Mbari e Like 23 - Obamba Kiwoyeti (mdt) NT Portions

Zezi o mua Pilaate

¹ Baari aso asarihi, ayeni na Zezi mua Pilaate.

² O ŋa bo aya ma banaha nde ndi: «Bisi lemi mono mvuuru yu, nde ataasa baari a bisi, nde aliha baari owura lepo le Sezaare. Nde anku aduha ndi nde Krisi, nde se nkani.»

³ Pilaate olehi nde oduhu ndi: «We nkani Azife?» Zezi okaali nde ndi: «We anku aduha.»

⁴ Pilaate oduhi na ankumu ma asi ma avuoŋi bla lemvuuru ndi: «Me i mono obila ma buma mvuuru yu o tso ni.»

⁵ Ŋa bo aselihi odzisiha ndi: «Nde atsiese baari mo mbari e nde ayisiha, nde oma baana o Ngalili, omi yira o Zide eso, omana omi to tii ngo kuuni.»

Zezi o mua Erode

⁶ Ntini e Pilaate ayuhi vua nde opisi ndi: «Balaha dzi osi Ngalili?»

⁷ Nde oyaa ndi Zezi awihi na onguundu Erode akihi nkumu, nde ovuuri Zezi mpili Erode, obila nde se akihi o Zerizaleme ma etsuhu bia.

⁸ Erode omoni ove bo mini ntini e nde amoni Zezi. Obila nde aki oma yuha ma wobo o nde. Erode se aki na ndzala omono Zezi osa omaa o miisi a nde.

⁹ Nde olehi nde eduhu ekuna kuna, ŋa Zezi aka kaala dza se lemo ni.

¹⁰ Ankumu ma asi ma avuoŋi, bla ayisihi ma angri selehe obanaha Zezi.

¹¹ Erode bla aworo a nde, ma sebe nde, bo ayahi nde o mvuuru otsa. Bo alaasi nde mfa e mvunu emana bo avuuri nde mpili e Pilaate.

¹² Erode bla Pilaate aki abuha ma ombangu na kala, ŋa o tsuhu dzia bo akirihi andihi.

Opami a Zezi bla leku

¹³ Pilaate okusihi ankumu ma asi ma avuoŋi bla ankani na baari.

¹⁴ Nde na bo ndi: «Be lema aya na me mvuuru yu mbri nde atosoho baari, ŋa me emi lehe nde oduhu o mua be, ŋa me eka mono dza e mbi e be lebanaha nde o yo ni.

¹⁵ Erode se aka mono dza e mbi ni, kia obila o nde atumi nde mpili e bisi. Balaha dzi eka asa dza e mbi eli ove abumi nde o yo ni.

¹⁶ Me etuma abeere nde ekatsi, omana me nyasaha nde.»

¹⁷ Atsinda a Paake aso, eki ove Pilaate otusihi mvuuru omo ma ongenehe.

¹⁸ Bo aso awuli ankima ndi: «Buma balaha dzi! Nyila bisi Barabase!»

¹⁹ Barabase aki alehi ongeneŋe, nde atsiesihi baari ntsa onguundu, nde se abumi mvuuru.

²⁰ Pilaate aki na ndzala onyasaha Zezi, ŋa nde ovurihi oyahi mbari.

²¹ Ŋa bo awuli ankima ndi: «Komo nde ma lembandzi! Komo nde ma lembandzi!»

²² Mo dzue le otari Pilaate oyahi mbari ndi: «Nde dza e mbi ama sa ma? Me eka mono dza ma buma nde o yo ni. Ŋa me etuma abeere nde ekatsi omana me nyasaha nde.»

²³ Ŋa bo aselihi odzisiha na ankima a nkala ndi: «Komo nde ma lembandzi!» Ŋa ankima a bo avili.

²⁴ O ŋa Pilaate oyalihi ndi bo asa ma osuumbu a bo ma dia.

²⁵ Nde onyasihi balaha e bo ma pisihi, eki ma ongeneŋe. Obila nde atsiesihi baari na nde se abumi mvuuru. Nde ompi bo Zezi mo bu ndi, bo asa nde ma osuumbu a bo ma dia.

Leku le Zezi o yula lembandzi

²⁶ Ntini e bo ma birihi nde, bo akuari balaha mo ewa na anguunu, nkuumi e nde Simon osi Sirene. Aworo akuari nde, ma obira lembandzi ngula Zezi.

²⁷ Lemvuuru le kuna leki leluono nde, eki se na akaasi, ma lila. Ma amono obi obila o nde.

²⁸ Ŋa Zezi okalihi mpili e bo na bo ndi: «Akaasi a Zerizaleme, leka liliha o me ni! Lelila o be anku na mo baana a be!

