Mbari e Like 22 - Obamba Kiwoyeti (mdt) NT Portions

Ankumu ma akura tsuumu oma Zezi

¹ Tsinda e Paake eki eya etsiina.

² Ankumu ma asi ma avuoŋi bla ayisihi ma angri, asahi osuumbu ma obuma Zezi, ŋa bo aki na vuoho o baari.

Zida atosoho Zezi

³ Ŋa Dzabri onyunihi o Zida ma atsuoloho mo Sikaryote, nde aki ntuma omo, ntsa antuma a kuumi na vuele.

⁴ Ŋa Zida oyeni na ayeese bla ankumu ma asi ma avuoŋi, na ankumu ma akielehe ndzo e Ndziami, osuumbu a nde atosoho Zezi.

⁵ Bo amoni ove bo mini, bo alehi nde ndahi ndi bo ma mpa nde adoro.

⁶ Nde oyalihi, emana nde osahi osuumbu ma otosoho Zezi ma adzisihi. Lemvuuru i yaa ni.

Zezi adza Paake bla aluoni a nde

⁷ Tsuhu e tsinda e mpeembe eli leviire kali eto, aya ma buma baana ma endoombo o Paake.

⁸ Zezi otumi Piere bla Zan ndi: «Ledziehe na alaama saabe biila e Paake.»

⁹ Bo apisi nde ndi: «We asaha mbri bisi lelaama dzo kuni?»

¹⁰ Nde okaali na bo ndi: «Ntini e be lenyuniha ntsa onguundu, be levunuha na balaha mo, ama bira mbasa andza o yula otsui. Be leluoni nde tii ngo ntsa ndzo e nde anyuniŋa o yo.

¹¹ Be leduhi na onga ndzo mbri: “Nkumu apisa we ndi biri e nde adza biila e Paake bla aluoni a nde eli kuni?”

¹² Nde adze olaha be otini o ndzo o yulu ama yeese. Dzia biri e be ledze olaama.»

¹³ Bo ayeni, amoni maami ma osuumbu a Zezi aduhi bo. Bo alaami biila e Paake.

Biila e Nkumu

¹⁴ Ntini odza eto Zezi okumi o tanda bla antuma a nde.

¹⁵ Nde na bo ndi: «Me edii kuna odza biila e Paake bla be, omana me ema mono ambaba!

¹⁶ Obila me eduha be, me eka adze oma dza yo bla be ni, tii ngo e Ndziami ayeese Paake ntsa Onkani o Nde.»

¹⁷ Nde oyahi kobo e mali, ompi Ndziami leve, emana nde ndi: «Leyaha be lekaba o mpanihi e be.

¹⁸ Ŋa me eduha be, ma obaana o tsuhu e lobi me eka ma nyua mali ba ni tii ngo Onkani o Ndziami ma oya.»

¹⁹ Emana nde oyahi lempeembe, omana ompa Ndziami leve, nde otsebi lo, ompi bo ndi: «Ji nyuru e me ma ama mpa o be. Lesa vua ma oyibiha me.»

²⁰ Bo amana odza, nde se oyahi kobo e mali, na bo ndi: «Kobo e mali dzi ondihi ma onyarihi, oma tohi le me, ledze okele obila o be.

²¹ Ŋa lemono, mvuuru adze otosoho me oli bla me o tanda ŋa!

²² Ŋa Muana mvuuru adze okua ma osuumbu a Ndziami ayeesi. Ŋa ndoho eka na mvuuru atosoho nde!»

²³ O ŋa aluoni aya ma pisa o mpanihi e bo ndi: «Mvuuru abuuna osa dzaa mva dzia na?»

Aveli okiimi o mpanihi aluoni na?

²⁴ Aluoni aya ma wobo o mpanihi e bo. Bo ma pisa abuha ndi: «Mvuuru aveli abuha okiimi o mpanihi e saabe ŋa na?»

²⁵ Zezi okaali na bo ndi: «Ankani ma esi, na onkumu o yula baari. Bo ndzala ndi atsuoloho bo o “baari ma siaha leve”.

