Mbari e Like 8 - Obamba Kiwoyeti (mdt) NT Portions

Antuma a kuumi na vuele bla akaasi ma luoniŋi Zezi

¹ Emana Zezi oyeni ntsa ampuhu na enguundu ma otooso Ntsia e Mve Onkani o Ndziami. Antuma a kuumi na vuele aki bla nde.

² Eki se na akaasi ma atusihi edidima ma ebi o bo, emana asalihi angaa a bo. Eki Mariya ma atsuolo o Mariya a Madala ma tusihi edidima ntsaami.

³ Dzaane okari a Suza odzandzi Erode, Sizaane bla akima kuna ma ampihi Zezi biibi e bo ma oyamaha nde bla aluoni a nde.

Ntsintsami okuni

⁴ Lemvuuru lewi ma enguundu eso ma odze mpili e Zezi, nde oti bo ntsintsami ndi:

⁵ «Mvuuru omo oyeni akuna mburu. Ntini e nde akunihi, mburu e ntsomi evi osiese a ndzila, baari adzarihi, anyui a yulu adzi eso.

⁶ Mburu e mo evi o yula akele. Biila ekuli, ekayi mo kaama andza.

⁷ Mburu nkima evi ntsa antsiene, dzo eso ekuli, emana antsiene abumi biila.

⁸ Mburu e mbisa evi o ntsie eve, ekuli empi mburu kuna kuna.» Ŋa Zezi owobi na ankala ndi: «Ali na atsui ma oyuha, oyuhi!»

⁹ Aluoni a Zezi apisi ndi ntsintsami dzia ma oduha ndi nki.

¹⁰ Nde okaali ndi: «Be lema basaha puha ma oyaa maami ama adzisihi ama Onkani o Ndziami, ŋa o baari akema, me owobo na bo ma antsintsami. Bo ma akeese okoroho bo i mono ni, bo ma ta tsui okoroho bo i yuha yemiŋi ni.»

Zezi apasa bo ntsintsami dzia

¹¹ Ŋa ntsintsami dzia ma oduha ndi: mburu oma kaha mbari e Ndziami.

¹² Eli osiese a ndzila oma kaha baari ma yuha mbari e Ndziami omana Dzabri otsiesi mbari ntsa etima e bo, ma oduma bo ama yalaha Ndziami bo se ama vuuha.

¹³ Mburu evi o yula akele oma kaha baari ma yuha mbari e Ndziami, ayalihi yo bla osuere, mbari e Ndziami ekini obaha ekaŋa nkara ntsa etima e bo ni. Bo oyalaha ma antini ake. Ŋa ntini ampasi bo asubi.

¹⁴ Mburu evi ntsa antsiene, oma kaha baari ma yuha mbari e Ndziami omana ampasi, bla osolo na eve ma lebihi, elihi bo kula. Bo i ma yele ni.

¹⁵ Mburu evi o ntsie e mve, oma kaha baari ma yuha mbari e Ndziami, aya tele na otima ove. Bo ma kiele yo, omana bo asi maami ma ave, mo nkomoho e bo.

Ntsintsami e baami e mbaa

¹⁶ Mvuuru i buuna onaasa baami e mbaa owuhi yo o ndzuu si kali olehi ntsina ntari ni. Nde otsuusa yo o biri eli baari onyunuŋa, amoni oyalala.

¹⁷ Maami aso ma ama dibiha ma dila otsuuha tsuhu mo. Ma ali ma adzisihi aso ma dila oyaa, atsuuha o ndzi.

¹⁸ Lesa ayiba ma osuumbu a be leyuha, obila mvuuru ali na kiila ma selehe oluusa nde, mvuuru ali kiila onyaŋa, ma tsiese na okiehe se o biibi e nde atsimiŋa oka na dzo.

Zezi alaha nkuono e nde e dzaa dzaa

¹⁹ Nguhu a Zezi bla nkuono e nde, ayi na basaha nde. Bo aki i buuna oto mpili e nde ni, obila ma lemvuuru.

²⁰ Baari na Zezi ndi: «Nguhu a we bla baana ma anguhu a we ali o ndzi, bo ma saha omono we.»

²¹ Zezi okaali na bo ndi: «Nguhu a me bla baana ma anguhu a me, oma kaha baari ma yuha mbari e Ndziami ŋa ma asiaha maami a nde.»

Zezi abie na okru

²² Tsuhu mo, Zezi bla aluoni a nde akumi ntsa mbuungu, nde na bo ndi: «Letsue levuula ngula dzaanga.Bo se ayeni.»

²³ Ntini e bo ma vuulihi, tolo lebiri Zezi, okru oyi, andza aluuli o mbuungu, bo aya o mbimbi.

²⁴ Aluoni atsiini na e Zezi, anyuusi nde ndi: «E Nkumu, e Nkumu saabe lobi lekua.» Nde onyusihi, obie na okru, na piebi, na epuhi elomi. Dzo eso eya kami.

²⁵ Emana nde opisi bo ndi: «Oyalihi o be oli kuni?» Bo amoni vuoho na lekimi. Aya ma wobo o mpanihi e bo ndi: «Saabe yu mvuuru na, eli na andza na okru ma nyiima nde.»

Zezi osalihi balaha eki na edidima ma ebi

²⁶ Zezi bla aluoni a nde ato osiese osi o Zerezani, eli ngula dzaanga e tele na Ngalili.

²⁷ Ntini e Zezi atsuuhi ntsa mbuungu, balaha mo e ma onguundu kia, aki na edidima ma ebi oyi na avunuha bla nde. Nde aki aya odzieŋe otaba. Aki ayiha i ka o ndzo ni, okaha ntsa antsuo.

