Tite 3 - Obamba Kiwoyeti (mdt) NT Portions

Lebihi le enyarihi

¹ We oyibihi bo aso anyiima ankumu bla ankani, bo aki na baani o bo. Bo aya ma buuna osa maami ma ave ma antini aso.

² Bo i duha dzaa e mbi o mvuuru ni. Bo aki anga oduusu, bo aki baari ma ave mo alaha oduusu o bo o miisi a baari aso.

³ Ŋa o ntini e kala, saabe se leki edzili. Saabe leki i nyiima ni, leki lema nyuoŋo. Saabe leki ayiha ma ediiŋi bla eve e yula ntsie eso. Saabe lekihi ntsa maami ma abi na mfunua muo bla eku ma ebi, bla mbele abuha.

⁴ Ŋa ntini ma lahi ove o Ndziami ovusihi a saabe bla dia e nde e mo baari ma omuo,

⁵ nde oma vusuha saabe, ŋa ka mo maami a tele le ema sa ni, ŋa mo nkerihi e nde. Nde oma tsuka saabe ma ekulihi enyarihi, bla lebihi le enyarihi le Oduduma Santi ampa.

⁶ Oduduma dzua, nde ampa saabe nde o kuna kuna mo muana nde Zezi Krisi Ovusihi a saabe.

⁷ Mo vua saabe leya tele mo mpolo e nde, saabe oma ka anga wanda lebihi le mbumbu le ema lehe lila o lo.

⁸ Dzia mbari e tele ma lehe tari o yo, me se esaha mbri we oselehe odzisiha yo na mpari eso. Mo bu ndi, baari ma ali na oyalihi o Ndziami aselehe odze na vusu o ntsa maami ma ave a bo ma asiaha. Bia eyisihi ma eve e yemiŋi o baari aso.

⁹ Ŋa we oka siaha owobo otsa, na lesaha le ombisa o baari ni. Bla ŋa otohi bla lesuhu le otsa le ma angri, bisa lo! Obila lo ntsuo kali lo se mvunu kali.

¹⁰ Mvuuru atsala baari, we odziesi nde odzue le ntsomi, bla le odzuele. O ngula ŋa we otsiesi nde.

¹¹ We oyaa mbri mvuuru mva dzua omi tamaŋa, nde aselehe osa mbiini ŋa nde aposoho nyuru e nde anku.

Anduo ma lembisa

¹² Ntini e me edze otuma we Atemase si kali Tisike, we osi asisari ma oya na abasaha me o Nikopolise. Dzia biri e me esuoli ma oke ma antini a mpebe yo mini.

¹³ Ŋa we oselihi oyeese opiinga a Zenase opami bla ŋa Apolose, ma oduma bo ama kaama o kiila.

¹⁴ Ove abuha a saabe se ayihi osa maami ma ave yemiŋi. Ma oyamaŋa baari ma avuli kaama enini. Bo i ma sa lebihi le ntsuo kali ni.

¹⁵ Abuha a bla me aso ma wooso we. We woosi abuha ma ama dia saabe ntsa oyalihi. Mpolo e Ndziami eka na be aso!