rá ntu yɨ́yáꞌvi nu̱u̱nꞌ rá ñɨvɨ ñɨ̱vɨ́ sáva xinúun re̱ꞌ rá yɨ́yáꞌvi rá ñɨvɨ ñɨ̱vɨ́.

²⁹ Jee sukuán nsa̱ꞌá Ndiosíꞌ sáva ni ɨɨn ñɨvɨ nkúvi kutéyɨ́ɨ́ iniꞌ ráa jie̱ꞌe̱ꞌ maáráa ichinúúnꞌ Ndiosíꞌ.

³⁰ Soo maá Ndiosíꞌ chi nsa̱ꞌá re̱ꞌ ya̱ kɨꞌɨ rán xi̱ntíín Cristo Jesús, jee ne̱ nu̱u̱nꞌ Jesús va̱ji tu̱ꞌun níchí tánɨ́ꞌ xi̱ni̱ꞌ táji Ndiosíꞌ nu̱u̱nꞌ‑ó, jee nsa̱ꞌá re̱ꞌ ya̱ kínóo na̱a̱ꞌ‑ó nu̱u̱nꞌ Ndiosíꞌ, jee nsa̱ꞌá sɨ́ɨ́n re̱ꞌ yó sáva kɨꞌɨ‑ó nu̱u̱nꞌ Ndiosíꞌ, jee nna̱kani núne re̱ꞌ yó nu̱u̱nꞌ kua̱chi ya̱ nkɨ́ꞌɨ‑ó ka̱ꞌ xi̱ntíín kua̱chi.

³¹ Jee sáva sukuán koo kuéntáꞌ káchíꞌ tu̱ꞌun ya̱ nééꞌ nu̱u̱nꞌ Tutuꞌ níso Tu̱ꞌun Ndiosíꞌ ya̱: “Néni ɨɨn ñɨvɨ ya̱ káꞌánꞌ kútéyɨ́ɨ́‑ɨ, jee íyó kaꞌanꞌ téyɨ́ɨ́ jie̱ꞌe̱ꞌ I̱toꞌoꞌ‑ó Ndiosíꞌ”, káchíꞌ tu̱ꞌun nééꞌ nu̱u̱nꞌ Tutuꞌ Ííꞌ.