²⁸ Nde omono Zezi owuli nkima, ovi o miisi a nde. Owobi na ankala ndi: «We na me oma Zezi? We muana a Ndziami a Nkara Yulu, Kolo kolo e we nyila me osuesehe!»

²⁹ Zezi obie na odidima ŋa ebi ndi: «Tsuuha o nde!» Tso oki oma biha nde o nyuru, akuri nde endi o dziala ankoso o nyiili, nde otsebi. Odidima kia obiri nde ntsa ebiri e kayi.

³⁰ Zezi opisi nde ndi: «Nkuumi e we na?» Nde okaali ndi: «Lenkindi la aworo.» Obila edidima kuna eki ema nyuniŋa o nde.

³¹ Edidima episi kolo kolo na Zezi, ma oduma nde oma tina dzo ntsa mbie leku.

³² Ŋa dziimi le enguu, leki o paani e bo, ledza o yula okuri. Edidima ma ebi na Zezi ndi: «Nyila bisi ledze ntsa enguu.» Nde se oyalihi.

³³ Edidima ma ebi etsuuhi o balaha dzia, enyunihi ntsa enguu, dziimi lia se lesurihi ntsa ongulu, lekui.

³⁴ Akieli ma enguu amono le eyiri, adimi ma antsiini na aduha baari a ma onguundu na ampuhu.

³⁵ Baari atsuuhi na amono maami ma ayiri, bo abasihi balaha ma tusihi edidima ma ebi. Oya o ntsi o paani e Zezi, ama laasa amfa, oya yemiŋi. Bo amoni vuoho.

³⁶ Baari ma amoni maami ma ayiri aso, ayeni na aduha abuha osuumbu a Zezi avusihi balaha eki na edidima ma ebi.

³⁷ Baari ama osi o Zerezani aso na Zezi ndi: «Tsiehe bisi o mpuhu.» Obila bo aki na vuoho yo mini. Zezi okumi ntsa mbuungu ovurihi.

³⁸ Balaha ma tusihi edidima ma ebi na Zezi ndi: «Kolo kolo e we, bira me bla we!» Zezi ovuuri nde ndi:

³⁹ «Vuruha ndzo e we, we oduha maami a Ndziami asi o we.» Nde ovurihi na aduha ntsa onguundu oso maami a Zezi asi o nde.

Zezi onyuusi muana Zayirise okaasi. Osalihi okaasi aki na ngaa esibi kuumi na dziele.

⁴⁰ Ewihi e Zezi ngula ongulu, baari ayambi nde. Ma oma, bo aso adilihi nde.

⁴¹ Balaha mo e nkuumi Zayirise, nkumu a ndzo ma avuonoho, owasihi na e Zezi, ovi o nyiili e Zezi. Ovuoni nde ma oya ndzo e nde.

⁴² Obila nde aki na muana okaasi, nde aki muana a kia. Muana esibi kuumi na dziele. Oli na ngaa e nkala. Zezi o ndzila, lemvuuru leki lepia nde.

⁴³ O ŋa eki na okaasi omo na ngaa ovuvuhu. Esibi eki emi yira kuumi na dziele. Nde aki ama kaba adoro kuna mpuhu asalihi a baari. Ŋa mvuuru se omo aka buuna osalaha nde ni.

⁴⁴ Nde oyiri ngula Zezi, otiili poho e mfa e nde, ovuvuhu owi.

⁴⁵ Zezi opisi ndi: «Atiili na me na?» Baari aso abisi. Ŋa Piere ndi: «Nkumu, lemvuuru ledzenehe we, lepia we!»

⁴⁶ Zezi okaali ndi: «Mvuuru ama tiila me. Me emoni mpari ema tsuuha o me.»

⁴⁷ Okaasi dzua omono ndi ami yiimba nde, oya atiriha, oyi na awura avuo o nyiili e Zezi mua baari aso. Nde se oduhi obila o nde anaami na Zezi, na osuumbu a nde awuumi o ntsi na ntsi.

⁴⁸ Zezi na nde ndi: «Kaasi, oyalihi o we omi vusuha we. Dziehe ntsa oduusu».

⁴⁹ Zezi aki okini awobo, balaha mo ntu ewi ndzo e Zayirise a nkumu a ndzo ma avuonoho, na nde ndi: «Muana a we omi kua nyila oma weele Nkumu.»

⁵⁰ Zezi oyuha vua nde na Zayirise ndi: «Kaa monoho vuoho ni, lehe oyalihi, muana a we avuuha.»

⁵¹ Nde oto ndzo, aka yalaha ndi baari aso anyuniha ni. Ongula Piere, Zan, Zaake na nguhu bla taara a muana.

⁵² Baari aso aki ma olili, bo ali o nkuono obila o nde. Zezi ndi: «Lenyila olili, nde okini okua ni, nde oli tolo!»

⁵³ Ŋa bo aya ma sebe Zezi, ma oma bo aki ayaa ndi muana ama kua.

⁵⁴ Zezi okuari nde o kuoho, owobi na ankala ndi: «Muana me, nyusuha!»

⁵⁵ Oduduma a muana okaasi se oyi na vriha, nde otemihi o ntsi na ntsi. Zezi na bo ndi: «Lempa nde biila.»

⁵⁶ Nguhu bla taara a muana aya ntsa lekimi. Zezi na bo ndi: «Be lekaa duha mvuuru maami ma ayiri ni.»