Mbari e Like 7 - Obamba Kiwoyeti (mdt) NT Portions

Zezi osalihi odzandzi a nkumu aworo

¹ Zezi omana owobo mbari e nde eso na baari, oyeni Kaprenaume.

² Ntsa onguundu kia, eki na nkumu aworo ekuumi kuumi. Odzandzi a nde aki na ngaa e nkala. Nkumu aki na ndzala nde kuna.

³ Nde oyuhi ma wobo o Zezi. Nde otumi akuuru ma Azife na apisa kolo kolo ma oya na avusuha odzandzi a nde.

⁴ Bo ato tuha na Zezi, bo aselihi opisa nde kolo kolo ndi: «Nkumu aworo dzua mvuuru ove, yamaha nde.

⁵ Nde na ndzala baari a saabe, nde mvuuru atsui ndzo ma avuonoho.»

⁶ Zezi oyeni bla bo, bo aki aya la na ndzo kali. E nkumu aworo ma ekuumi kuumi atumi andihi a nde, na aduha Zezi ndi: «Me na okiimbi o we Nkumu, me kaa dia mbri we onyunuha ntsa ndzo e me ni.

⁷ Kia obila o me eka aya me ankulu na amono we ni. Duha dzaa lemo, ŋa odzandzi a me owuuma.

⁸ Me anku se na nkumu a me enyiimaha. Me na aworo o ngula me. Me oduha na omo, mbri: “Dziehe”, nde oyeni. Me oduha na okima mbri: “Dziaha”, nde oyi. Me oduha na odzandzi a me mbri: “Sa bu”, nde osi.»

⁹ Zezi oyuha mbari e nkumu aworo, odzuusi nde. Nde okalihi, na lemvuuru leluonihi nde ndi: «Me kini mono oyalihi mva ki se o Isayele ni?»

¹⁰ Antuma a nkumu aworo avurihi ndzo e bo, amoni odzandzi omi wuuma.

Zezi onyuusi muana okuuli

¹¹ Emana Zezi oyeni onguundu o Nayine. Aluoni a nde bla lemvuuru aki bla nde.

¹² Ntini e nde ato ntsuo e mpuhu, baari ma adze na obiimi antsuo. Okui aki muana a balaha, nde se aki muana a kia. Nguhu okui aki okuuli. Lemvuuru le ma onguundu kia lekihi bla okuuli.

¹³ Nkumu omono nde nkerihi esi nde, na nde ndi: «nyila olila!»

¹⁴ Nde otsiini, otiili okuba, abiri ma obiimi asuri. Nde na obiimi ndi: «Odzambu a balaha, me eduha na we mbri temehe!»

¹⁵ Obiimi oya o ntsi, owobi. Zezi oyahi muana, ovuuri na nguhu a nde.

¹⁶ Baari aso amoni vuoho, aya ma kuusa lekuma le Ndziami ndi: «Owobi a mbari e Ndziami onini omi ya o mpanihi e saabe. Ndziami omi ya na vusuha baari a nde.»

¹⁷ Antsia a Zezi ayeni ntsa osi o Zide oso, na ma apaani.

Antuma a Zan Batise ayi mpili e Zezi

¹⁸ Aluoni a Zan Batise aduhi maami maa aso na Zan a nkumu a bo. Ŋa nde otsuoli vuele o mpanihi e bo.

¹⁹ Nde otumi bo mpili e Nkumu na apisa ndi: «We Krisi adze oya? Si kali bisi le dila okima?»

²⁰ Bo ato mpili e Zezi, bo na nde ndi: «Zan Batise atumi bisi ma opisa yuhu we Krisi adze oya si kali bisi ledila okima?»

²¹ O ntini dzidzia Zezi osalihi a nga angaa kuna, na eleme. Nde otsuuri na edidima me ebi, nde onaani baari kuna miisi.

²² Emana nde okaali na antuma a Zan ndi: «Levuruha na aduha Zan a be lemoni, na a be leyuhi: baari ma aki i mono ni, aya ma mono. Eleme eya me edzie, anga ebila ami wuuma, ma ali atsui kali aya ma yuha, akui ami nyusuha. Ami tooso anga owuha Ntsia e Mve.

²³ Osuere oka na mvuuru ali i suba oyalihi kalihi obila o me ni.»

²⁴ Aluoni a Zan Batise ama vuruha, Zezi okaali na lemvuuru leki ŋa ndi: «O be leyeni na amono o ntsa kayi oma, le ndziba lefubi o piebi, kali?

