Tite 2 - Obamba Kiwoyeti (mdt) NT Portions

Ekubu

¹ Ŋa we Tite, yisiha maami a yemiŋi lemihi na eyisihi e dzaa dzaa.

² Ekubu ma abalaha ove eki anga oduusu, bo aki baari ma nyiimaŋa. Bo aki baari ma siaha maami yemiŋi, dzaa dzaa o ntsa oyalihi, na dia bla nkomoŋo.

³ Ma osuumbu dzu dzua, duha na ekubu ma akaasi bo abaha ekiihi ma esa Ndziami ove. Bo i ka na osami ni, bo se i ka ayiha a mali na lenyua le mo kuna ni. Ove bo ayisihi maami a tele.

⁴ Ŋa bo ayisihi endzambu ma akaasi osuumbu odia alumi a bo bla baana a bo.

⁵ Ove bo anyiimi anyuru a bo, bo i sa obla ni. Bo adzandzi ma antsa ma andzo a bo yemiŋi. Mvuuru na mvuuru ovurihi ntsi o miisi ma olumi a nde. Ma oduma ndi baari ama sebe mbari e Ndziami.

Edzambu

⁶ We oyaasa edzambu se eka baari a ntsimi.

⁷ Ŋa na we se, ove we oki na ekiihi ma eve me ediima abuha. Ntsa eyisihi e we, we olahi maami a tele, we se oki mvuuru ma nyiimaŋa.

⁸ Mo mbari e we opeende eli i sa baari nkala ni, mo bu ndi buha le ombangu i basaha dzaa e mbi ma oduha o saabe ni.

Ayiha

⁹ Ayiha ove avurihi ntsi o miisi ma ankumu a bo o maami aso. Bo asi ankumu a bo ove. Bo i kemeŋe maami ma ankumu ma duha bo ni.

¹⁰ Si kali, bo i dziba ankumu a bo mpini kiila ni. Ŋa ove bo alahi ndi bo baari ma ave ma buuna olehe tari o bo. Mo bu ndi eyisihi e Ndziami ovusihi a saabe ediima baari aso.

Ma laha mpolo e Ndziami

¹¹ Ŋa mpolo e Ndziami evusuha, emi ya o baari aso.

¹² Mbari dzia eyisiha saabe ma obisa obese Ndziami ŋa ediiŋi e yula ntsie. Mo bu ndi lesa lebihi le eve ma antini ma, lebihi le tele bla le yemiŋi, le nyiimaŋa Ndziami.

¹³ Dzua osuumbu ledila eve e saabe le eki le ema lehe tari o dzo: o tsuhu edze oya lekuma le Ndziami a saabe onini bla ovusihi Zezi Krisi.

¹⁴ Nde ampi nyuru e nde o saabe, ma ovusuha saabe o ntsa maami ma abi. Mo osa saabe leka baari a nde a tse tse, ma obaha obeyi ma osa maami ma ave.

¹⁵ Mono maami a we ayisiha bla onkumu o we oso, mo oyaasa baari ma yuha we. Si kali ma obie na bo, mo bu ndi mvuuru se omo i bese we ni.