Mbari e Like 5 - Obamba Kiwoyeti (mdt) NT Portions

Zezi asuolo aluoni a nde antsomi

¹ Tsuhu lemo Zezi aki osiese a dzaanga e Zenezarete, lemvuuru lema dzenehe nde. Lepia nde, ma oyuha mbari e Ndziami.

² Nde omoni ambuungu muele ma osiese a dzaanga, anga mo aki ama suriha ma otsuka apondzi.

³ Zezi okumi o ntsa mbuungu mo, mbuungu dzia eki e Simon. Zezi oduhi na Simon ndi tsiina na mbuungu mua andza. Nde oya o ntsi ntsa mbuungu, ayisiha lemvuuru.

⁴ Nde omana oyisiha, nde na Simon ndi: «Tsiisa mbuungu mua okeri, lehe apondzi ma andza, ma okuara antsu.»

⁵ Simon okaali na nde ndi: «Nkumu, bisi lema dzandza lempiibi letsiina, leka abaha kiila ni. Ŋa me elehe apondzi ma andza lemihi na eduhi e we.»

⁶ Bo alehi apondzi ma andza, akuari antsu a kuna, apondzi aya ma baha.

⁷ Bo atsuoli abuha ma aki o mbuungu emo, na ayamaha bo. Bo ayi, aluusi ambuungu a muele. Antsu ama vula kuna, ambuungu aya ma dzina.

⁸ Simon Piere oma mono maami maa aso, nde ovi ma avuo o miisi a Zezi. Nde na nde ndi: «Aa Nkumu, labaha na me, me osi ambiini.»

⁹ O ŋa, Simon bla abuha a nde aso amoni vuoho, obila mo kuna antsu a bo ma kuari.

¹⁰ Zaake bla Zan baana a Zebede, aki bla Simon amoni vuoho se. Ŋa Zezi oduhi na Simon ndi: «We oka monoho vuoho ni, na ema ka we, dzandza e we oma ka lesaha le baari.»

¹¹ Bo ama ya na mbuungu o sabi, asubi mo kalihi, aluoni Zezi.

Zezi osalihi nga ebila

¹² Tsuhu mo Zezi aki ntsa onguundu. Balaha mo, eki na ebila, omono Zezi, oyi na akumuha o miisi a nde mpaa o ntsie. Na nde ndi: «Nkumu, me eyaa mbri we odia, we abuuna osalaha me.»

¹³ Zezi olabi kuoho, otiili nde ndi: «Me edia, wuuma!» O ŋiŋa, ebila ewi.

¹⁴ Zezi ndi: «We okaa duha mvuuru ni. Dziehe na alaha nyuru mpili osi avuoŋi, ma ompa vuoŋi ma osuumbu a Moyize aduhi. Ma osiisa enyua mbri we omi wuuma.»

¹⁵ Baari kuna ma wobo o ntsia e nde. Lemvuuru lekuha na e nde, ma oyuha nde, ma osaha nde osalaha angaa a bo.

¹⁶ Ŋa nde oyeni ntsa kayi na avuono Ndziami.

Zezi osalihi obuka

¹⁷ Tsuhu mo Zezi aki ayisiha. Afarizi bla ayisihi ma angri a Ndziami, aki o ntsi o paani e Zezi. Bo awihi ampuhu a ma angaala a Ngalili na onguundu o Zide na Zerizaleme. Mpari e Nkumu eki bla Zezi ma osalaha abieri.

¹⁸ Baari ayi bla obuka o yula okuba ma osaha osuumbu ma onyunuŋa ntsa ndzo, ma otsuusa nde o miisi a Zezi.

¹⁹ Baari aki ama vula kuna, bo aka yaa osuumbu onyunuŋa ni, bo akumi yula ndzo. Anaani maha, atubi bulu. Apiisi okuba o mua okuha, o miisi a Zezi.

²⁰ Nde omoni oyalihi eki bla bo, na obuka ndi: «Ambiini a we amiboloho.»

²¹ Ayisihi ma angri bla Afarizi, aya ma awobo ndi: «Yu mvuuru na, atuuha Ndziami yu? Ongula Ndziami na mvuuru okima abuuna oboloho ambiini? Kali, Ndziami otu!»

²² Zezi aki oyahi etsimiŋi ebo, okaali ndi: «Be bi etsimiŋi ema?

²³ Osiami kali oma? Leduha le mbri “Ambiini a we amiboloho” si kali ma oduha ndi: “Temeŋe, we olaana?”

²⁴ Mo bu mbri be leyaa mbri Muana Mvuuru na onkumu ma oboloho ambiini o yula ntsie.» Nde na obuka ndi: «Temeŋe, yaha okuba a we, dze ndzo.»

²⁵ O ŋiŋa, obuka otemihi o miisi a baari, oyahi okuba a nde akihi o yula nde, oyeni ndzo. Na okuusa lekuma le Ndziami.

²⁶ Baari aso aki ntsa lekimi na lenyiima, bo ma akuusa lekuma le Ndziami ndi: «Lobi bisi lemi mono maami a luari.»

Zezi osuoli Levi

²⁷ Emana Zezi oyeni, omoni otoniŋi lepo a nkuumi Levi, aki o ntsi obiri e nde e dzandza. Zezi na nde ndi: «Luono me!».

²⁸ Levi otemihi, osubi eso kalihi, oluoni nde.

²⁹ Emana Levi osi biila e kuna, otsuoli Zezi ndzo e nde na adza. Baari aki kuna, na abuha a nde ma atoniŋi ma lepo.

³⁰ Afarizi bla ayisihi ma angri ma ŋiina, na aluoni a Zezi ndi: «Be ledza, lenyua bla atoniŋi ma lepo, na asi ma ambiini ma oma?»

³¹ Zezi okaali na bo ndi: «Baari ma ali enganaha kaama mo osalihi kali, abieri baari ma ali na kaama.

³² Me eka aya na atsuolo baari ma tsimiŋa ndi bo ali tele ni, ŋa asi ma ambiini, mo bu ndi bo akaala eku.»

Zezi awobo ma ongerehe

³³ Afarizi na Zezi ndi: «Aluoni a Zan Batise bla a bisi ma aka ongerehe ma ovuono. Ŋa aluoni a we, ma adza, ma anyua.»

³⁴ Zezi okaali na bo ndi: «Ŋa tsuhu e tsinda e baala be lebuuna onyila andihi ma olumi aki ndzala o ntini olumi ali bla bo?

³⁵ Ŋa ntini edze oto, ma adze otsiese olumi o mpanihi e bo. Bia etsuhu ebo ma adze oka ongerehe.»

³⁶ Zezi oti bo ntsintsami ndi: «I buuna otsebe o bari o mfa e nyarihi ma otsua bla mfa e kala ni. Osa vua, abiisi mfa e nyarihi. Obari kia se i vunuha bla mfa e kala ni.

³⁷ Mvuuru i buuna olehe mali ma anyarihi ntsa ambasa a kala ni. Tsaaki mo abulihi, nde oyeli aso.

³⁸ Ove alehi mali ma anyarihi ntsa ambasa ma anyarihi.

³⁹ Mvuuru i buuna onyua mali a kala ovurihi opisi ma anyarihi ni. Obila baari ndi: “A kala avuli ove.”»