²⁵ Be oma leyeni na amono? Mvuuru ama laasa amfa amvunu? Baari ma laasa amfa amvunu na ma ali na ontaambu, okaha ma andzo ma ankani.

²⁶ Be na leyeni na mono? Owobi a mbari e Ndziami? Ee me eduha be, nde ovuli na Owobi a mbari e Ndziami.

²⁷ Obila Zan mvuuru ma ama teende ntsa osaangumu o Ndziami ndi: “Me elehe Ntuma levusu ma oselehe ndzila e we”.»

²⁸ Zezi oluusi ndi: «Me eduha be o yula ntsie akini okula mvuuru avuli Zan onini ni. Ma oma mvuuru okiehe ntsa Onkani o Ndziami ovuli Zan Batise onini.

²⁹ Baari aso ma ayuhi nde, na atoniŋi ma lepo aduhi ndi Ndziami oli tele. Bo ayalihi ndi Zan ompa bo ateeme.

³⁰ Ŋa Afarizi bla ayisihi ma angri a Ndziami abisi ediŋii e Ndziami o bo, bo se abisi ateeme a Zan Batise.»

³¹ Zezi ovurihi ndi: «Be baari a lobi me oyelehe be bla na? Bo se owuana na?

³² Bo owuana enkere me eli o ntsi, me etaama ma lebuhu, bo ma tsuolo abuha ndi: “Bisi leberehe be ngomo, be i kina ni, bisi lemi yima be luumu le ndoho, be leka lila ni.”

³³ Ma oma, Zan Batise ayi nde i dza biila ni nde i nyua mali a ba ni, be mbri: “Nde na lari.”

³⁴ Muana mvuuru oya nde adza, anyua, ŋa be mbri: “Nde na ndzala odza bla lenyua le mali, nde andihi atoniŋi ma lepo bla anga ambiini!”

³⁵ Ntsimi e Ndziami eli tele mo baari ma ama yalaha nde aso.»

Zezi ntsa ndzo e Simon Ofarizi

³⁶ Ofarizi omo otsuoli Zezi na adza bla nde. Zezi onyunihi ntsa ndzo Ofarizi oya o tanda.

³⁷ Ntsa onguundu kia, eki na okaasi obla. Nde oyuhi ndi Zezi oli ndzo Ofarizi, nde oyi na mbiina oyombo e mvunu to.

³⁸ Nde oya o ngula Zezi, alila antsia ma va Zezi o yula nyiili. Nde okuomi antsia o mfu e nde, ompi nde amfemfe o nyiili, odzirihi nde oyombo o nyiili.

³⁹ Ofarizi atsuoli Zezi omono vua, otsimihi ndi: «Mvuuru yu aki ma oka owobi a mbari e Ndziami, kaa nde adziabi ndi okaasi yu na obla.»

⁴⁰ Zezi na Ofarizi ndi: «Me na dzaa ma oduha we Simon.» Ofarizi ndi: «Wobo Nkumu.»

⁴¹ Zezi ndi: «Mvuuru omo obihi baari vuele adoro. A ntsomi ekuumi ma enkama etaani, odzuele ekuumi etaani.

⁴² Ŋa bo aka buuna okasa obiimi kia ni. Obihi na bo ndi i ma kasa ni. Ŋa ntsa bo vuele avuli odia nga adoro na?»

⁴³ Simon okaali ndi: «Me etsimiŋa mbri a nde asi mpolo ma obiimi enini.» Zezi okaali ndi: «We na mpieme.»

⁴⁴ Nde okalihi mpili okaasi, na Simon ndi: «We amono okaasi yu, me nyunihi ntsa ndzo e we, we aka dziriha me andza o nyiili ni. Ŋa nde ama vuoso me nyiili ma antsia, oma kuomo o mfu e nde.

⁴⁵ We aka ampa me amfemfe ni, ŋa lebihi le esi nyuniha nde, nde okini onyila ompa me amfemfe o nyiili ni.

⁴⁶ We aka dziriha me maari o yula otsui ni, nde omi dziriha me oyombo o yula nyiili.

⁴⁷ Kia obila o me eduha we mbri ambiini a nde kuna ami boloho. Ma osuumbu a nde alahi dia e nde enini. Mvuuru ma boloho ntseeri, olaha se dia e nkiehe.»

⁴⁸ Zezi oduhi na okaasi ndi: «Ambiini a we ami boloho.»

⁴⁹ Baari ma aki ma odza bla nde, aya ma tsimiha ndi: «Yu mvuuru abuuna oboloho ambiini na?»

⁵⁰ Zezi na okaasi ndi: «Oyalihi o we omi vusuha we. Dziehe ntsa oduusu.»