Zaake 5 - Obamba Kiwoyeti (mdt) NT Portions

Ma dziese anga osolo

¹ Ŋa leyuha me be anga osolo! Lelila, lesue obila o ndoho edze oya o be!

² Osolo a be oma bolo, antsieri se amadza be amfa.

³ Akele a be a mvunu bla adoro a be aya na muanga. Muanga dzua adze obanaŋa be. Nde adze odza akabi a be mva mbaa. Be lema baha osolo a ma antini ma lembisa!

⁴ Lemono gura andzandzi a ma anguunu a be. Be leka mpa bo yo ni. Bo masue, ankima ma adzandzi ami to ma atsuui a Ndziami a Nkumu a yulu bla ntsie.

⁵ Be lema ka oyula ntsie ntsa osolo bla eve dzo mini. Be lema nyiee o maari mva anyama ma biriha o tsuhu ma atsebe bo ankii.

⁶ Be lema lehe ongeneŋe, be se lema buma epeende. Bo aka bisa ni.

Ledila le edziihi e Nkumu yemiŋi

⁷ Baana ma anguhu ledila ntii ngo e Nkumu aya. Lemono osuumbu okuni adiliha, nde adila biila ma eve e nde ama kuna o ntsie, ntii ngo e nde atolo biila e ntsomi bla ma lembisa.

⁸ Ŋa be se ledila leyaasa anyuru, obila edziihi e Nkumu eya tuha.

⁹ Baana ma anguhu leka sueŋe o mpaniŋi e be ni. Ma odima Ndziami oma pama be, mvuuru apamaŋa oli ma onyua a ndzo.

¹⁰ Baana ma nguhu, leyaha lemihi le mpasi bla ledila le awobi a mbari e Ndziami, ma wobihi o nkuumi e Nkumu.

¹¹ Bisi ledzuusa baari ma siaha nkomoŋo. Be lema yuha ma wobo mo nkomoŋo e Zobe, be se lemoni maami a Nkumu asi nde ongula ŋa. Obila Nkumu na otima onini, nde se na nkerihi.

¹² Ongula ŋa baana ma anguhu leka labaha okesi mo yulu bla ntsie, si kali ma osuumbu okima ni. Be oyalaha «Ee» ni «Ee», be se obisa «Kali» ni «Kali». Mo bu ndi Ndziami i ma pama be ni.

Mpari ovuoni

¹³ Mvuuru o mpanihi e be oli o ntsa ampasi? Ŋa nde ovuono. Mvuuru oli ntsa osuere? Nde oyima aluumu a Ndziami.

¹⁴ Omo o mpaniŋi e be oli na ngaa? Nde otsuolo akuuru ma Ekuha, bo avuono o nde, omana bo adziriha nde ataŋi a maari oyula nde o nkuumi e Nkumu.

¹⁵ Ovuoni ali na oyalihi adze ovusuha mvuuru ali na ngaa. Nkumu asaara nde ma otele, ŋa yuhu nde oma sa ambiini, Nkumu oboloho nde mo.

¹⁶ Lesa komboso o mpaniŋi e be, be se levuono ma abuha, mo bu ndi be lewuuma. Ovuoni a mvuuru ali tele na mpari eso.

¹⁷ Eli aki mvuuru omuo mva saabe, nde ovuoni ŋa mpari eso mo bu ndi mvula i ma noho ni, mvula se aka noho oyula ntsie ni. Lemihi le esibi etari na angondo asiami.

¹⁸ Emana nde ovrihi ovuoni, yulu se evrihi epiisi mvula, ŋa ntsie se evrihi empi biila.

¹⁹ Baana ma nguhu a me, yuhu mvuuru omo o mpaniŋi e be omi labaha na asisiele, okima oyi na vuriha na nde.

²⁰ Ove be leya mbri mvuuru aya na vuriha ŋa osi ambiini mo ndzila e nde aki ami nyuoŋo, avusuha nde ntsa leku, nde se atuma adiisa ambiini a nde kuna.