Mbari e Like 24 - Obamba Kiwoyeti (mdt) NT Portions

Enyusihi e Zezi

¹ Tsuhu e ntsomi ntsa etsuhu ntsaami e dzandza nkara entsiere, akaasi ayeni antsuo. Bo abiri maari bla eyombo e bo ma ayeesi.

² Bo amoni ndi kele ledibihi onyua a muuma, ami buuna o paani.

³ Bo anyuniŋi ŋa bo aka basaha obiimi o Zezi a Nkumu ni.

⁴ Bo aki i yaa dzaa oduha ni. Abalaha vuele ayi na e bo ama laasa amfa ma kieme.

⁵ Akaasi amoni vuoho, apiisi miisi o ntsie. Abalaha ba na bo ndi: «Be lesaha mvuuru ali muo o mpanihi akui ma oma?

⁶ Nde kuuni onyaŋa, nde oma nyusiha. Leyibaha maami a nde aduhi be o ntini e nde aki okini o Ngalili.

⁷ Nde aduhi ndi: “Ove ampi Muana mvuuru o dziala ma anga ambiini akomi nde ma lembandzi, ŋa tsuhu otari nde onyusihi ntsa leku.”»

⁸ Ŋa akaasi ayibihi mbari e Zezi.

⁹ Bo atsiehi antsuo ayeni na aduha na antuma akuumi na omo bla aluoni maamo aso.

¹⁰ Eki na Mariya a Madala, na Dzaane bla Mariya a nguhu a Zaake. Ŋa eki na akaasi akimama ayeni na aduha maami maa na antuma.

¹¹ Ŋa antuma atsimihi ndi bo ma aduha maami ma otsa. Bo se aka yalaha maami a bo ma aduhi ni.

¹² Ŋa Piere otemihi oyeni antsuo o ntsiini. Nde okemiha bu, omoni amfa atu ma aki ma ama poroho obiimi. Emana nde ovurihi ndzo ntsa lekimi mo maami ma ayiri.

Aluoni vuele o ndzila Emayise

¹³ Ŋa o tsuhu dzi dzia, aluoni vuele o ntsa bo, ayeni na mpuhu ma tsuoloho ma Emayise. Osa atari muele a dzue ma oto Zerizaleme.

¹⁴ Bo aki ma awobo o mpanihi e bo o maami ma ayiri aso.

¹⁵ Ntini e bo ma wobihi o mpanihi e bo, Zezi nde anku otsiini, oya alaana bla bo.

¹⁶ Bo ma mono nde, okoroho bo i yiimba nde ni.

¹⁷ Zezi opisi bo ndi: «Be oma ledziehe na owobo?» O ŋa bo asuri, bo aya ma mono obi.

¹⁸ Omo o mpanihi e bo a vuele, a nkuumi Klopase okaali nde ndi: «Ali i yaa maami ma ayiri o Zerizaleme ma etsuhu bi ni, mini we otu?»

¹⁹ Nde opisi bo ndi: «Mo ama?» Bo akaali nde ndi: «Maami ma ayiri o Zezi a Nazarete! Nde aki owobi a mbari e Ndziami onini. Mbari e nde eki na mpari. Nde osi maami a luari, o miisi a Ndziami bla a baari aso.

²⁰ Ankumu ma asi ma avuoŋi a saabe bla ankumu maamo, ama mpa nde ndi abuma nde, emana ama komo nde ma lembandzi.

²¹ Bisi leki na tari mbri nde avusaha Isayele. Ŋa lobi tsuhu otari e maami maa ma asi yira.

²² Bisi lema kima, akaasi ake a bla bisi ama dze antsuo nkara entsiere.

²³ Ŋa bo aka mono obiimi o nde ni. Bo ayi na avuriha, aduhi ndi bo ami mono abaandzi. Abaandzi ami duha na bo ndi nde oli muo.

²⁴ Abuha a bla bisi ake se ama dze antsuo. Bo amoni maami ma osuumbu akaasi ma aduhi bo. Ŋa bo aka mono nde ni.»

²⁵ Ŋa Zezi na bo ndi: «Be baari leli oyalihi kaali. Be ma oyalaha maami ma awobi a mbari e Ndziami ma duhi ntsa etima e be ŋa onono!