²⁶ Ŋa be lekaa siaha mva bo ni. Mvuuru avili okiimi o mpanihi e be, ove nde oki mva muana onkere. Mvuuru ali nkumu, ove nde oki mva odzandzi.

²⁷ Mo be avili okiimi na? Mvuuru ali o tanda si mvuuru alehe biila o tanda? Mbaa mvuuru ali o tanda? Ŋa me eli o mpanihi e be mva mvuuru aleehe biila mo tanda!

²⁸ Be leki bla me ma antini a me ma ampasi.

²⁹ Ŋa ma osuumbu a Taara a me ama mpa me Onkani, me se empa be Onkani vua.

³⁰ Be ledze odza, be lenyua o tanda ntsa Onkani o me. Be ledze oka ma antsi o yula ambara, ma opama ankaka a kuumi na vuele a Isayele.»

Zezi awobo mo Piere adze obisa nde

³¹ Nkumu ndi: «E Simon, Simon! Sa ayiba: Sata asaha be, ma osuesehe be aso, mva ma nyengese mburu.

³² Ŋa me ema vuono o we obu mbri we i ma yele oyalihi ni. Ŋa ntini e we aya na vuruha, we ompi baana ma anguhu a we mpari.»

³³ Piere na nde ndi: «E Nkumu, me ebuuna odze ongeneŋe bla we, me se ebuuna okua bla we.»

³⁴ Zezi okaali na nde ndi: «E Piere me eduha we, lobi ntsusu a ntsomi a ka sa kuoho ni, we akemehe me ekru etari.»

Adoro bla mpie na baha ampele muele

³⁵ Emana Zezi na bo ndi: «Ntini e me etumi be adoro kali, mpie kali na akoroho kali, be leki leyeli kiila?» Bo akaali ndi: «Kali.»

³⁶ O ŋa nde na bo ndi: «Ŋa ma obaana o tsuhu e lobi, mvuuru ali na adoro oyahi, ali na mpie se oyahi. Mvuuru ali baha ampele muele kali, otehi mfa e nde anku ma osuuma baha ampele muele.

³⁷ Obila me eduha be, ama teende o me ntsa Osaangumu ndi: “Ama tala nde ntsa embeŋe.” Ma oma, maami ma ama teende o me, aya oto.»

³⁸ Bo na nde ndi: «Nkumu mono abaha ampele muele.» Nde okaali na bo ndi: «Abaha muele ma ampele muele, ami to.»

Zezi avuono ma okuri eti ma Eliive

³⁹ Zezi otsuuhi ma otiiri a nde, oyeni okuri eti ma Eliive ŋa aluoni a nde se aluoni nde.

⁴⁰ Ntini e nde ato obiri dzia, nde na bo ndi: «Levuono obu mbri be i ma va o ntsa etsinihi ma ebi ni.»

⁴¹ Emana nde olabihi na bo ntseeri, owuri avuo oya avuono ndi:

⁴² «E Taara yuhu we adia, we osa mbri kobo e mpasi dzi elabaha na me, ŋa ka ma edziiŋi e me ni, ma edziiŋi e we.»

⁴³ O ŋa obaandzi a Ndziami owi yulu, oyi na ampa nde mpari.

⁴⁴ Zezi omoni onguo, oyiha avuono na mpari eso, ndzanihi e nde eyiha etsolo o ntsie mva ataŋi a tohi.

⁴⁵ Nde omana ovuono, otemihi, oyi na vuruha mpili aluoni, omoni bo ali antolo. Ama kolo ma obi o bo ma amonihi.

⁴⁶ Nde na bo ndi: «Be letsa antolo bu ma oma? Letemehe be levuono, be i ma va ntsa etsimihi ma ebi ni.»

Ma akuara Zezi

⁴⁷ Zezi aki okini awobo, lemvuuru lewasihi. Ntuma a nde omo ntsa antuma a kuumi na vuele ma tsuolihi o Zida, aki levusu le bo. Nde otsiini tuha na Zezi ma ompa nde amfemfe.