²⁹ Obila, antini ma aya, ma dze oduha ndi: “Osuere oka na akaasi ma onguma bla akaasi ma akini okula ni, na ma kini ompa baana abiele ni!”

³⁰ O ŋa baari ma adze oduha na ekuri ndi: “Leva o yula bisi!” Na ŋa enguma ndi: “Ledzisiha bisi!”

³¹ Obila yuhu ma asa bu ma oti obisi, ŋa ma adze osa buni ma oti ama kaa?»

³² Ayi na abalaha akimavuele ma abi se, ma obuma bo bla Zezi.

³³ Bo ato obiri ma tsuoloho o «Kraane», aworo akomi Zezi o kuri bla abalaha vuele ma abi, yu o kuoho olumi, yu mo kuoho omboho.

³⁴ Ŋa Zezi oduhi ndi: «E Taara boloho bo obila bo i yaa maami a bo ma siaha ni.» Aworo akabihi amfa a nde o mpanihi e bo. Bo aya ma taama ma osuolo mo.

³⁵ Baari aki ŋa ma okeese. Ankumu ma Azife aki ma sebe nde ndi: «Nde oma vusaha baari akema, ŋa nde se ovusaha nyuru e nde anku, yuhu nde Krisi a Ndziami ama suolo!»

³⁶ Aworo se asebihi nde, ma tsiina mpili e nde, na lempa le nde mali a ŋayi.

³⁷ Ma duha ndi: «Yuhu we nkani Azife vusuha nyuru e we, we anku!»

³⁸ Ŋa leyulu le otsui a nde aki ama teende ndi: «Yu nkani Azife.»

³⁹ Balaha mo o ntsa embeŋe e dziele ma komi bla Zezi, aki aduha na nde ndi: «We ka Krisi ni? Vusaha nyuru e we we anku, we se ovusaha bisi!»

⁴⁰ Ŋa buha omo obie na nde ndi: «We vuoho o Ndziami kali, ni we ma aliisa bla nde ŋa se osuumbu omo?

⁴¹ Mo saawe yemiŋi, saawe lemono ampasi, obila saawe maami abi. Ŋa nde aka sa dza e mbi ni.»

⁴² Emana nde oluusi ndi: «Zezi yibaha me o ntini e we adze oya ma oka nkani.»

⁴³ Zezi okaali na nde ndi: «Me eduha we sisiele, lobi we aka bla me o biri e mve.»

Leku le Zezi

⁴⁴ Tari leki leya o mua ndzanga, mui odimi, lempiibi leyi ma osi oso, atari ayiri.

⁴⁵ Mui odima, mfa eki ntsa ndzo e Ndziami ebaahi o mua kari.

⁴⁶ Zezi owuli nkima enini oduhi ndi: «E Taara me evuura odidima o me ntsa dziala e we.» Nde omana owobo vua, nde okui.

⁴⁷ Nkumu aworo ma ekuumi kuumi ama osi o Rome, omoni maami ma yirihi, okuusi lekuma le Ndziami oya aduha ndi: «Dzaa dzaa balaha dzi eki opeende!»

⁴⁸ Lemvuuru leso leki leyi, ma omono maami aluari maa, lemoni mo. O ŋa bo avirihi na okuruha endundu ma obi o bo ma amoni.

⁴⁹ Andihi a Zezi aso bla akaasi ma baani oluono nde, nkara Ngalili, ma keese osuumbu e maami ma ayirihi.

Alehi Zezi o muuma

⁵⁰ Eki na balaha mo ma tsuolihi o Zuzefe nde aki ntsa ankani ma Azife. Balaha dzia ekihi tele nde se aki balaha e mve.

⁵¹ Nde aka yalaha opami bla maami a bo ma asihi ni. Nde aki osi Arimate onguundu Azife. Nde aki adila Onkani o Ndziami.

⁵² Nde oyeni mpili e Pilaate ma opisa obiimi o Zezi.

⁵³ Emana nde otsiesi obiimi o yula lembandzi, okuri ntsa mfa e mvunu. Otsuusi ntsa muuma ma tsimi o ntsa akele, muuma dzua aki akini odziiha mvuuru okima ni.

⁵⁴ Eki eya tuha na tsuhu ma awuumaha. Tsuhu dzia eki eya etsiina.

⁵⁵ Akaasi ma awi bla Zezi nkara Ngalili aluoni Zuzefe, bo akeesi ntsa muuma, na osuumbu ma tsuusi obiimi o nde.

⁵⁶ Emana bo ayeni andzo, bo ayeesi maari bla eyombo ma obiimi. Bo anyiimi tsuhu ma awuumaha mva ma ama teende ntsa angri.