²⁶ Eki mbaa ove Krisi osi amono ambaba, omana nde onyunihi ntsa lekuma le nde?»

²⁷ Ŋa Zezi obaani oduha bo maami ma wobihi o nde ntsa Esaangumu e Ndziami eso. Ma obaana ma esaangumu e Moyize, tii ngo esaangumu ma awobi a mbari e Ndziami eso.

²⁸ Ŋa bo atsiina tuha na mpuhu e bo ma yenihi, Zezi osi mva alabaha na bo.

²⁹ Ŋa bo akanihi nde ndi: «Ka bla bisi, tsuhu eya ekolo, lempiibi leya le eya.» O ŋa nde onyunihi ntsa ndzo, na aka bla bo.

³⁰ Nde okuma tanda bla bo, nde oyahi lempeembe. Ovuoni, nde otsebi ompi bo lo.

³¹ O ŋa bo miisi anahi, bo ayiimbi nde. Emana nde onyuoŋi o miisi a bo.

³² Bo aya ma wobo o mpaniŋi e bo vuele ndi: «Saawe leka mono mbaa ntsa etima e saawe o biri e nde awobihi na saawe o ndzila, na o nde awobihi saawe o mbari e Ndziami eli ntsa Esaangumu ni?»

³³ Bo asarihi asisari, avurihi Zerizaleme. Bo amoni antuma a kuumi na omo ama kusaha abuha bla abuha akema.

³⁴ Bo aduhi ndi: «Dzaa dzaa Nkumu ama nyusiha! Nde ama laha nyuru na Simon!»

³⁵ Ŋa bo aduhi maami a bo ma moni o ndzila. Na osuumbu a bo ma yiimbi Zezi, o ntini e nde atsebi lempeembe.

Zezi alaha nyuru na aluoni a nde

³⁶ Bo aki akini ma wobo vua Zezi nde anku owasihi o mpanihi e bo, na bo ndi: «Oduusu oka bla be!»

³⁷ Bo amoni onguo bla vuoho yo mini, bo aki ndi odidima obi.

³⁸ Ŋa Zezi na bo ndi: «Be lemono onguo ma oma? Ŋa ekemi ntsa etima e be buni?

³⁹ Lekeese dziala e me bla nyiili. Be lemono mbri me! Letiila me be lemono. Odidima akabi kali, eyesi kali. Okoroho be lemono mbri me na dzo.»

⁴⁰ Nde oduha vua, nde olahi bo dziala bla nyiili e nde.

⁴¹ Bo aki akini ntsa osuere na lekimi. Bo akini oyalaha ni. Ŋa nde opisi bo ndi: «Be kuuni na kiila ma odza?»

⁴² Bo ampi nde otini o ntsu ma ama kaanga.

⁴³ Nde oyahi tso, odzi o miisi a bo.

⁴⁴ Emana nde na bo ndi: «Lemono maami a me ewobihi ntini eme eki ekini bla be. Maami ma ama teende o me ntsa angri a Moyize, na Awobi a mbari e Ndziami bla a Soome, ove amoni mo.»

⁴⁵ Emana nde onaani oyeri o bo ma oyuha maami ma ama teende ntsa Esaangumu e Ndziami.

⁴⁶ Ŋa nde na bo ndi: «Ama teende ndi, Krisi ove omoni ambaba, omana o tsuhu otari nde onyusihi ntsa akui.

⁴⁷ Ma adze otooso mbari o nkuumi e nde, ma esi eso. Baari akaala eku, nde oboloho ambiini a bo, ma obaana o Zerizaleme.

⁴⁸ Be baari le siisa enyua o maami maa aso.

⁴⁹ Ŋa me etuma be ndahi e Taara a me alehi be. Be lesa aka ntsa onguundu, tii ngo e mpari e yulu ewuha be.»

Zezi adze yulu

⁵⁰ Emana nde obiri bo mpili e Betani. Nde osaari dziala na yulu ma ompa bo andosoho.

⁵¹ Ntini e nde ampihi bo andosoho, nde otsiehi bla bo, oyeni yulu.

⁵² Bo amana okumuha ma ovuono o miisi a nde, bo avurihi na Zerizaleme bla osuere enini.

⁵³ Ŋa bo akiihi antini aso ntsa Ndzo e Ndziami ma osiha aluumu a Ndziami.