Tite 1 - Obamba Kiwoyeti (mdt) NT Portions

Ewoosihi

¹ Me Pole, odzandzi a Ndziami, me se ntuma a Zezi Krisi, ma osa ndi baari a Ndziami ama suolo abaha oyalihi, bo ayaa asisiele ma tuma bo ma osa maami ma ave o miisi a Ndziami.

² Bo se aka o ntsa lila lebihi le mbumbu. Ndziami ali osami kali, aki ama baana olehe ndahi dzia na kala levusu ma asi baanaha maami.

³ Nde oma laha mbari e nde ma antini a nde anku ayeesi, mbari e me etooso dzi aki ama mpa yo ŋa me, ma osuumbu a Ndziami Ovusihi a saabe aduhi.

⁴ Me eteende we osaangumu Tite, muana a me a dzaa dzaa a ntsa oyalihi o saawe. Ndziami a Taara bla Zezi Krisi ovusihi a saabe ampa we mpolo bla oduusu!

Dzandza e Tite ŋa okuha a Krete

⁵ Me enyili we o Krete, mo bu mbri we omana oyeese maami aso. We odze na olehe akuuru ma enguundu eso ma osuumbu a me eduhi we.

⁶ Okuuru a ntsa okuha ove oki mvuuru a tele. Nde oka okari omo otu. Baana a nde ove aki baana ma alehe lila o bo, ma ali na ekiihi ma eve bo se ndzamba kali.

⁷ Ma oma nkumu okuha ove oki mvuuru a tele, obila nde akielehe biibi e Ndziami. Nde i ka mvuuru ali na ndzamba na nkala ni, nde se i nyua mali a kuna ni, nde se i dzuana angru ni. Nde i saha obaha o ngula baari ni.

⁸ Ŋa ove nde oki mvuuru ayambaha baari, nde osiaha leve. Mvuuru asiaha maami a yemiŋi, nde oka tele. Nde oka opeende, ove nde oyaa okiele nyuru e nde anku.

⁹ Ove nde oselihi oyalaha mbari e dzaa dzaa oyalihi, mva ma yisihi. Ove nde oki mvuuru ayaasaha abuha, ntsa eyisihi ma opeende. Ma olaha etamiŋi e baari ma bisiha maami a nde.

¹⁰ Ma oma kuna o mpaniŋi e bo na otsui onono, vuli vuli ma awa mpili Azife, bo ma duha maami ma otsa otsa, bo se ma kura abuha.

¹¹ Ove abiindi bo enyua. Bo ma biisa ankuono kuna ma oyiisiha maami ma ali i buuna oyisiha ni. Bo ma siaha vua ma obaha o ngula baari.

¹² Owobi ali na ntsimi omo o mpaniŋi e bo anku oduhi ndi: «Be ma asi Krete be dzandza osami, be anyama a nkala. Be abolo, be otsimiŋa eso odza.»

¹³ Mbari dzia asisiele, bie na bo ndzele ndzele. Mo bu ndi bo abaha oyalihi o dzaa dzaa.

¹⁴ Bo i luono maami ma eyuumba ma Azife ni. Bo se i nyiima angri a baari ma omuo ma ama labaha na asisiele ni.

¹⁵ Maami aso ali tse tse, mo baari ma ali se tse tse. Ŋa mo baari ma ali ka tse tse ni, ma ama bisa oyalaha, kiila se omo o tse tse kali. Ŋa oyeri o bo bla etsimiŋi e bo ema biiya.

¹⁶ Bo ma aduha ndi bo ayaa Ndziami, okoroho bo osiaha maami akema. Bo ma asa Ndziami obi. Bo na ndzamba. Dzaa se mo e mve e bo ma buuna osa kali.