Zaake 1 - Obamba Kiwoyeti (mdt) NT Portions

Ewoosihi

¹ Me Zake, me odzandzi a Ndziami bla a Nkumu Zezi Krisi, me ewooso embisa e kuumi na dziele me ema tsalaha o yula ntsie eso, ambulu a be.

Oyalihi bla ntsimi

² Baana ma anguhu a me, lesuere o ntini e be leeli ntsa ampasi mpini mo.

³ Ma oma, be leyaa mbri mpasi e mo oyalihi e be lemono dzia, eyaasa nkomoŋo e be.

⁴ Ŋa lesa mbri nkomoŋo e be eyama mbumbu, mo bu ndi be leka yemiŋi, nyengele, mo vua be i ma kaama kiila ŋa eve ni.

⁵ Ŋa mvuuru o mpaniŋi e be okaama ntsimi, nde opisi na Ndziami adze ompa nde yo. Obila Ndziami mvuuru ampaha baari aso nyengele, nde i mpa mvuuru apisa dzua mberi ni.

⁶ Ŋa ove nde opisa na oyalihi oso, nde i ma sa ekemi ni. Obila mvuuru asa ekemi, owuana epuhi mo okeri o nini e piebi esaariha ma angulu aso.

⁷ Mvuuru mva dzua i tsimiŋa ndi nde abuuna obaha mpini kiila ewa ma lengulu le Nkumu ni,

⁸ obila nde na antsiha, nde i yaa osuumbu osa o maami a nde asa aso ni.

Owuha bla osolo

⁹ Muana nguhu ali owuha ove nde osueri, obila Ndziami akuusa nde.

¹⁰ Ŋa muana nguhu ali na osolo ove nde se osueri, obila Ndziami avuura nde ntsi. Ma oma nde adze oyira mva gula e ndziba.

¹¹ Muuyi obala, nkala e nde ekaasi ndziba, omana gula episihi, owali o yo se owi. Ma osuumbu dzu dzua nga osolo amono obi o biibi e nde.

Mpasi bla ntsuesehe

¹² Ove oka na mvuuru asa nkomoŋo o ntsa ampasi, obila yuhu amimiha nde, nde adze obaha ongundza a lebihi le mbumbu, o Nkumu alehi ndahi na baari madia nde.

Ndziami aka tsiniŋa mvuuru o ntsa etsiniŋi ma ebi ni

¹³ Yuhu mvuuru oli ntsa etsiniŋi ma ebi, nde i duha ndi: «Ndziami mvuuru alehe me ntsa etsiniŋi ma ebi ni!» Obila Ndziami i buuna osaha osa dzaa e mbi ni, nde se i buuna otuma mvuuru ma osa dzaa e mbi ni.

¹⁴ Mvuuru na mvuuru na etsimiŋi ma ebi, dzo ma edziaha ma ediiŋi a nde anku ma ebi. Dzo ma ediima nde, me etuma nde osa dzaa e mbi.

¹⁵ Ediiŋi ma ebi me tuma mvuuru osa mbiini. Ŋa mbiini ebaha biri, empi leku.

¹⁶ Lekaa tamaŋa ni baana ma anguhu a me a dia.

¹⁷ Apuha a mvunu bla biibi ma ave eso ma wuaha yulu, mpili e Taara mvuuru asuumbi oyalala. Nde ali i kaala osuumbi ni, nde se i kalaha ompi odziiŋi ni.

¹⁸ Nde anku mvuuru adii ompa saabe lebihi mo mbari e nde asisiele, mo bu ndi saabe leka levusu o ntsa biibi e nde awaangi eso.

Leyuha, lesa maami a mbari e Ndziami eduha

¹⁹ Baana ma nguhu a me a dia, be leyaa mbri ove mvuuru na mvuuru oti tsui oyuhi, kaa siaha asisari ma owobo ni, kaa biriha nkala se asisari ni.

²⁰ Obila mvuuru ali na nkala, i sa maami a tele o miisi a Ndziami ni.

²¹ Kia obila eli ove be lebisi maami ma abi, na ma ampaha nkala aso. Leyalaha mbari ma ama lehe ntsa etima e be bla oduusu, ma oma yo ebuuna ovusiha be.

²² Lekiele mbari e Ndziami, leka kaha ma oyuha otu ni. Ma oduma be lema kiisa anyuru a be anku.

²³ Obila mvuuru ayuha mbari omana nde i kiele yo ni, nde owuana mvuuru akeese nyuru e nde anku ma otaala, omoni ndi ki olia o nde awi na tso o muo.

²⁴ Nde omana okeese nyuru e nde anku ma otaala, nde oyeni olimiŋi osuumbu aki nde.

²⁵ Ongula ŋa, mvuuru anyiima ngri yemiŋi ma siaha baari aki nyengele, omana nde okieli mo, osi ma osuumbu a mo ma duha. Nde i yuha oyuha otu omana nde olimiŋi mo ni, ŋa mvuuru dzua adze omono ove ma esima e nde asa eso.

²⁶ Mvuuru aduha ndi nde aluono Ndziami omana nde i diisa lempele le nde ni, nde ŋa nde akiisaha nyuru e nde anku. Eluoniŋi e nde bia o tsa.

²⁷ Lemono osuumbu oka tse tse bla yemiŋi ma oluono Ndziami a Taara: lekie le antsiayi bla akuuli ma ali ntsa ampasi. Lekiele le nyuru tse tse o maami ma abi a yula ntsie aso.