Zaake 3 - Obamba Kiwoyeti (mdt) NT Portions

Onkumu ma lempele

¹ Baana ma anguhu a me, be leka kaa be aso ayisihi ni. Obila, be leyaa mbri opami a saabe adze ovula abuha.

² Saabe aso lesiaha maami ma abi. Yuhu mvuuru i tamaŋa o mbari e nde awobo ni, nde mvuuru ove abuuna okiele nyuru e nde eso yemiŋi.

³ Saabe lelehe ondi ma enyua ma akabala, mo bu mbri bo anyiima saabe. Saabe se lebira nyuru e bo eso levusu.

⁴ Lemono se ambuungu, se mo ama vula onini kuna, se ŋa piebi e nkala e tsiniŋa mo, ma bira mo bla otini oti okiehe, mpini mpili oduhi adia obira mo.

⁵ Ma osuumbu dzu dzua se, lempele kiila e kiehe o nyuru e mvuuru. Okoroho lo ledzoho ma osuumbu a lo lebuuna oya na maami ma anini. Lemono mbaa e nkiehe ebuuna o tsuha suaha okumuhu!

⁶ Lempele se oma kaa mva mbaa. Lempele kiila etusuha maami ma abi lo se leli ntsa nyuru e saabe. Lo lebiisa nyuru e saabe eso. Lempele letsuha lebihi le saabe leso mo mbaa ewuaha biri ampasi.

⁷ Mvuuru omuo abuuna okiele ankaka ma anyama na anyohi bla antaari, na antsu aso. Nde abuuna otsuha bo.

⁸ Ŋa mvuuru se omo i buuna okuara lempele ni. Lempele le bi, lo leka kaa tsuo ni. Lo lema luula ma antayi a mbumi.

⁹ Saabe lekuusa Nkumu a Taara a saabe bla lempele. Okoroho bla lempele lilia se, saabe leloho baari ma omuo a Ndziami ama waanga mva nde.

¹⁰ Onyua dzu dzua atusaha mbari andosoho bla oloho. Baana ma nguhu a me, maami i buuna oka vua ni!

¹¹ Ntsulu okeri mo i buuna otusaha andza ma ave bla ankali ni.

¹² Oti a fiige baana ma nguhu a me, i buuna okula mburu eliive ni. Oti a viinye se i buuna okula mburu e figie ni. Ntsulu okeri etusaha andza ma ongua, i buuna otusaha andza ma ave ni.

Ntsimi ewa na yulu

¹³ Ali na ntsimi bla oyeri o mpaniŋi e be na? Nde olaha ma ekiihi e nde ma eve, mo maami a nde asiaha ntsa oduusu na ntsimi.

¹⁴ Ŋa yuhu etima e be ema luula mo mfuniŋa muo bla yala, lenyila odzoho mbri be na ntsimi, be lebiisa asisiele ma ondii o be.

¹⁵ Ntsimi dzia ewuaha ka yulu ni. Dzia ntsimi e yula ntsie, ntsimi e mvuuru o muo, ntsimi edidima ma ebi!

¹⁶ Obila biri eli na mfuniŋa muo bla yala, maami ma otsa otsa bla ma abi aso se oka o ŋa.

¹⁷ Ŋa ntsimi e yulu obaana oka ni tse tse. Omana yo na oduusu, yo oka angru kali, yo ekoso abuha, ntsimi na nkerihi e baari, ntsimi esa mvuuru obaha eku ma eve. Yo i pama reŋe ni, ntsimi ompiele kali.

¹⁸ Baari ma ama dia oduusu, ompa ni oduusu o mpaniŋi e bo, mva mburu ma kunuŋa omana atoli, lia lebihi lesiaha Ndziami ove.