Zaake 2 - Obamba Kiwoyeti (mdt) NT Portions

We i dia ake we onyili ake ni

¹ Baana ma anguhu a me, be leli na oyalihi oma Nkumu a saabe lekuma Zezi Krisi, lekaa pamaŋa reŋe ni.

² Leebuuna oduha mbri: balaha mo eli na osolo, ema laasa ankuere a ma akele amvunu ma eliemi, na amfa ma wali, onyuniŋi ntsa okuha a be. Ŋa balaha eli na owuha se ama laasa afra ma amfa onyuniŋi.

³ Ŋa be yuhu okeese eso mvuuru ama laasa amfa ma ali na owali, omana be leduhi na nde mbri: «Ka o ntsi o biri e mve dzi!» Ŋa mo mvuuru ali na owuha be mbri: «We, ka mo otele!» Si kali mbri: «Dziaha na aka o ntsi o ntsie, o ntsina nyiili e me!»

⁴ Be dzua ŋa ka ombayi lesiaha o mpaniŋi e be ni? Be ŋa ka be lemi wuana apami ma ali na etima ma ebi ni?

⁵ Leyuha baana ma nguhu a me a dia: Ndziami ka mvuuru asuoli anga owuha o yula ntsie mo osa bo akiriha anga osolo ntsa oyalihi bla anga wanda Onkani, e nde alehi ndahi na baari ma dia nde ni?

⁶ Ŋa be, be lema bese onga owuha. Okoroho, bo ka anga osolo bibaa ma suesehe be, omana bo abira be andzo ma pamaŋa baari ni?

⁷ Bo ka baari bibaa ma tuuha nkuumi e mve ma ama mpa be ni?

⁸ Be yemiŋi lesiaha, ntini e be lenyiima ngri Onkani o Ndziami, mva ma ama teende ntsa osaangumu o Ndziami ndi: «Ove we odii buaha le we mva o we ama dia nyuru e we anku.»

⁹ Ŋa be yuhu lesa ombayi, be lesiaha ŋa mbiini. Ŋa ngri se ebuma be ntsoso, obila be i nyiima yo ni.

¹⁰ Ma oma, mvuuru obisa onyiima ngri mo, se nde ama nyiima maamo, nde oma kua ntsoso ma angri aso.

¹¹ Obila mvuuru aduhi ndi: «We oka siaha ntsuuma ni». Mvuuru dzu dzua se aduhi ndi: «We oka bumaŋa mvuuru ni.» Ŋa yuhu we i sa ntsuuma ni, okoroho we abuma mvuuru, we ŋa we aka nyiimaŋa ngri ni.

¹² Lewobo be lesa maami, mva baari ma adze opama mo ngri enyila be nyengele.

¹³ Obila, Ndziami aka adze omono nkerihi o ntini e nde adze opama mvuuru aka sa leve na abuha ni. Ŋa leve le Ndziami leedze ovula opami.

Oyalihi bla maami

¹⁴ Baana ma nguhu a me, mvuuru oduha ndi: «Me na oyalihi.» Okoroho nde i laha esima bla tso ni, oyalihi kia ebuuna ovusuha nde?

¹⁵ Muana nguhu okaasi si kali a balaha ali mfa ma olaasa bla kiila mo odza etsuhu eso kali,

¹⁶ ŋa mvuuru omo o mpaniŋi e be oduhi na bo ndi: «Ledziehe ntsa oduusu, leguha amfa a mpebe omana ndi leedza be ledzuruha!» Okoroho be i mpa bo biibi e bo ma ali na kaama ni?

¹⁷ Ma osuumbu dzu dzua se, oyalihi eli esima bla tso kali, oyalihi ema kua.

¹⁸ Ŋa mvuuru leke aduha ndi: «We na oyalihi, ŋa me na esima. Laha me oyalihi o we eli esima kali, ŋa me se elaha we ndiimi oyalihi o me o bla esima.»

¹⁹ We ayalaha mbri Ndziami omo otu? Yemiŋi. Ŋa edidima ma ebi se ma yalaha, bo se ma triha o vuoho!

²⁰ We odzili! We asaha mbri alaha we ndi oyalihi eli esima kali, ntsuo kali?

²¹ Ndziami aka yalaha Abraame a taara saabe ndi mvuuru a tele o esima nde asi, o biri e nde ampi muana a nde Izaake o yula nkiina ni?

²² We amono mbri oyalihi o nde bla esima e nde eyeniŋi ndzila mo. Oyalihi o nde oyeli yemiŋi obila ma esima e nde asihi.

²³ Mo vua amoni maami ma Osaangumu o Ndziami eduhi ndi: «Abraame olehi tari o Ndziami, ma osuumbu dzua se Ndziami oyahi nde o mvuuru a tele.» Ndziami se otsuoli nde mo ndihi a nde.

²⁴ Be lemono mbri Ndziami ayaha mvuuru ndi oli tele, ma esima e nde ka ma oyalihi otu ni.

²⁵ Osuumbu dzudzua se mo Rayabe, okaasi aki na obla. Ndziami oyahi nde o mvuuru a tele obila ma esima e nde. Ma oma nde ayambi antuma a Isayele emana nde otumi bo mo ndzila nkima.

²⁶ Ma osuumbu dzu dzua se, nyuru eli owuru kali ema kua, na oyalihi se eli esima kali oma kua.