Mbari e Like 9 - Obamba Kiwoyeti (mdt) NT Portions

Zezi otumi aluoni a kuumi na vuele

¹ Zezi okusihi aluoni a kuumi na vuele. Nde ompi bo mpari bla onkumu ma otsuura edidima ma ebi eso, na lesalaha la abieri.

² Nde otumi bo ma otooso Onkani o Ndziami, na lesalaha la abieri.

³ Nde na bo ndi: «Ntini e be ledze, lekaa biriha kiila se omo ni: i bira osuumbu, i bira mpie, na biila, na adoro ni. Be i bira amfa muele ni.

⁴ Ntini ma yamba be o ndzo mo, be leki ŋa tii ngo e be le tsiehe mpuhu dzia.

⁵ Ntini e baari ma ali i yamba be ni, be letsiehi ma onguundu kia, lekubihi ogru a mo nyiili e be. Ntini e be lesa vua, be ledziese bo.»

⁶ Bo ayeni ma ampuhu. Atoosi Ntsia e Mve, na lesalaha la abieri.

Erode amono onguo o mvuuru a nkuumi Zezi

⁷ Erode Titrake aki nkumu a Ngalili, oyuha maami ma ayiri, onguo osi nde. Obila maamo ndi: «Zan omi nyusuha ntsa leku».

⁸ Akima ndi: «Eli omi ya na avuruha». Ma lembisa ndi: «Omo ntsa awobi a mbari e Ndziami a kala omi ya na avuriha.»

⁹ Erode ndi: «Zan me ti etuma otsebe nkii, ŋa yu mvuuru okima ma wobo o nde na?» Nde aki asaha omono Zezi.

Zezi abunuŋa lemvuuru le kuna

¹⁰ Antuma ayi na avuriha, aduhi Zezi maami a bo ma asi aso. Nde obiri bo, oyeni na bo la na baari, mpili onguundu o Betesayida.

¹¹ Lemvuuru leyuha vua, leluoni nde. Zezi oyambi bo, owobi na bo ma Onkani o Ndziami. Osalihi ma aki na kaama.

¹² Tsuhu eki eya ekolo, antuma a kuumi na vuele atsiini mpili e nde ndi: «Vuura baari ntsa ampuhu na andzo a m paani. Mpili e bo ma baha biri e tolo na biila e bo ma adza. Obila saabe leli o biri e kayi.»

¹³ Zezi na bo ndi: «Lempa bo biila be anku.» Bo akaali ndi: «Bisi leli ŋa na mpeembe taani na antsu vuele atu. Leke we asaha mbri bisi lema suuma biila mo baari ba aso?»

¹⁴ Bo aki ma buuna oto amile ataani a baari(5000). Zezi oduhi na aluoni a nde ndi: «Leduha bo aka ma antsi asa edzu. Odzu omo ekuumi e baari etaani.»

¹⁵ Bo anyiimi, atsuusi baari aso ma antsi.

¹⁶ Zezi oyahi mpeembe e taani na antsu a vuele. Okeesi yulu, ovuoni, ompi andosoho o yula biila, okabi, ompi na aluoni ma okabaha lemvuuru.

¹⁷ Bo aso adzi, adzurihi. Abiri angara kuumi na muele, ma entiha e biila ma esiili.

Piere ndi Zezi Krisi

¹⁸ Tsuhu mo Zezi avuono o paani bla aluoni a nde. Opisi bo ndi: «Lemvuuru leduha ndi me na?»

¹⁹ Bo akaali ndi: «Zan Batise, maamo ndi Eli. Ma lembisa ndi owobi a mbari e Ndziami a kala, ama nyusuha.»

²⁰ Zezi opisi bo ndi: «Mo be, me na?» Piere okaali ndi: «We Krisi a Ndziami.»

²¹ Zezi obie na bo ndi: «Leka duha dzaa dzia na mvuuru ni.»

²² Nde oluusi ndi: «Ove muana Mvuuru omoni ambaba mo mini. Akuuru a ntsa ekuha, ankumu ma asi ma avuoŋi, na ayisihi ma angri madze obuma nde. Ŋa tsuhu otari nde onyusuhi.»

Osuumbu ma oluono Zezi

²³ Emana nde na bo aso ndi: «Mvuuru asaha oluono me, i ma tsimiha o nde anku ni, ove nde obiri lembandzi le nde, ŋa nde oluoni me.

²⁴ Ŋa mpini mvuuru asaha okiele lebihi le nde, ayele lo. Mvuuru adze oyele lebihi le nde o me, adze ovusuha lo.

²⁵ Mvuuru obaha biibi e yula ntsie eso, omana nde obiisi lebihi le nde, si kali nde oposihi lo nde anku, nde obaha oma?

²⁶ Mpini mvuuru amono okru o me, na mbari e me, Muana Mvuuru adze omono okru o nde se, o ntini e nde adze oya ntsa lekuma le nde, na le Taara, na la abaandzi ma epeende.

²⁷ Me eduha be asisiele, maamo o mpanihi e be ŋa ma aka sa kua ni yuhu bo akini omono maami ma Onkani o Ndziami ni.»

Zezi ntsa lekuma le Ndziami

²⁸ Etsuhu mfuomo eyiri e nde amani owobo, Zezi oyahi Piere, bla Zan na Zaake, okumi yula okuri na avuono.

²⁹ Ntini e nde avuonihi, olia o nde okalihi osuumbu, amfa aya kubuhu mva epeeŋi e ngari.

³⁰ O ŋa, abalaha vuele aya ma awobo bla nde. Eki Moyize bla Eli bo aki awobi a mbari e Ndziami.

