Mbari e Like 4 - Obamba Kiwoyeti (mdt) NT Portions

Dzabri asaha olehe Zezi ntsa etsiniŋi ma ebi

¹ Zezi awa na Zurde, Oduduma Santi oma luula o nde, Oduduma obiri nde ntsa kayi.

² O kua, Dzabri osoŋi nde ekuumi ma etsuhu ena. Ntsa etsuhu bia nde aka dza biila ni, emana ŋa ndzala esi nde.

³ Dzabri na nde ndi: «Yuhu we muana Ndziami, wobo na kele dzi ekiriha biila.»

⁴ Zezi okaali ndi: «Amateende ntsa Osaangumu o Ndziami ndi, “Mvuuru omuo aka baha lebihi ma lempeembe letu ni.”»

⁵ Dzabri obiri nde nkara yulu, olahi nde esi e yulu a ntsie eso.

⁶ Nde na Zezi ndi: «Me edze ompa we onkumu bla osolo e ma esi bi, dzo eso aki ama mpa me. Me se ompa na mvuuru a me edia.

⁷ We owura avuo o miisi a me, dzo eso me edze oka e we.»

⁸ Zezi okaali ndi, ama ateende ntsa Osaangumu o Ndziami ndi: «We owura avuo eso o miisi a Ndziami a Nkumu a we, we ovuono eso nde otu.»

⁹ Dzabri obiri Zezi Zerizaleme, nde otsuusi nde o yula ndzo e Ndziami. Nde na nde ndi: «Yuhu we Muana Ndziami va o ntsie!

¹⁰ Obila ama teende ntsa Osaangumu o Ndziami ndi: “Ndziami adze oduha na abaandzi a nde asuha we.”

¹¹ Bo ma adze obira we ntsa dziala e bo ma odema nyiili e we ema tiila o kele.»

¹² Zezi okaali ndi: «Ateende ntsa Osaangumu o Ndziami ndi: “We i soŋo Ndziami a Nkumu a we ni.”»

¹³ Nde oma mana osoŋo Zezi ma angulu aso, Dzabri olabihi na nde ma odila oya na avuriha ntini nkima.

Zezi ovurihi Ngalili

¹⁴ Zezi ovurihi Ngalili, mpari Oduduma Santi eki ema luula o nde. Baari aya ma wobo o nde o ntsa ngaala dzia eso.

¹⁵ Nde oyisihi mbari o ntsa sinagoge, ndzo ma avuonoŋo. Baari adzuusi nde.

Atsuuri Zezi o Nazarete

¹⁶ Zezi oyeni Nazarete, mpili ma kuusi nde. Nde onyunihi ntsa ndzo ma avuonoho, o tsuhu ma awuumaha, me esihi e nde e kala. Nde otemihi ma oliira Osaangumu o Ndziami.

¹⁷ Ampi nde osaangumu owobi a mbari e Ndziami Ezayi. Nde onaani, oliiri biri ma ama teende ndi:

¹⁸ «Oduduma a Nkumu oli o me. Nde ama suolo me, ma otooso Ntsia e Mve na baari ma ali ntsa owuha. Nde atuma me ma ovusiha baari ma ali ntsa engeneŋe, ma onaana miisi a baari ma ali i mono ni, ma ovusiha baari ma ali ntsa ampasi,

¹⁹ ma oduha ndi ki osibi o be lemono eve e Nkumu.»

²⁰ Zezi ovuuri osaangumu na odzandzi, oya o ntsi. Baari aso ma aki ntsa ndzo ma avuonoho, ma keese nde.

²¹ Nde na bo ndi: «Maami a be leyuhi ntsa Osaangumu ki, ami mono mo lobi.»

²² Baari aso a siisi enyua e nde, aya kimimi mo mbari e nde e mve. Bo ndi: «Saabe yu ka muana Zuzefe ni?»