⁴⁸ Ŋa Zezi na nde ndi: «Zida we atosoho Muana mvuuru ŋa ma amfemfe?»

⁴⁹ Baari ma kihi bla Zezi amono vua, bo na nde ndi: «E Nkumu, bisi lebeere bo ma ampele ma abaha a bisi?»

⁵⁰ Ŋa omo o mpanihi e bo, obeeri odzandzi osi avuoŋi onini, emana otsebi nde tsui le kuoho olumi.

⁵¹ Ŋa Zezi ndi: «Lenyila vua!» Nde otiili tsui le balaha dzia, osalihi nde.

⁵² Emana Zezi oduhi na ankumu ma asi ma avuoŋi bla ankumu ma akielehe ndzo e Ndziami, na akuuru ma ayi na kuara nde ndi: «Be leyaha me mva ombeŋe, eli be lema aya bla abaha na ankumuha?

⁵³ Me eki bla be etsuhu eso o ntsa ndzo e Ndziami, be leka saha okuara me ni. Ŋa dzi eya ntini e be bla mpari lempiibi.»

Piere atuna Zezi

⁵⁴ Ŋa bo akuari Zezi, ayeni ŋa nde ntsa ndzo osi avuoŋi onini. Piere aki aluono nde o lala.

⁵⁵ O mua lebuhu, aki ama vua mbaa, baari ali ma antsi ama dzenehe yo. Piere oya o ntsi bla bo.

⁵⁶ Odzandzi omo okaasi omoni Piere o ntsi tuha ŋa mbaa, okeesi nde yemiŋi ndi: «Balaha dzi se eki bla Zezi!»

⁵⁷ Ŋa Piere otuni, na nde ndi: «Kali me i yaa nde ni.»

⁵⁸ Antini ayira, mvuuru okima omoni nde, oduhi ndi: «We se a bla bo!» Piere okaali na balaha dzia ndi: «Kali, me ka a bla bo ni.»

⁵⁹ Tari mo eyira, okima ovurihi odzisihi ndi: «Sisiele yu se aki bla nde, obila nde se osi Ngalili.»

⁶⁰ Ŋa Piere okaali ndi: «Me i yaa a we ŋa saha oduha ni.» O ŋiŋa nde aki okini awobo, ntsusu okuohi.

⁶¹ Nkumu okalihi, okeesi Piere, o ŋa Piere oyibihi mbari e Nkumu aduhi na nde ndi: «Ntsusu antsomi aka sa kuoho ni, we atuna me amihi atari.»

⁶² Piere otsuuhi, oyiha alila kuna.

Lebeere na letuha le Zezi

⁶³ Abalaha ma kielihi Zezi aki ma lelehe nde, bo se ma beere nde.

⁶⁴ Bo adibihi nde olia ma amfa, emana aya ma pisa nde ndi: «Owobi a mbari e Ndziami, Mvuuru abeeri we na? Ma yiimba!»

⁶⁵ Ŋa bo aselihi otuha nde.

Zezi o mua ankani ma anini

⁶⁶ Tsuhu etsa, akuuru ma okuha bla asi ma avuoŋi ma anini, na ayisihi ma angri, akusihi abuha. Bo ayeni na Zezi mpili ankani ma anini, ma opama nde.

⁶⁷ Bo apisi nde ndi: «Yuhu we Krisi duha bisi.» Nde okaali bo ndi: «Me oduha be, be lekaa yalaha me ni.

⁶⁸ Ŋa me se olehe be oduhi, be leka kaala me ni.

⁶⁹ Ŋa ma obaana o tsuhu e lobi, Muana mvuuru aka o ntsi mo kuoho olumi o Ndziami a mpari.»

⁷⁰ Bo aso apisi nde ndi: «We ŋa ndzaa Muana Ndziami?» Nde okaali bo ndi: «Be anku leduha mbri me Muana a Ndziami.»

⁷¹ O ŋa bo aduhi ndi: «Bisi kaama mo mvuuru asiisa enyua kali! Bisi anku lemi yuha mbari e ma onyua a nde!»