Zaake 4 - Obamba Kiwoyeti (mdt) NT Portions

Letsiina na e Ndziami

¹ Etohi bla angru kuni me wuaha o mpaniŋi e be? Dzo me dziaha mo maami a be ma abi, ma dzuanaha ntsa etima e be.

² Be na ndzala kiila okoroho be i buuna obaha tso ni. Be na mbumi bla mfunuŋa muo, mo vua be i buuna osa dzaa se mo ni. Ŋa be letoho be ledzuana. Be i baha ni, obila be i pisa ni.

³ Si kali be opisa, be i baha ni obila episihi e be ebi. Be osaha oposoho eso ma ediiŋi e be!

⁴ Be leli mva akaasi ma siaha ntsuuma! Be leyaa mbri ledia le maami a yula ntsie, lebele le Ndziami. Mvuuru adia maami a yula ntsie, okirihi buha le ombangu le Ndziami.

⁵ Si kali be letsimiŋa mbri Osaangumu o Ndziami eduuha ndi: «Ndziami na yala mo Oduduma a nde ama mpa saabe.» Kia kalaa kali?

⁶ Okoroho mpolo e Ndziami ama mpa saabe evili onini. Kia obila Osaangumu o Ndziami evuriha oduha ndi: «Ndziami abele anga kuuna, okoroho nde ayamba baari ma ali na baani bla okiimbi.»

⁷ Lenyiima Ndziami be lekemeŋe Dzabri, ŋa nde olabaha na be.

⁸ Letiina tuha na Ndziami nde se otsiina tuha na be. Letsuka dziala e be, asi ma ambiini. Be letsuka etima e be, be baari leli angulu muele!

⁹ Leyubaha ampasi a be, lelila be lesue. Kehi le be lekiriha olili, osuere o be okiriha ndoho.

¹⁰ Levuriha ntsi o mua Nkumu, mo vua nde adze okuusa be!

Leka pamaha baana ma nguhu ni

¹¹ Baana ma anguhu, leka duuha maami ma bi ma abuha ni. Mvuuru aduha maami ma abi si kali apama muana a nguhu a nde, nde akimaŋi ngri e Ndziami nde se apami yo. Mo vua, we apama ngri, ka we anyiima yo ni.

¹² Ŋa Ndziami otu mvuuru awaangi ngri, nde se mvuuru apama. Nde abuuna ovusuha, nde se abuuna obuma. Ŋa we na, apamaŋa buha?

Lenyila kuuna

¹³ Leyuha me, be baari leduuha mbri: «Na lobi si kali osuuha bisi leedze mo ki onguundu, lesa osibi etsiina, bisi leedze na osa ombuungu lebaha adoro.»

¹⁴ Ŋa be i yaa osuumbu edze oka lebihi le be osuuha ni! Obila be oma kaa mva lenguri ledziaha ntini mo, omana lenyuoŋi.

¹⁵ Kaa be oduuha ni bu mbri: «Nkumu yuhu adia, bisi leedze oka bu, si kali leedze osa bu.»

¹⁶ Ŋa be ŋa kuuna be se na ndzala amonoŋo be. Kuuna mva dzia, kuuna e mbi.

¹⁷ Yuhu mvuuru oyaa osa leve omana nde i sa lo ni, nde ŋa nde asiaha mbiini.