²³ Ŋa nde na bo ndi: «Be lebuuna ota me ntsintsami dzi mbri: “Osalihi, salaha nyuru e we, we ankulu.” Ŋa be se lebuuna oduha me mbri: “Bisi lema yuha maami a we asi ma onguundu o Kaprenaume. Sa ma osuumbu dzua ntsa onguundu o we.”»

²⁴ Nde oluusi ndi: «Ee me eduha be, owobi a mbari e Ndziami se omo ma aka yambaha mo osi o nde ankulu ni.

²⁵ Sisiele me eduha be, ntini owobi a mbri e Ndziami Eli akihi ntsa osi o Isayele, mvula aki aka noho esibi etari na otini ni, mpuhu evi ndzala. Ntini dzia se eki na akuuli.

²⁶ Ŋa Ndziami aka tuma Eli mpili e bo aso ni. Nde osuoli okuuli omo akihi ntsa onguundu o Sareta ma osi o Sidon.

²⁷ O ntini owobi a mbari e Ndziami Elize akihi o Isayele, eki na se anga ebila, nde aka salaha bo ni. Nde asalihi Naman, osi Siri.»

²⁸ Aso ma yuhi nde ntsa ndzo ma avuonoho, abie nkala.

²⁹ Bo atemihi, atsuuri nde. Ayeni na nde ntsuo onguundu yulu okuri, obiri ma ama tua onguundu o Nazarete. Bo asahi otsiniŋa nde ntsa mbie.

³⁰ Nde oyiri o mpanihi e bo, oyeni.

Zezi ovusihi mvuuru aki na edidima ma ebi

³¹ Zezi osurihi Kaprenaume, onguundu o ntsa ngaala e Ngalili, nde aki ayisiha o tsuhu ma awuumaha.

³² Baari aya kimimi ma osuumbu eyisihi nde bla mpari e Ndziami.

³³ «Ntsa ndzo ma avuonoho balaha mo eki na odidima obi. Owuli nkima na nkala.»

³⁴ «Aa! We Zezi a Nazarete, we na bisi oma? We omi ya na apama bisi. Me eyaa we, we opeende a Ndziami atumi!»

³⁵ Zezi obie na nde ndi: «Tsuuha o nde!» Oduduma obi obali mvuuru dzua o ntsie, o mua okuha. Otsuuhi o nde, aka yusaha nde ngaa ni.

³⁶ Bo aso aya kimimi, aya ma ŋiina ompanihi ebo ndi: «Saabe dzi mbari ma? Nde awobo na edidima ma ebi na mpari bla lila, dzo ma etsuuha.»

³⁷ Okuumu o nde oyeni ntsa ngaala dzia eso.

Zezi Osalihi abieri

³⁸ Zezi otsiehi ndzo ma avuonoho, oyeni ndzo e Simon. Nde obasihi oko o Simon okaasi na obaa o nkala. Bo apisi Zezi ma osalaha nde.

³⁹ Nde okumihi o yula okaasi, obie na obaa, obaa owi. O ntsi na ntsi ŋa, nde otemihi, oya ampa bo biila.

⁴⁰ Tari ema va, baari ma aki na abieri ayi na laha bo na Zezi, nde olehi dziala o yula bo, bo awuumi.

⁴¹ Edidima ma ebi etsuuhi na owula ankima: «We Muana Ndziami.» Zezi obie na bo ma oka pi. Obila bo adziabi ndi nde Krisi.

Zezi atooso mbari e Ndziami ntsa andzo ma avuonoho

⁴² Eto na entsiere, Zezi otsuuhi ntsa onguundu ma odze ntsa kayi. Baari aya ma saha nde, bo ayi mpili e nde. Bo akanihi nde ma oduma nde oma dze.

⁴³ Nde na bo ndi: «Ove me se yeni na otooso Ntsia e Mve Onkani o Ndziami, ntsa enguundu ekima. Kia obila o Ndziami atumi me o yula ntsie.»

⁴⁴ Ŋa nde atoosihi mbari dzia ntsa andzo ma avuonoho a Zide.