³¹ Bo awasihi. Lekuma le Ndziami lema dzenehe bo. Ma awobo na Zezi ma ekuhi e nde o Zerizaleme.

³² Piere bla abuha a nde ama ntsa antolo lo mini. Bo anyusihi, amoni lekuma le Zezi, bla abalaha vuele ma aki bla nde.

³³ Ntini e Moyize bla Eli ma nyili Zezi, Piere na nde ndi: «Nkumu saabe ma oka ŋa yemiŋi. Letua elebe etari. Omo a we, omo a Moyize, omo Eli.» Piere aka yaa maami a nde aduuhi ni.

³⁴ Ntini e nde awobihi vua, lenguri lewuhi bo. Aluoni amoni vuoho ntini e bo ma nyuniŋi ntsa lenguri.

³⁵ Dzuuhi lewobi ntsa lenguri ndi: «Yu Muana a me ema suolo, leyuha nde!»

³⁶ Dzuuhi lemana owobo, Zezi ama ka nde otu. Aluoni akieli maami maa, bo aka duha mvuuru o ntini dzia ni.

Zezi asalaha muana ali na odidima obi

³⁷ Tsuhu etsa, bo asurihi okuri, lemvuuru leyi mpili e Zezi.

³⁸ O ntsa lemvuuru, balaha mo ewuli nkima: «E Nkumu, kolo kolo e we, lehe miisi a we o yula muana a me a balaha. Me nde muana a kia!

³⁹ Odidima kia okuari nde o ŋiŋa, nde owuli nkima, tso onyisihi nde na mpari. Awuru aya ma tsuuha nde ma onyua. Odidima kia osuesihi nde kuna, tso ma otsuuha o nde eki na onono.

⁴⁰ Me vuoni aluoni a we ma otsuura tso, bo aka buuna ni.»

⁴¹ Zezi okaali ndi: «Be baari le eli oyalihi kali, be osiaha maami ma abi. Me edze oka bla be, na lebaha le okiini o ma be, tii ngo dzini ntini?» Zezi na balaha dzia ndi: «Ya na muana a we kuuni!»

⁴² Ntini e muana atsiini, odidima obi obali nde o ntsie, onyisihi nde na mpari. Ŋa Zezi obie na odidima obi, osalihi muana, ovuuri na taara.

⁴³ Baari aso akimi onini o Ndziami. Ŋa baari aso aya ma yuusa Zezi, o maami a nde asihi. Nde na aluoni ndi:

Zezi avuriha oduha ndi nde adze okua

⁴⁴ «Leyuha maami a me eduha be. Ma adze ompa Muana mvuuru o dziala e baari.»

⁴⁵ Ŋa aluoni a nde aka yuha mbari dzia ni, yo eki lempiini. Ma oduma bo ama yuha, bo amoni vuoho ma olehe nde eduhu.

Avuli abuha o mpanihi aluoni na?

⁴⁶ Aluoni aya ma awobo o mpanihi e bo, ma saha oyaa mvuuru avuli abuha onkumu.

⁴⁷ Zezi aki oyaa etsimiŋi e bo. Oyahi muana onkere, otsuusi o paani e nde.

⁴⁸ Nde na bo ndi: «Mvuuru ayamba muana yu, o nkuumi e me, nde ayambi me. Mvuuru se ayamba me, nde ayambi mvuuru atumi me. Obila mvuuru avuli onkere o mpanihi e be, dzua mvuuru avuli abuha onkumu.»

Mvuuru ali mbele e be kali, oli bla be

⁴⁹ Zan oyahi mbari ndi: «E Nkumu, bisi lemi mono mvuuru atsuura edidima ma ebi o nkuumi e we. Ŋa bisi lema saha okanaha nde, obila nde i luono we bla bisi ni.»

⁵⁰ Zezi okaali nde ndi: «Lekaa kanaha nde ni. Obila mvuuru ali mbele e be kali, oli bla be.»

Zezi adze Zerizaleme. Asi Samari aka yamba nde ni

⁵¹ Antini aki aya ma tsiina, ma etsiehi e Zezi o yula ntsie, nde okuri eyenihi e Zerizaleme.

⁵² Otumi baari levusu le nde. Bo ayeni, anyunihi o mpuhu asi Samari, ma oyeese edzihi e Zezi.

⁵³ Bo aka dia o yamba nde ni, obila nde ayenihi na Zerizaleme.

⁵⁴ Bo amono vua, aluoni ma tsuolo o Zaake bla Zan na Zezi ndi: «E Nkumu we asaha bisi leduha mbaa ewa yulu, etsuha bo?»

⁵⁵ Zezi okalihi mpili e bo, obie na bo.

⁵⁶ O ŋa bo ayeni mpuhu nkima.

Leluono le Zezi

⁵⁷ Ntini eki bo o ndzila, balaha mo na Zezi ndi: «Me edze oluono we, ma ebiri e we adze oyira eso.»

⁵⁸ Zezi okaali na nde ndi: «Ebahi na abulu ama otsa tolo, anyui a yulu na andzo. Ŋa Muana mvuuru biri owuuma kali.»

⁵⁹ Zezi na okima ndi: «Luono me!» Ŋa balaha dzia ekaali ndi: «E Nkumu, sa nyila me dze na dziiha taara a me.»

⁶⁰ Ŋa Zezi okaali ndi: «Nyila akui adziiha akui a bo. Ŋa we, dziehe na atooso Onkani o Ndziami.»

⁶¹ Okima ndi: «Me edze oluono we Nkumu, ŋa sa nyila me dze na laasa nkuono e me.»

⁶² Zezi oduhi nde ndi: «Mvuuru yuhu akuna nguunu omana nde okuoni yo, nde mva mvuuru ali i buuna odzandza ma Onkani o Ndziami ni.»